Yijemojabꞌ chijute kobꞌa tet Komam Dios
12
Hex wuxhtaj hex wanabꞌ,
kaw chinqꞌanan teyet yu iskꞌulchꞌanil iskꞌul Komam Dios xayaqꞌ jet,
tato cheyako hebꞌa yul isqꞌabꞌ Komam hakaꞌ hunu xahanbꞌal itzitz chiꞌaqꞌlax tet Komam.
Ta chijako kobꞌa yul isqꞌabꞌ Komam hakaꞌ tuꞌ,
yetxanhe Komam chiju,
kaw chitzalapaxo Komam jinh.
Hak tuꞌ chu jinayo kobꞌa tet Komam.
2 Machojabꞌ chebꞌeybꞌalnhe hakaꞌ isnabꞌal anma yul sat yibꞌanhqꞌinal tiꞌ,
wal xin helwe henabꞌal haxinwal chiꞌakꞌbꞌilo sunil hebꞌeybꞌal.
Hak tuꞌ xin chu heyohtanhenilo tzet choche Komam;
hunteqꞌan iskꞌulal yebꞌ hunteqꞌan chitzala Komam yinh,
yebꞌ hunteqꞌan tzꞌajan lahan yehi.
3 Haꞌ Komam anheko huneꞌ munil tiꞌ yul inqꞌabꞌan yuxin chiwalan teyet tato machojabꞌ hunujex chexekꞌbꞌanli hetxumniko teyinh yibꞌanh tzet chaqꞌ Komam hetxumuꞌ.
Wal xin to haꞌ heyet,
txumwej tzet munilal xayaqꞌ Komam teyet hatatikꞌa yip heyanma chaqꞌ Komam.
4 Hakaꞌtikꞌa ye konimanil tinanh,
kaw txꞌiꞌal yiqꞌni isbꞌa,
yajaꞌ nananta ismunil hunun.
5 Hak tuꞌ xin je hanhonh tiꞌ yinh Komam,
waxanhka kaw txꞌiꞌalonh,
yajaꞌ huneꞌnhe nimanile je yinh Komam Jesucristo,
yuxin jetbꞌixa kobꞌa yuto hunxanhe nimanile jehi.
6 Nanantanhe komunil yaqꞌ Komam Dios jet hununonh,
hatatikꞌa munil el yinh iskꞌul Komam haꞌ yaqꞌ jet.
Yuxin haꞌ mak bꞌay yaqꞌ Komam ismunil yalnikꞌo Istzotiꞌ,
yalaꞌbꞌikꞌoj hatatikꞌa yip yanma chaqꞌ Komam.
7 Yebꞌ haꞌ mak bꞌay yaqꞌ Komam ismunil yinh iskolwahi,
kolwahojabꞌ yinh kaw kꞌul.
Haxa mak aqꞌlax ismunil iskuywahi,
yaqꞌabꞌiko yinh iskꞌul iskuywahi.
8 Haxa mak aqꞌlax ismunil yinh yiptzeli,
isyijeꞌabꞌ ismunil tuꞌ yinh yiptzeli.
Haꞌ mak chiꞌaqꞌni hunu tzet ye tuꞌ tet yet anmahil,
yaqꞌabꞌ yinh sunil yanma.
Haxa mak aqꞌlax ismunil yijbꞌali,
yinhojabꞌ sunil iskꞌul chiꞌijbꞌali.
Haxa mak chikolwa yinh mak matzet aya,
yinhojabꞌ tzalahilal chikolwahi.
Hunteqꞌan yilal isbꞌeybꞌalnhen yuninal Komam Dios
9 Xahanojabꞌ cheyil hebꞌa hunun hex,
yajaꞌ yinh sunil heyanma.
Yahwekano sunilal istxꞌojal kat helahniko hewatxꞌen sunil iskꞌulal.
10 Xahanojabꞌ cheyil hebꞌa hunun hex,
yuto yuninalxa Komam Dios heyehi,
nimanojabꞌ yelapno ye ebꞌnaj juxhtaj yebꞌ ebꞌix janabꞌ yul hesat.
11 Helanojabꞌ hex,
machojabꞌ isah cheyute hebꞌa,
wal xin yijemojabꞌ cheyute hebꞌa tet Komam yinh sunil heyanma.
12 Tzalahanhwe sunilbꞌal tiempo yuto ay tzet ayko yipo heyanma.
Aqꞌwe techaho sunil isyaꞌtajil chul teyibꞌanh yebꞌ xin mach chebꞌej hetxahli tet Komam Dios.
13 Kolwahanhwe yinh makta yetxa Komam matzet aya.
Ta ay mak chiꞌekꞌ tekꞌatanh,
kꞌulojabꞌ chu hechahni.
14 Qꞌanwe iskꞌulal Komam Dios yibꞌanh mak chiꞌaqꞌni ekꞌoyaꞌ heyanma,
mach chetzꞌaktiꞌnhe,
to haꞌ iskꞌulal cheqꞌan yibꞌanh.
15 Aqꞌwe tzalaho hekꞌul yinta mak tzalahilal yehi,
yebꞌ xin okanhwe yinh bꞌiskꞌulal yinta mak bꞌiskꞌulal yehi.
16 Ayojabꞌ tzalahilal texol hunun hex.
Mach cheyute hebꞌa loloꞌal,
wal xin utewe hebꞌa hakaꞌ anma machi yelapnoj,
mach cheyute hebꞌa hakaꞌ mak kaw ay ishelanil chute yalni.
17 Mach cheyaqꞌ istxꞌojal ispajo istxꞌojal chiswatxꞌe anma teyinh.
Aweko yinh hekꞌul hewatxꞌen iskꞌulal sata sunil anma.
18 Aqꞌwe heyanma heyehikꞌo yinh aqꞌankꞌulal yebꞌ sunil anma.
19 Hex wuxhtaj hex wanabꞌ,
hex xahan ay wuhan,
machojabꞌ cheyaqꞌ istxꞌojal ispaj selel tet mak chiwatxꞌen istxꞌojal teyinh,
wal xin awekano yul isqꞌabꞌ Komam Dios,
haꞌ Komam chiꞌaqꞌni ispaj selel tet mak chiwatxꞌen istxꞌojal tuꞌ.
Yuto chal yul Yum Komam Dios:
«Haninnhehan chu wanayojan isyaꞌtajil yibꞌanh mak chiwatxꞌen istxꞌojal,
haninnhehan chu inpajtzenan,»
xhi Komam Dios Jahawil,
xhihayoj.
20 Chalnipaxo yul Yum Komam:
«Tato chinhohcha hunu mak ayko ishowal tawinh,
aqꞌ tzet chislo.
Taka chitaj istiꞌ xin,
aqꞌpaxo haꞌ yukꞌuꞌ,
hak tuꞌ xin chitak iskꞌul kat istxꞌixwikanh,»
xhihayoj.
21 Machojabꞌ chiqꞌoji istxꞌojal teyinh,
wal xin haꞌojabꞌ iskꞌulal chewatxꞌe,
haxinwal chexqꞌoji yinh istxꞌojal.