Haꞌojabꞌ iskꞌulal chikowatxꞌe xol makta ayxako yul isqꞌabꞌ Komam
15
Hanhonh ayxa yip janma yinh Komam machojabꞌnhetaj hanhonh chijako kobꞌa yinh kokꞌul,
wal xin yilal kokolwa yinh mak maxhto kaw tꞌinhano yekoj.
2 Hununonh tiꞌ haꞌojabꞌ iskꞌulal chikowatxꞌe yinh makta ayxako yul isqꞌabꞌ Komam Dios,
hak tuꞌ xin chitzala iskꞌul yinh Komam yebꞌ yunhe yiqꞌni yip yanma yinh yet Komam.
3 Hakaꞌ Komam Jesucristo,
maxhtaj tzet yoche Komam iswatxꞌe,
wal xin to yij isbꞌa yinh Komam tzet tzꞌibꞌnhebꞌilkanoj bꞌay chala:
«Hayet habꞌuchlaxi,
haninan wabꞌehan isyaꞌil,»a
xhihayoj.
4 Sunil tzet tzꞌibꞌnhebꞌilkano yul Yum Komam Dios yet payat,
kokuybꞌanil yu istzꞌibꞌnhelaxkanoj,
chaqꞌni isnimanil kokꞌul yebꞌ yaqꞌlobꞌal janma,
yunhe janiko Komam yipo janma.
5 Haꞌojabꞌ Komam Dios,
Komam chiꞌaqꞌni isnimanil kokꞌul yebꞌ yaqꞌlobꞌal janma chikolwa teyinh,
haxinwal hunxanhe cheyute henabꞌal,
hakaꞌ isnabꞌal Komam Jesucristo.
6 Hak tuꞌ xin hunxanhe cheyute hebꞌa kat hebꞌitnhen isbꞌi Komam Dios,
Ismam Komam Jesucristo Jahawil.
Hal-lax Tzotiꞌ yet Kolbꞌanile tet anma mach Israeloj
7 Yuxin makta ayxako yul isqꞌabꞌ Komam Dios chahwe texol,
hakaꞌ yu kexischahni Komam Cristo yu heyaniko ismay Komam Dios.
8 Chiwalan huneꞌ tiꞌ teyet tato hul Komam Jesucristo yaqꞌaꞌko isbꞌa ischejabꞌo anma Israel,
yunhe yijni isbꞌa tzet haltebꞌilkano yu Komam Dios tet jichmamanh.
Hak tuꞌ yu isyenipaxilo Komam Cristo tato kaw chij isbꞌa tzet yalte Komam Dios.
9 Yebꞌ xin hulpaxo Komam Cristo,
yunhe yanipaxiko anma mach Israelo ismay Komam Dios yu iskꞌulchꞌanil iskꞌul Komam,
hakaꞌ yalni yul Yum Komam bꞌay chala:
«Yuxin chiwalan kꞌul-la tzotiꞌ tawinh yu yok hamay yulaj iskonhobꞌ anma mach Israeloj,
kat inbꞌitnhenan habꞌi,»b
xhihayoj.
10 Ay huneꞌ bꞌay chalpaxo yul Yum Komam Dios:
«Tzalahanhwe hex mach Israelo hex tiꞌ yinta iskonhobꞌ Komam Dios,»c
xhihayoj.
11 Ay huneꞌxa bꞌay chalpaxoj:
«Sunil nimeta konhobꞌ yebꞌ nixhte konhobꞌ bꞌay ay anma mach Israeloj,
bꞌitnhelaxojabꞌ Komam Dios yu,»d
xhi.
12 Tzꞌibꞌnhebꞌilpaxkanayo yu yaꞌ Isaías:
«Chipitzkꞌa huneꞌ yaꞌ chitit yinh yuninal yaꞌ Isaí,
kat yok yahawo yinh anma mach Israeloj.
Yinh xin chikawxi iskꞌul anma tuꞌ,»e
xhi.
13 Haꞌojabꞌ Komam Dios,
Komam chꞌaqꞌni iskawxobꞌal kokꞌul,
haꞌ chꞌaqꞌni tzalahilal yebꞌ aqꞌankꞌulal teyet,
hex cheyayto yul heyanma yinh Komam;
kat kam yaqꞌnipaxo Komam Espíritu Santo iskawxobꞌal hekꞌul.
14 Hex wuxhtaj hex wanabꞌ kaw wohtajan sikꞌlebꞌil ta kaw kꞌulchꞌan hekꞌul teyinh hunun hex,
yebꞌ xin kaw aypaxo hehelanil,
kaw xin heyohtapaxo hekuyni hebꞌa hunun hex.
15 Yajaꞌ yinh huneꞌ carta tiꞌ ay hunteqꞌan tzet ye tuꞌ ayayo wuhan chiwaltojan teyet yinh sunil wanmahan yunhe mach chenahulnhetoj.
Chiwaltojan hunteqꞌan tiꞌ teyet yuto haꞌ Komam Dios aqꞌnhe huneꞌ inmuniltiꞌan yu iskꞌulchꞌanil iskꞌul.
16 Ischejabꞌ Komam Jesucristo wekojan xol anma mach Israeloj,
haꞌ inmunilan xin haꞌ ton walnikꞌojan Tzotiꞌ Kꞌul yet Kolbꞌanile yunhe yok anma mach Israelo yul isqꞌabꞌ Komam,
hakaꞌ hunu xahanbꞌal kaw chitzala Komam yinh,
sajnhebꞌilxa yu Komam Espíritu Santo.
17 Wal xin yu kaw ayinxakojan yul isqꞌabꞌ Komam Jesucristo yuxin kaw chintzalahan yinh inmunilan aqꞌbꞌil yu Komam Dios.
18 Mach chu walnihan yinh tzet chu ismunla hunuxa mak yinh ismunil Komam,
to hanhkꞌanhe yinh tzet chu kinisqꞌannihan Komam Cristo yinh ismunil yinh winitijan anma mach Israelo yinh isyijen tzet chal Komam Dios,
hanhe chiwalan.
Huneꞌ tiꞌ yij isbꞌa yinh tzet walan yebꞌ yinh tzet inwatxꞌehan,
19 yebꞌ yu yip tzettaj inyehan,
yebꞌ yu yip kꞌaybꞌalkꞌule,
yebꞌ yu yip Komam Espíritu Santo;
hak tuꞌ yu inyijenan yinh walnikꞌojan Tzotiꞌ yet kolbꞌanile yinh Komam Cristo.
Hata bꞌey yul konhobꞌ Jerusalén kinichikojan walnikꞌojan;
kaw sunil bꞌay kinekꞌan walaꞌkꞌojan masanta kinapnihan yul ismajul txꞌotxꞌ Ilírico.
20 Hak tuꞌ yu waniko yinh inkꞌulan walnikꞌojan Tzotiꞌ yet kolbꞌanile bꞌay maxhtotikꞌa chiꞌabꞌelax isbꞌina isbꞌi Komam Jesucristo,
yunhe machi hunu mak chihalni ta toxanhe kinekꞌan inlahaꞌan munil tzabꞌilxakoj.
21 Yul Yum Komam Dios tzꞌibꞌnhebꞌilkanoj:
«Chiyilaꞌ anma huneꞌ mak maxhtotikꞌa bꞌay chiꞌabꞌelax isqꞌumal.
Mak maxhtotikꞌa bꞌay chabꞌe istzotiꞌal,
chitxumchalo yu,»f
xhihayoj.
Yet yalnito yaꞌ Pablo ta chito yaꞌ ilwal yinh makta ayxako yul isqꞌabꞌ Komam bꞌey Roma
22 Yuxin maxhtotikꞌa chu intohan kexwilaꞌan,
waxanhka xin txꞌiꞌalxa el chiwochehan intohan.
23 Yajaꞌ wal tinanh xin xalahwi inmunilan yul hunteqꞌan konhobꞌ tiꞌ.
Kaw txꞌiꞌalxa tiempo yichi wochenan intohan kexwilnojan.
24 Yuxin hayet chintohan yinh inbꞌelan bꞌey España kat wekꞌan kexwilnojan,
lahwi istzala wanmahan kexwilnihan yinh hayebꞌo tzꞌayik xin,
chiwochehan tato chexkolwa winhan inlahnihan inbꞌel tuꞌan.
25 Yajaꞌ wal tinanh xin chintohan bꞌey Jerusalén waqꞌaꞌkanojan hanikꞌ chꞌen ofrenda chikolwa yinh ebꞌnaj juxhta ay bꞌey Jerusalén tuꞌ.
26 Yuto ebꞌnaj juxhta yebꞌ ebꞌix janabꞌ ay bꞌey Macedonia yebꞌ bꞌey Acaya tiꞌ,
el yinh iskꞌul iskutxbꞌanayo hanikꞌ chꞌen ofrenda,
kat yilaxto chꞌen tet anma mebꞌaꞌ ayxako yul isqꞌabꞌ Komam bꞌey Jerusalén.
27 Kaw kꞌul huneꞌ tiꞌ yuto hakaꞌtikꞌa yu yaqꞌni ebꞌnaj juxhta Israel iskꞌulal Komam tet ebꞌnaj mach Israeloj,
hak tuꞌ xin chu ispajtzen ebꞌnaj yinh tzet ay tet ebꞌnaj juxhta Israel tuꞌ.
28 Yuxin chito yijkano isbꞌa huneꞌ inchejbꞌaniltiꞌan intohan waqꞌnokanojan chꞌen ofrenda tuꞌ,
lahwi tuꞌ kat wekꞌan kexwilnojan yet chintohan bꞌey España.
29 Ayko yinh wanmahan ta hayet chinekꞌan texol,
txꞌiꞌal iskꞌulal Komam Cristo chiyaqꞌkano jet.
30 Hex wuxhtaj hex wanabꞌ,
kaw chinqꞌanan teyet yinh isbꞌi Komam Jesucristo yebꞌ yu iskꞌulchꞌanil iskꞌul Komam Espíritu Santo tato cheyako yinh hekꞌul hekolwa hetxahli winhan tet Komam Dios.
31 Qꞌanwe tet Komam Dios,
haxinwal chiniskolan Komam tet ebꞌnaj ah Judea mach chayto yul yanma yinh Komam,
yebꞌpaxo xin yunhe kꞌul chu ischahni ebꞌnaj juxhta ay bꞌey Jerusalén huneꞌ kolwal chiwitotiꞌan.
32 Qꞌanwepaxo tet Komam haxinwal ta hak tuꞌ chiꞌel yinh iskꞌul Komam chinapnihan kexwilaꞌan kat inxewninojan texol yinh tzalahilal.
33 Haꞌojabꞌ Komam yahaw aqꞌankꞌulal chiꞌok heyetbꞌihoj.
¡Hakojabꞌ tuꞌ!