Kuybꞌanile yinh yaꞌ Abraham
4
Hakaꞌ jichmam Abraham,
¿tzet yu yok yaꞌ kꞌulal yul sat Komam Dios heyalni?
2 Tato yu tzet iswatxꞌe yaꞌ yuxin ok yaꞌ kꞌulal yul sat Komam Dios,
yimikanh isbꞌa yaꞌ,
wal xin machoj.
3 Chal yul Yum Komam Dios:
«Yayto yaꞌ Abraham yul yanma yinh Komam Dios,
yu huneꞌ tuꞌ yuxin ok yaꞌ kꞌulal yul sat Komam,»a
xhihayoj.
4 Qꞌinalo tato ay hunu naj chimunla yinta hunu naj yahaw munil,
chꞌaqꞌlax istohol naj.
Haꞌ istohol naj tuꞌ xin,
mach matanilo yehi,
to kꞌasxa ye tet naj.
5 Yajaꞌ mak mach yinho tzet chiswatxꞌe chikawxi iskꞌul,
to chayto yul yanma yinh Komam chiꞌaqꞌni nimankꞌulal yinh ismul anma.
Yu chako yanma huneꞌ mak tuꞌ yinh Komam Dios,
haꞌ chiꞌaniko kꞌulal yul sat Komam.
6 Haꞌ kaw yaꞌ rey David halni tato kaw saqꞌal yet mak chal Komam Dios kꞌulal,
maxhtaj yu tzet chiswatxꞌe,
7 yet yalni hakaꞌ tiꞌ:
«Saqꞌal yet mak chꞌaqꞌlax nimankꞌulal yinh ismul yu Komam Dios,
kat isnahulnhenkanto Komam ismul tuꞌ.
8 Saqꞌal yet mak matxa bꞌaqꞌinhal chisnati Komam ismul,»b
xhi yaꞌ David tuꞌ.
9 ¿Mak xin kaw saqꞌal yet?
¿Tom hanhe mak ayko circuncisión yinh,
mato haꞌpaxo mak machi circuncisión yinh?
Wal xin xajalanh tato okkano yaꞌ Abraham kꞌulal yul sat Komam Dios yu yako yanma yaꞌ yinh Komam.
10 ¿Bꞌaqꞌinh xin ok yaꞌ kꞌulal yul sat Komam Dios?
¿Tom yet ayxako circuncisión yinh yaꞌ?
¡Machoj!
To yet maxhto chiꞌok circuncisión yinh yaꞌ.
11 Wal xin tzujanilxa yok huneꞌ circuncisión tuꞌ yinh yaꞌ,
haꞌ xin ok yecheloj tato ok yaꞌ kꞌulal yul sat Komam Dios yuto yayto yaꞌ yul yanma yinh Komam.
Yuxin okkano yaꞌ mamehal yinh hunteqꞌan mak maxhto circuncisión yinh,
yaj chayto yul yanma yinh Komam;
hak tuꞌ xin chu yokkano kꞌulal yul sat Komam,
hakaꞌ yaꞌ Abraham tuꞌ.
12 Mamepaxo yaꞌ yinh sunil mak ayxako circuncisión yinh,
yajaꞌ maxhtaj yinh huneꞌ yechel tuꞌ chikawxi iskꞌul,
to chayto yul yanma yinh Komam,
hakaꞌ yu yanayto yaꞌ Abraham yul yanma yinh Komam yet yalanhto maxhto chiꞌok huneꞌ yechel circuncisión yinh yaꞌ.
Haꞌ tzet haltebꞌilkanoj chij isbꞌa yu janiko janma yinh Komam
13 Yaltekano Komam Dios tet yaꞌ Abraham yebꞌ tet ej yuninal yaꞌ,
tato chischah ismajul yul sat yibꞌanhqꞌinal tiꞌ,
yajaꞌ maxhtaj yu yijem yaꞌ yinh ley,
wal xin to yu yayto yaꞌ yul yanma yinh Komam.
14 Qꞌinalo tato hanhe tet mak chiyijen ley chaqꞌ Komam Dios tzet haltebꞌilkanoj,
ta hak tuꞌ machim tzet chal yelapno janiko janma yinh Komam Dios chal tuꞌ,
machimpaxo tzet haltebꞌilkano yu Komam.
15 Yuto haꞌ ismunil ley haꞌ yaniko isyaꞌtajil yibꞌanh anma.
Qꞌinalo ta machi ley,
machim mak chako ismul yinh ley tuꞌ.
16 Yuxin yaltekano Komam Dios huneꞌ tuꞌ tet yaꞌ Abraham yu yako yanma yaꞌ yinh Komam.
Yuxin matanil chaqꞌ Komam tzet haltebꞌilkano yu,
mach xin chishel isbꞌa to haktikꞌapax tuꞌ tet yuninal yaꞌ yinh tzujanilxa.
Haꞌ chal yelapno tuꞌ to maxhnhetaj tet mak chiyijen ley bꞌay chaqꞌ Komam tzet yalte tuꞌ,
to jetpaxo hanhonh chijayto yul janma yinh Komam Dios hakaꞌ yu yanayto yaꞌ Abraham yul yanma yinh Komam;
yuxin okkano yaꞌ mamehal jinh hanhonh tiꞌ.
17 Hakaꞌ yalni yul Yum Komam Dios bꞌay chala:
«Chaxhwakanikojan mamehal yinh txꞌiꞌal ej konhobꞌ,»c
xhi Komam tet yaꞌ.
Yajaꞌ yaꞌ Abraham tuꞌ yako yanma yaꞌ yinh Komam,
Komam chiꞌaqꞌni itzitzbꞌokanh kamom yebꞌ chiwatxꞌen tzet ye tuꞌ maxhto watxꞌebꞌiloj.
18 Yaꞌ Abraham kaw yayto yaꞌ yul yanma yinh Komam Dios,
yok yaꞌ yechmano yinh tzet yalte Komam,
waxanhka xin maxhto ixtanho yijni isbꞌa.
Hak tuꞌ xin yu yok yaꞌ mamehal yinh txꞌiꞌal ej konhobꞌ,
hakaꞌtikꞌa yu yalni Komam tet yaꞌ yet yalni hakaꞌ tiꞌ:
«Hakaꞌ isbꞌisil txꞌumel,
hak tuꞌ isbꞌisil anma chipohchakanh yinh ej hawuninal,»d
xhi Komam.
19 Maxhtikꞌa xin kabꞌkonkanh yanma yaꞌ yinh Komam,
waxanhka kaw ichamxa,
kaw etza cien habꞌilxa,
hakpax tuꞌ yaꞌ Sara,
kaw ixnamxa,
matxa istiempohalo yuninwi.
20 Yajaꞌ xin maxhtikꞌa kabꞌkonkanh iskꞌul yaꞌ yinh tzet yalkano Komam,
kaw machi yilo yanma yaꞌ yinh Komam.
Wal xin to ip yanayto yaꞌ yul yanma yinh tzet yal Komam,
yaqꞌni tzalaho iskꞌul yinh Komam.
21 Kaw yohta yaꞌ tato ay yip Komam iswatxꞌen tzet yalte tet yaꞌ.
22 Yu huneꞌ tuꞌ yuxin ok yaꞌ kꞌulal yul sat Komam Dios,
yuto yayto yaꞌ yul yanma yinh Komam.
23 Yaj maxhnhetaj yinh yaꞌ Abraham tuꞌ tzꞌibꞌnhebꞌilkanoj ta ok kꞌulal yul sat Komam Dios yet yaniko yanma yaꞌ yinh Komam,
24 wal xin to tzꞌibꞌnhebꞌilpaxkano jinh hanhonh xakonhok kꞌulal yu xajako janma yinh Komam,
Komam aqꞌni itzitzbꞌokanh Komam Jesucristo Jahawil.
25 Komam alaxiko yul isqꞌabꞌ kamikal yu komul,
lahwi tuꞌ ispitzkꞌalaxkanh xol kamom,
yunhe jokkano kꞌulal yul sat Komam Dios.e