Matxa jeto ay kowatxꞌen istxꞌojal
6
¿Tzet konhchi yinh huneꞌ tiꞌ?
¿Tom chikolahiko janiko komul yunhe kam chisyelo Komam Dios iskꞌulchꞌanil iskꞌul?
2 Wal xin machoj,
hanhonh tiꞌ kamnajonhxalo yinh mule,
matxa jeto ay janiko komul.
3 ¿Tom mach heyohtajo xin tato yet yah haꞌ kowiꞌ hununonh,
hunxanhe jukano yebꞌ Komam Jesucristo?
Hak tuꞌ xin yu isyenilo isbꞌa tato hayet iskam Komam,
kokampaxo yintaj.
4 Yet yah haꞌ kowiꞌ isyenilo isbꞌa tato konhmuji yinta Komam Jesucristo,
hak tuꞌ yu kokamleloj.
Yuxin hakaꞌtikꞌa yu yitzitzbꞌikanh Komam Jesucristo xol kamom yu iskꞌulchꞌanil yip Komam Dios,
hakxa tuꞌ chu jekꞌ yinh huneꞌ akꞌ qꞌinale.
5 Yuto yet iskam Komam Jesucristo kokampaxo yintaj,
yuxin hakaꞌtikꞌa yu yitzitzbꞌikanh Komam tuꞌ,
hak tuꞌ chu jitzitzbꞌikanh.
6 Kaw johtaj tato huneꞌ koicham bꞌeybꞌal ahkano yinh kulus yinta Komam yunhe yelkano yip huneꞌ kobꞌeybꞌal kaw mulum tuꞌ,
hak tuꞌ xin yu jelkanti yalanh yip mule matxa chikowatxꞌe.
7 Yuto haꞌ mak xakami,
matxa ayokto yalanh yip mule.
8 Hanhonh tiꞌ xakonhkam yinta Komam Jesucristo,
yuxin chikawxi kokꞌul tato chonheh iskꞌatanh Komam yinh hunelnhe.
9 Kaw johtaj tato itzitzbꞌikanh Komam Jesucristo,
matxa xin bꞌaqꞌinhal chikami.
Huneꞌ kamikal tuꞌ matxa yip yibꞌanh Komam.
10 Yet iskam Komam Jesucristo,
kam Komam hunelnhe yinh mule,
matxa bꞌaqꞌinhal chikami.
Tinanh xin itzitz Komam yinh hunelnhe yu iswatxꞌen tzet chal iskꞌul Komam Dios.
11 Hakonhojabꞌ tuꞌ,
konabꞌawetij tato kamnajonhxa yinh mule,
yajaꞌ itzitzonhxa yu koyijen tet Komam Dios,
yuto hunxa je yebꞌ Komam Jesucristo Jahawil.
12 Yuxin matxa chijaqꞌ hamanil tet mule islahniko yiqꞌni yip yinh konimanil yet kamikal ye tiꞌ,
hak tuꞌ xin matxa chonhok kowatxꞌeꞌ tzettaj istxꞌojal choche kokꞌul kowatxꞌeꞌ.
13 Matxa chijaqꞌ huneꞌ konimanil tiꞌ yinh mule,
hakaꞌ hunu tzet ye tuꞌ chiꞌokniko yinh istxꞌojal.
Wal xin jaqꞌaꞌweko kobꞌa kowatxꞌen yinh tzet choche Komam Dios,
yuto kamnajonhxa yajaꞌ pitzkꞌabꞌilonhxakanh.
Yuxin tinanh jaqꞌaꞌweko sunil konimanil yul isqꞌabꞌ Komam Dios,
hakaꞌ tzet ye tuꞌ chiꞌokniko yinh iskꞌulal.
14 Yuxin matxa tzet yok mule jinh yuto matxa ayonhiko yalanh isley yaꞌ Moisés,
wal xin to yalanhxa iskꞌulchꞌanil iskꞌul Komam Dios ayonhikoj.
Haxa iskꞌulal ayonhiko koyijeni
15 ¿Tzet xin cheyute heyalni?
¿Tom chonhok jaqꞌaꞌpaxiko komul yu matxataj yalanh ley ayonhikoj,
to yalanhxa iskꞌulchꞌanil iskꞌul Komam Dios?
¡Wal xin machoj!
16 Kaw heyohtaj tato hayet chijaniko kobꞌa yalanh yip hunu maka,
kaw chonhokkano ischejabꞌo huneꞌ mak tuꞌ,
kat koyijen tzet chala.
Hakton tuꞌ xin tato haꞌ tet mule chijaqꞌ chejaꞌ kobꞌa,
chonhokkano ischejabꞌo mule tuꞌ,
huneꞌ chonhinito yinh kamikal.
Yajaꞌ ta haꞌ tet Komam Dios chikoyije chonhokkano ischejabꞌo Komam,
kat jokkano kꞌulal yul sat.
17 Yet yalanhtokanoj kaw chejabꞌ heyehiko yinh mule,
yajaꞌ yuchꞌandios tet Komam Dios yuto tinanh yinh kaw sunil heyanma cheyijen kuybꞌanile aqꞌbꞌilkano teyet.
18 Yet heyelkanti yalanh yip mule tuꞌ heyokkano yijemal yinh istoholal.
19 Haꞌ hunteqꞌan tzet chiwaltojan teyet tiꞌ kaw komonnhe chu walnitojan yunhe mach yaꞌtajo istxumchalo heyu.
Hakaꞌtikꞌa yu janiko konimanil yijemal yinh sunil istxꞌojal,
kowatxꞌen isyahbꞌetajil yebꞌ ismachiswalilal yet yalanhtokanoj,
hakojabꞌ tuꞌ xin chu janiko konimanil yijemal yinh iskꞌulal,
hak tuꞌ xin hanhkꞌanhe tet Komam Dios chikoyije.
20 Hayet ayonhtoko yalanh yip mule mach yijemojonh yinh istoholal.
21 Yajaꞌ,
¿tzet iskꞌulal jiqꞌ yinh hunteqꞌan istxꞌojal kowatxꞌe tuꞌ,
hunteqꞌan bꞌay chonhtxꞌixwi tinanh?
Wal xin hanhkꞌanhe yinh kamikal mach istanhbꞌal chonhyitoj.
22 Yajaꞌ tinanh xin kolbꞌilonhxa yalanh ischejbꞌanil mule,
ischejabꞌxa Komam Dios jehi.
Haꞌ huneꞌ iskꞌulal chaqꞌ jet xin,
haꞌ ton jok kowatxꞌen sunil tzet choche Komam Dios,
kat yaqꞌnipaxo Komam koqꞌinal mach istanhbꞌal.
23 Yuto haꞌ ispaj selel mule,
haꞌ ton kamikal mach istanhbꞌal,
wal issabꞌehal Komam Dios xayaqꞌ jet xin,
haꞌ ton qꞌinale mach istanhbꞌal,
yuto hunxanhe je yebꞌ Komam Jesucristo Jahawil.