YINH TZET ISWATXꞌE EBꞌYAꞌ ISCHEJABꞌ KOMAM JESUCRISTO
Yal Komam Jesús tato chati Komam Espíritu Santo
1
Hanin Lucas intiꞌan,
chintzꞌibꞌnhetojan huneꞌ hum tiꞌ tawet mam Teófilo.
Wal xin yul huneꞌxa hum tzꞌibꞌnhebꞌilxato tawet wuhan yet yalanhtokanoj,
waltojan tawet tzettaj ye tuꞌ iswatxꞌe Komam Jesús,
yebꞌ xin yinh sunil kuybꞌanile yaqꞌ Komam iskuyuꞌ anma yichtaxtikꞌa istzabꞌniko Komam iskuywa xol anma,
2 masanta yet yapni istzꞌayikal ispaxkanto Komam yul satkanh.
Yet maxhto chipaxto Komam tuꞌ,
yalnikano ischejbꞌanil ebꞌyaꞌ ischejabꞌ sikꞌbꞌililo yu,
yu yip Komam Espíritu Santo.
3 Hayet lahwi iskam Komam xin,
yitzitzbꞌipaxokanh xol kamom,
kaw txꞌiꞌal el isye isbꞌa Komam tet ebꞌyaꞌ ischejabꞌ.
Yulbꞌal 40 (kawinaj) tzꞌayik isye isbꞌa yunhe istxumnilo ebꞌyaꞌ tato kaw yeli itzitzbꞌikanh Komam.
Istzotel Komam tet ebꞌyaꞌ yinh tzet chu yok anma yul isqꞌabꞌ Komam Dios kat yok Komam Yahawiloj.
4 Yet aytokꞌo Komam xol ebꞌyaꞌ ischejabꞌ tuꞌ,
yalnikano Komam tet ebꞌyaꞌ:
—Kananhwekano yul konhobꞌ Jerusalén tiꞌ,
echmawe yul huneꞌ tzet haltebꞌilkano teyet yu Inmaman hakaꞌ wute walnihan teyet.
Jesús sube al cielo (Hechos 1.4-11)
5 Wal yaꞌ Juan,
kaw yeli hanhe ha haꞌ yaqꞌ yaꞌ yahbꞌalo haꞌ iswiꞌ anma,
wal hex tiꞌ xin,
yulbꞌal hayebꞌxanhechꞌan tzꞌayik kat hechahni Komam Espíritu Santo yul heyanma hakaꞌ yahbꞌalo haꞌ hewiꞌ,
xhikano Komam Jesús tet ebꞌyaꞌ ischejabꞌ tuꞌ.
Yet isto Komam Jesús yul satkanh
6 Yet kutxantoko ebꞌyaꞌ ischejabꞌ Komam Jesús iskꞌatanh,
isqꞌambꞌenilo ebꞌyaꞌ tet Komam hakaꞌ tiꞌ:
—Mamin,
¿ham tinanh chakolkanilti ebꞌnaj jet konhobꞌ Israel tiꞌ yalanh yip bꞌay ayonhiko tiꞌ?
xhi ebꞌyaꞌ.
7 Yalni Komam tet ebꞌyaꞌ:
—Mach heyeto heyohtanhenilo istzꞌayikal yebꞌ xin istiempohal yinh tzet ye tuꞌ hanhkꞌanhe Komam Dios ay yok yinh yalnilo tzet yehi.
8 Yaj xin chiyaqꞌ Komam Dios yip teyet hunun hex yet chul Komam Espíritu Santo yul heyanma.
Chilahwi tuꞌ xin,
kat heyaniko hebꞌa heyalnilo intzotiꞌan yul konhobꞌ Jerusalén tiꞌ,
yebꞌpaxo yul sunil ismajul Judea,
yebꞌ xin yulaj ismajul Samaria yebꞌ tet sunil anma ay yul sat yibꞌanhqꞌinal tiꞌ,
xhi Komam.
9 Yet lahwi yalnikano Komam Jesús hunteqꞌan tuꞌ,
yilaxto Komam yul satkanh.
Kaw xin tꞌanhankanahto ebꞌyaꞌ ischejabꞌ Komam tuꞌ yet iskꞌaykanokanh Komam xol moyan.
10 Yet tꞌanhanahto ebꞌyaꞌ yilni isto Komam satkanh,
isyenikanh isbꞌa kawanh ebꞌnaj ángel kaw sajhoponhe xil isqꞌap,
yok linhno ebꞌnaj iskꞌatanh ebꞌyaꞌ ischejabꞌ Komam.
11 Yalni ebꞌnaj ángel hakaꞌ tiꞌ:
—Hex ah Galilea,
¿tzet yinh xin to tꞌanhan hex ahto satkanh?
Haꞌ Komam Jesús tiꞌ,
maꞌilaxilo texol yu ispaxto Komam satkanh.
Hakaꞌtikꞌa mayu heyilni isto Komam tiꞌ,
hak tuꞌ xin chu yulpaxo Komam,
xhi ebꞌnaj ángel tet ebꞌyaꞌ.
Saylax selel naj Judas
12 Lahwi tuꞌ xin,
ispaxayti ebꞌyaꞌ ischejabꞌ Komam Jesús bꞌey huneꞌ wonhan chiyij Olivo,
ismeltzo ebꞌyaꞌ bꞌey yul konhobꞌ Jerusalén.
Etza yikta legua yelo wonhan tuꞌ yinh konhobꞌ.
13 Lahwi yapni ebꞌyaꞌ yul konhobꞌ,
yahto ebꞌyaꞌ yul huneꞌ cuarto yinh iskabꞌ piso bꞌay ay isposada ebꞌyaꞌ.
Haꞌ ton xin yaꞌ Pedro,
yaꞌ Jacobo,
yaꞌ Juan,
yaꞌ Andrés,
yaꞌ Felipe,
yaꞌ Tomás,
yaꞌ Bartolomé,
yaꞌ Mateo,
yebꞌ yaꞌ Jacobo,
iskꞌahol icham Alfeo,
yebꞌpaxo xin yaꞌ Simón,
yaꞌ aytikꞌako yinh huneꞌ partido chiyij Cananista.
Aypaxo xin huneꞌxa yaꞌ chiyij Judas,
iskꞌahol yaꞌ Jacobo.
14 Hununnhetikꞌa tzꞌayik xin,
iskutxbꞌan isbꞌa ebꞌyaꞌ sunil yebꞌ yuxhta Komam Jesús yu istxahli tet Komam Dios.
Aypaxo hunteqꞌan ebꞌix chitxahli yinta ebꞌyaꞌ.
Xol ebꞌix tuꞌ,
ayko yaꞌ María,
ismiꞌ Komam Jesús.
15 Haꞌ yinh huneꞌ tiempohal tuꞌ,
aymi hunu ciento veinte mak ayko yul isqꞌabꞌ Komam kutxaniko bꞌey tuꞌ.
Yah linhno yaꞌ Pedro xol ebꞌyaꞌ tuꞌ,
yalni yaꞌ:
16 —Hex wuxhtaj,
hex wanabꞌ,
kaw yilal yijni isbꞌa hakaꞌ yu istzꞌibꞌnhenkano yaꞌ rey David yet payxa yu Komam Espíritu Santo yinh naj Judas,
naj yewa tet ebꞌnaj tzabꞌnayo Komam Jesús.
17 Naj Judas tuꞌ,
ayko naj jetbꞌiho yet yalanhtokanoj,
huneꞌnhe komunil yebꞌ naj.
18 Yu istohol istxꞌojal iswatxꞌe naj yinh Komam,
isloqꞌ naj huneꞌ txꞌotxꞌ.
Lahwi tuꞌ xin istit xulna naj,
ispohto iswiꞌ naj,
hak tuꞌ yu yelti chꞌitna yul iskꞌul naj.
19 Sunil anma ay yul konhobꞌ Jerusalén abꞌen isqꞌumal huneꞌ tuꞌ,
yuxinto Acéldama okkano isbꞌiho huneꞌ txꞌotxꞌ tuꞌ yinh yabꞌxubꞌal anma.
Haꞌ chal yelapnoj txꞌotxꞌ loqꞌbꞌil yu istohol chikꞌ.
20 »Yuto hak tuꞌ yalni yul Yum Komam Dios yinh Salmos:
“Kanojabꞌkano huneꞌ yatut naj tuꞌ ischukil,
machojabꞌ mak xin chꞌok yahawoj,”a
xhi.
Chalnipaxoj:
“Okojabꞌ hunuxa mak selelo yinh ismunil,”b
xhikano yul Hum tuꞌ,
xhi yaꞌ Pedro.
21-22 Yalnipaxo yaꞌ Pedro:
—Yuxin kosayaꞌwelo hunuxa mak chiꞌok selelo naj Judas tuꞌ,
kat yok yalnokꞌo xol anma tato kaw yeli itzitzbꞌikanh Komam Jesús.
Haꞌ hunu mak chikosayilo tuꞌ yilal xaꞌekꞌ tzujtzun yinta Komam yebꞌ hanhonh tiꞌ,
yulbꞌal yet ayikꞌo Komam koxol;
chiꞌichiti yet yah haꞌ iswiꞌ Komam Jesús yu yaꞌ Juan masanta yet istokano Komam yul satkanh,
xhi yaꞌ Pedro.
23 Yuxin issayilti ebꞌyaꞌ kawanh ebꞌyaꞌ,
huneꞌ yaꞌ chiyij Matías,
huneꞌxa yaꞌ José Barsabás isbꞌi,
chiyijpaxo Justo.
24 Lahwi tuꞌ xin,
istxahli ebꞌyaꞌ sunil hakaꞌ tiꞌ:
«Mamin,
kaw hawohtaj tzet ye yanma hunun anma,
yuxin ye jetanh mak hunu ebꞌyaꞌ kawanh tiꞌ sikꞌbꞌilxalo hawu.
25 Yunhe ischahni hamunil bꞌejbꞌilkano yu naj Judas,
yet istokano naj bꞌaytikꞌa kaw tꞌinhan istohi,»
xhi ebꞌyaꞌ tet Komam.
26 Lahwi tuꞌ yilwen ebꞌyaꞌ mak chikankano yinh huneꞌ munil tuꞌ.
Kꞌuxan xin yapni yinh yaꞌ Matías.
Hak tuꞌ xin yu yokkano yaꞌ yetbꞌiho ebꞌyaꞌ 11 (hunlahonhwanh) ischejabꞌ Komam Jesucristo tuꞌ.