Komam Dios chiꞌilni yinh istoholal yinh tzet chiꞌeliko anma
2
Yuxin matxa tzet tzꞌaj hawalaꞌ hach chaxhok hawilaꞌ yinh tzet chiswatxꞌe hawet anmahil,
mach chiyok yinh mak anmahil hach,
yet chaxhok hawilno tzet chiswatxꞌe hawet anmahil tuꞌ,
hach hunach chawiti isyaꞌtajil tawibꞌanh yuto lahan tzet chawatxꞌepaxo yebꞌi.
2 Yajaꞌ wal xin kaw johtaj tato haꞌ Komam Dios chiꞌilni yinh kaw isyelal yinh tzet chiꞌeliko mak chiwatxꞌen hakaꞌ tuꞌ,
kat iskawxiko ismul yibꞌanh yu Komam.
3 Wal hex chexok heyilaꞌ istxꞌojal chiswatxꞌe heyet anmahil,
lahan xin chewatxꞌepaxo yebꞌi.
¿Ham heyalni tato chexkolcha tet isyaꞌtajil chati Komam Dios?
4 ¿Mato cheyah iskꞌulchꞌanil iskꞌul Komam kaw ay yelapnoj?
Ta hak tuꞌ machi xin chenaloj tato haꞌ iskꞌulchꞌanil iskꞌul Komam yebꞌ isnimankꞌulal Komam,
haꞌ lanhan kexyinito yinh heyaniko hebꞌa yul isqꞌabꞌ Komam.
5 Yajaꞌ yu iskawil heyanma yebꞌ yu mach cheje heyaqꞌaꞌko hebꞌa yul isqꞌabꞌ Komam Dios,
kat hebꞌejnikano istxꞌojal,
yu huneꞌ tuꞌ xin lanhan hekutxbꞌaniko ishowal Komam Dios teyibꞌanh yinh huneꞌ istzꞌayikal isyaꞌtajil,
yet chilni Komam yinh kaw isyelal yinh tzet chiꞌeliko anma.
6 Yinh huneꞌ tzꞌayik tuꞌ chaqꞌ Komam ispaj selel tet hunun anma hatatikꞌa tzet iswatxꞌe.
7 Chaqꞌnipaxo Komam qꞌinale mach istanhbꞌal tet mak maxhtikꞌa isbꞌej iswatxꞌen iskꞌulal yuto choche ta kꞌulchꞌannhetikꞌa yul sat Komam Dios,
yebꞌ ta ay yelapno yul sat Komam yebꞌ yu issayni tzet ye tuꞌ mach istanhbꞌal.
8 Yajaꞌ xin chitit ishowal Komam kat yanayo isyaꞌtajil yibꞌanh mak hanhetikꞌa tzet choche iskꞌul chissayikꞌoj,
mach choche isyije kuybꞌanile kaw yeli;
hanhkꞌanhetikꞌa yinh istxꞌojal ayko yanma.
9 Chitit isyaꞌtajil yibꞌanh,
kat yekꞌyaꞌ yanma sunil anma chiwatxꞌen istxꞌojal;
yinh bꞌabꞌelal yibꞌanh anma Israel,
lahwi tuꞌ xin yibꞌanh anma mach Israeloj.
10 Wal xin chaqꞌ Komam issaqꞌalil,
yebꞌ ismay yebꞌ aqꞌankꞌulal tet mak chiwatxꞌen iskꞌulal;
yinh bꞌabꞌelal tet anma Israel,
tzujan tuꞌ xin tet anma mach Israeloj.
11 Yuto yul sat Komam Dios lahan anma sunil.
12 Sunil mak mach ayoko yalanh isley yaꞌ Moisés yet yaniko ismul,
maxhtaj ley tuꞌ chikawxeniko ismul yibꞌanh yu yay isyaꞌtajil yibꞌanh.
Wal mak ayko yalanh ley tuꞌ xin yaniko ismul,
haꞌtikꞌa yinh ley tuꞌ chiꞌil-laxi yinh tzet chiꞌelikoj.
13 Yuto haꞌ anma chiꞌabꞌen ley machi xin chisyijepaxo tzet chala,
haꞌ anma tuꞌ mach chikan kꞌulal yul sat Komam Dios,
wal xin to haꞌ anma chiyijen yinh tzet chala,
haꞌ anma tuꞌ chikan kꞌulal yul sat Komam Dios.
14 Waxanhka mach ayokto anma mach Israelo yalanh isley yaꞌ Moisés,
yajaꞌ ta chiswatxꞌe yul yet ischukil hakaꞌ chal ley tuꞌ,
chalilo chal tuꞌ tato aytikꞌako huneꞌ ley tuꞌ yinh isnabꞌal ebꞌnaj.
15 Yu isbꞌeybꞌal xin chisyeloj tato ayxako huneꞌ ley tuꞌ yinh yanma,
chisyenipaxilo yinh tzet chu istxumni.
Haꞌtikꞌa isnabꞌal ebꞌnaj chalni tet tato kꞌul maka txꞌoj tzet chiswatxꞌe.
16 Hakaꞌ yalni Tzotiꞌ Kꞌul yet Kolbꞌanile chiwalikꞌotiꞌan chihul istzꞌayikal yet chilni Komam Dios yu Komam Jesucristo ismul anma ewanyehi.
Ebꞌnaj Israel yebꞌ isley yaꞌ Moisés
17 Ay hex cheyikanh hebꞌa yuto Israel hex,
yinh isley yaꞌ Moisés tzujan hex,
kaw xin loloꞌ cheyute hebꞌa yuto iskonhobꞌ Komam Dios heyehi.
18 Heyohtaj bꞌaytet choche Komam Dios chewatxꞌe,
haꞌ xin ley tuꞌ chexyeni hesayni iskꞌulal.
19 Kaw chikawxi hekꞌul teyinh tato chu heyijbꞌanikꞌo mak maxhto ohtanhe Komam Dios hakaꞌ mak mach chu yilni,
yebꞌ hakaꞌ issajilqꞌinal heyehiko yinh anma ayko xol qꞌejholo heyalni.
20 Kaw xin chikawxipaxo hekꞌul teyinh ta chu hekuyni anma suk iskꞌul,
yebꞌ ta ijbꞌalom hex yinh anma matzet yohtaj,
yuto yu isley yaꞌ Moisés ayko yul heqꞌabꞌ yuxin kaw ay yitzꞌatil hewiꞌ yebꞌ heyohta isyelal,
heyalni.
21 Yuxin tato chekuy hunuxa heyet anmahil,
¿tzet yinh xin maxhtaj hex chekuy hebꞌa bꞌabꞌel?
Cheyala tato mach chu jelqꞌawi,
yajaꞌ xin chexelqꞌawipaxoj.
22 Ay hex cheyala ta mach chexixli,
yajaꞌ xin chexixlipaxoj.
Cheyah ej tioxh,
yajaꞌ xin cheyelqꞌapaxilti tzet ayikto yul yatut tioxh tuꞌ.
23 Kaw loloꞌ cheyute hebꞌa yinh isley yaꞌ Moisés aqꞌbꞌil teyet,
yajaꞌ xin cheyilo ispixan Komam Dios yuto mach cheyije yinh tzet chala.
24 Hakaꞌ tzꞌibꞌnhebꞌilkano yul Yum Komam Dios bꞌay chal hakaꞌ tiꞌ:
«Anma mach Israeloj kaw txꞌoj istzotel yinh Komam Dios,
yajaꞌ heyu hex tiꞌ,»a
xhihayoj.
25 Kaw yeli,
huneꞌ circuncisión ayko yinh henimanil,
haꞌ chaliloj ta cheyije isley yaꞌ Moisés,
yajaꞌ ta mach cheyije xin,
lahan chaliloj hakaꞌtikꞌa mach huneꞌ circuncisión tuꞌ yinh henimanil.
26 Wal ebꞌnaj machi circuncisión yinh xin yajaꞌ chiswatxꞌe hakaꞌ chal ley tuꞌ,
ebꞌnaj tuꞌ hakaꞌtikꞌa ayxako circuncisión yinh.
27 Ebꞌnaj mach ayoko circuncisión yinh isnimanil,
yaj chisyije tzet chal ley tuꞌ,
haꞌ chihalnilo ismul ebꞌnaj mach chiyijen ley tuꞌ waxanhka ayko circuncisión yinh,
yebꞌ waxanhka yohta huneꞌ ley tzꞌibꞌnhebꞌil tuꞌ.
28 Maxhtaj haꞌ mak chihal-lax Israel yu anma,
maka yu ayxako circuncisión yinh isnimanil,
haꞌ kaw yeli israelita yul sat Komam Dios.
29 Wal xin haꞌ mak kaw yeli Israel yul sat Komam Dios,
haꞌ ton mak ayko yanma yinh Komam.
Huneꞌ yechel circuncisión tuꞌ Yespíritu Komam chiꞌaniko yinh janma,
maxhtaj yu ley tzꞌibꞌnhebꞌilkanoj.
Mak hakaꞌ tuꞌ,
maxhtaj anma chꞌaniko ismay,
to haꞌ Komam Dios.