Kobꞌeybꞌal yet ayxako Komam Espíritu Santo jinh
8
Wal tinanh xin hunxa je yebꞌ Komam Jesucristo,
yuxin matxa isyaꞌtajil chayo Komam Dios jibꞌanh yinh islahobꞌal tzꞌayik yuto matxa chikowatxꞌe tzet choche konimanil,
to haꞌ tzet choche Komam Espíritu Santo.
2 Haꞌ Komam Espíritu Santo tuꞌ chiꞌaqꞌni koqꞌinal mach istanhbꞌal yuto hunxa je yebꞌ Komam Jesucristo.
Yu yip Komam Espíritu yuxin kolbꞌilonhxa yul isqꞌabꞌ mule yebꞌ tet kamikal.
3 Yu mule ayko yinh konimanil machi yu koyijen isley yaꞌ Moisés,
yuxin mach qꞌoji ley tuꞌ konhiskolni yalanh mule.
Yajaꞌ wal Komam Dios yati Komam Iskꞌahol yul sat yibꞌanhqꞌinal tiꞌ,
haꞌ xin isnimanil Komam Jesús lahan hakaꞌ huneꞌ konimanil yet yul sat yibꞌanhqꞌinal tiꞌ.
Iskam Komam yinh komul,
hak tuꞌ xin yu yaqꞌnikano tanho Komam komul yinh isnimanil.
4 Iswatxꞌe Komam hakaꞌ tuꞌ yunhe kowatxꞌen istoholal hakaꞌ yalni ley.
Yuto matxataj tzet chal huneꞌ konimanil tiꞌ chikowatxꞌe,
to haxa tzet choche Komam Espíritu Santo.
5 Yuto haꞌ mak chibꞌeybꞌalnhen yinh tzet choche isnimanil,
hanhechꞌan yinh tuꞌ bꞌay chiyako isnabꞌal.
Wal mak chibꞌeybꞌalnhen yinh tzet choche Komam Espíritu Santo,
haꞌ yinh tzet choche Komam tuꞌ bꞌay ayko isnabꞌal.
6 Wal xin ta hanhe tzet choche konimanil ayko yinh konabꞌal kowatxꞌeni,
huneꞌ tuꞌ chonhyito yinh kamikal mach istanhbꞌal,
wal ta haꞌ tzet choche Komam Espíritu Santo ayko yinh konabꞌal kowatxꞌeni,
chikochah koqꞌinal mach istanhbꞌal,
kat konhyaniko yinh aqꞌankꞌulal yebꞌ Komam Dios.
7 Mak hanhkꞌanhe tzet choche isnimanil ayko yinh yanma iswatxꞌeni,
kaw ayko ishowal yinh Komam Dios,
yuto mach chisje iskꞌul isyije ischejbꞌanil Komam,
yebꞌ xin mach chiqꞌoji isyijeni.
8 Yuxin haꞌ mak hanhe tzet choche isnimanil chisbꞌeybꞌalnhe,
mach chu iswatxꞌen tzet choche Komam Dios.
9 Yajaꞌ wal hex tiꞌ,
matxa chebꞌeybꞌalnhe hakaꞌ tzet choche henimanil,
to haxa huneꞌ akꞌ nabꞌale chaqꞌ Komam Espíritu Santo teyet haꞌ chebꞌeybꞌalnhe.
Tato ay mak mach ayayto Komam Espíritu Santo yul yanma mach yeto Komam Jesucristo yehi.
10 Ta ayxayto Komam Cristo yul heyanma,
waxanhka kambꞌehal ye henimanil yu mule,
wal heyanma xin ay isqꞌinal mach istanhbꞌal,
yuto xakexkan kꞌulal yul sat Komam.
11 Tato ayko Yespíritu Komam Dios teyinh,
Komam pitzkꞌankanh Komam Jesucristo xol kamom,
haꞌ Komam chiꞌaqꞌni huneꞌ akꞌ nimanile tet henimanil kambꞌehal yehi yu Yespíritu ayko teyinh.
12 Wal tinanh xin hex wuxhtaj hex wanabꞌ,
yilal kobꞌeybꞌalnhen tzet choche Komam Espíritu,
machojabꞌtaj istxꞌojal tzet chal konimanil.
13 Yuto ta haꞌ tzet choche henimanil haꞌ chewatxꞌe,
chexkam yul sat Komam Dios,
yajaꞌ tato yu yip Komam Espíritu Santo chebꞌej hewatxꞌen tzettaj choche henimanil,
ay heqꞌinal mach istanhbꞌal.
14 Sunil mak haꞌ Komam Espíritu Santo chiꞌijbꞌani,
haꞌ hunteqꞌan mak tuꞌ yuninal Komam Dios yehi.
15 Yuto Komam Espíritu Santo chabꞌilxa ju mach chonhyako yalanh ischejbꞌanil ley hunelxa kat koxiwpaxoj hakaꞌ yet yalanhtokanoj.
Wal xin haꞌ Komam Espíritu tuꞌ chonhaniko yuninalo Komam Dios,
yuxin yinh sunil janma chijal tet Komam Dios hakaꞌ tiꞌ:
«Hach Inmaman,»
konhchi.
16 Haꞌtikꞌa Komam Espíritu Santo chalni tet janma tato yuninalxa Komam Dios jehi.
17 Yu yuninalonhxa Komam Dios yuxin chikochah komajul tet Komam.
Huneꞌ komajul tuꞌ hun chu kochahni yebꞌ Komam Jesucristo tato haꞌ hunonh chijaqꞌle isyaꞌtajil yinta Komam;
ta hak tuꞌ hun chu kochahni iskꞌulal yebꞌ Komam.
Iskꞌulchꞌanil chikochah
18 Yinh kaw yeli sunil isyaꞌtajil lanhan jilni tinanh kaw matzet chaliloj yuto mach chu kolahbꞌan yebꞌ iskꞌulchꞌanil chaqꞌ Komam jet yinh huneꞌ tiempohal chul kosataj.
19 Sunil tzet watxꞌebꞌil yu Komam Dios mach chitecha yu yilni bꞌaqꞌinh chaqꞌ Komam Dios ohtanhelaxoj tato yuninalxa Komam Dios jehi.
20 Yuto sunil tzet watxꞌebꞌil yu Komam Dios etaxkantoj,
yajaꞌ maxhtaj yu hak tuꞌ yoche,
wal xin haꞌ Komam Dios chahni etaxotoj.
Yajaꞌ ayko yipo janma,
21 ta chikolcha tzet watxꞌebꞌil yu Komam yalanh yip isyaꞌtajil bꞌay aykoj,
hakaꞌ chu kokolcha hanhonh yuninalonhxa Komam Dios tiꞌ,
kat kochahni iskꞌulchꞌanil iskꞌul Komam.
22 Johtaj tato sunil tzet watxꞌebꞌil yu Komam Dios ayko yinh isyaꞌtajil.
Kaw xin chiꞌel yaw hakaꞌ hunu ix ix chiꞌabꞌen isyaꞌil yet chiwatxꞌi iskꞌul,
hak tuꞌ ye sunil tzet iswatxꞌe Komam tuꞌ tinanh.
23 Maxhnhetaj hunteqꞌan tuꞌ lanhan yabꞌen isyaꞌtajil,
wal xin to haꞌ hunonh hanhonh aqꞌbꞌilxa Komam Espíritu Santo jet hakaꞌ bꞌabꞌel sabꞌehal xol sunil tzet chꞌaqꞌlax jet,
lanhan jabꞌenpaxo isyaꞌtajil masanto yet chiꞌapni istiempohal bꞌay chonhohtanhelaxi tato konhyuninalxa Komam Dios.
Haꞌ to tuꞌ xin chikolcha huneꞌ konimanil tiꞌ tet mule.
24 Yettax kochahni kokolbꞌanil yichiko iskawxi kokꞌul ta chonhkol-lax yinh sunil.
Qꞌinalo tato xakochah tzet ayko yipo janma tuꞌ,
¿tom chito jechma yuli?
¡Machoj!
Yuto bꞌaytet chijiliko yinh matxa chijechma.
25 Wal xin kaw niman chijute kokꞌul jechman tzet ayko yipo janma tuꞌ,
yuto maxhto chijiliko yinh.
26 Haꞌtikꞌapaxo xin Komam Espíritu Santo chikolwa jinh yinh tzet mach chonhqꞌoji kotxumni,
yuto yet chonhtxahli mach johtajo yinh tzet chu koqꞌanni hakaꞌ chal iskꞌul Komam Dios,
yajaꞌ xin Komam Espíritu chitzotel jinh tet Komam Dios.
Haꞌ hunteqꞌan tzotiꞌ chal Komam Espíritu tuꞌ,
machi tzotiꞌ tiꞌ chihalni jet tzet yoki.
27 Yaj wal Komam Dios yohtanhe tzet chiꞌekꞌ yinh konabꞌal,
chistxum Komam tzet chal Komam Espíritu tuꞌ,
yuto haꞌ tzet choche iskꞌul Komam haꞌ chisqꞌan Komam Espíritu yinh istxah jinh hanhonh yetonhxa Komam tiꞌ.
Aqꞌbꞌilxa jip koqꞌoji yibꞌanh tzettaj ye tuꞌ
28 Johtaj tato sunil tzet ye tuꞌ chihul jibꞌanh hanhonh chijoche Komam Dios,
to yu iskꞌulal jinh yuxin chul jibꞌanh hanhonh awtebꞌilonhxa yu Komam yunhe yijni isbꞌa tzet choche Komam jinh.
29 Yuto yohtaxa Komam makta yet Komam yettaxtikꞌa payat,
hatax tuꞌ konhissikꞌlenkano Komam jok yuninaloj,
yunhe hakaꞌ Iskꞌahol Komam chonhelkanikoj.
Hak tuꞌ yute Komam yunhe haꞌ Iskꞌahol Komam tuꞌ haꞌ chiꞌok bꞌabꞌel Kꞌahole xol txꞌiꞌal mak yuninal Komam Dios.a
30 Hanhonh konhissayilo Komam yet payat tuꞌ,
hanhonh konhyawtepaxo Komam.
Hanhonh awtebꞌilonh yu Komam tuꞌ konhkankano kꞌulal sata Komam Dios,
yaqꞌnipaxo Komam iskꞌulchꞌanil jet.
31 ¿Tzet xin chijute jalni yinh hunteqꞌan tiꞌ?
Tato ayko Komam Dios jetbꞌihoj,
¿maktaxka chu isqꞌoji jinh?
32 Mach ismanhkꞌo Komam yaqꞌni Iskꞌahol yul isqꞌabꞌ kamikal jinh kosunil,
¿hatokꞌanabꞌ xin iskꞌulal mach chaqꞌ Komam jet yinta Iskꞌahol tuꞌ?
Wal xin chaqꞌ Komam.
33 Hanhonh saybꞌilonhxa yu Komam tiꞌ.
¿Tom ayto hunu mak chu yok aqꞌokꞌule jinh tet Komam Dios xin?
Machi hunu maka yuto xakonhkan kꞌulal yul sat Komam Dios.
34 ¿Maktaxka chu iskawxeniko hunu komul jibꞌanh?
Machi maka,
yuto kam Komam Jesús yu komul,
yitzitzbꞌipaxokanh Komam.
Tinanh xin ayko Komam yinh iswatxꞌqꞌabꞌ Komam Dios,
lanhan istzotel jinh tet Komam.
35 Kaw xahan ayonh yu Komam Cristo,
¿mak xin chu konhispohnilo yinh iskꞌulchꞌanil iskꞌul Komam tuꞌ?
¿Chimyu konhispohnilo isyaꞌtajil,
maka bꞌiskꞌulal,
maka yu chonhkajlax yu Istzotiꞌ Komam,
maka yu wahil,
maka yu manh xilqꞌapehal,
maka hunu il,
maka yu kamikal?
36 Hakaꞌ yalni Istzotiꞌ Komam Dios bꞌay tzꞌibꞌnhebꞌilkanoj:
«Hawu yuxin ayonhnhetikꞌakojanh yul isqꞌabꞌ kamikal hunun tzꞌayik.
Hakaꞌ chiꞌutelax noꞌ meꞌ chiꞌilaxto kamoj,
hak tuꞌ chonhutelaxanh,»b
xhihayoj.
37 Yajaꞌ waxanhka chihul hunteqꞌan isyaꞌtajil tuꞌ jibꞌanh,
chonhqꞌoji yinh yu iskolwal Komam xahan chonhilni.
38 Yuxin kaw wohtajan tato machi hunu tiꞌ chu konhispohnilo yinh iskꞌulchꞌanil iskꞌul Komam Dios;
mach yuho kamikal,
mach yuho qꞌinale,
mach yuho ebꞌnaj ángel,
mach yuho hunteqꞌan espíritu matzwalil ay yip chiꞌekꞌi,
mach yuho tzet chijiliko yinh,
mach yuho tzet maxhto chihuli.
39 Mach yuho tzet ay yul satkanh,
mach yuho tzet ay sat yibꞌanhqꞌinal tiꞌ.
Machi hunu tzet watxꞌebꞌil yu Komam Dios chu konhispohnilo yinh iskꞌulchꞌanil iskꞌul Komam,
yuto ayonhxako yul isqꞌabꞌ Komam Jesucristo Jahawil.