ISKABꞌ CARTA YAꞌ SAN PABLO YATO TET MAKTA AYXAKO YUL ISQꞌABꞌ KOMAM BꞌEY CORINTO
Yichebꞌanil iscarta yaꞌ Pablo
1
Hanin Pablo intiꞌan,
ischejabꞌ Komam Jesucristo wehan,
yuto hak tuꞌ el yinh iskꞌul Komam Dios.
Haninan yebꞌ naj juxhta Timoteo chikotzꞌibꞌnhetojanh huneꞌ carta tiꞌ teyet,
hex ayexxako yul isqꞌabꞌ Komam Dios yul konhobꞌ Corinto,
yebꞌ tet makta ayxako yul isqꞌabꞌ Komam yul ismajul Acaya.
2 Yaqꞌabꞌayo Komam Dios Mame yebꞌ xin Komam Jesucristo Jahawil iskꞌulchꞌanil iskꞌul teyibꞌanh,
yebꞌ xin aqꞌankꞌulal yul heyanma.
Hunteqꞌan isyaꞌtajil yaqꞌle yaꞌ Pablo
3 Jalaꞌwe tzotiꞌ kꞌul yinh Komam Dios,
Ismam Komam Jesucristo,
Komam chitzꞌay iskꞌul jinh yebꞌ koDios chiꞌaqꞌni yaqꞌlobꞌal janma.
4 Hakaꞌojabꞌ yaqꞌni Komam yaqꞌlobꞌal janma yinh ej isyaꞌtajil chul jibꞌanh,
hakojabꞌ tuꞌ chu jaqꞌni yaqꞌlobꞌal yanma makta chiꞌaqꞌlen isyaꞌtajil;
chijaqꞌ yaqꞌlobꞌal yanma,
hakaꞌtikꞌa kochahni yaqꞌlobꞌal janma tet Komam.
5 Yuto hakaꞌtikꞌa chu islahniko jaqꞌlen nimeta isyaꞌtajil yinh Komam Cristo,
haktikꞌapax tuꞌ chu islahniko Komam yaqꞌni yaqꞌlobꞌal janma.
6 Ta chiꞌekꞌyaꞌ janmahanh yaj yu hechahnipaxo yaqꞌlobꞌal heyanma yebꞌ yunhe hekolchahi.
Ta chaqꞌ Komam Dios yaqꞌlobꞌal janmahanh yunhe hechahnipaxo yaqꞌlobꞌal heyanma hex tiꞌ,
hak tuꞌ xin ay heyip heyaqꞌni techaho isyaꞌtajil chul teyibꞌanh hakaꞌ hunteqꞌan isyaꞌtajil chijaqꞌletiꞌanh.
7 Chikawxi kokꞌulanh yinh Komam Dios yuto chikolwa teyinh heyaqꞌni techaho isyaꞌtajil ayayo teyibꞌanh,
yuto johtajanh tato lanhan heyaqꞌlen isyaꞌtajil hakaꞌ jaqꞌlehanh,
hak tuꞌ chu hechahnipaxo yaqꞌlobꞌal heyanma chitit tet Komam Dios.
8 Wuxhtaj,
wanabꞌ,
chijaqꞌanh heyohtanheloj hanta isyaꞌtajil jaqꞌlehanh yul ismajul Asia.
Haꞌ jalnihanh mach chitecha hunteqꞌan isyaꞌtajil tuꞌ juhanh,
yuxin matxam chonhkolchahanh jalnihanh.
9 Haꞌ jalnihanh to haꞌ bꞌey tuꞌ kaw konhkamanh.
Haꞌ hunteqꞌan isyaꞌtajil tuꞌ haꞌ aqꞌni kotxumuꞌanh tato mach chu iskawxi kokꞌulanh jinhanh,
wal xin to kaw yinhnhe Komam Dios bꞌay wal iskawxi kokꞌul,
Komam chiꞌaqꞌni itzitzbꞌokanh anma kamom.
10 Wal xin haꞌ Komam konhkolnihanh yul isqꞌabꞌ kamikal bꞌay etza konhkamanh,
chixin kawxi kokꞌulanh yinh Komam ta chikolwapaxo jinhanh yinh isyaꞌtajil chul kosata tiꞌanh.
11 Ta chexkolwa hetxahli jinhanh,
yebꞌ xin ta txꞌiꞌal mak chitxahlipaxo jinhanh,
txꞌiꞌaltikꞌapaxo mak chiꞌaqꞌni yuchꞌandiosal tet Komam yinh iskꞌulal chiyaqꞌ Komam jet.
Yal yaꞌ Pablo tzet yinh xin machi to yaꞌ bꞌey Corinto
12 Ay huneꞌ tzet chiꞌaqꞌni tzalaho kokꞌulanh yuto janmahanh chalni tato kꞌul kobꞌeybꞌalanh yinh sat sunil anma.
Hakpax tuꞌ yet jekꞌanh texol kꞌul kobꞌeybꞌalanh,
yajaꞌ maxhtaj yu istzꞌajanil kokꞌulanh yuxinto kꞌul chijute kobꞌahanh,
machoj,
wal xin to haꞌ iskꞌulchꞌanil iskꞌul Komam Dios chikolwa jinhanh.
13 Yet chikotzꞌibꞌnhentojanh kocartahanh teyet,
hanhechꞌan hunteqꞌan chisje heyilni yebꞌ hunteqꞌan habꞌan hetxumni,
haꞌ chijayojanh.
14 Haꞌ hunteqꞌan lanhan yichi hetxumni tuꞌ wochebꞌalan ta chetxumilo yinh kaw kꞌul,
haxinwal yet chul Komam Jesucristo chextzala jinhanh,
kat kotzalapaxojanh teyinh.
15 Haꞌ hunteqꞌan tuꞌ ayko iskawxobꞌalo inkꞌulan,
yuxin ok yinh innabꞌalan tato bꞌabꞌel chinekꞌan kexwilaꞌan,
haxinwal kayel chexwilan yinh inbꞌelan yu hechahni iskꞌulal Komam Dios.
16 Yuto yet chintohan yul ismajul Macedonia walnihan kat xin wekꞌan kexwilnojan bꞌabꞌel,
haxa yet chinmeltzohan xin kat wekꞌpaxojan kexwilnojan hunelxa,
hexxa xin chexkolwa winhan yet chintohan bꞌey txꞌotxꞌ Judea.
17 Yet intxumnihan huneꞌ tiꞌ,
¿tom mach sunilo wanmahan walnihan heyalni?
Tajka chetxumu ta chinetlihan teyinh hakaꞌ chute komon anma,
yuto ta chiwalan ta chintohan kexwilaꞌan,
tzujan tuꞌ xin mach chintopaxkanhan,
wal xin mach hako tuꞌ intxumnihan.
18 Kaw chil Komam Dios tato maxhto hunelo chiwalan teyet hakaꞌ tiꞌ:
«Hoꞌ,
kꞌultikꞌa,»
kinchihan,
lanhantotikꞌa xin kat walnihan «machoj.»
19 Komam Jesucristo,
Iskꞌahol Komam Dios haꞌ walikꞌojan texol,
yebꞌ naj juxhta Silvano,
yebꞌ naj juxhta Timoteo.
Haꞌ Komam tuꞌ machi bꞌay yal Komam «kꞌultikꞌa,»
tzujan tuꞌ yalnipaxo Komam «machoj,»
yuto haꞌ Komam Cristo hanhkꞌanhe isyelal yal Komam.
20 Wal xin haꞌ yinh Komam Jesucristo chijkano isbꞌa sunil tzet haltebꞌilkano yu Komam Dios,
yuxin yet chijaniko ismay Komam Dios chijalni:
hakojabꞌ tuꞌ konhchi.
21 Haꞌ xin Komam Dios konhsikꞌnikaniloj,
konhyaniko yinh istꞌinhanil,
jetbꞌinhenkano kobꞌa yebꞌ Komam Jesucristo.
22 Haꞌ Komam Dios aniko Komam Espíritu Santo yul janma,
haꞌ xin chiyeniloj tato yetonhxa Komam.
Komam Espíritu Santo lahan hakaꞌ hunu sello,
haꞌ chiyeniloj ta chikochah sunil hunteqꞌan tzet xayalte Komam jet.
23 Kaw yohta Komam Dios tato maxhto chintokojan bꞌey Corinto tuꞌ tekꞌatanh hakaꞌ nabꞌil wuhan,
yunhe machi waqꞌ takojan hekꞌul.
24 Matolo yu yahaw chiwute hinbꞌahan yinh tzet chu heyaniko heyanma yinh Komam Dios,
machoj,
yuto xaheyayto yul heyanma yinh Komam yuxin linhan hex yinh Komam.
Wal xin to chijochehanh chonhkolwahanh teyinh,
kat hechahni yaqꞌbꞌil tzalahilal yul heyanma.