Yalto yaꞌ Pablo ta chil isbꞌa makta ayxako yul isqꞌabꞌ Komam ay bꞌey Roma
16
Kaw chintaqꞌetojan janabꞌ Febe teyet.
Ix janabꞌ tiꞌ diaconisa ix,
kaw munla ix xol anma ayxako yul isqꞌabꞌ Komam bꞌey konhobꞌ Cencrea.
2 Kaw kꞌulojabꞌ chu hechahni ix yuto janabꞌ ix yinh Komam,
chahwe ix hakaꞌ chu kochahni hunu mak ayxako yul isqꞌabꞌ Komam.
Kolwahanhwe yinh tzet chiꞌokniko yu ix yuto kaw txꞌiꞌal mak bꞌay kolwa ix,
kolwapaxo ix winhan.
3 Halwe tet janabꞌ Priscila yebꞌ tet juxhta Aquila ta chil isbꞌa yinh iskawil,
kaw wet munlawomal hinbꞌahan yebꞌ ix yebꞌpaxo xin naj juxhta tuꞌ yinh ismunil Komam Jesucristo.
4 Ix janabꞌ Priscila yebꞌ juxhta Aquila tuꞌ,
kaw ishin isbꞌa iskam yu kiniskolnihan,
maxhnhetajinan xin chiwaqꞌan yuchꞌandiosal tet naj yebꞌ tet ix,
to haꞌ hunpaxo sunil mak ayxako yul isqꞌabꞌ Dios mach Israeloj ay yul hunun konhobꞌ chiꞌaqꞌnipaxo yuchꞌandiosal.
5 Halwepaxo tet sunil mak ayxako yul isqꞌabꞌ Komam chiskutxbꞌa isbꞌa yul yatut janabꞌ yebꞌ juxhta tuꞌ ta chil isbꞌa.
Halwepaxo tet juxhta Epeneto tato chil isbꞌa,
naj juxhta tuꞌ kaw xahan ay naj wuhan.
Haꞌ naj bꞌabꞌel yako isbꞌa yul isqꞌabꞌ Komam Jesucristo yul ismajul Asia.
6 Halwepaxo tet ix janabꞌ María ta chil isbꞌa,
ix janabꞌ tuꞌ kaw xamunla ix texol.
7 Halwepaxo tet ebꞌnaj wet konhobꞌan,
naj juxhta Andrónico yebꞌ juxhta Junias ta chil isbꞌa.
Ebꞌnaj kawanh tuꞌ hun yu wokan preso yebꞌ ebꞌnaj,
kaw xin ay yelapno ebꞌnaj yul sat ebꞌyaꞌ ischejabꞌ Komam,
bꞌabꞌel xin yako isbꞌa ebꞌnaj yul isqꞌabꞌ Komam Dios insatajan.
8 Halwe tet juxhta Amplias tato chil isbꞌa naj,
kaw xahan ay naj wuhan yinh isbꞌi Komam.
9 Halwe tet juxhta Urbano ta chil isbꞌa,
naj juxhta tuꞌ kaw munla naj jintajanh yinh ismunil Komam,
kat heyalnipaxo tet juxhta Estaquis ta chilpaxo isbꞌa,
kaw xahan ay naj wuhan.
10 Halwe tet naj juxhta Apeles ta chil isbꞌa,
naj juxhta tuꞌ kaw xaꞌekꞌ ilwebꞌal yibꞌanh naj yu ayko yanma naj yinh Komam.
Halwepaxo tet naj juxhta Aristóbulo yebꞌpaxo tet sunil mak ay bꞌey yatut naj ta chil isbꞌa.
11 Halwepaxo tet naj wet konhobꞌan,
naj juxhta Herodión ta chil isbꞌa.
Halwepaxo tet juxhta Narciso yebꞌpaxo tet sunil mak ay bꞌey yatut naj ta chil isbꞌa yinh iskawil,
yuto xayayto ebꞌnaj yul yanma yinh Komam.
12 Halwepaxo tet janabꞌ Trifena yebꞌ janabꞌ Trifosa ta chil isbꞌa.
Ebꞌix janabꞌ tuꞌ kaw chimunla ebꞌix yinh ismunil Komam Dios;
kat heyalnipaxo tet janabꞌ Pérsida,
ix kaw xahan ay wuhan,
ta chil isbꞌa.
Ix janabꞌ tuꞌ kaw munlapaxo yinh ismunil Komam.
13 Halwepaxo tet juxhta Rufo ta chil isbꞌa,
naj juxhta tuꞌ kaw sikꞌbꞌililo naj yu Komam.
Halwepaxo tet ismiꞌ juxhta tuꞌ ta chil isbꞌa,
janabꞌ tuꞌ hakaꞌ inmiꞌan yepaxoj.
14 Halwe tet juxhta Asíncrito yebꞌ juxhta Flegonte yebꞌ juxhta Hermas yebꞌ juxhta Patrobas yebꞌ juxhta Hermes ta chil isbꞌa ebꞌnaj yinh iskawil;
yebꞌpaxo ebꞌnaj juxhta ay iskꞌatanh ebꞌnaj.
15 Halwe tet juxhta Filólogo yebꞌ janabꞌ Julia yebꞌ tet juxhta Nereo,
yebꞌ tet yanabꞌ naj,
yebꞌ tet janabꞌ Olimpas,
ta chil isbꞌa yebꞌpaxo tet sunil ebꞌnaj juxhtaj yebꞌ ebꞌix janabꞌ ay iskꞌatanh ebꞌnaj.a
16 Qꞌambꞌele hanikꞌ heye hunun hex yinh sunil heyanma yinh kaw tzalahilal.
Chalnipaxto sunil yuninal Komam Dios ay yul hunun konhobꞌ ay bꞌey tiꞌ ta cheyil hebꞌa yinh hekawil.
17 Hex wuxhtaj hex wanabꞌ,
kaw cheyil hebꞌa tet ebꞌnaj choche yaqꞌaꞌko pohlebꞌahil texol,
yebꞌ choche kexyaqꞌaꞌ aykꞌayoj.
Haꞌ hunteqꞌan chu ebꞌnaj tuꞌ mach chischah isbꞌa yebꞌ kuybꞌanile chabꞌilxa heyu.
Hunteqꞌan ebꞌnaj tuꞌ mach chechah ebꞌnaj texol.
18 Yuto maxhtaj tet Komam Jesucristo chisyije ebꞌnaj,
wal xin to haꞌ tzet choche iskꞌul ebꞌnaj haꞌ chissayikꞌoj.
Kaw kꞌulchꞌan chute istzotel ebꞌnaj yunhe yaqꞌni subꞌchaho ebꞌnaj anma mach kaw yitzꞌatil iswiꞌ.
19 Kaw sunil mak ohtanhe tato kaw yijem hex,
yuxin kaw chintzalahan teyinh.
Chiwochehan ta helan cheyute hebꞌa yinh iskꞌulal,
maxhtaj yinh istxꞌojal.
20 Haꞌ Komam Dios yahaw aqꞌankꞌulal,
chiꞌinayo naj matzwalil yinh lembꞌil,
kat iskan naj yalanh heyoj.
Haꞌojabꞌ Komam Jesucristo chiꞌanayo iskꞌulal teyibꞌanh.
21 Chalto naj juxhta Timoteo ta cheyil hebꞌa,
naj juxhta tiꞌ kaw wet munlawomalan naj yinh ismunil Komam Dios.
Chalnipaxto juxhta Lucio yebꞌ juxhta Jasón yebꞌ juxhta Sosípater ta cheyil hebꞌa;
ebꞌnaj juxhta tiꞌ wet konhobꞌ hinbꞌahan yebꞌ ebꞌnaj.
22 Hakinpax tuꞌan hanin Tercio intiꞌan,
chiwalpaxtojan ta cheyil hebꞌa yinh hekawil,
yuto yetonhxa Komam.
Haninan lanhan intzꞌibꞌnhentojan huneꞌ carta tiꞌ yu yaꞌ Pablo.
23 Chalnipaxto juxhta Gayo ta cheyil hebꞌa,
yul yatut juxhta tiꞌ ayonhanh.
Haꞌ bꞌey tiꞌ xin chikokutxbꞌapaxo kobꞌahanh yinh culto yebꞌ sunil makta ayxako yul isqꞌabꞌ Komam Jesucristo.
Chalnipaxto juxhta Erasto ta cheyil hebꞌa,
naj juxhta tiꞌ tesorero naj yul konhobꞌ tiꞌ.
Chalnipaxto juxhta Cuarto ta cheyil hebꞌa.
24 Yaqꞌabꞌayo Komam Jesucristo iskꞌulchꞌanil iskꞌul teyibꞌanh.
¡Hakojabꞌ tuꞌ!
Tzotiꞌ kꞌul yal yaꞌ Pablo yinh Komam Dios
25 Jaqꞌaꞌweko ismay Komam Dios,
Komam chu kexislinhbꞌan hakaꞌ yalni Tzotiꞌ Kꞌul yet Kolbꞌanile walikꞌojan yinh Komam Jesucristo.
Huneꞌ kuybꞌanile tiꞌ ewantikꞌa yehi yettaxtikꞌa maxhto chiwatxꞌi yul sat yibꞌanhqꞌinal tiꞌ yu Komam Dios.
26 Yajaꞌ wal tinanh xin xayaqꞌ Komam ohtanhelaxoj yu tzet tzꞌibꞌnhebꞌilkano yu ebꞌyaꞌ ischejabꞌ Komam yet payat,
hakaꞌtikꞌa yu yalni Komam,
Komam aynhetikꞌa yinh sunilbꞌal tiempo.
Huneꞌ Tzotiꞌ yet kolbꞌanile ewantikꞌa ye tiꞌ,
xaꞌaqꞌlax yohtanhelo sunil anma yunhe yanayto yul yanma kat isyijeni.
27 Yu tzet iswatxꞌe Komam Jesucristo yuxin alaxojabꞌiko ismay Komam Dios yinh sunilbꞌal tiempo,
Komam huneꞌnhechꞌan yebꞌ kaw ay ishelanil.
¡Hakojabꞌ tuꞌ!