2 Huneꞌ Tzotiꞌ Kꞌul yet Kolbꞌanile tuꞌ,

halbꞌilkano yu Komam Dios yet payat,

tzꞌibꞌnhebꞌilkano yul Yum Komam yu ebꞌyaꞌ ischejabꞌ.

3 Haꞌ hunteqꞌan kuybꞌanile tzꞌibꞌnhebꞌilkano tuꞌ,

yinh Komam Jesucristo Jahawil chitzoteli,

Komam Iskꞌahol Komam Dios.

Komam Jesucristo tuꞌ yinh yuninal yaꞌ rey David titna Komam yet yulikꞌo yul sat yibꞌanhqꞌinal tiꞌ.

4 Yajaꞌ yu Yespíritu Komam Dios ayko yinh,

yebꞌ yu itzitzbꞌikanh Komam xol kamom,

hak tuꞌ xin yu isyeni isbꞌa tato Iskꞌahol Komam Dios yehi yebꞌ xin kaw ay yip.

5 Yu Komam Jesucristo yuxin xaꞌinchahan iskꞌulal.

Kinyanikojan Komam Dios ischejabꞌo Komam Jesucristo yu walnikꞌojan Istzotiꞌ,

haxinwal ay mak chichahnayto Komam yul yanma yul hunun konhobꞌ,

kat isyijen yinh tzet chala.

6 Xol hunteqꞌan mak tuꞌ ayexiko hex tiꞌ,

awtebꞌilex yu heyok yul isqꞌabꞌ Komam Jesucristo.

7 Chintzꞌibꞌnhetojan huneꞌ carta tiꞌ teyet hex ay hex bꞌey yul konhobꞌ Roma.

Kaw xahan ay hex yu Komam Dios,

awtebꞌilexpaxo yu heyok iskonhobꞌo Komam.

Yaqꞌabꞌ Komam Dios Mame yebꞌ Komam Jesucristo iskꞌulchꞌanil iskꞌul yebꞌ aqꞌankꞌulal teyet.

8 Tinanh xin,

yinh isbꞌi Komam Jesucristo chiwaqꞌan yuchꞌandiosal teyinh tet Komam Dios yuto sunil yulaj konhobꞌ chihal-laxi tato kaw ayko heyanma yinh Komam Dios.

9 Kaw yohta Komam tato hunta el chintxahlihan chexinnatijan yinh intxahan.

Yinh sunil wanmahan chinyijehan walnikꞌojan Istzotiꞌ Iskꞌahol Komam.

10 Chinqꞌannihan tet Komam Dios tato chiꞌel yinh iskꞌul Komam chintohan kexwilaꞌan.

11 Yuto kaw chiwochehan kexwilaꞌan yu inkolwahan hanikꞌo teyinh yinh yet Komam,

haxinwal chiyiqꞌ yip heyanma yinh Komam.

12 Hak tuꞌ xin chu jiptzelen kobꞌa hununonh,

yuto hun lahanxa yeko janma yinh Komam.

13 Hex wuxhtaj hex wanabꞌ,

chiwochehan cheyohtanheloj tato txꞌiꞌalxa el chiwochehan chintohan kexwilaꞌan,

yajaꞌ maxhtotikꞌa chij isbꞌa intohan.

Chiwochehan ta hayet chinapnihan texol,

txꞌiꞌal mak chiꞌok yul isqꞌabꞌ Komam wuhan,

hakaꞌtikꞌa chiwuhan yulaj hunun konhobꞌ bꞌay chinekꞌan xol anma mach Israeloj.

14 Yuto inkꞌasan ye walnilojan Istzotiꞌ Komam Dios tet makxanhetikꞌa anmahil,

tet anma ay iskuyu maka tet anma mach iskuyu,

tet anma ay yitzꞌatil iswiꞌ maka tet anma machi yitzꞌatil iswiꞌ.

15 Yuxin ayko yinh inkꞌulan intohan walnokꞌojan Tzotiꞌ Kꞌul yet Kolbꞌanile texol bꞌey Roma tuꞌ.

16 Wal hanintiꞌan,

mach chintxꞌixwilojan yinh Tzotiꞌ Kꞌul yet Kolbꞌanile,

yuto yip Komam Dios yehi;

haꞌ chꞌaqꞌni kolbꞌanile tet sunil mak chiꞌanayto yul yanma.

Yinh bꞌabꞌelal hal-lax jet hanhonh Israel honh tiꞌ,

tzujan tuꞌ xin yal-lax tet anma mach Israeloj.

17 Huneꞌ Tzotiꞌ Kꞌul yet Kolbꞌanile tiꞌ,

haꞌ chiꞌaqꞌni johtanhelo yinh tzet chu jok kꞌulal yul sat Komam Dios,

kachannhe yu kochahni Komam Jesucristo yul janma,

hakaꞌ yalni yul Yum Komam Dios:

«Haꞌ mak xakan kꞌulal yul sat Komam Dios yinhxanhe Komam ayko yanma,

yuxin ay isqꞌinal mach istanhbꞌal,»^a

xhihayoj.

18 Wal xin chati Komam Dios isyaꞌtajil yul satkanh yibꞌanh anma txꞌoj,

anma maxhtikꞌa chiwatxꞌen istoholal.

Yu istxꞌojal anma tuꞌ yuxin mach chiꞌohtanhelaxilo isyelal.

19 Yinh tzet chu johtanhenilo Komam Dios kaw yohtaxa anma;

mach ewano ye yul sat yuto haꞌtikꞌa Komam yenilo tet.

20 Waxanhka mach chijiliko yinh Komam Dios,

yajaꞌ chu johtanhenilo Komam yu tzet ye tuꞌ watxꞌebꞌilxa yu.

Yuto yettaxtikꞌa iswatxꞌenkano Komam huneꞌ yul sat yibꞌanhqꞌinal tiꞌ isyenilo isbꞌa yinh kaw habꞌan tato kaw Dios Komam,

yebꞌ ta kaw machi bꞌaqꞌinh chitanh yip.

Yuxin hunteqꞌan anma tuꞌ matxa tzet tzꞌaj yalaꞌ yunhe iskolni isbꞌa.

21 Waxanhka kaw yohta anma tato ay Komam Dios,

yajaꞌ maxhtikꞌa yiyo isbꞌa anma tet Komam hakaꞌ kaw yehi.

Maxhtikꞌa xin yaqꞌpaxo anma yuchꞌandiosal tet Komam,

wal xin hanhkꞌanhetikꞌa issukal chiꞌekꞌ yinh isnabꞌal yu qꞌejholo ayko yinh isnabꞌal.

22 Kaw tzꞌajan iskꞌul anma tuꞌ yalni,

yajaꞌ kaw suk,

23 yuto xaꞌisbꞌejkano anma Komam Dios kaw aykano ismay isqꞌaqꞌal yip,

Komam maxhtikꞌa chikami.

Haxa yechel anma kambꞌehal yehi,

yebꞌ noꞌ chꞌik,

yebꞌ noꞌ labꞌa yebꞌ yechel no noqꞌ kanhebꞌ yoj,

haꞌ yako anma isdiosaloj.^b

24 Yuxin alaxkaniko hunteqꞌan anma tuꞌ xol istxꞌojal yu Komam Dios,

chiswatxꞌen tzet chal iskꞌul,

kaw xin txꞌixobꞌal tzet chiswatxꞌe anma yinh hunun.

25 Maxhtaj isyelal Komam Dios yayto anma yul yanma,

wal xin to haꞌ leqꞌtiꞌal yayto yul yanma.

Haꞌ xin tet hunteqꞌan tzet watxꞌebꞌil yu Komam Dios haꞌ bꞌay chiyo isbꞌa anma yebꞌ haꞌ chako anma ismay;

maxhtaj tet Komam watxꞌenhe sunil tzet ye tuꞌ,

Komam yet ay yaniko anma ismay yinh sunilbꞌal tiempo,

¡hakojabꞌ tuꞌ!

26 Yu huneꞌ tuꞌ yuxin bꞌejbꞌilkano anma yu Komam Dios,

chiswatxꞌen tzet choche iskꞌul,

hunteqꞌan kaw txꞌixobꞌal.

Ebꞌix ix xaꞌisbꞌejkano ebꞌix hunteqꞌan iqꞌbꞌiltikꞌa yu yinh yochen isbꞌa yebꞌ yichamil,

chiswatxꞌen ebꞌix hunteqꞌan tzet ye tuꞌ yebꞌ yet ixal mach yeto ay iswatxꞌeni.

27 Hakpax tuꞌ ebꞌnaj winaj xaꞌisbꞌejkano ebꞌnaj hunteqꞌan tzet iqꞌbꞌiltikꞌa yu yinh yochen isbꞌa yebꞌ yixal,

kaw chipalkꞌon ebꞌnaj iswatxꞌen istxꞌojal yinh hunun hakaꞌ tzet chal yanma,

kaw xin txꞌixobꞌal tzet chiswatxꞌe ebꞌnaj yinh yet winajil.

Haꞌtikꞌa xin isnimanil ebꞌnaj chichahni isyaꞌtajil ispajo istxꞌojal chiswatxꞌe tuꞌ.

28 Yajaꞌ yu machi yelapno Komam Dios yul sat anma,

yuxin bꞌejbꞌilkano anma yu Komam yinh sunil istxꞌojal chiꞌekꞌ yinh isnabꞌal.

Chiswatxꞌen anma tzet ye tuꞌ mach yeto ay iswatxꞌeni.

29 Kaw nohnako sunil tzet ye tuꞌ mach kꞌulo yinh hunteqꞌan anma tuꞌ,

hanhkꞌanhetikꞌa istxꞌojal nabꞌil yu iswatxꞌeni,

hanhetikꞌa qꞌalomal ayko yinh iskꞌul issayni,

kaw chitzala iskꞌul iswatxꞌen istxꞌojal.

Tonhetikꞌa chichiwa iskꞌul yinh yet anmahil kat ispotxꞌwahi,

aqꞌom howal,

kat yaqꞌni subꞌchaho yet anmahil,

txꞌojnhetikꞌa nabꞌil yu yinh yet anmahil,

yebꞌ halom qꞌumal.

30 Chishobꞌkanh leqꞌtiꞌal yinh yet anmahil,

ayko ishowal yinh Komam Dios,

chisyah yet anmahil,

kaw chikanh isbꞌa,

kaw loloꞌ,

chisnakanh istxꞌojal,

mach chisyije yinh tzet chal ismam ismiꞌ.

31 Kaw lutꞌ chute isbꞌa,

tzet haltebꞌil yu mach chisyije,

matxa iskꞌulchꞌanil iskꞌul yinh yet anmahil,

mach chaqꞌ nimankꞌulal,

yebꞌ mach chitzꞌay iskꞌul yinh yet anmahil.

32 Kaw yohta hunteqꞌan anma tuꞌ ta halbꞌilkano yu Komam Dios tato haꞌ mak chiwatxꞌen hunteqꞌan istxꞌojal tuꞌ chitokano yinh kamikal mach istanhbꞌal,

yajaꞌ wal anma tuꞌ kaw chislahiko iswatxꞌen istxꞌojal,

chitzalapaxoj tato ay mak chiwatxꞌen istxꞌojal.