Chꞌen kolwal chiꞌalaxto tet ebꞌnaj ayxako yul isqꞌabꞌ Komam Jesucristo
16
Wal chꞌen heyofrenda chikutxi texol,
chꞌen chiꞌalaxto tet mak ayxako yul isqꞌabꞌ Komam Dios,
chekutxbꞌawe chꞌen hakaꞌ yu walnihan tet makta ayxako yul isqꞌabꞌ Komam ay yul ismajul Galacia.
2 Hunun domingo yinh semana,
yilal hepohnilo hanikꞌo chꞌen melyu cheyiqꞌ yinh hemunil hunun hex,
hatatikꞌa hanta chikolwa Komam teyinh,
kat hekꞌubꞌantoj,
haxinwal yet chinapnihan matxa yilalo chꞌah chꞌen texol.
3 Hato yet chinapnihan texol kat wanitojan mak saybꞌilxa heyu,
kat yinito ebꞌnaj hunu carta yebꞌ chꞌen hekolwal tuꞌ tet ebꞌnaj juxhtaj ay bꞌey Jerusalén.
4 Yajaꞌ ta hankawinan chintohan xin,
yilaltikꞌa chitopaxo ebꞌnaj wintajan.
Yalto yaꞌ Pablo tato chiꞌapni yaꞌ yilaꞌ makta ayxako yul isqꞌabꞌ Komam bꞌey Corinto
5 Hayet chintohan yinh inbꞌel tuꞌan yilal wekꞌan bꞌey Macedonia,
lahwi tuꞌ xin kat wapnihan kexwilnojan bꞌey Corinto tuꞌ.
6 Etzanhem chinkanan hanikꞌo tiempohal tekꞌatanh,
maka xin haꞌ bꞌey tuꞌ ayinikꞌojan chiꞌekꞌ nhabꞌil;
ta hak tuꞌ hexxa chexkolwa winhan yinh inbꞌelan yet chinelan texol.
7 Mach chiwochehan tato yinh anhe chinekꞌan kexwilaꞌan,
wal xin chiwochehan chinkanan hanikꞌo tiempohal texol,
ta hak tuꞌ chiꞌel yinh iskꞌul Komam Dios.
8 Yajaꞌ xin yilalto inkanan bꞌey Efeso tiꞌ masanto yet chiꞌekꞌ qꞌinh pentecostés.
9 Yuto kaw chalte isbꞌa munil yinh ismunil Komam Dios chiwilan,
yuxin chinkanan waxanhka xin kaw ay mak ayko ishowal winhan.
10 Ta chiꞌapni naj Timoteo tekꞌatanh xahan cheyil naj,
haxinwal chitzala iskꞌul naj texol,
yuto chimunlapaxo naj yinh ismunil Komam Dios hakaꞌ intiꞌan.
11 Tajka mach chikam hekꞌul yinh naj,
wal xin kolwahanhwe yinh naj haxinwal chislah naj isbꞌel yinh tzalahilal kat yul naj kokꞌatanhanh,
yuto chijechmahanh naj yebꞌ ebꞌnaj juxhtaj.
12 Wal juxhta Apolos,
walan tet yaꞌ tato chito yaꞌ yinta ebꞌnaj to kexilnoj,
yajaꞌ machisjeto yaꞌ,
yettojabꞌ hunelxa chito yaꞌ yet ay ishamanil yaꞌ.
Yet istaqꞌlito yaꞌ Pablo tet makta ayxako yul isqꞌabꞌ Komam bꞌey Corinto
13 Hex wuxhtaj,
hex wanabꞌ,
kaw majwahanhwej,
linhbꞌawe hebꞌa yinh huneꞌ bꞌay ayxako heyanma,
kaw mach chexxiwi,
aqꞌwe yip heyanma.
14 Sunilojabꞌ tzet chewatxꞌe,
ayojabꞌ iskꞌulchꞌanil hekꞌul yinh.
15 Hex wuxhtaj hex wanabꞌ,
kaw heyohtaj tato naj juxhta Estéfanas yebꞌ yuninal haꞌ bꞌabꞌel yako isbꞌa yul isqꞌabꞌ Komam Dios bꞌey yul ismajul Acaya tuꞌ.
Kaw xin hunelnhe yeko yanma naj iskolwa yinh mak ayxako yul isqꞌabꞌ Komam.
16 Chiwochehan ta cheyije tet naj Estéfanas yebꞌ yuninal tuꞌ,
yebꞌ tet sunil makta chikolwahi yebꞌ chimunla yinh ismunil Komam.
17 Kaw chintzalahan yuto hul naj Estéfanas yebꞌ naj Fortunato yebꞌpaxo naj Acaico bꞌey tiꞌ,
yuto yet chiwilnihan yinh ebꞌnaj hakaꞌojtam hex chiwilikojan teyinh.
18 Yinh kaw yeli ebꞌnaj tiꞌ yaqꞌ tzalaho ebꞌnaj inkꞌulan,
hakaꞌ yu yaqꞌni tzalaho ebꞌnaj hekꞌul.
Ebꞌnaj juxhta hakaꞌ ebꞌnaj tiꞌ,
ayojabꞌ yelapno ebꞌnaj yul hesat.
19 Ebꞌnaj juxhta yebꞌ ebꞌix janabꞌ ayxako yul isqꞌabꞌ Komam Dios yul hunu konhobꞌ yul ismajul Asia tiꞌ,
chalto ta cheyil hebꞌa.
Hakpax tuꞌ naj juxhta Aquila yebꞌ ix janabꞌ Priscila yebꞌ ebꞌnaj juxhta chiskutxbꞌa isbꞌa yul yatut naj,
chalpaxtoj ta cheyil hebꞌa.
20 Hakpax tuꞌ ebꞌnaj juxhta ay bꞌey tiꞌ chalpaxto ebꞌnaj ta cheyil hebꞌa.
Yebꞌ xin qꞌambꞌewepaxo teyet yinh tzalahilal hanikꞌ heye hunun hex.
21 Hanin Pablo intiꞌan hankawinan chintzꞌibꞌnhehan yul carta tiꞌ ta cheyil hebꞌa.
22 Ta ay hunu mak mach chiꞌochen Komam Jesucristo,
tijabꞌ isyaꞌtajil yibꞌanh.
¡Mam Jesucristo Jahawil,
hulanh!
23 Yaqꞌabꞌayo Komam Jesucristo iskꞌulchꞌanil iskꞌul teyibꞌanh.
24 Kaw xahan ay hex hesunil wuhan,
hex ayexxako yul isqꞌabꞌ Komam Jesucristo.
¡Hakojabꞌ tuꞌ!