10
Hex wuxhtaj hex wanabꞌ,
haꞌ huneꞌ chiwochehan yebꞌ kaw ayinikojan inqꞌannihan tet Komam Dios ta chischah wet konhobꞌ Israelan iskolbꞌanil.
2 Hanintiꞌan chiwako hinbꞌahan yinh walnihan tato kaw yijem ebꞌnaj tet Komam,
kachannhe xin mach hakaꞌo yalni isyelal kuybꞌanile.
3 Wal xin mach yohtajo ebꞌnaj yinh tzet chu iskan kꞌulal sata Komam Dios,
yuto ischukil ebꞌnaj chisayni yok kꞌulal yul sat Komam,
mach chisje ebꞌnaj yabꞌeto yinh tzet halbꞌilkano yu Komam yinh tzet chu iskan kꞌulal.
4 Yuto isley yaꞌ Moisés kachnakano ismunil yinh Komam Cristo,
yuxin makxanhetikꞌa chiꞌanayto Komam yul yanma chikankano kꞌulal yul sat Komam Dios.
5 Tzꞌibꞌnhebꞌilkano yu yaꞌ Moisés yul Yum Komam yinh tzet chu kokan kꞌulal yu ley,
chalni:
«Maknhetikꞌa tzꞌajan isyijen ley,
chischah isqꞌinal yu ley tuꞌ,»a
xhihayoj.
6 Yajaꞌ wal yinh kokan kꞌulal yul sat Komam Dios yu janiko janma yinh Komam Jesucristo,
tzꞌibꞌnhebꞌilkanayoj:
«Machojabꞌ chꞌekꞌ yinh heyanma hakaꞌ tiꞌ:
“¿Maktaxka chito yul satkanh?”
tajka kexchi.
(Haꞌ chal yelapno tuꞌ yunhe yok yinayti Komam Cristo.)
7 Machojabꞌ chiꞌekꞌpaxo yul heyanma hakaꞌ tiꞌ:
“¿Maktaxka chito yul kambꞌal?”
tajka kexchi,»
xhihayoj.
(Haꞌ chal yelapno tuꞌ,
chiꞌok yiqꞌati Komam Cristo xol kamom yalni.)
8 ¿Tzet chute yalni chal tuꞌ?
Wal xin chal Yum Komam Dios:
«Hekawilal ayko Istzotiꞌ Komam Dios,
yul hetiꞌ ayiktoj,
yebꞌ yul heyanma aykoj,»
xhi.
Hunteqꞌan tzotiꞌ tuꞌ xin haꞌ ton kuybꞌanile yinh janiko janma yinh Komam Dios,
huneꞌ chijalikꞌojanh.
9 Ta chijal yu kotiꞌ tato haꞌ Komam Jesús haꞌ Jahawil,
kat xin janayto yul janma tato yaqꞌ itzitzbꞌokanh Komam Dios Komam xol kamom,
ay kokolbꞌanil chal tuꞌ.
10 Wal xin chonhkan kꞌulal yul sat Komam Dios yu chijayto yul janma yinh Komam Jesús,
yebꞌ yet chijalni yu kotiꞌ ta haꞌ Komam Jesús Jahawil,
kat kokolchakanoj.
11 Yuto chal yul Yum Komam Dios:
«Sunil mak chiꞌanayto yul yanma yinh Komam Dios mach chikan yinh txꞌixwilal,»b
xhihayoj.
12 Yuto chal yul Yum Komam Dios tato mach nano ye ebꞌnaj Israel,
mach nano yepaxo ebꞌnaj mach Israeloj,
wal xin lahannhe anma sunil sata Komam Dios;
hanhe xin Komam Yahawil yinh sunil anma.
Makxanhetikꞌa chiꞌawten Komam yinh chaqꞌ Komam iskꞌulal tet yinh kaw txꞌiꞌal.
13 Yuto chal yul Yum Komam Dios:
«Sunil mak chiꞌawten Komam Dios yinh,
chikolchahi,»c
xhihayoj.
14 ¿Tzettaxka chu yawten anma Komam yinh tato maxhto chayto yul yanma yinh Komam?
Yebꞌ xin,
¿tzettaxka chu yanayto yul yanma tato maxhto bꞌay chabꞌe anma yinh Komam?
¿Tzettaxka xin chu yabꞌen anma tato machi mak chihalni Istzotiꞌ Komam tuꞌ tet?
15 ¿Tzettaxka xin chu yal-laxikꞌo Istzotiꞌ Komam ta machi mak chichejlaxto isto yalnokꞌoj?
Hakaꞌ yalni yul Yum Komam Dios bꞌay chala:
«Hanta issaqꞌalil yet mak chiꞌekꞌ halnokꞌo tzotiꞌ yet aqꞌankꞌulal yebꞌ Tzotiꞌ Kꞌul yet Kolbꞌanile,»d
xhi.
16 Yajaꞌ mach sunilo mak choche yabꞌe huneꞌ Tzotiꞌ Kꞌul yet Kolbꞌanile,
hakaꞌ yalni yaꞌ Isaías:
«Mamin,
mach chayto anma yul yanma yinh Hatzotiꞌ chijalikꞌojanh,»e
xhi yaꞌ.
17 Wal xin hayet chijabꞌeni,
chipitzkꞌati janiko janma yinh Komam Dios,
haꞌ xin tzet chijabꞌe tuꞌ haꞌ ton Istzotiꞌ Komam Cristo.
18 Yajaꞌ,
¿tzet cheyute heyalni?
¿Tom mach yabꞌe anma Israel huneꞌ Tzotiꞌ yet kolbꞌanile tiꞌ?
¡Wal xin kaw yabꞌe!
Hakaꞌ yalni yul Yum Komam Dios bꞌay chala:
«Sunil yul sat yibꞌanhqꞌinal tiꞌ bꞌay chꞌabꞌelaxi masanta
bꞌay chikachnakan apno yul sat yibꞌanhqꞌinal tiꞌ,»f
xhihayoj.
19 Chinqꞌambꞌepaxojan:
¿Tom xin mach yohtanhelo anma Israel huneꞌ tuꞌ?
Wal xin haꞌ yaꞌ Moisés halni yinh bꞌabꞌelal yinh tzet chute yalni Komam Dios:
«Chiwaqꞌ chíwahojan hekꞌul yinh hunteqꞌan konhobꞌ machi yelapnoj kat waqꞌnitijan hehowal yu tzet chiwaqꞌan tet huneꞌ konhobꞌ ayko yinh sukal,»g
xhihayoj.
20 Yalnipaxo yaꞌ Isaías yinh kaw habꞌan,
yinh Tzotiꞌ yaqꞌ Komam Dios:
«Haꞌ mak mach kinsaynihan,
kinilchalojan yu.
Inyenipaxo hinbꞌahan tet mak mach kinqꞌambꞌenan,»
xhi Komam.h
21 Yajaꞌ wal yinh anma Israel yal yaꞌ Isaías yinh tzet yal Komam Dios:
«Kaw sunilbꞌal tzꞌayik kinawihan tet anma Israel,
yajaꞌ maxhtikꞌa isyije tzet walan,
yuto kaw manhkꞌomnhetikꞌa,»
xhi Komam,i
xhi yaꞌ Isaías.