Kuybꞌanile elna yinh mak mohyinaxa
7
Hex wuxhtaj hex wanabꞌ,
hex tiꞌ heyohtaxa ley.
Huneꞌ ley tuꞌ ay yip yibꞌanh anma,
yajaꞌ hanhkꞌanhe yet aykꞌo yul sat yibꞌanhqꞌinal tiꞌ.
2 Qꞌinalo hunu ix ix mohyinaxa tinanh,
hunbꞌabꞌilxa ix yebꞌ yichamil yu ley,
yajaꞌ hanhkꞌanhe yet ayikꞌo naj yul sat yibꞌanhqꞌinal tiꞌ.
Yajaꞌ ta chikam naj xin,
chiꞌelkanti ix yalanh huneꞌ ley hunbꞌanhekano tuꞌ.
3 Yuxin tato itzitzto yichamil ix kat ishunbꞌan isbꞌa ix yebꞌ hunuxa naj winaj,
chako ismul ix yinh hakaꞌ tuꞌ.
Wal ta xakam naj xin waxanhka chiqꞌ ix hunxa yichamil,
matxa chako ix ismul yuto xaꞌelti ix yalanh huneꞌ ley mohbꞌanhe ix yebꞌ yichamil tuꞌ.
4 Hakonh tuꞌ hex wuxhtaj hex wanabꞌ,
yet iskam Komam Jesucristo kokampaxo yebꞌi,
yuxin yul sat Komam Dios kamomonhxa tet isley yaꞌ Moisés.
Wal tinanh yetonhxa Komam Jesucristo,
Komam pitzkꞌakanh xol kamom.
Hak tuꞌ xin haxa tzet choche Komam Dios haꞌ chikowatxꞌe.
5 Yet yalanhtokanoj yet ayonhtoko kowatxꞌen tzet choche iskꞌul huneꞌ konimanil tiꞌ,
haꞌ huneꞌ ley tuꞌ aqꞌni yochekanh istxꞌojal choche konimanil tiꞌ,
haꞌ hunteqꞌan tuꞌ xin konhinito yinh kamikal.
6 Yajaꞌ wal tinanh xin kamnajonhxa yinh huneꞌ ley bꞌay ayonhikto yet yalanhtokano tuꞌ,
hak tuꞌ xin yu jokkano yalanh yip huneꞌ akꞌ bꞌeybꞌale yet Komam Espíritu Santo,
matxataj yalanh ischejbꞌanil ley tzꞌibꞌnhebꞌilkano yet payat ayonhikoj.
Istxꞌojal ayko jinh
7 ¿Tzet cheyute hetxumni?
¿Tom txꞌoj isley yaꞌ Moisés tuꞌ,
chal tuꞌ?
¡Machoj!
Wal xin ta machi ley machim wohtajojan tzet chal-lax mulehal.
Kaw machim wohtajojan ta txꞌoj jocheniko hunu tzet ye tuꞌ ta mach chal ley hakaꞌ tiꞌ:
«Mach chu hawocheniko hunu tzet ye tuꞌ mach hawetoj,»a
xhi.
8 Yu huneꞌ ley tiꞌ,
yuxin pitzkꞌa sunil istxꞌojal winhan,
wilnilojan wochenikojan tzet ye tuꞌ mach kꞌuloj.
Yuto ta machi ley,
machim ixtanho mule.
9 Yet maxhto wohtajojan ley tuꞌ kaw itzitz hinan,
yajaꞌ yet wohtanhenilojan ley tuꞌ intxumnilojan ta kamominan yul sat Komam Dios.
10 Huneꞌ ley tuꞌ aqꞌlaxi yu yaqꞌni qꞌinale,
yajaꞌ xin haꞌ kamikal yiti wibꞌanhan.
11 Yu huneꞌ ley tuꞌ yuxin yiqꞌ yip mule winhan,
kinyaqꞌni subꞌchahojan,
haꞌ xin initi kamikal wibꞌanhan yu inmulan.
12 Wal xin yinh kaw isyelal,
huneꞌ ley tuꞌ yet Komam Dios yehi,
yetpaxo Komam chejbꞌanile ayko yinh,
kaw toholkanoj yebꞌ kaw kꞌul.
13 ¿Tzet xin chu hetxumni?
¿Tom haꞌ huneꞌ ley kꞌul tuꞌ initi kamikal wibꞌanhan?
¡Machoj!
Wal xin to yu isyenilo isbꞌa tato kaw txꞌojkano mule,
yuxin hul kamikal wibꞌanhan yu huneꞌ mule.
Haꞌ huneꞌ ley kꞌul tuꞌ,
haꞌ yeniloj tato kaw mach chiswalilkano mule.
14 Kaw johtaj tato haꞌ Yespíritu Komam Dios anheti huneꞌ ley tuꞌ,
yajaꞌ wal hinan ayinikojan yinh huneꞌ nimanile yet yul sat yibꞌanhqꞌinal tiꞌ,
yuxin hakaꞌtanhe txonhbꞌil hinan ischejabꞌo mule.
15 Haꞌ tzet chinwatxꞌehan mach chitxumcha wuhan,
yuto haꞌ iskꞌulal chiwochehan inwatxꞌehan mach chinwatxꞌepaxojan.
Wal xin haꞌ hunteqꞌan tzet yahbꞌil wuhan haꞌ chinwatxꞌepaxojan.
16 Yuxin tato haꞌ istxꞌojal machi wochehan inwatxꞌehan haꞌ chinwatxꞌepaxojan,
hak tuꞌ chu wohtanhenilojan tato maxhtaj ley tuꞌ txꞌoj,
to kaw kꞌul.
17 Yuto maxhtaj kawinan chinwatxꞌehan hunteqꞌan istxꞌojal tuꞌ,
to haꞌ mule iqꞌbꞌiltikꞌa yu huneꞌ innimaniltiꞌan,
haꞌ chiwatxꞌeni.
18 Kaw wohtajan tato huneꞌ innimanilan kaw mulum tiꞌ,
machi nino iskꞌulal ayko yinh,
yuto hayet chiwochehan inwatxꞌenan iskꞌulal,
mach chu inwatxꞌenan.
19 Haꞌ iskꞌulal chiwochehan inwatxꞌeꞌan,
mach chinwatxꞌepaxojan.
Wal xin haꞌ istxꞌojal mach chiwochehan inwatxꞌehan,
haꞌ chinwatxꞌepaxojan.
20 Yuxin tato haꞌ tzet mach chiwochehan hinwatxꞌehan,
haꞌ chinwatxꞌepaxojan,
maxhtaj hinan chinwatxꞌehan hunteqꞌan tuꞌ,
to haxa mule ayko winhan haꞌ chiꞌaqꞌni wubꞌan.
21 Kaw chiwilan tato hayet chinwatxꞌenan iskꞌulal walnihan,
to haꞌ istxꞌojal chati isbꞌa yinh insatan.
22 Wal wanmahan,
kaw chitzala yinh isley Komam Dios,
23 yajaꞌ xin ay huneꞌ tzet chikachni inyijenan huneꞌ ley bꞌay chintzala tuꞌan,
haꞌ ton isley mule ayko winhan,
yuxin hakaꞌ preso wehan yu huneꞌ mule chichejni wubꞌan istxꞌojal.
24 Kaw kꞌanchꞌaninan,
¿maktaxka chu kiniskolnihan yul isqꞌabꞌ huneꞌ innimaniltiꞌan chininitojan yinh kamikal?
25 Wal xin hanhkꞌanhe Komam Dios chu kiniskolnihan,
yajaꞌ yu Komam Jesucristo Jahawil;
yuxin kaw chiwaqꞌan yuchꞌandiosal tet Komam.
Yuxin chiwohtanhelojan tato wanmahan choche isyijeꞌ yinh tzet chal Komam Dios,
yaj wal mule ayko winhan xin haꞌ chinijbꞌanan yinh istxꞌojal.