Yet yul Komam Espíritu Santo yibꞌanh makta ayxako yul isqꞌabꞌ Komam Jesucristo
2
Yet yayilo istzꞌayikal qꞌinh Pentecostés,
huneꞌnhe bꞌay kutxaniko sunil mak ayxako yul isqꞌabꞌ Komam Jesús.
2 Kaw hunepixto xin yabꞌen ebꞌnaj tuꞌ isbꞌili istit huneꞌ hakaꞌ jaqꞌeqꞌ yul satkanh yinh kaw ip chiꞌekꞌi.
Isnohilo sunil yul nha bꞌay ayikto yuninal Komam Jesús yu huneꞌ hakaꞌ jaqꞌeqꞌ tuꞌ.
3 Lahwi tuꞌ xin yilni yuninal Komam yayilo hakaꞌ xaj qꞌa qꞌaꞌ,
ispujnakanh xol ebꞌnaj,
yapnikano yibꞌanh hunun ebꞌnaj tuꞌ.
4 Sunil ebꞌnaj yebꞌ ebꞌix tuꞌ okkano yalanh ischejbꞌanil Komam Espíritu Santo yok tzotelo yinh nananta abꞌxubꞌal yu yip Komam.
5 Yinh huneꞌ tiempohal tuꞌ,
kaw txꞌiꞌal anma Israel ayko yanma yinh Komam Dios,
kutxaniko yul konhobꞌ Jerusalén tuꞌ.
Kaw nananta bꞌay titiko anma tuꞌ yul sat yibꞌanhqꞌinal tiꞌ.
6 Yet yabꞌen anma isbꞌili huneꞌ hakaꞌ jaqꞌeqꞌ tuꞌ,
iskutxbꞌaniko isbꞌa anma bꞌey huneꞌ nha tuꞌ.
Kaw kꞌaykanh iskꞌul anma yabꞌen istzotel makta ayxako yul isqꞌabꞌ Komam yul yabꞌxubꞌal hunun anma tuꞌ.
Yuto sunil yabꞌxubꞌal anma yal ebꞌnaj yebꞌ ebꞌix ayxako yul isqꞌabꞌ Komam Jesucristo.
7 Kaw chikꞌay iskꞌul anma yilni huneꞌ tuꞌ,
yalni anma hakaꞌ tiꞌ:
—Wal hunteqꞌan ebꞌnaj yebꞌ ebꞌix chitzotel tiꞌ,
kaw ah Galilea sunil.
8 ¿Tzimi yinh xin chijabꞌe istzotel yul jabꞌxubꞌal bꞌay pitzkꞌanajonh hununonh?
9 Wal xin koxol hanhonh tiꞌ ay anma titna yul ismajul Partia,
aypaxo anma ah Media,
yebꞌ ah Elam.
Aypaxo anma ah Mesopotamia,
yebꞌ ah Judea,
yebꞌ Capadocia yebꞌ Ponto,
yebꞌ anma ay yul ismajul Asia.
10 Aypaxo anma ah Frigia,
yebꞌ ah Panfilia,
yebꞌ ah Egipto.
Aypaxo anma titna yul ismajul Africa bꞌey iskawilal Cirene,
yebꞌpaxo anma ah Roma.
Xol sunil anma tiꞌ xin,
ay anma jet Israelal,
yebꞌpaxo mak xayako isbꞌa yinh koreligión hanhonh Israel honh tiꞌ.
11 Aypaxo anma ah Creta,
yebꞌ ah Arabia,
yajaꞌ kosunil hanhonh tiꞌ chijabꞌe istzotel ebꞌnaj yebꞌ ebꞌix yul jabꞌxubꞌal yinh iskꞌulal iskꞌul Komam Dios,
xhi anma tuꞌ.
12 Kaw toxanhe chikꞌay iskꞌul sunil anma,
issomchalo yul iswiꞌ,
yuxin isqꞌambꞌele anma tet hunun hakaꞌ tiꞌ:
—¿Tzet chalilo hunteqꞌan chijabꞌe tiꞌ?
xhi anma.
13 Aypaxo hunteqꞌanxa anma chibꞌuchwahi,
leyalni hakaꞌ tiꞌ:
—Haꞌ hunteqꞌan ebꞌnaj yebꞌ ebꞌix tiꞌ,
kaw ukꞌum,
xhi anma tuꞌ.
Yet yalni yaꞌ Pedro Istzotiꞌ Komam Dios
14 Yuxin ah linhno yaꞌ Pedro yebꞌ ebꞌyaꞌ 11 (hunlahonhwanhxa) yetbꞌi tuꞌ,
istzabꞌlo istzotel yaꞌ xol sunil anma yinh kaw ip hakaꞌ tiꞌ:
«Hex ay bꞌey yul ismajul Judea,
yebꞌ xin sunil hex nananta konhobꞌal aykꞌo yul konhobꞌ Jerusalén tiꞌ,
kaw chiwaqꞌan heyohtanheloj tzet yelapno ye huneꞌ tiꞌ.
Wal xin,
haj hetxikin yinh tzet chiwalan.
15 Hanhonhtiꞌanh mach ukꞌumojonhanh hakaꞌ cheyute hetxumni jinhanh,
yuto sahabꞌ sakꞌayal ayonh tinanh yinh chꞌen bꞌalonhebꞌ.
16 Wal xin,
lanhan yijni isbꞌa tzet halbꞌilkano yul Yum Komam Dios yu yaꞌ Joel,
ischejabꞌ Komam Dios yet payat,
17 bꞌay yalkano hakaꞌ tiꞌ:
“Yet chꞌapni islahobꞌal tzꞌayik,
chiwatijan Wespírituhan yibꞌanh anma yul sat yibꞌanhqꞌinal tiꞌ.
Yuxin haꞌ ej hekꞌahol yebꞌpaxo ej hekutzꞌin,
haꞌ chalnolo Intzotiꞌan.
Chinyehan hunteqꞌan kuybꞌanile tet ebꞌnaj tzehtaj yinh sajsatil.
Yebꞌpaxo ebꞌnaj ichamtaj chintzotelan tet ebꞌnaj yul iswayik.
18 Yet huneꞌ tiempohal tuꞌ chiwako Wespírituhan yinh sunil anma chiyaqꞌ chejaꞌ isbꞌa wetan,
ebꞌnaj winaj yebꞌ ebꞌix ix,
kat yalnikꞌo ebꞌnaj yebꞌ ebꞌix Intzotiꞌan tet anma.
19 Chinyehan kꞌaybꞌalkꞌule yul satkanh tet anma,
kat iskꞌayilo iskꞌul yilni.
Yebꞌ xin bꞌey yul sat yibꞌanhqꞌinal tiꞌ,
chinyehan huneꞌ tzet chiyenilo wipan tet anma.
Haꞌ hunteqꞌan tiꞌ xin,
haꞌ ton chikꞌ yebꞌ qꞌa qꞌaꞌ,
yebꞌ huneꞌ niman nhubꞌ hakaꞌ moyan.
20 Chiꞌok qꞌejholo yinh sat tzꞌayik,
wal yinh ixahaw xin,
kaw kajponhponhe chukoj hakaꞌ chikꞌ.
Haꞌ hunteqꞌan tiꞌ chiyu yet yalanhto maxhto chihul istzꞌayikal bꞌay chul Komam Jahawil.
Huneꞌ tzꞌayik tuꞌ,
kaw niman yelapno yehi,
yebꞌpaxo aytam saqꞌal.
21 Haꞌ yinh huneꞌ tzꞌayik tuꞌ xin,
haꞌ mak chiꞌawten Komam Yahawoj chikolchahi,”a
xhikanoj.
22 »Hex wet konhobꞌ Israel,
hajbꞌa hetxikin yinh tzet chalilo huneꞌxa chiwalan teyet tiꞌ:
Kaw xaꞌisyelo Komam Dios ismunil Komam Jesucristo ah Nazaret jet kosunil,
yet iswatxꞌen Komam Jesús iskꞌulal yebꞌ kꞌaybꞌalkꞌule yebꞌ yechel yip Komam Dios.
Wal xin kaw heyohtaxa sunil tiꞌ yuto haꞌ koxol yuhi.
23 Wal xin alaxiko Komam Jesucristo yul heqꞌabꞌ yuto hak tuꞌ yoche iskꞌul Komam Dios.
Kaw xin yohtaxa Komam Dios yettax payat yinh tzet chihul yibꞌanh Komam Jesucristo.
Wal hex hex tiꞌ xin,
heqꞌan isqꞌabꞌ ebꞌnaj txꞌoj yu yanikanh ebꞌnaj Komam yinh teꞌ kulus.
Hak tuꞌ xin yu iskam Komam heyu.
24 Wal xin itzitzbꞌikanh Komam yu Komam Dios.
Iskolnilo yul isqꞌabꞌ kamikal yuxin machi yu isqꞌoji huneꞌ kamikal tuꞌ ismajchenayo Komam.
25 Yaꞌ rey David,
yalkano yaꞌ hunteqꞌan Tzotiꞌ yibꞌanhilo Komam Jesucristo hakaꞌ tiꞌ:
“Sunilbꞌal tiempo wohtajan tato ay Komam Dios inkꞌatanhan.
Aynhetikꞌako Komam yinh inwatxꞌqꞌabꞌan,
hak tuꞌ xin machi mak chiꞌaqꞌni kabꞌkonkanh wanmahan,
kat waykꞌayan.
26 Yuxin kaw chitzala wanmahan,
chintzotelan yinh kaw tzalahilal.
Waxanhka chikam innimaniltiꞌan,
yaj chikawxi inkꞌulan yinh Komam.
27 Mamin,
mach chawaqꞌaꞌkano wanmahan xol kamom,
mach chachabꞌaꞌpaxo qꞌajoꞌto innimanilan,
hanin sikꞌbꞌil inkanhan hawu.
28 Xahaye huneꞌ bꞌeh chꞌaqꞌni qꞌinale aynhetikꞌa sunilbꞌal tiempo wetan.
Kaw chawaqꞌ tzalaho wanmahan yet chinapnihan takꞌatanh.b
Hak tuꞌ yu istzꞌibꞌnhenkano yaꞌ rey David,”
xhi yaꞌ.
29 »Hex wet konhobꞌ,
yinh kaw isyelal chiwalan teyet,
yaꞌ jichmam David tuꞌ,
kaw johtaj tato kam yaꞌ,
ismujlaxpaxoj.
Haꞌ bꞌay mujan yaꞌ tuꞌ xin,
kaw ixtanhto koxol tinanh.
30 Wal yaꞌ rey David tuꞌ,
ischejabꞌ Komam Dios ye yaꞌ.
Kaw xin yohta yaꞌ tato haltebꞌilkano yu Komam Dios tato yinh yuninal yaꞌ chipitzkꞌa Komam Cristo,
kat yokkano Jahawo isselelo yaꞌ.
31 Yuxin yet kaw yalanhtokano tuꞌ,
aqꞌlax yohtanhelo yaꞌ,
yuxin yalkano yaꞌ tato chiꞌitzitzbꞌikanh Komam Jesucristo.
Yalnipaxo yaꞌ tato mach chikankano yanma Komam xol kamom anma,
machi xin chichahlax qꞌajoꞌto isnimanil Komam.
32 Haꞌ xin Komam Dios aqꞌni itzitzbꞌokanh Komam Jesucristo tuꞌ.
Kosunilanh chijaqꞌ kobꞌahanh testigohal yinh huneꞌ tiꞌ.
33 Haꞌ Komam Dios inito Komam Jesucristo yul satkanh yu yok tzꞌonhno yinh iswatxꞌqꞌabꞌ Komam Dios.
Yaqꞌni Komam Dios Komam Espíritu Santo tet Komam Cristo hakaꞌ yu yalnikanoj.
Yuxin haꞌ Komam Jesús aniti tzet lanhan heyilni tiꞌ,
yebꞌ huneꞌ cheyabꞌe tiꞌ.
Hak tuꞌ chu isyenikanilo isbꞌa yulbꞌal Komam Espíritu Santo jibꞌanhanh.
34 »Yaꞌ David tuꞌ,
mach bꞌeyahto yaꞌ yul satkanh yaj xin yalpaxo yaꞌ hakaꞌ tiꞌ:
“Yal Komam Dios Jahawil tet Wahawilan:
‘Ayanh tzꞌonhno yinh inwatxꞌqꞌabꞌtiꞌan,
35 masanto chiwakojan anma ayko ishowal tawinh yalanh hawoj,’
xhi Komam Dios,”
xhi yaꞌ rey David.
36 »Tinanh xin,
yilal heyabꞌenkano yinh kaw ishabꞌanil hex wet konhobꞌ Israel.
Waxanhka xaheyakanh Komam Jesús yinh teꞌ kulus,
yaj haꞌ Komam Dios aniko Komam Jesús Yahawiloj,
yebꞌ xin yinh Cristohal,»
xhi yaꞌ Pedro.
37 Yet yabꞌen anma Israel sunil tzet yal yaꞌ,
kꞌayilo iskꞌul anma,
yok bꞌiskꞌulal yinh yanma anma tuꞌ.
Isqꞌambꞌen anma tet yaꞌ Pedro yebꞌ xin tet hunteqꞌanxa ebꞌyaꞌ ischejabꞌ Komam Jesucristo:
—Hex wet konhobꞌ,
¿tzet wal juten kobꞌahanh tinanh heyalni?
xhi anma.
38 Istaqꞌwi yaꞌ Pedro tet anma hakaꞌ tiꞌ:
—Bꞌejwe hewatxꞌen istxꞌojal,
kat yahkano haꞌ hewiꞌ hunun hex yinh isbꞌi Komam Jesucristo,
kat yaqꞌlaxkano nimankꞌulal yinh hemul.
Hak tuꞌ xin chu hechahnikano Komam Espíritu Santo yul heyanma hunun hex.
39 Huneꞌ tiꞌ haltebꞌil jet yebꞌ tet juninal yebꞌ tet sunil anma nahat aya,
sunil hunteqꞌan mak chawte Komam Dios,
xhi yaꞌ Pedro.
40 Wal xin,
txꞌiꞌalto tzet yal yaꞌ,
yok yaꞌ yiptzeno anma tuꞌ,
yalni yaꞌ hakaꞌ tiꞌ:
—Kolwelo hebꞌa tet isyaꞌtajil chihul yibꞌanh anma txꞌoj chiswatxꞌe,
xhi yaꞌ Pedro.
41 Kaw hanta mak chahni Komam yul yanma yu tzet yal yaꞌ Pedro,
yahkano haꞌ iswiꞌ anma tuꞌ.
Haꞌ yinh huneꞌ tzꞌayik tuꞌ xin,
aymi oxebꞌo mil anma okkano yetbꞌiho makta ayxako yul isqꞌabꞌ Komam.
42 Hak tuꞌ xin chilannhetikꞌa iskutxbꞌan isbꞌa yabꞌen iskuywa ebꞌyaꞌ ischejabꞌ Komam.
Huneꞌnhe xin yute yanma,
chiswahni ixim pan,
chitxahlipaxo tet Komam Dios.c
Yinh tzettaj yu mak bꞌabꞌel ok yul isqꞌabꞌ Komam Jesús
43 Sunil anma kaw xiwkanokanh,
yuto kaw hantanhe kꞌaybꞌalkꞌule yebꞌ xin yechel yip Komam Dios isye ebꞌyaꞌ ischejabꞌ Komam Jesús.
44 Haꞌ anma chahnikano Komam Jesús yul yanma tuꞌ,
kaw huneꞌxanhe anma eliko sunil,
yebꞌpaxo xin kaw huneꞌxanhe yutekanayo tzettaj aya.
45 Ay ebꞌnaj txonhnito istxꞌotxꞌ yebꞌ tzettaj aya,
haxa istohol tuꞌ xin,
ispohkanh ebꞌnaj yinh anma hatatikꞌa hanta chiꞌokniko yu hunun.
46 Anma yako isbꞌa yul isqꞌabꞌ Komam tuꞌ,
kaw hunun tzꞌayik iskutxbꞌan isbꞌa yul Yatut Komam Dios,
yuto huneꞌxanhe isnabꞌal.
Wal yulaj yatut xin,
chispohkanh ixim pan,
kat iswahni ixim yinh kaw tzalahilal,
yebꞌ xin kaw kꞌulchꞌan chiyute iskꞌul yinh hunun.
47 Chisbꞌitnhen Komam Dios,
kaw xin chitzala sunil anma yinh yuninal Komam tuꞌ.
Yebꞌ xin kaw hunun tzꞌayik ischꞌibꞌkanh isbꞌisil yuninal Komam Jesús yu anma chako isbꞌa yul isqꞌabꞌ Komam yunhe iskolchahi.