Machojabꞌ chijal isqꞌumal makta maxhto yip yanma yinh Komam Dios
14
Chahwe mak maxhto yip yanma yinh Komam texol.
Mach chebꞌuch hebꞌa yebꞌi.
2 Yuto ay mak yohtaj tato chu koloni sunil tzettaj ye tuꞌ,
aypaxo xin ebꞌnaj juxhta chito kabꞌkon yanma islohni sunil tzettaj ye tuꞌ,
yuxin itahnhe chislo.
3 Wal xin haꞌ mak chiloni sunil tzettaj ye tuꞌ machojabꞌ chisyah mak mach chiloni sunil tzettaj ye tuꞌ.
Haxa mak mach chiloni sunil tzettaj ye tuꞌ,
machojabꞌ chal isqꞌumal mak chiloni sunil tzettaj ye tuꞌ,
yuto haꞌ huneꞌ mak tuꞌ chabꞌilxa Komam yu.
4 Qꞌinalo tinanh ta ay hunu naj chimunla yinta ispatrón,
¿tom ay jok jalni isqꞌumal naj munlawom tuꞌ?
¡Machoj!
Wal xin hanhkꞌanhe naj ispatrón naj tuꞌ chalni ta kꞌul naj maka machoj.
Hak tuꞌ je yul sat Komam Dios,
kꞌul chonhelikoj yuto ay yip Komam konhiswatxꞌeniko yinh iskꞌulal.
5 Aypaxo xin mak tiꞌ chalni tato ay tzꞌayik ekꞌbꞌal yelapno yibꞌanh hunuxa tzꞌayik,
aypaxo mak chalni tato lahannhe yelapno sunil tzꞌayik;
wal xin tꞌinhanojabꞌ jekoj yinh tzet chikowatxꞌe.
6 Yuxin haꞌ mak chiyijen hunu tzꞌayik haꞌ tet Komam chisyije,
hakpax tuꞌ mak mach chiyijen hunu tzꞌayik,
yu Komam yuxin mach chisyije.
Hakpax tuꞌ xin mak chiloni sunil tzet ye tuꞌ,
yu yaniko ismay Komam yuxin chislo,
chaqꞌni yuchꞌandiosal tet Komam Dios yinh tzet chislo.
Hakpax tuꞌ mak mach chiloni sunil tzet ye tuꞌ,
yu yaniko ismay Komam yuxin mach chislo,
chaqꞌnipaxo yuchꞌandiosal tet Komam.
7 Yulbꞌal yet itzitzonh,
mach jeto kobꞌa kochukil,
hakpax tuꞌ yet chonhkami mach jeto kobꞌa.
8 Ta itzitzonh yul sat yibꞌanhqꞌinal tiꞌ to yu koyijen tzet chal Komam;
taka chonhkam xin yettikꞌapaxo Komam jehi.
Yuxin waxanhka itzitzonh maka chonhkami,
yet Komam jehi.
9 Yuxin kam Komam Jesucristo,
yitzitzibꞌikanh hunelxa yu yok Komam Yahawil yinh anma kamom yebꞌ anma itzitz.
10 Yuxin mach chu jalni isqꞌumal maka koyahni hunu juxhtaj maka hunu janabꞌ,
yuto kosunil chonhok sata Komam kat yilni Komam yinh tzet chonhelikoj.
11 Chal yul Yum Komam Dios:
«Hanin Yahawintiꞌan,
chiwaqꞌ bꞌinaho inbꞌihan yinh tzet chiwaltiꞌan tato sunil anma chihul insatajan,
yebꞌ sunil mak yilal yalni yu istiꞌ ta haninnhechꞌanan Dios hinan,»a
xhihayoj.
12 Yuxin sunilonh chonhok sata Komam Dios kat jalni yinh tzet kowatxꞌe hununonh.
Machojabꞌ chijaqꞌ somchaho isnabꞌal makta ayxako yul isqꞌabꞌ Komam
13 Yuxin mach chu heyalni heqꞌumal hunun hex,
wal xin aweko yinh hekꞌul hewatxꞌen iskꞌulal,
haxinwal machi hunu mak cheyaqꞌ aykꞌayoj,
kat issomchakanto isnabꞌal heyu.
14 Hanintiꞌan kaw wohtajan tato machi hunu tzet chilolax tiꞌ ayko istxꞌojal yinh,
kaw tꞌinhan wehan yinh huneꞌ tiꞌ yuto yuninalxa Komam Jesucristo wehan.
Yajaꞌ tato ay hunu mak chitxumni tato ayko istxꞌojal yinh hunu tzet ye tuꞌ,
txꞌoj islohni chal tuꞌ.
15 Yuxin ta yu tzet cheloh cheyaqꞌ tako iskꞌul hunu ebꞌnaj juxhtaj,
haꞌ chal yelapno tuꞌ mach xahano cheyil hebꞌa.
¡Machojabꞌtaj yu tzet cheloh cheyaqꞌ aykꞌayo hunu maka,
yuto haꞌ huneꞌ mak tuꞌ bꞌay yaqꞌkamo isbꞌa Komam Jesús!
16 Machojabꞌ cheyaqꞌ yubꞌ anma istzotel teyinh yu tzet chewatxꞌe.
17 Hanhonh ayonhxako yul isqꞌabꞌ Komam Dios mach chiyok yinh tzet chikolo maka tzet chijukꞌu,
wal xin haꞌ jekꞌ yinh istoholal,
yebꞌ jekꞌ yinh aqꞌankꞌulal,
yebꞌ yinh tzalahilal yu Komam Espíritu Santo.
18 Haꞌ mak chiyijen tet Komam Cristo hakaꞌ tuꞌ,
chitzala Komam Dios yinh,
kaw kꞌulpaxo huneꞌ mak tuꞌ yul sat anma.
19 Yuxin kolahaweko kowatxꞌen tzet chonhaniko yinh aqꞌankꞌulal,
hak tuꞌ chu kokolwa jinh hununonh yinh kochꞌibꞌ yinh yet Komam.
20 Machojabꞌ cheyaqꞌ etaxoto ismunil Komam Dios yu tzet cheloh.
Yinh kaw isyelal sunil tzet chilolaxi mach istxꞌojal ayko yinh.
Haꞌ istxꞌojal,
haꞌ koloni hunu tzet ye tuꞌ chiꞌaqꞌni kabꞌkonokanh yanma hunu mak yinh Komam.
21 Ekꞌbꞌalto kꞌul ta mach chikokꞌux noꞌ chibꞌe maka jukꞌni vino maka hunuxa tzet ye tuꞌ,
sata jaqꞌni aykꞌayo hunuxa juxhtaj.
22 Haꞌ tzet cheyayto yul heyanma,
tꞌinhanojabꞌ heye yinh yul sat Komam Dios.
¡Saqꞌal yet mak mach chikabꞌkon iskꞌul yinh tzet chiswatxꞌe!
23 Yajaꞌ wal mak chikabꞌkon yanma islohni hunu tzet ye tuꞌ,
hayet chisloni chako ismul,
yuto mach yinh sunilo yanma chisloni.
Yuxin ta mach tꞌinhano jeko yinh tzet chikowatxꞌe,
chijako komul.