3
Yuxin,
¿tzet cheyute heyalni yinh huneꞌ chiwaltiꞌan?
¿Tom mach yelapno anma Israel yebꞌ huneꞌ circuncisión ayko yinh tuꞌ?
2 Wal xin kaw ay chaliloj yuto kawxi iskꞌul Komam Dios yaqꞌni Istzotiꞌ tet anma Israel.
3 Yajaꞌ,
¿tzet xin chiꞌelikoj tato ay anma Israel mach chiswatxꞌe yinh tzet chal Komam Dios?
¿Tom yu huneꞌ tuꞌ yuxin mach chisyijepaxo Komam Istzotiꞌ halbꞌilkano yu?
4 ¡Machoj!
Wal xin to hanhe isyelal chal Komam wal sunil anma kaw leqꞌtiꞌ,
hakaꞌ yalni yul Yum Komam bꞌay chala:
«Yuxin chaxhhal-lax kꞌulal yu anma yu tzet chawala,
hayet chaxhyilwen anma machi nino istxꞌojal chiꞌilchalo tawinh,»a
xhihayoj.
5 Wal xin ay mak chihalni hakaꞌ tiꞌ:
«Ta yu istxꞌojal chikowatxꞌe chiꞌixtanhwiloj tato hanhe istoholal chiswatxꞌe Komam,»
xhi.
Yuxin ¿tzet cheyute heyalni hex tiꞌ?
¿Tom istxꞌojal chiswatxꞌe Komam yet chiyanayo isyaꞌtajil jibꞌanh yu istxꞌojal chikowatxꞌe?
¡Machoj!
6 Kaw istoholal chiswatxꞌe Komam.
Qꞌinaloj,
ta maxhtaj istoholal chiswatxꞌe,
machim chu yok Komam yilni yinh tzet chiꞌeliko anma yul sat yibꞌanhqꞌinal tiꞌ.
7 Ay mak chitxumni hakaꞌ tiꞌ:
«Yet chiwanikojan leqꞌtiꞌal kaw ekꞌbꞌalto chisyelo isbꞌa isyelal yip Komam Dios,
yajaꞌ ¿tzet yinh xin chiꞌil-laxi yinh tzet chinwatxꞌehan kat wal-laxan mulumal?»
xhi anma tuꞌ.
8 Ay mak chalni tato hak tuꞌ walnihan.
Tato hak tuꞌ,
¿tzet yinh xin maxhtaj istxꞌojal chikowatxꞌe yunhe kaw yixtanhwilo iskꞌulchꞌanil iskꞌul Komam Dios?
Ay anma txꞌoj isnabꞌal chalni ta hak tuꞌ inkuynihan anma.
Haꞌ mak chihalni hakaꞌ tuꞌ,
haꞌ ay yet yay isyaꞌtajil yibꞌanh yu Komam Dios.
Machi hunu mak kꞌul
9 Wal xin,
¿tom ekꞌbꞌal kꞌulonh hanhonh Israel honh tiꞌ sata anma mach Israeloj?
¡Machoj!
Wal xin lahanonh kosunil.
Xawalan teyet tato sunil anma Israel yebꞌ anma mach Israeloj ayikto yalanh yip mule.
10 Hakaꞌ yalni yul Yum Komam Dios,
bꞌay chala:
«Machi hunu mak kꞌul,
nitam hunuj.
11 Machi hunu mak chitxumchalo yu,
machi hunu mak chisaynilo Komam Dios.
12 Sunil mak chikꞌayikꞌoj,
sunil mak xayetato isbꞌa.
Machi hunu mak chiwatxꞌen iskꞌulal nitam hunuj.b
13 Kaw hanhetikꞌa istxꞌojal chiꞌelti yul istiꞌ anma,
lahan hakaꞌ hunu bꞌay mujan kamom elna ismajil.
Kaw xin chaqꞌ subꞌchaho yet anmahil yinh leqꞌtiꞌal chala.
Hakaꞌ veneno ayikto yul istiꞌ noꞌ labꞌa,
hak tuꞌ ismachiswalilal tzet chiꞌelti yul istiꞌ anma.c
14 Hanhetikꞌa tzꞌaktiꞌ chiꞌelti yul istiꞌ anma,
yebꞌ tzotiꞌ kaw txꞌoj.d
15 Kaw xin yinh anhe chito potxꞌwal yinh yet anmahil.
16 Bꞌajxanhetuꞌwal chꞌekꞌi chiꞌetaxto tzet ye tuꞌ yu,
bꞌiskꞌulalnhetikꞌa chiꞌekꞌ yaqꞌaꞌkanoj.
17 Mach yohtajo isbꞌelal yet aqꞌankꞌulal.e
18 Maxhtikꞌa yelapno Komam Dios yul sat,»
xhihayo yul Yum Komam.f
19 Kaw johtaj tato sunil tzet tzꞌibꞌnhebꞌilkano yinh ley yet payat tuꞌ,
haꞌ tet mak ayikto yalanh ley tuꞌ haꞌ tet chitzoteli,
yunhe sunil mak chiskach istiꞌ,
kat istaqꞌweniko ismul yibꞌanh tet Komam Dios.
20 Yuto machi hunu mak chiꞌok kꞌulal yul sat Komam Dios yu isyijen yinh tzet chal ley,
wal xin kachannhe ismunil huneꞌ ley tuꞌ haꞌ isyeniloj tato kaw mulumonh.
Chonhkolchahi yu janiko janma yinh Komam Jesucristo
21 Tinanh xin,
xaꞌisyelo Komam Dios yinh tzet chu jok kꞌulal yul sat Komam,
maxhtaj yu koyijen ley.
Wal xin halbꞌilkano yu yaꞌ Moisés yebꞌ yu ebꞌyaꞌ ischejabꞌ Komam yet payat yinh tzet chu jok kꞌulal yul sat Komam.
22 Yu janiko janma yinh Komam Jesucristo yuxin chonhok kꞌulal yul sat Komam Dios,
hakpax tuꞌ xin sunil mak chiꞌanayto yul yanma yinh Komam chiꞌokkano kꞌulal yuto lahan anma sunil.
23 Mulumonh kosunil yul sat Komam,
yuxin nahat jehilo yinh issaqꞌalil Komam.
24 Yaj xin,
yu iskꞌulchꞌanil iskꞌul Komam yuxin chonhok kꞌulal yul sat,
yaj yu kolbꞌilonhxa yu Komam Jesucristo,
sunil tiꞌ aqꞌbꞌil matanil jet yu Komam Dios.
25 Komam Jesucristo ok xahanbꞌalil yu Komam Dios.
Ismalto ischikꞌil yu yaqꞌni nimankꞌulal yinh ismul anma.
Chischah anma huneꞌ nimankꞌulal yu yaniko yanma yinh Komam.
Hak tuꞌ chu isyeni Komam tato haꞌ istoholal chiswatxꞌe yet yaqꞌni nimankꞌulal yinh ismul anma yet payat.
26 Hakpax tuꞌ tinanh,
chisyelo Komam Dios tato haꞌ istoholal chiswatxꞌe,
yebꞌ ta yexnheto iswatxꞌen istoholal yet chonhyalni Komam kꞌulal yu chijayto yul janma yinh Komam Jesucristo.
27 Ta hak tuꞌ chal tuꞌ,
¿tzettaxka xin chiꞌeliko huneꞌ heloloꞌal?
Chitanhkanoj yuto maxhtaj yu koyijen isley yaꞌ Moisés yuxin chonhkolchahi,
wal xin to yu janiko janma yinh Komam Jesucristo.
28 Hakpax tuꞌ xin chu johtanhenkaniloj ta yu janiko janma yinh Komam Jesucristo yuxin chonhok kꞌulal yul sat Komam,
maxhtaj yu koyijen ley.
29 ¿Tom hanhkꞌanhe hanhonh Israel honh tiꞌ koDiosal ye Komam Dios?
¿Tom mach isDiosalopaxo anma mach Israelo ye Komam?
Wal xin kaw yeli isDiosalpaxo anma mach Israelo ye Komam.
30 Yuto huneꞌnhechꞌan Komam Dios,
yuxin makta ayko circuncisión yinh,
yebꞌ makta machi circuncisión yinh,
chiꞌok kꞌulal yul sat Komam Dios,
yaj yu yaniko yanma yinh Komam Jesucristo.
31 Yet chijaniko janma yinh Komam,
¿tom lanhan jalni tato matxa tzet chal yelapno ley?
¡Machoj!
Wal xin chikoyelo yinh tzet chal yelapno ley tuꞌ.