13
Yijemojabꞌ cheyute hebꞌa hesunil yinh tzet chal ebꞌnaj alkal,
yuto machmi ebꞌnaj alkal tato maxhtaj Komam Dios anheko ebꞌnaj yinh huneꞌ munil tuꞌ,
wal xin haꞌ Komam anheko ebꞌnaj yinh ismunil.
2 Yuxin haꞌ mak chimanhkꞌon yinh tzet chal ebꞌnaj,
chismanhkꞌo yinh tzet aqꞌbꞌilkano yu Komam Dios.
Haꞌ mak manhkꞌom tuꞌ xin chiꞌalaxayo isyaꞌtajil yibꞌanh.
3 Ebꞌnaj alkal tuꞌ,
mach ayoko ebꞌnaj yinh ismunil yu yaqꞌni xiwo ebꞌnaj anma chiwatxꞌen iskꞌulal,
wal xin to yu yanayo ebꞌnaj isyaꞌtajil yibꞌanh mak txꞌoj chiswatxꞌe.
Yuxin ta mach cheyoche chexaqꞌlax xiwoj,
watxꞌewe istoholal,
hak tuꞌ xin chitzala ebꞌnaj teyinh.
4 Yuto ebꞌnaj alkal ayko ebꞌnaj isyijen huneꞌ munil aqꞌbꞌil yu Komam tuꞌ yu iskꞌulalo teyinh,
yajaꞌ ta istxꞌojal chewatxꞌe xin yilaltikꞌa hexiwi,
yuto aqꞌbꞌil ismunil ebꞌnaj yanayo isyaꞌtajil yibꞌanh anma txꞌoj chiswatxꞌe.
Yu yanayo ebꞌnaj isyaꞌtajil yibꞌanh anma manhkꞌom,
yuxin ayko ebꞌnaj yinh ismunil yu Komam.
5 Yuxin yilal heyijen yinh tzet chal ebꞌnaj,
maxhnhetaj yu chexxiw yay isyaꞌtajil teyibꞌanh,
wal xin to yu hak tuꞌ choche Komam tato chikoyije.
6 Yuxin yilal heyaqꞌni hetohlabꞌal yuto haꞌ Komam Dios aqꞌnhe huneꞌ munil tuꞌ tet ebꞌnaj,
haꞌ xin lanhan isyijen ebꞌnaj.
7 Hayet chiqꞌanlax chꞌen tohlabꞌal,
yilal heyaqꞌni chꞌen,
yebꞌ xin chetohlawe heyornato maka hunu licencia hakaꞌ yalni ley.
Haꞌ mak ay yet isyijelax tzet chala,
yilal heyijen tet;
haxa mak ay yelapnoj,
ayojabꞌ yelapno yul hesat.
Haꞌ mak yilal yalaxiko ismay,
yilal heyaniko ismay.
8 Machojabꞌ hekꞌas tet hunu maka,
wal xin haꞌojabꞌ hexahannhen hebꞌa hanhehojabꞌ chiꞌok hekꞌasoj,
yuto haꞌ mak chixahannhe yet anmahil lanhan isyijen ischejbꞌanil Komam.a
9 Yuto chal ischejbꞌanil Komam Dios:
«Mach chaxhixli mach chaxhwinajli,
mach chaxhpotxꞌwahi,
mach chaxhelqꞌawi,
mach chahobꞌkanh leqꞌtiꞌal yinh hawet anmahil,»b
xhi.
Hunteqꞌan chejbꞌanil tiꞌ yebꞌ hunteqꞌanxa,
huneꞌxanhe chiꞌelikoj chalni hakaꞌ tiꞌ:
«Xahan chawil hawet anmahil hakaꞌ hayaꞌilnhen habꞌa,»
xhi.
10 Haꞌ mak xahan ay yet anmahil yu,
mach istxꞌojal chiswatxꞌe yinh yet anmahil tuꞌ,
yuto hayet chisxahannhe yet anmahil,
tzꞌajan lahan chisyije ischejbꞌanil Komam.
11 Yuxin kaw txumwe yinh huneꞌ tiempo bꞌay ayonh tiꞌ,
istiempohalxa jinilo kowayanh,
yuto tinanh kawilxa yeti kokolbꞌanil sata yet janayto yul janma yinh Komam.
12 Tinanh xin kawilxa yeti tiempo,
lahan hakaꞌ yet xaꞌekꞌto aqꞌbꞌal,
lanhanxa issajbꞌiloj.
Yuxin kobꞌejaꞌwekano sunil istxꞌojal yet qꞌejholo,
kat kowatxꞌen kobꞌa jekꞌ yinh issajilqꞌinal Komam,
hakaꞌ chu iswatxꞌen isbꞌa naj soldado,
yet chaniko naj hunteqꞌan xilqꞌape yet howal.
13 Kowatxꞌewe istoholal hakaꞌ tzet chiwatxꞌelax yet tzꞌayikal.
Machojabꞌ chonhekꞌ yinh ukꞌu teꞌ,
machojabꞌ chonhekꞌpaxo yinh peqꞌal maka yinh ixloj.
Machojabꞌ chikoqꞌaytzeko istxꞌojal jinh,
machojabꞌ chijaqꞌle howal koxol maka ischiwa kokꞌul jinh hununonh.
14 Hakaꞌojabꞌ hunu naj soldado chiswatxꞌe isbꞌa chaniko hunteqꞌan xilqꞌape yet howal yinh,
hakojabꞌ tuꞌ kowatxꞌen kobꞌa yinh yet Komam Jesucristo,
machojabꞌ chijaqꞌ yubꞌ istxꞌojal tzet choche konimanil.