ISBꞌABꞌEL CARTA YAꞌ SAN PABLO YATO TET MAKTA AYXAKO YUL ISQꞌABꞌ KOMAM BꞌEY CORINTO
Yichebꞌanil iscarta yaꞌ Pablo
1
1-2 Hanin Pablo intiꞌan,
awtebꞌil-inan wokan ischejabꞌo Komam Jesucristo,
yuto hak tuꞌ el yinh iskꞌul Komam Dios.
Haꞌ hun juxhta Sóstenes chitzꞌibꞌnhento huneꞌ carta tiꞌ wintajan teyet,
hex ayexxako yul isqꞌabꞌ Komam yul konhobꞌ Corinto.
Yu Komam Jesucristo yuxin ayexxako yul isqꞌabꞌ Komam Dios.
Awtebꞌilexpaxo yu heyok iskonhobꞌo Komam,
yebꞌ sunil mak bꞌayxanhetuꞌwal aya chiꞌawten isbꞌi Komam Jesucristo yinh,
Komam Jahawil yebꞌ yahawilpaxo ebꞌnaj tuꞌ.
3 Yaqꞌabꞌ Komam Dios yebꞌ Komam Jesucristo iskꞌulchꞌanil iskꞌul teyet,
yebꞌ aqꞌankꞌulal yul heyanma.
Iskꞌulal chikochah yinh Komam Jesucristo
4 Maxhtikꞌa chinbꞌejan waqꞌnihan yuchꞌandiosal tet Komam Dios teyinh,
yuto xahechah iskꞌulchꞌanil iskꞌul Komam,
yu Komam Jesucristo.
5 Yu huneꞌnhe heye yebꞌ Komam Jesucristo,
yuxin xayako Komam Dios sunil iskꞌulchꞌanil yinh heyanma,
hehelanil hetzoteli,
yebꞌ yitzꞌatil hewiꞌ.
6 Yuxin sunil tzet halbꞌil teyet yinh Komam Jesucristo kaw lanhan isyenilo isbꞌa teyinh.
7 Tinanh xin machi hunu iskꞌulchꞌanil iskꞌul Komam Dios matzet teyinh yulbꞌal ayexikꞌo heyechman istzꞌayikal bꞌay chul Komam Jesucristo.
8 Haꞌ Komam Dios chiꞌaqꞌni heyip helinhbꞌan hebꞌa masanto yet chihul islahobꞌal tzꞌayik,
haxinwal machi istxꞌojal chiꞌilcha teyinh yet chul Komam Jesucristo Jahawil.
9 Sunil tzet chalte Komam Dios masan kaw chij isbꞌa,
haꞌ xin Komam kexawteniko yul isqꞌabꞌ Iskꞌahol,
haꞌ ton Komam Jesucristo Jahawil.
Pohlebꞌahil xol anma ayxako yul isqꞌabꞌ Komam Jesucristo
10 Hex wuxhtaj,
hex wanabꞌ,
yinh isbꞌi Komam Jesucristo chiwaltojan teyet,
hunxanhehojabꞌ cheyute henabꞌal,
mach komono chepohleto hebꞌa.
Wal xin ayojabꞌ aqꞌankꞌulal texol,
hunxanhehojabꞌ tzet chiꞌekꞌ yinh henabꞌal yebꞌ yul heyanma.
11 Chiwaltojan huneꞌ tiꞌ teyet,
hex wuxhtaj,
hex wanabꞌ,
yuto xawabꞌehan heqꞌumal tato ay howal texol bꞌey tuꞌ,
hak tuꞌ yalni yuninal juxhta Cloé wetan.
12 Tolabꞌ ay hex cheyal hakaꞌ tiꞌ:
«Hanhonhtiꞌanh,
yinta juxhta Pablo ayonhikojanh,»
yebꞌ ay hex cheyalpaxoj:
«Yinta juxhta Apolos ayonhikojanh.»
Ayexpaxo xin cheyala:
«Hanhonhtiꞌanh yinta juxhta Pedro ayonhikojanh,»
kexchi.
Tolabꞌ ay hex cheyalpaxoj:
«Hanhonhtiꞌanh yet Komam Jesucristo jehanh,»
kexchi.
13 ¿Tom pohbꞌilayo Komam Cristo heyalni?
¿Tom haninan kinalaxkanhan yinh kulus yu hekolchahi?
yebꞌ ¿tom yinh inbꞌihan alaxkanh haꞌ hewiꞌ xin?
14 Wal xin chiwaqꞌan yuchꞌandios tet Komam Dios yuto machi hunujex tiꞌ wakanhan haꞌ hewiꞌ,
kachannhe juxhta Crispo yebꞌ juxhta Gayo,
15 yuxin mach chu heyalni ta yinh inbꞌihan alaxkanh haꞌ hewiꞌ.
16 Wapaxokanhan haꞌ iswiꞌ yuninal juxhta Estéfanas,
wal hunuxa maka,
mach chitit yul hinkꞌulan tato ahna haꞌ iswiꞌ wuhan.a
17 Mach chejbꞌilojinan wanikanhan haꞌ iswiꞌ anma yu Komam Cristo,
wal xin to haꞌ inchejbꞌanilan haꞌ walnikꞌojan Tzotiꞌ yet kolbꞌanile.
Yajaꞌ machi bꞌay kintzotelan yinh nimeta tzotiꞌ teyet yunhe heyaniko heyanma yinh,
wal xin hanhe iskamikal Komam Jesucristo yinh kulus,
haꞌ walikꞌojan.
Ayko yip yebꞌ ishelanil Komam Dios yinh Komam Jesucristo
18 Huneꞌ kuybꞌanile yinh iskamikal Komam Jesucristo yinh teꞌ kulus,
sukal ye yul sat anma chikꞌaytoj.
Wal yul kosat hanhonh xakonhkolcha xin,
huneꞌ kuybꞌanile yet kolbꞌanile tiꞌ yip Komam Dios yehi.
19 Hakaꞌ yalni yul Yum Komam Dios:
«Chintanhtzelojan ishelanil anma ay ishelanil sat yibꞌanhqꞌinal tiꞌ,
kat intanhtzenpaxilojan isnabꞌal anma ay yitzꞌatil iswiꞌ,»b
xhihayoj.
20 ¿Tzet xin tanhkano ebꞌnaj ay ishelanil yebꞌ ebꞌnaj kuywawom,
yebꞌ ebꞌnaj kaw helan istzotel yinh huneꞌ yul sat yibꞌanhqꞌinal tiꞌ?
Wal xin xaꞌismeltzoko Komam ishelanil anma tuꞌ yinh sukal.
21 Yu ishelanil Komam Dios yuxin el yinh iskꞌul tato maxhtaj yu ishelanil yul sat yibꞌanhqꞌinal tiꞌ,
yuxin chiꞌohtanhelaxilo Komam,
wal xin el yinh iskꞌul Komam ta yu Istzotiꞌ chijalikꞌojanh,
haꞌ chikolni anma chiꞌanayto yul yanma,
waxanhka ay mak chalni tato sukalil ye huneꞌ Tzotiꞌ tiꞌ.
22 Anma Israel,
haꞌ kꞌaybꞌalkꞌule choche yilaꞌ,
wal ebꞌnaj griego xin,
haꞌ yitzꞌatil iswiꞌ anma choche ebꞌnaj yabꞌeꞌ.
23 Yajaꞌ wal hanhonhtiꞌanh haꞌ Komam Cristo alaxkanh yinh kulus,
haꞌ chijalikꞌojanh.
Yul sat anma Israel kaw txꞌoj huneꞌ tuꞌ,
walpaxo yul sat anma mach Israelo xin sukal yehi.
24 Wal hanhonh awtebꞌilonhxa yu Komam Dios tiꞌ xin,
waxanhka Israel maka mach Israeloj johtaj tato yip yebꞌ ishelanil Komam Dios ayko yinh Komam Jesucristo.
25 Hunteqꞌan sukal ye yinh Komam Dios yalni anma,
haꞌ ekꞌbꞌal yelapno sata ishelanil anma.
Haxa hunteqꞌan machi yip yinh Komam Dios yalni anma xin,
haꞌ kaw ekꞌbꞌal yip sata yip anma.
26 Hex wuxhtaj,
hex wanabꞌ,
chimheyil texol hex awtebꞌilexxa yu Komam Dios tato kaw haywanhexchꞌan ay hehelanil hakaꞌ ishelanil anma.
Haywanhexchꞌanpaxo yahaw hex,
hakaꞌ ebꞌnaj iswiꞌehal konhobꞌ,
yebꞌ haywanhexchꞌanpaxo hex yikꞌal anma aykano yelapnoj heyehi.
27 Yuxin haꞌ mak machi nichꞌano tzet yohta yul sat anma,
haꞌ issikꞌkanh Komam Dios yuninaloj yunhe yel istxꞌixobꞌal mak kaw ay ishelanil.
Issikꞌnipaxokanh Komam mak machi yelapnoj yunhe yel istxꞌixobꞌal mak kaw ay yelapno yehi.
28 Issikꞌkanh Komam anma yahbꞌil yebꞌ anma machi yelapno yul sat yibꞌanhqꞌinal tiꞌ,
yunhe matxa yelapno chiꞌelkaniko mak kaw ay yelapno chabꞌe.
29 Hak tuꞌ xin machi mak chu yalni isbꞌa kanhyehal yul sat Komam Dios.
30 Haꞌ Komam konhhunbꞌankano yinh Komam Jesucristo,
yaqꞌnipaxo Komam ishelanil Komam Cristo kohelaniloj.
Yu Komam Jesucristo yuxin chonhkan kꞌulal yul sat Komam Dios,
yebꞌ yetxa Komam jehi,
yupaxo Komam Cristo tuꞌ yuxin kolbꞌilonhxa.
31 Hak tuꞌ chu yijni isbꞌa tzet tzꞌibꞌnhebꞌilkano yul Yum Komam Dios bꞌay chala:
«Tato ay hunu mak choche yiqꞌaꞌkanh isbꞌa,
haꞌojabꞌ Komam Cristo Jahawil chikanh,»
xhihayoj.c