Komam Dios saynhelo ebꞌnaj Israel
9
Wal hanintiꞌan,
chabꞌilxa Komam Jesucristo wuhan yul wanmahan,
yuxin haꞌ hunteqꞌan chiwalan teyet tiꞌ kaw yeli,
mach leqꞌtiꞌaloj,
yebꞌpaxo xin haꞌ Komam Espíritu Santo chiꞌaqꞌni intxumuꞌan tato kaw yel tzet chiwaltiꞌan.
2 Ay huneꞌ inbꞌiskꞌulalan yinh wet konhobꞌ Israelan,
huneꞌ bꞌiskꞌulal tiꞌ kaw yaꞌnhetikꞌa yeko yinh wanmahan hunun tzꞌayik.
3 Qꞌinalo ta chikolcha ebꞌnaj wet konhobꞌ tuꞌan yu chinqꞌantijan isyaꞌtajil wibꞌanhan tet Komam Dios kat winilo hinbꞌahan yinh Komam Jesucristo,
ta huneꞌ tuꞌ chikolwa yinh wet konhobꞌ tuꞌan,
sunil inkꞌulan chinqꞌannihan.
4 Yuto wet konhobꞌ Israel tuꞌan yako Komam Dios ebꞌnaj yuninaloj,
isyeni Komam isqꞌaqꞌal yip xol ebꞌnaj,
iswatxꞌen Komam istrato yebꞌ ebꞌnaj,
yaqꞌnipaxo ischejbꞌanil tet ebꞌnaj,
haꞌ ton isley yaꞌ Moisés.
Isyeni Komam tet ebꞌnaj yinh tzet chu yinayo isbꞌa ebꞌnaj tet Komam,
txꞌiꞌal xin tzet yaltekano Komam tet ebꞌnaj.
5 Titna anma wet konhobꞌ tuꞌan yinh ebꞌyaꞌ jichmam sikꞌbꞌililo yu Komam Dios,
istitpaxo Komam Cristo yinh ebꞌyaꞌ jichmam tuꞌ yet yul sat yibꞌanhqꞌinal tiꞌ.
Haꞌ Komam Cristo tuꞌ Dios yehi,
Yahaw yeko yibꞌanh sunil tzettaj ye tuꞌ,
yuxin jaqꞌaꞌweko ismay Komam yinh sunilbꞌal tiempo.
Hakojabꞌ tuꞌ.
6 Mach sunil ebꞌnaj tit yinh yuninal ebꞌnaj Israel iskonhobꞌ Komam Dios yehi,
yuto mach sunil ebꞌnaj yijem yute isbꞌa yinh tzet yal Komam.
7 Mach sunilo ebꞌnaj titna yinh yaꞌ Abraham,
yuninal yaꞌ Abraham tuꞌ yul sat Komam Dios,
yuto yal Komam tet yaꞌ Abraham hakaꞌ tiꞌ:
«Yinhnhe yaꞌ Isaac chielto hawuninal sikꞌbꞌililo wuhan,»
xhi Komam.
8 Haꞌ chal yelapno tuꞌ maxhtaj yu yinh yaꞌ Abraham titna hunu maka yuxin yuninal Komam Dios yehi,
wal xin to hanhkꞌanhe mak pitzkꞌana yalanh tzet haltebꞌilkano yu Komam Dios,
hanhkꞌanhe hunteqꞌan mak tuꞌ chal Komam Dios yuninalo yaꞌ Abraham.
9 Yuto yalte Komam tet yaꞌ Abraham hakaꞌ tiꞌ:
«Yet chinhulan yet hunabꞌ hakaꞌ huneꞌ tiempohal tiꞌ ayxa nichꞌan iswinaj unin hawixal Sara tiꞌ,»
xhi Komam.
10 Yajaꞌ xin maxhnhetaj huneꞌ tuꞌ,
haꞌ ebꞌnaj kawanh yunin ix Rebeca huneꞌnhe ismam ebꞌnaj,
haꞌ ton jichmam Isaac.
11-13 Yajaꞌ yet maxhto chipitzkꞌa nixhte istioxh unin ix Rebeca tuꞌ,
maxhto iskꞌulal maka istxꞌojal xaꞌiswatxꞌe,
yalni Komam Dios tet ix Rebeca:
«Naj bꞌabꞌel,
chꞌok naj ischejabꞌo naj iskabꞌ,»
xhi Komam.
Huneꞌ tiꞌ chiꞌeliko hakaꞌ yalni yul Yum Komam Dios bꞌay chal hakaꞌ tiꞌ:
«Yaꞌ Jacob sikꞌbꞌilxa wuhan,
wal naj Esaú manhkꞌobꞌil naj wuhan,»
xhihayoj.
Hak tuꞌ chu isyenilo isbꞌa tato haꞌ Komam Dios chisikꞌlen mak chiꞌok yuninaloj.
Maxhtaj yu tzet chiswatxꞌe hunu maka yuxin chako Komam Dios yuninaloj.
14 ¿Tzet chu kotxumni huneꞌ tiꞌ?
¿Tom maxhtaj istoholal chiswatxꞌe Komam chal tuꞌ?
machoj.
Wal xin haꞌ istoholal chiswatxꞌe Komam.
15 Yuto yal Komam Dios tet yaꞌ Moisés:
«Chitzꞌay inkꞌulan yinh mak bꞌay chal inkꞌulan,
kat waqꞌnipaxojan nimankꞌulal yinh mak bꞌay chal inkꞌulan,»
xhi Komam.
16 Yuxin waxanhka kaw chijoche maka chikowatxꞌe hunu tzet ye tuꞌ yu jok yuninalo Komam Dios,
mach chuhi.
Wal xin to haꞌ Komam chitzꞌay iskꞌul jinh yuxin chonhyako yuninaloj.
17 Chalpaxo Istzotiꞌ Komam Dios tato yal Komam tet naj isreyal Egipto hakaꞌ tiꞌ:
«Kaxhwakojan reyal yunhe isyenilo isbꞌa wipan tawinh yinh sunil tzet chawatxꞌe.
Hak tuꞌ chu yohtanhenilo sunil anma yul sat yibꞌanhqꞌinal tiꞌ tato kaw ay wipan,»
xhi Komam tet naj.
18 Yuxin chitzꞌay iskꞌul Komam yinh mak bꞌay choche chitzꞌay iskꞌul,
kat yaqꞌnipaxo kawbꞌo Komam yanma mak chal iskꞌul.
19 Yajaꞌ ayexmi cheyal wetan;
«Tato hak tuꞌ yehi,
¿tzet yinh xin chonhyal Komam txꞌojal tato machi hunu mak chipalkꞌon yibꞌanh tzet choche iskꞌul Komam iswatxꞌe?»
kexchimi.
20 Yajaꞌ hach wet anmahil,
¿tzet hawehi yuxin chaxhok haqꞌambꞌeꞌ tet Komam Dios yinh tzet chiswatxꞌe?
¿Tom chal txꞌotxꞌ xi tet mak watxꞌenhe hakaꞌ tiꞌ?:
«¿Tzet yuxin hak tiꞌ makinhawutehan?»
¿Tom xhi txꞌotxꞌ?
21 Wal xin to haꞌ naj tzꞌajom xi tuꞌ chiswatxꞌe naj txꞌotxꞌ hakaꞌ chal iskꞌul,
ta choche naj chiswatxꞌe naj txꞌotxꞌ aykanh istohol,
maka txꞌotxꞌ komon,
yajaꞌ huneꞌnhetikꞌa txꞌotxꞌal bꞌay chiswatxꞌe naj txꞌotxꞌ iskabꞌ majanil.
22 Hakpax tuꞌ Komam Dios yebꞌ anma,
waxanhka yoche Komam isyebꞌalo yip yebꞌ ishowal yinh mak chako ismul,
yajaꞌ xin yaqꞌ techaho Komam yaqꞌni nimankꞌulal yinh makta yetxatikꞌa isto yinh isyaꞌtajil yebꞌ yinh kamikal.
23 Hak tuꞌ xin chu isyenipaxilo Komam iskꞌulchꞌanil iskꞌul jinh,
hanhonh konhissikꞌilo Komam yet yalanhtokanoj,
yu jokkano yinh iskꞌulal.
24 Wal xin haꞌ Komam Dios konhawteni,
ay mak xol ebꞌnaj Israel,
aypaxo mak xol anma mach Israelo yawte Komam yuninaloj.
25 Hakaꞌ yu istzꞌibꞌnhenkano ischejabꞌ Komam Dios yet payat chiyij Oseas hakaꞌ tiꞌ:
«Haꞌ mak mach inkonhobꞌojan,
chiwakojan inkonhobꞌojan.
Mak maxhtikꞌa xahano wilan,
xahanxa chiwilan tinanh,»
xhi Komam.
26 Haꞌtikꞌa bꞌay yal Komam huneꞌ tiꞌ:
«Hex tiꞌ,
mach kexinkonhobꞌojan,»
xhi Komam.
Haꞌtikꞌa tuꞌ chihal-laxpaxo anma yuninalo Komam,
Komam Dios itzitz,a
xhihayoj.
27 Hakpax tuꞌ yaꞌ Isaías ischejabꞌ Komam Dios yet payat,
yalpaxo yaꞌ yinh anma Israel:
«Waxanhka kaw tzetkꞌakano isbꞌisil anma chitit yinh yaꞌ Israel,
hakaꞌ isbꞌisil arena ayayo istiꞌla haꞌ mar,
yajaꞌ kaw haywanhnhe ebꞌnaj chikolchahi,
28 yuto toxa chiyil Komam Dios yinh tzet chiꞌeliko anma ay yul sat yibꞌanhqꞌinal tiꞌ kat yanayo isyaꞌtajil yibꞌanh yu ismul,»
xhihayoj.
29 Yalpaxo yaꞌ Isaías:
«Haꞌ Komam Dios kaw aykano yip,
ta mach issikꞌlekano Komam haywanho jikꞌal,
kaw lahanmi konheliko hakaꞌ konhobꞌ Sodoma yebꞌ konhobꞌ Gomorra,»b
xhihayoj.
Mach yayto ebꞌnaj Israel yul yanma yinh Tzotiꞌ Kꞌul yet Kolbꞌanile
30 ¿Tzet xin chu kotxumni huneꞌ tiꞌ?
Wal xin to haꞌ anma mach Israeloj,
hunteqꞌan mach ayoko yinh iskꞌul,
iskan kꞌulal yul sat Komam Dios,
haꞌ tzujcha apno yu yok kꞌulal sata Komam Dios yuto yayto yul yanma yinh Komam.
31 Wal anma Israel ayko isyijeno isley yaꞌ Moisés yunhe iskan kꞌulal sata Komam Dios yalni,
yaj xin mach tzujcha apno yu anma tuꞌ.
32 Yajaꞌ,
¿tzet yinh yuxin hak tuꞌ elikoj?
Wal xin yuto haꞌ yalni ta yu tzet chiswatxꞌe chikan anma kꞌulal sata Komam Dios,
maxhtaj yu yaniko yanma yinh Komam Jesucristo.
Yuxin hakaꞌ hunu chꞌen chꞌen bꞌay chonhtxaqꞌmohi,
hak tuꞌ ye Komam Jesucristo yinh ebꞌnaj.
33 Hakaꞌ yalni yul Yum Komam bꞌay chala:
«Yul konhobꞌ Sión chiwakojan huneꞌ makc hakaꞌ chꞌen chꞌen bꞌay chitxaqꞌmo anma Israel,
haꞌ xin chꞌen chiꞌaqꞌni aykꞌayoj.
Wal anma chayto yul yanma yinh huneꞌ mak tuꞌ,
mach chikan yinh txꞌixwilal,»d
xhihayoj.