Ay haywanh ebꞌnaj Israel sikꞌbꞌililoj
11
Tinanh xin chinqꞌambꞌehan:
¿Tom xayintanhekanilto Komam Dios iskonhobꞌ,
chal tuꞌ?
¡Machoj!
Hanintiꞌan,
Israel inpaxojan,
yaꞌ Abraham wichmaman,
yinh yaꞌ Benjamín titnaj hinan.
2 Hataxtikꞌa yet yalanhtokanoj,
yanikaniko Komam Dios ebꞌnaj Israel tuꞌ iskonhobꞌoj,
tinanh xin mach yahbꞌilo anma Israel tuꞌ yu Komam.
Chisje henaniti yinh tzet tzꞌibꞌnhebꞌilkano yul Yum Komam yinh yaꞌ Elías yet yalni yaꞌ tet Komam Dios yinh ej ismul yet konhobꞌ Israel:
3 «Mamin,
ebꞌnaj wet konhobꞌtiꞌan yaqꞌkamo ebꞌnaj ebꞌyaꞌ hachejabꞌ,
yuchkꞌanpaxto ebꞌnaj bꞌay chiꞌaqꞌlax xahanbꞌal tawet.
Haninxanhehan ayinikꞌojan,
yajaꞌ chinispotxꞌpaxojan ebꞌnaj yalni,»a
xhi yaꞌ.
4 Istaqꞌwi Komam Dios tet yaꞌ Elías tuꞌ:
«Xaꞌinsikꞌilojan hujebꞌ mil ebꞌnaj winaj mach ay jahno sata tioxh Baal,»
xhi Komam.
5 Hakpax tuꞌ tinanh,
ay haywanh ebꞌnaj sikꞌbꞌililo yu iskꞌulchꞌanil iskꞌul Komam Dios.
6 Yuto yu iskꞌulchꞌanil iskꞌul Komam yuxin issikꞌilo Komam ebꞌnaj,
maxhtaj yu tzet iswatxꞌe ebꞌnaj.
Yajaꞌ ta yu iskꞌulal iswatxꞌe ebꞌnaj yuxin issikꞌilo Komam ebꞌnaj,
matxam tzet chal yelapno iskꞌulchꞌanil iskꞌul Komam chal tuꞌ.
7 ¿Tzet xin eliko anma Israel?
Wal xin issay ebꞌnaj yinh tzet yu iskan kꞌulal yul sat Komam Dios,
yajaꞌ mach tzujcha apno yu ebꞌnaj.
Hanhkꞌanhe ebꞌnaj issikꞌilo Komam kan kꞌulal sata Komam,
wal hunteqꞌanxa ebꞌnaj Israel tuꞌ yaqꞌ kawbꞌolo Komam yanma ebꞌnaj.
8 Hakaꞌ yalni yul Yum Komam Dios bꞌay chala:
«Yaqꞌ kawbꞌo Komam Dios yanma ebꞌnaj.
Waxanhka chil ebꞌnaj yip Komam,
yajaꞌ mach chitxumcha yu ebꞌnaj.
Waxanhka chabꞌe ebꞌnaj Istzotiꞌ Komam,
yajaꞌ mach chitxumchapaxo yu ebꞌnaj yinh tzet chaliloj.
Hak tuꞌ ye hunteqꞌan ebꞌnaj tuꞌ tinanh,»b
xhihayo.
9 Yalpaxo yaꞌ David:
«Haꞌtikꞌa isqꞌinh ebꞌnaj chiyekꞌtze,
haꞌ chiꞌok latzꞌabꞌo yinh,
yunhe yaykꞌayi kat yalaxayo isyaꞌtajil yibꞌanh.
10 Hakaꞌtanhe chitanhilo ismujlubꞌal yuxin mach chu yilni.
Hakaꞌ hunu mak kꞌonhanxa ye yalanh ijatz,
hak tuꞌ chukano ebꞌnaj yinh sunilbꞌal ej tzꞌayik,»c
xhi yaꞌ rey David.
Iskolbꞌanil anma mach Israeloj
11 Tinanh xin chinqꞌambꞌepaxojan:
¿Tom xin hayet yaykꞌay ebꞌnaj Israel tuꞌ yaykꞌaykano ebꞌnaj yinh hunelnhe?
¡Machoj!
Yuto hayet ismanhkꞌon ebꞌnaj yinh tzet yal Komam Dios,
istzujcha apno iskꞌulchꞌanil yu anma mach Israeloj yunhe hayet chilni ebꞌnaj Israel tuꞌ kat yocheniko ebꞌnaj iskꞌulal Komam.
12 Yuxin tato hayet yaniko ismul ebꞌnaj Israel ischahnikano tzetkꞌa anma ay yul sat yibꞌanhqꞌinal tiꞌ iskꞌulal Komam Dios,
yebꞌ tato yet yaykꞌay ebꞌnaj Israel tuꞌ ischahnikano anma mach Israelo iskꞌulal Komam,
hajxam yet chimeltzoko sunil anma Israel yul isqꞌabꞌ Komam Dios,
hantanhem iskꞌulal chischah sunil anma yul sat yibꞌanhqꞌinal tiꞌ.
13 Tinanh xin,
ay huneꞌ tzet chiwalan teyet hex mach Israeloj.
Haꞌ Komam anheinikojan ischejabꞌoj xol anma mach Israeloj,
kaw xin niman yelapno ye huneꞌ munil tiꞌ yul insatan.
14 Chiwochehan tato chil ebꞌnaj wet konhobꞌtiꞌan hekolchahi,
kꞌuxantaxka ay ebꞌnaj chochekanh kat iskolchapaxoj.
15 Tato hayet yintanhenkanilto Komam Dios anma Israel,
yok anma mach Israelo yinh aqꞌankꞌulal yebꞌ Komam;
nanxam yok iskꞌulal yet chichahlax ebꞌnaj Israel tuꞌ yu Komam hunelxa,
lahanmi hakaꞌ yet chiꞌitzitzbꞌikanh anma yinh kamikal.
16 Qꞌinalo hakaꞌ ixim bꞌabꞌel pan chiwatxꞌi yinh ixim harina,
ta yet Komam ye ixim bꞌabꞌel,
yetpaxo Komam ye sunil ixim harina tuꞌ,
chal tuꞌ.
Yebꞌpaxo xin hunu te teꞌ,
tato yet Komam ye isxeꞌ teꞌ yettikꞌapaxo Komam ye isqꞌabꞌ teꞌ,
chal tuꞌ.
17 Ay ebꞌnaj Israel tiꞌ hakaꞌ isqꞌabꞌ teꞌ olivo tzokꞌbꞌililoj,
hak tuꞌ yehi,
haxa hex tiꞌ xin lahan hex hakaꞌ isqꞌabꞌ teꞌ xoltelajil olivo tzakꞌbꞌiliko yinh yoj teꞌ kaw olivo isselelo ebꞌnaj.
Hak tuꞌ yu heyetbꞌinhenkano hebꞌa yebꞌ teꞌ isxeꞌ olivo tuꞌ,
heyiqꞌnikano heqꞌinal yinh teꞌ.
18 Mach cheyala ta ekꞌbꞌal kꞌul hex sata teꞌ kaw isqꞌabꞌ olivo tuꞌ,
ta cheyala ta ekꞌbꞌal kꞌul hex xin,
nawetij tato maxhtaj hex iqꞌnhe teꞌ isxeꞌ olivo tuꞌ,
to haꞌ teꞌ xeꞌ tuꞌ iqꞌnhe hex.
19 Yajaꞌ chimheyal hakaꞌ tiꞌ:
«Tzokꞌlaxilto teꞌ isqꞌabꞌ tuꞌ yunhe kotzakꞌbꞌalaxiko yinh teꞌ yoj olivo tuꞌ,»
kexchimi.
20 Yeli hak tuꞌ yehi,
anma Israel tuꞌ ilaxiloj yuto mach yayto yul yanma yinh Komam,
wal hexpaxo xin yu heyayto yul heyanma yinh Komam,
yuxin kexalaxiko isselelo ebꞌnaj;
yuxin machojabꞌ cheyikanh hebꞌa,
xiwanhwej.
21 Yuto ta mach yaqꞌ nimankꞌulal Komam Dios yinh ebꞌnaj Israel hakaꞌ isqꞌabꞌ teꞌ kaw olivo yehi,
hajxamexpaxo chal tuꞌ,
mach chaqꞌ nimankꞌulal Komam teyinh ta chebꞌej heyanayto yul heyanma yinh Komam.
22 Txumweloj tato kaw kꞌulchꞌan iskꞌul Komam,
yajaꞌ xin kaw howpaxoj.
Kaw yiti Komam ishowal yinh ebꞌnaj yetato isbꞌa,
wal teyinh xin kaw kꞌulchꞌan yute iskꞌul Komam,
yajaꞌ tanhe yinhnhe iskꞌulchꞌanil iskꞌul Komam chelahiko iskawxi hekꞌul,
ta mach xin haꞌ hunex chextzokꞌlaxiltoj.
23 Yajaꞌ xin ta chimeltzo ebꞌnaj Israel kat yanayto ebꞌnaj yul yanma yinh Komam chiꞌalaxpaxiko ebꞌnaj yinh yoj teꞌ olivo hunelxa,
yuto ay yip Komam yaniko ebꞌnaj isqꞌabꞌo teꞌ hunelxa.
24 Hex mach Israelo hex tiꞌ,
lahan hex hakaꞌ isqꞌabꞌ teꞌ xoltelajil olivo kextzokꞌlaxiloj heyalaxiko yinh teꞌ kaw olivo,
hajxam ebꞌnaj Israel tiꞌ,
to hakaꞌ kaw isqꞌabꞌ teꞌ olivo ye ebꞌnaj,
yuxin chisje yalaxpaxiko ebꞌnaj yinh teꞌ hunelxa.
Chiꞌapni istiempohal bꞌay chikolcha ebꞌnaj Israel
25 Hex wuxhtaj hex wanabꞌ,
chiwochehan cheyohtanhelo tzet ewan ye yu Komam Dios,
yunhe machi hex cheyala tato kaw ay hehelanil.
Ebꞌnaj wet Israelan etza sunil ebꞌnaj kawbꞌilo yanma,
hak tuꞌ xin chukano ebꞌnaj masanta chiꞌokkano sunil anma mach Israelo yul isqꞌabꞌ Komam.
26 Hayet chijni isbꞌa huneꞌ tuꞌ kat iskolcha ebꞌnaj wet konhobꞌan,
hakaꞌ yalni yul Yum Komam Dios bꞌay chala:
«Bꞌey Sión chitit yaꞌ chiꞌaqꞌni kolbꞌanile kat yinilo yaꞌ istxꞌojal yinh ej yuninal yaꞌ Jacob.d
27 Haꞌ huneꞌ tiꞌ xin intratohan yebꞌ ebꞌnaj yet chintanhtzenkanilojan ismul ebꞌnaj yibꞌanh,»e
xhi Komam.
28 Huneꞌ kuybꞌanile yet kolbꞌanile tiꞌ kaw ayko ishowal ebꞌnaj wet Israelan yinh,
yunhe yaqꞌlax hamanil teyet,
yajaꞌ mach chisbꞌej Komam yochen ebꞌnaj,
yuto haꞌ Komam sikꞌlenkano yichmam ebꞌnaj.
29 Yuto haꞌ tzet chaqꞌ Komam jet mach chilo Komam hunelxa,
yebꞌ xin haꞌ mak awtebꞌil yu Komam mach chismanhkꞌoto Komam.
30 Yet yalanhtokanoj kaw manhkꞌomex hex tiꞌ,
yajaꞌ wal tinanh xatzꞌay iskꞌul Komam teyinh yu ismanhkꞌomal ebꞌnaj Israel tuꞌ.
31 Yexnhetotikꞌa xin ismanhkꞌomal ebꞌnaj wet konhobꞌ Israelan tuꞌ tinanh,
yajaꞌ yunhe yilni ebꞌnaj iskꞌulchꞌanil Komam chaqꞌ teyet,
hak tuꞌ xin chitzujchapax apno iskꞌulchꞌanil iskꞌul Komam yu ebꞌnaj.
32 Yuto yal Komam Dios tato lahan komanhkꞌomal kosunil,
hak tuꞌ xin lahannhe istzꞌaypaxo iskꞌul Komam jinh kosunil.
33 ¡Kaw mach isbꞌi hanta iskꞌulal Komam Dios,
yebꞌ xin ishelanil,
yebꞌpaxo isnabꞌal!
Kaw machi hunu mak chiqꞌoji istxumni yinh tzet chiꞌekꞌ yinh isnabꞌal Komam yebꞌ xin yinh tzet chiswatxꞌe Komam.f
34 Hakaꞌ yalni yul Yum Komam Dios:
«¿Maktaxka hunu mak chiꞌohtanhenilo tzet chiꞌekꞌ yinh isnabꞌal Komam?
¿Maktaxka chu istzꞌajbꞌan iskꞌul Komam?
35 ¿Mak hunu tiꞌ aqꞌnhe hunu tzet ye tuꞌ tet Komam bꞌabꞌel yunhe ischahni ispaj selel tet Komam?»g
xhihayoj.
36 Wal xin sunil tzettaj ye tuꞌ,
tet Komam chitita;
yu Komam yuxin aya,
ismaypaxo Komam ye sunil.
¡Yuxin alaxojabꞌiko ismay Komam yinh sunilbꞌal tiempo!
¡Hakojabꞌ tuꞌ!h