TZOTIꞌ KꞌUL YET KOLBꞌANILE TZꞌIBꞌNHEBꞌILKANO YU YAꞌ SAN JUAN
Istzotiꞌ Komam Dios, haꞌ ton Komam Jesucristo yuteko isbꞌa anmahil
1
Yet yalanhtokanoj,
yet maxhto hunu tzet watxꞌinaxa,
ayxatikꞌa Komam Tzotiꞌ isbꞌi.a
Haꞌ Komam Tzotiꞌ tuꞌ huneꞌnhe ye yebꞌ Komam Dios,
kaw Diospaxo yehi.
2 Yet kaw yichebꞌanil ayxatikꞌa Komam tuꞌ yebꞌ Komam Dios.
La Palabra (Juan 1.1-18)
3 Yu Komam Tzotiꞌ tuꞌ,
yuxin iswatxꞌe Komam Dios Mame sunil tzettaj ay yul sat yibꞌanhqꞌinal tiꞌ yebꞌ satkanh.
Machi hunu tzet ye tuꞌ watxꞌinaj ta mach yuho Komam Tzotiꞌ.
4 Yinh Komam Tzotiꞌ tuꞌ,
chipitzkꞌati qꞌinale,
haꞌ ton xin chiꞌaqꞌni issajilqꞌinal tet yanma anma.
5 Huneꞌ issajilqꞌinal tiꞌ chimujli xol qꞌejholo.
Haꞌ qꞌejholo tuꞌ xin,
mach chiqꞌoji isbꞌutnitanhoj.
6 Ay xin huneꞌ yaꞌ chejbꞌilti yu Komam Dios,
Juan isbꞌi.
7 Hulikꞌo yaꞌ tzotelo yinh huneꞌ issajilqꞌinal tuꞌ yunhe yanayto sunil anma huneꞌ issajilqꞌinal yul yanma.
8 Haꞌ yaꞌ Juan tuꞌ xin,
maxhtaj yaꞌ huneꞌ issajilqꞌinal tuꞌ,
kaw tonhe hul yaꞌ tzotelo yinh issajilqꞌinal.
9 Wal Komam yinh kaw yeli issajilqꞌinal tuꞌ,
hulikꞌo yul sat yibꞌanhqꞌinal tiꞌ yu yaqꞌni issajilqꞌinal yul yanma sunil anma.
10 Waxanhka iswatxꞌe Komam Dios sunil yul sat yibꞌanhqꞌinal tiꞌ yu Komam Tzotiꞌ tuꞌ,
yajaꞌ yet yulikꞌoj maxhtikꞌa ohtanhelax Komam yu anma.
11 Hulikꞌo Komam yul iskonhobꞌ,
yaj machi ischah anma Komam.
12 Yaj wal sunil mak chahni Komam,
yanayto yul yanma yinh tzet chala,
haꞌ ton hunteqꞌan tuꞌ yaqꞌ Komam yip yokkano yuninalo Komam Dios.
13 Yet chꞌok yuninalo Komam Dios,
mach lahano hakaꞌ chu ispitzkꞌa yuninal anma yul sat yibꞌanhqꞌinal tiꞌ,
yebꞌ mach hakaꞌo chal iskꞌul naj winaj,
to hakaꞌ chiꞌel yinh iskꞌul Komam Dios,
hak tuꞌ chu yok anma yuninalo Komam.
14 Komam Tzotiꞌ tuꞌ,
yako isbꞌa anmahil.
Hulikꞌo koxol isyeni isyelal jet,
yebꞌpaxo iskꞌulal iskꞌul Komam Dios.
Jilnipaxo isqꞌaqꞌal yip Komam ischah tet Ismam,
yuto hanhkꞌanhe hunpilan Iskꞌahol Komam Dios tuꞌ.
15 Hakpax tuꞌ yaꞌ Juan yal yaꞌ yinh Komam tuꞌ yinh kaw ip hakaꞌ tiꞌ:
«Haꞌ ton huneꞌ yaꞌ tiꞌ walan teyet ta tzujan yul wintajan yebꞌ ta kaw ekꞌbꞌal yelapno ye insatajan,
yuto ayxatikꞌa yaꞌ yet yalanhto maxhto chinpitzkꞌahan,»
xhi yaꞌ Juan tuꞌ.
16 Haꞌ Komam chiwaltiꞌan,
kaw kosunil chikochah iskꞌulal iskꞌul,
yaj xin mach hunelnheho chikochah,
chilannhetikꞌa kochahni.
17 Yul isqꞌabꞌ yaꞌ Moisés yaqꞌ Komam Dios huneꞌ chejbꞌanile kaw how,
yaqꞌni yaꞌ jet,
haxa Komam Jesucristo xin,
hul aqꞌno sunil iskꞌulal iskꞌul yebꞌ xin isyelal Komam Dios jet.
18 Kaw maxhto hunu mak xaꞌilni yinh Komam Dios,
hach kachannhe hunpilan Iskꞌahol Komam Dios,
haꞌ ton Komam Jesucristo aynhetikꞌa iskꞌatanh,
haꞌ Komam hul yeno jet tzet ye Komam Dios.
Yaꞌ Juan anikanh haꞌ iswiꞌ anma chiꞌaqꞌni johtanhelo Komam Jesús
19 Yet hunel xin ebꞌnaj yahawil konhobꞌ Israel ay bꞌey Jerusalén,
ischejto ebꞌnaj hunteqꞌan ebꞌnaj sacerdote yebꞌ hunteqꞌan ebꞌnaj levita isqꞌambꞌeno tet yaꞌ Juan hakaꞌ tiꞌ:
—¿Mak hach anmahil?
xhi ebꞌnaj.
Juan el Bautista identifica al Mesías (Juan 1.19-34)
20 Yalnilo yaꞌ yinh kaw isyelal tet ebꞌnaj,
matzet yebꞌakano yaꞌ,
yalni yaꞌ hakaꞌ tiꞌ:
—Maxhtaj hinan chiwijan Cristohal,
xhi yaꞌ.
21 Isqꞌambꞌenpaxo ebꞌnaj hunelxa:
—¿Mak hach anmahilach,
chal tuꞌ?
¿Tom hach tiꞌ Elías?
xhi ebꞌnaj.
—Machoj,
maxhtaj hinan,
xhi yaꞌ.
—¿Mato hach tiꞌ ischejabꞌ Komam Dios echmabꞌil yul juhanh?
xhi ebꞌnaj tet yaꞌ.
—Machoj,
xhipaxo yaꞌ.
22 Isqꞌambꞌenpaxo ebꞌnaj hunelxa:
—¿Mak anmahil hach chal tuꞌ?
Halilo jetanh yunhe jinitojanh ispaj istzotiꞌ ebꞌnaj chejnheonhtijanh.
¿Tzet kaw chawute hawalni jetanh tawinh?
xhi ebꞌnaj.
23 Istaqꞌwi yaꞌ Juan tuꞌ xin,
yalni yaꞌ:
—Hanintiꞌan yal yaꞌ Isaías,
huneꞌ ischejabꞌ Komam Dios yet payat,
yet istzꞌibꞌnhenkano yaꞌ:
Ay huneꞌ mak chiꞌawi bꞌey txꞌotxꞌ desierto,
chalni:
“Hakaꞌ chu istoholbꞌanhelax hunu bꞌeh yet chul naj jahaw,
hak tuꞌ chu hewatxꞌeniko heyanma,
yuto chihul Komam Dios Jahawil,”b
xhikano yaꞌ Isaías tuꞌ,
xhi yaꞌ Juan.
24 Ebꞌnaj bꞌey tzotelo tet yaꞌ Juan tuꞌ,
ebꞌnaj fariseo chejnhe ebꞌnaj,
25 isqꞌambꞌepaxo ebꞌnaj tet yaꞌ:
—¿Tzet yinh yuxinto chawakanh haꞌ iswiꞌ anma tiꞌ tato maxhtaj hach tiꞌ Cristo hach?
¿Mach Elíaspaxo hach?
¿Maxhtaj hachpaxo ischejabꞌ Komam Dios echmabꞌil yul juhanh?
xhi ebꞌnaj.
26 Yalni yaꞌ Juan tuꞌ tet ebꞌnaj:
—Wal hanintiꞌan hanhe ha haꞌ chiwaqꞌan yahbꞌalo haꞌ iswiꞌ anma,
yaj koxol tiꞌ ayko huneꞌ yaꞌ kaw maxhto heyohtajoj.
27 Tzujan yul yaꞌ wintajan,
yaj kaw ekꞌbꞌal yelapno yaꞌ insatajan,
yuxin mach chu inpuhnilojan istxꞌanhal isxanhabꞌ yaꞌ chiwabꞌehan,
xhi yaꞌ Juan.
28 Haꞌ bꞌey huneꞌ txꞌotxꞌ chiyij Betania,
isqꞌaxebꞌikꞌto haꞌ niman Jordán,
bꞌay yakanh yaꞌ Juan haꞌ iswiꞌ anma,
haꞌ tuꞌ bꞌeykꞌo ebꞌnaj isqꞌambꞌeꞌ hunteqꞌan tiꞌ tet yaꞌ.
Haꞌ Komam Jesús ok xahanbꞌalil yu Komam Dios
29 Haxa yet hunxa tzꞌayikal xin,
yilnito yaꞌ Juan tato lanhan yapni Komam Jesús iskꞌatanh,
yalni yaꞌ hakaꞌ tiꞌ:
«Ilwekꞌanabꞌi lah,
haꞌ huneꞌ mak lanhan yul tiꞌ,
haꞌ aqꞌbꞌilti jet yu Komam Dios koxahanbꞌaloj,
hakaꞌ chiyu yok noꞌ meꞌ xahanbꞌalil.
Haꞌ yaꞌ chiꞌinilo komul jibꞌanh kosunil hanhonh ayonh yul sat yibꞌanhqꞌinal tiꞌ.
30 Haꞌ ton yinh yaꞌ tiꞌ kintzotelan yet walnihan teyet:
“Ay huneꞌ yaꞌ tzujan yul wintajan,
kaw ekꞌbꞌal yelapno insatajan,
yuto ayxatikꞌa yaꞌ yet maxhto chinpitzkꞌahan yul sat yibꞌanhqꞌinal tiꞌ,”
kinchihan teyet.
31 Yet yalanhtokanoj,
kaw maxhtikꞌa wohtajojan mak Kokolomal,
yaj wakanhan haꞌ iswiꞌ anma yunhe yohtanhelaxilo Komam yu anma Israel tiꞌ,»
xhi yaꞌ Juan tuꞌ.
32 Yalnipaxo yaꞌ Juan:
«Kaw wilan yayilo Komam Espíritu Santo yul satkanh yibꞌanh yaꞌ.
Hakaꞌ chiyu yay lalon hunu noꞌ palamuch,
hak tuꞌ yu yay yibꞌanh.
33 Yet yalanhtokano tuꞌ,
kaw maxhto wohtajojan yaꞌ,
yaj Komam Dios chejnheintijan wanokanhan haꞌ iswiꞌ anma tiꞌ,
haꞌ Komam chalni wetan:
“Haꞌ huneꞌ mak chawil yay Komam Espíritu Santo yibꞌanh,
haꞌ ton huneꞌ tuꞌ chiꞌaqꞌni Komam Espíritu Santo tet anma,”
xhi Komam Dios wetan.
34 Kaw ilbꞌilxa wuhan,
yuxin chiwalikꞌojan tato kaw Iskꞌahol Komam Dios ye yaꞌ tiꞌ,»
xhi yaꞌ Juan.
Ebꞌyaꞌ bꞌabꞌel iskuywom Komam Jesús
35 Yet huneꞌxa tzꞌayikal xin,
aypaxikꞌo yaꞌ Juan bꞌey tuꞌ yebꞌ kawanhxa ebꞌyaꞌ iskuywom iskꞌatanh.
Los seguidores siguen a Jesús (Juan 1.35-51)
36 Hayet yilni yaꞌ Juan yekꞌto Komam Jesús,
yalni yaꞌ tet ebꞌyaꞌ kawanh tuꞌ:
«Ilwekꞌanabꞌi lah,
haꞌ yaꞌ tuꞌ aqꞌbꞌil jet koxahanbꞌalo yu Komam Dios hakaꞌ chiyu yok noꞌ meꞌ xahanbꞌalil ju,»
xhi yaꞌ Juan tuꞌ.
37 Hayet yabꞌen ebꞌyaꞌ kawanh tuꞌ tzet yal yaꞌ Juan,
isto ebꞌyaꞌ yinta Komam Jesús.
38 Istꞌanhxito Komam Jesús yintaj,
yilni Komam tato tzujan ebꞌyaꞌ kawanh tuꞌ.
Isqꞌambꞌen Komam tet ebꞌyaꞌ:
—¿Tzet chesaya?
xhi Komam.
—Rabí,
¿bꞌaytuꞌwal ayach?
xhi ebꞌnaj.
(Huneꞌ tzotiꞌ rabí,
Kuywawom chaliloj.)
39 Istaqꞌwi Komam xin:
—Katawej kat heyilni,
xhi Komam.
Hak tuꞌ yu isto ebꞌyaꞌ yilno bꞌaytuꞌwal ay Komam.
Iskankano ebꞌyaꞌ huneꞌ aqꞌbꞌal tuꞌ yuto qꞌejbꞌixa.
40 Ebꞌyaꞌ kawanh abꞌen tzet yal yaꞌ Juan okkano tzujno yinta Komam.
Huneꞌ yaꞌ Andrés isbꞌi,
yuxhta isbꞌa yaꞌ yebꞌ yaꞌ Simón Pedro.
41 Yet lahwi istzotel yaꞌ Andrés tuꞌ yebꞌ Komam Jesús,
yinh haꞌmataj to yaꞌ saywal yinh yuxhtaj,
yalni yaꞌ tet yaꞌ:
—Kaw machahloyo mak Aqꞌbꞌil ismunil yu Komam Dios juhanh,
xhi yaꞌ.
42 Hak tuꞌ xin yu yijbꞌanto yaꞌ Andrés tuꞌ yaꞌ Simón iskꞌatanh Komam Jesús.
Yok tꞌanhno Komam yinh yaꞌ Simón tuꞌ,
yalni Komam:
—Simón,
iskꞌahol yaꞌ Jonás,
wal tinanh Cefas chiꞌokkano habꞌihoj,
xhi Komam tet yaꞌ.
(Yinh huneꞌ yabꞌxubꞌal ebꞌnaj tuꞌ,
huneꞌ bꞌihe Cefas chal yelapnoj Pedro.)
Yet yawtelax yaꞌ Felipe yebꞌ yaꞌ Natanael yu Komam Jesús
43 Yet huneꞌxa tzꞌayik xin yok yinh isnabꞌal Komam Jesús isto bꞌey yulaj ismajul txꞌotxꞌ Galilea.
Ischahni isbꞌa Komam yebꞌ yaꞌ Felipe,
yalni Komam tet yaꞌ:
—Okanh tzujno wintajan,
xhi Komam.
44 Kaw xin yet konhobꞌ isbꞌa yaꞌ Felipe tuꞌ yebꞌ yaꞌ Andrés yebꞌpaxo yaꞌ Simón Pedro;
ah konhobꞌ Betsaida ebꞌyaꞌ.
45 Lahwi tuꞌ,
isto yaꞌ Felipe saywal yinh yaꞌ Natanael.
Yet ischahlo yaꞌ Natanael tuꞌ yu yaꞌ,
yalni yaꞌ:
—Machahlo Komam tzꞌibꞌnhebꞌilkanayo yul Hum yet ley aqꞌbꞌilkano yu yaꞌ Moisés,
yebꞌ tzꞌibꞌnhebꞌilkano yu hunteqꞌanxa ebꞌyaꞌ ischejabꞌ Komam Dios yet payat;
haꞌ yaꞌ Jesús ah Nazaret,
iskꞌahol yaꞌ José,
xhi yaꞌ.
46 Yalni yaꞌ Natanael tuꞌ:
—¿Tom xin ay hunu mak kꞌul chiꞌelti xol ebꞌnaj ay bꞌey konhobꞌ Nazaret tuꞌ?
xhi yaꞌ.
Istaqꞌwi yaꞌ Felipe xin:
—Tonhkꞌanabꞌ jilaꞌ kat hawilni,
xhi yaꞌ.
47 Yet yilnito Komam Jesús yapni yaꞌ Natanael iskꞌatanh tuꞌ xin,
yalni Komam:
—Haꞌ huneꞌ yaꞌ lanhan yul tiꞌ,
kaw Israel yaꞌ yul sat Komam Dios,
kaw machi nino leqꞌtiꞌal ayko yinh,
xhi Komam.
48 Isqꞌambꞌen yaꞌ Natanael tet Komam:
—¿Tzet xin chu kinhawohtanhenilojan?
xhi yaꞌ.
Yalni Komam:
—Makaxhwilan yet maxhto chaxhyawte yaꞌ Felipe tiꞌ,
yet ayach yich teꞌ higuera,
xhi Komam tet yaꞌ.
49 Istaqꞌwi yaꞌ Natanael tuꞌ:
—Mam kuywawom,
yinh kaw yeli hach tiꞌ Iskꞌahol Komam Dios,
Yahawil konhobꞌ Israel hawehi,
xhikanh yaꞌ tet Komam.
50 Yalnipaxo Komam tet yaꞌ:
—Chawayto yul hawanma winhan yuto mawalan ta makaxhwilan yich teꞌ higuera,
wal xin kaw ekꞌnato kꞌaybꞌalkꞌule chito hawilaꞌ sata tiꞌ,
xhi Komam.
51 Yalnipaxo Komam hakaꞌ tiꞌ:
—Yinh kaw isyelal chiwalan teyet,
cheyilaꞌ ishajni isbꞌa satkanh,
kat heyilni yahtoj yebꞌ yayilo ebꞌnaj yángel Komam Dios wibꞌanhan Hanin Aqꞌbꞌilintijan texol yu Komam Dios,
xhi Komam Jesús.