3 Maxhnhetaj yinh tuꞌ chonhtzalahi,

to kaw chonhtzalapaxo yinh ej isyaꞌtajil chihul jibꞌanh,

yuto kaw johtaj tato hayet chul isyaꞌtajil tuꞌ kaw ekꞌbꞌalto chikolinhbꞌa kobꞌa yinh Komam.

4 Yet chikolinhbꞌan kobꞌa yinh Komam tuꞌ xin,

kaw ekꞌbꞌalto chitzala Komam jinh,

haꞌ huneꞌ tuꞌ chiꞌok yipo janma.

5 Huneꞌ ayko yipo janma tuꞌ mach chonhyako yinh txꞌixwilal,

yuto xayaqꞌ Komam iskꞌulchꞌanil iskꞌul jet yet yaqꞌni Komam Espíritu Santo yul janma.

6 Yet yalanhto,

machi hunujonh konhqꞌoji kokolni kobꞌa,

yajaꞌ apni istiempohal bꞌay halbꞌilkano yu Komam Dios,

yul Komam Jesucristo,

yaqꞌnikamo isbꞌa Komam yinh ismul anma.

7 Kaw mach subꞌuta yaqꞌnikamo isbꞌa hunu anma yinh hunuxa maka,

waxanhka kaw kꞌul huneꞌ mak tuꞌ,

kachannhe tato chipalkꞌon iskꞌulchꞌanil iskꞌul hunu maka,

wal tuꞌ aymi hunu mak chishin isbꞌa iskam seleloj.

8 Yajaꞌ wal Komam Dios,

kaw isyelo Komam iskꞌulchꞌanil iskꞌul jet,

waxanhka kaw mulumonh,

yajaꞌ yaqꞌkamo isbꞌa Komam Jesucristo jinh.

9 Tinanh xin kꞌulonhxa yul sat Komam Dios yu iskamikal Komam Jesucristo,

yuxin yinh sunil janma chijala tato haꞌ Komam chonhkolni yinh isyaꞌtajil chul yinh islahobꞌal tzꞌayik.

10 Yet yalanhto ayko kohowal yinh Komam Dios yu komul,

yajaꞌ xin konhalaxiko kꞌulal yu iskamikal Komam Jesucristo,

Iskꞌahol Komam Dios.

Tinanh xin kaw johtaj tato tꞌinhanxa kokolcha yu isqꞌinal Komam Jesucristo,

yuto ayonhxako yinh aqꞌankꞌulal yebꞌ Komam Dios.

11 Maxhnhetaj tuꞌ,

wal xin to kaw chonhtzala yinh Komam Dios yu Komam Jesucristo,

yuto yu Komam Jesucristo yuxin ayonhxako yinh aqꞌankꞌulal yebꞌ Komam Dios.

12 Wal xin yu huneꞌ naj winaj,

haꞌ ton naj Adán,

yuxin hul mule yul sat yibꞌanhqꞌinal tiꞌ;

yu mule tuꞌ yuxin hul kamikal.

Haꞌ kamikal tuꞌ xin,

yibꞌanh sunil anma titkanoj yuto sunil anma yako ismul.

13 Yet yalanhtokanoj yet maxhto chiꞌaqꞌlax isley yaꞌ Moisés ayxatikꞌa mule yul sat yibꞌanhqꞌinal tiꞌ,

yajaꞌ bꞌay machi ley mach ixtanho mule.

14 Anma yinh istiempo naj Adán masanta yinh istiempohal yet yaqꞌlax ley tet yaꞌ Moisés,

hul kamikal yibꞌanh anma yuto yako ismul,

waxanhka xin mach lahano ismul anma tuꞌ hakaꞌ ismul naj Adán,

yuto ismanhkꞌo naj huneꞌ chejbꞌanile yaqꞌ Komam Dios.

Naj Adán tuꞌ yechel huneꞌ mak hul yinh tzujanilxa ye naj,

yajaꞌ xin mach lahano tzet yaqꞌkano hunun jet.

15 Ismul naj Adán mach lahano yebꞌ iskꞌulchꞌanil iskꞌul Komam xayaqꞌ jet,

yuto yu ismul naj yuxin hul kamikal jibꞌanh kosunil;

yajaꞌ xin yu huneꞌxa mak,

haꞌ ton Komam Jesucristo,

yuxin xakochah iskꞌulchꞌanil iskꞌul Komam Dios matanil.

Huneꞌ iskꞌulchꞌanil iskꞌul Komam tuꞌ kaw niman yelapnoj,

yebꞌ chaqꞌ iskꞌulal tet txꞌiꞌal anma.

16 Yu ismul naj Adán tuꞌ yuxin titkano isyaꞌtajil yibꞌanh anma sunil,

yajaꞌ wal iskꞌulchꞌanil iskꞌul Komam Dios mach hako tuꞌ,

wal xin to chaqꞌ nimankꞌulal yinh ismul anma,

waxanhka kaw txꞌiꞌal.

17 Hak tuꞌ xin johtaj ta yu ismul huneꞌ naj winaj yuxin okkano anma yul isqꞌabꞌ kamikal,

yajaꞌ xin yu Komam Jesucristo yuxin chonhok kꞌulal yul sat Komam Dios,

yu iskꞌulchꞌanil iskꞌul Komam chaqꞌ komatanoj.

Yu Komam Jesucristo yuxin chikochah huneꞌ akꞌ qꞌinale yinh sunilbꞌal tiempo.

18 Yuto yu ismul naj Adán,

yuxin kankano sunil anma yalanh isyaꞌtajil,

yajaꞌ yu istoholal iswatxꞌe Komam Jesucristo,

yuxin chonhkolcha yalanh isyaꞌtajil kat kochahni koqꞌinal.

19 Yu ismanhkꞌomal huneꞌ naj yuxin mulum jukaniko yul sat Komam Dios kosunil,

yajaꞌ xin yu isyijemal Komam Jesucristo yuxin konhkan kꞌulal yul sat Komam Dios.

20 Hayet yaqꞌlax isley yaꞌ Moisés kaw isyekanokanh isbꞌa ismul anma,

hayet yahkanh mule tuꞌ kaw ekꞌbꞌalto isyekanilo Komam iskꞌulchꞌanil iskꞌul.

21 Hakaꞌtikꞌa yu isyenilo isbꞌa yip mule yiniti kamikal jibꞌanh kosunil,

hakpax tuꞌ yu isyenilo isbꞌa iskꞌulchꞌanil iskꞌul Komam Dios.

Yu Komam Jesucristo yuxin konhok kꞌulal yul sat Komam Dios,

yaqꞌnikano Komam koqꞌinal mach istanhbꞌal.