Istzotiꞌal yet yitzitzbꞌikanh Komam Jesucristo
15
Tinanh xin,
hex wuxhtaj hex wanabꞌ,
chiwochehan chenati Tzotiꞌ yet kolbꞌanile halbꞌilkano teyet wuhan,
huneꞌ chabꞌilxa heyu bꞌay linhan hex tinanh.
2 Yuto yu huneꞌ Tzotiꞌ yet kolbꞌanile tuꞌ,
yuxin kolbꞌilexxa,
yaj tato mach linhanoj hex yinh,
chal yelapnoj tato mach heyayto yul heyanma yinh kaw isyelal.
3 Haꞌ hunteqꞌan kuybꞌanile chabꞌilkano wuhan,
haꞌ bꞌabꞌel walan teyet.
Kexinkuynihan tato kam Komam Jesús yu komul,
hakaꞌ yalni yul Yum Komam Dios.
4 Lahwi tuꞌ ismujlax Komam,
yajaꞌ yinh yox tzꞌayik yitzitzbꞌikanh xol kamom,
hakaꞌtikꞌa yalni yul Yum Komam Dios.
5 Isyeni isbꞌa Komam tet yaꞌ Pedro,
isyenipaxo isbꞌa tet ebꞌyaꞌ ischejabꞌ.
6 Lahwi tuꞌ xin,
isyenipaxo isbꞌa Komam tet ekꞌbꞌal howebꞌ ciento ebꞌnaj juxhtaj.
Txꞌiꞌal xin ebꞌnaj aytokꞌo tinanh,
ay xin ebꞌnaj xakami.
7 Isyenipaxo isbꞌa Komam tet yaꞌ Jacobo,
lahwi tuꞌ xin isyenipaxo isbꞌa Komam tet ebꞌyaꞌ ischejabꞌ.
8 Haxa yinh istzujanilxa xin isyeni isbꞌa Komam wetan,
yajaꞌ hakaꞌ hunu nichꞌan unin pitzkꞌana yalanhto maxhto istiempohalo ispitzkꞌahi,
hak tuꞌ wehan.
9 Yuxin kaw matzet welapnojan xol ebꞌyaꞌ ischejabꞌ Komam chiwabꞌehan,
yuxin mach intzanojan yal-lax ischejabꞌ Komam Jesucristo winhan,
yuto waqꞌ ekꞌojan yaꞌ yanma makta ayxako yul isqꞌabꞌ Komam Dios yet yalanhtokanoj.
10 Yu iskꞌulchꞌanil iskꞌul Komam Dios,
yuxin ayinikojan yinh huneꞌ munil tiꞌ,
yajaꞌ mach nabꞌnheho huneꞌ iskꞌulchꞌanil iskꞌul Komam yaqꞌ wettuꞌan yuto ekꞌbꞌalto chinmunlahan sata ebꞌyaꞌ ischejabꞌ Komam.
Yajaꞌ maxhtaj yu wipan,
wal xin to haꞌ iskꞌulchꞌanil Komam chikolwa winhan.
11 Yajaꞌ machi yok yinh mak chihalnikꞌo kuybꞌanile tuꞌ,
waxanhka haninan,
maka ebꞌyaꞌ ischejabꞌ Komam,
haꞌ huneꞌ kaw yilal haꞌ jalnikꞌojanh kuybꞌanile tuꞌ,
huneꞌ chabꞌilxa yul heyanma.
Chiꞌitzitzbꞌikanh anma kamnaxa
12 Haꞌ kuybꞌanile jalanh teyet chala tato itzitzbꞌikanh Komam Jesucristo,
yajaꞌ ¿tzet yinh xin ay hex cheyala tato mach chiꞌitzitzbꞌikanh kamom?
13 Ta mach chiꞌitzitzbꞌikanh anma kamnaxa,
machim itzitzbꞌikanh Komam Jesucristo.
14 Ta mach itzitzbꞌikanh Komam Jesucristo machim tzet chal yelapno kuybꞌanile jaqꞌanh teyet,
nabꞌanhem chijako janma yinh Komam.
15 Ta hak tuꞌ leqꞌtiꞌonhmi yinh Komam Dios,
yuto chijala tato haꞌ Komam Dios aqꞌni itzitzbꞌokanh Komam Jesucristo.
Machim yaqꞌ itzitzbꞌokanh Komam Dios Komam Jesucristo tato yeli mach chiꞌitzitzbꞌikanh kamom.
16 Tato yeli mach chiꞌitzitzbꞌikanh anma kamnaxa,
machmi itzitzbꞌikanh Komam Jesucristo.
17 Ta mach itzitzbꞌikanh Komam tuꞌ xol kamom,
nabꞌnhem chijako janma yinh Komam Dios,
ayonhtomiko yinh komul.
18 Hakmipax tuꞌ ebꞌnaj chabꞌilxa Komam Jesucristo yu yet iskami,
kꞌaynamikanto ebꞌnaj yinh hunelnhe.
19 Ta iskawxobꞌal kokꞌul yinh Komam Jesucristo yulnhe sat yibꞌanhqꞌinal tiꞌ yehi,
maxhtikꞌam nichꞌano iskꞌulal jet yinh hakaꞌ tuꞌ.
20 Wal xin,
yinh kaw yeli itzitzbꞌikanh Komam Jesucristo xol kamom,
hakaꞌ bꞌabꞌel sat tzꞌunubꞌ chaqꞌa,
hak tuꞌ yu isbꞌabꞌi yitzitzbꞌikanh,
haꞌ chiyeni ta chiꞌitzitzbꞌipaxkanh kamom.
21 Yu huneꞌ naj,
yuxin hul kamikal yibꞌanh anma yul sat yibꞌanhqꞌinal tiꞌ,
yajaꞌ yu huneꞌxa naj xin,
yuxin chiꞌitzitzbꞌikanh anma yinh kamikal.
22 Hakaꞌtikꞌa chu iskamto anma yu ismul naj Adán,
haktikꞌapax tuꞌ chu yulkanh iskꞌul anma yu Komam Jesucristo.
23 Yuxin yinh istxolal aykoj,
haꞌ Komam Jesucristo haꞌ bꞌabꞌel itzitzbꞌikanh,
haxa yet chul Komam yet iskayel kat yitzitzbꞌikanh makta yetxa Komam.
24 Lahwi tuꞌ xin,
kat yul islahobꞌal tzꞌayik bꞌay chiqꞌoji Komam yinh ebꞌnaj kanhyehi yebꞌ ebꞌnaj ayko yahawilo konhobꞌ,
yebꞌ ischejabꞌ naj matzwalil chiꞌekꞌ xol jaqꞌeqꞌ yebꞌ yul yibꞌanhqꞌinal tiꞌ,
katto yaniko Komam sunil tzet ay yul isqꞌabꞌ tet Komam Dios Mame.
25 Yajaꞌ yet maxhto chako Komam Jesucristo sunil tiꞌ yul isqꞌabꞌ Komam Dios chꞌok Komam Yahawiloj masanto yet chiꞌok sunil mak ayko ishowal yinh Komam yalanh yoj.
26 Haxa huneꞌ islahobꞌal bꞌay chiqꞌoji Komam xin,
haꞌ ton yinh naj kamikal ayko ishowal yinh Komam.
27 Tzꞌibꞌnhebꞌilkanoj tato sunil tzet ye tuꞌ chakto Komam Dios yalanh yoj Komam Jesucristo,
yajaꞌ wal Komam Dios mach chiꞌokto yalanh yoj Komam Jesucristo,
yuto haꞌ Komam Dios chiꞌaniko sunil yalanh yoj Komam Cristo.
28 Yet chiꞌokkanto sunil yalanh yip Komam Jesucristo tuꞌ xin,
haꞌ kaw Komam tuꞌ chakto isbꞌa yalanh ischejbꞌanil Ismam anheko sunil tzet ye tuꞌ yul isqꞌabꞌ,
hak tuꞌ xin haxanhe Komam Dios Yahaw chukaniko yinh sunil tzet ye tuꞌ.
29 Yebꞌpaxo hunxa,
hakaꞌ anma chiꞌah haꞌ iswiꞌ selelo anma kamnaxa,
yajaꞌ ta mach chulkanh iskꞌul kamom,
¿tzet yinh xin chiꞌah haꞌ iswiꞌ anma selelo anma kamnaxa tuꞌ?
30 Ta machi itzitzbꞌikanh kamom,
¿tzet yinh xin chijaqꞌ janmahanh hanhonh ischejabꞌ Komam Dios honhtiꞌanh jijlenanh isyaꞌtajil chul jibꞌanhanh hunun tzꞌayik?
31 Hex wuxhtaj hex wanabꞌ,
hanintiꞌan kaw hunun tzꞌayik inhinni hinbꞌahan inkaman.
Huneꞌ tiꞌ kaw yeli hakaꞌ huneꞌ tzalahilal chiwabꞌehan teyinh,
yuto ayexxako yul isqꞌabꞌ Komam Jesucristo.
32 Hanintiꞌan kaw ekꞌyaꞌ wanmahan bꞌey Efeso hakaꞌtanhe waqꞌlehan howal yebꞌ ej noꞌ howla noqꞌ.
¿Tzet xin chiwiqꞌan yinh huneꞌ tuꞌ tato mach chiꞌitzitzbꞌikanh kamom?
Ta hak tuꞌ,
haꞌmi ye yu anma chihalni hakaꞌ tiꞌ:
«¡Waꞌojonhwe yinh kaw kꞌul,
jaqꞌaꞌwe tzet choche janma,
yuto kamomonhxataxka yet hekal!»
xhi.
33 Hex wuxhtaj hex wanabꞌ,
mach cheyaqꞌ subꞌchaho hebꞌa,
kajxam yal-laxi:
«Ta chijetbꞌinhe kobꞌa yebꞌ anma txꞌoj isbꞌeybꞌal,
nixhtejalnhe kokuynito kowatxꞌen istxꞌojal tuꞌ,»
xhi.
34 Nachahojabꞌilo heyu yinh istxꞌojal bꞌay ayexikoj yebꞌ matxa cheyako hemul,
yuto ay hex maxhto heyohtajo Komam Dios.
Chiwalan huneꞌ tiꞌ yunhe hetxꞌixwikanh.
Yinh tzet chu yitzitzbꞌikanh anma kamnaxa
35 Aymi mak chiqꞌambꞌen hakaꞌ tiꞌ:
«¿Tzettaxka chu yitzitzbꞌikanh anma kamnaxa?
yebꞌ ¿tzettaxka jilni isnimanil yet chiꞌitzitzbꞌikanh?»
xhimi.
36 Haꞌ mak chalni hakaꞌ tuꞌ kaw suk.
Qꞌinalo ta chikotzꞌun hunu ixim hinhat,
kaw yilal isqꞌato huneꞌ hinhat tuꞌ,
hakaꞌtanhe chikami,
haxa yanma ixim xin chiꞌahiloj.
37 Maxhtaj awalxa yehi chikotzꞌunni,
wal xin to haꞌ hinhat tuꞌ chikotzꞌunu,
hakaꞌ ixim hinhat trigo maka hunuxa nan hinhatil.
38 Haxa Komam Dios xin chiꞌaqꞌni aholo ixim hinhat tuꞌ hakaꞌ choche iskꞌul,
hatatikꞌa tzet hinhatil chikotzꞌunu haꞌ xin chiꞌahiloj.
39 Yuxin mach sunilo nimanile lahan,
wal xin nantikꞌa isnimanil anma,
nanpaxo isnimanil no noqꞌ kanhebꞌ yoj,
nanpaxo isnimanil noꞌ chꞌik,
nanpaxo isnimanil noꞌ kay.
40 Hakpax tuꞌ xin,
ay nimanile yet satkanh yehi,
aypaxo nimanilehal yet sat txꞌotxꞌal tiꞌ.
Yajaꞌ xin nananta jilni iskꞌulchꞌanil isnimanil tzettaj ye tuꞌ ay satkanh,
yebꞌ xin nan jilni iskꞌulchꞌanil isnimanil tzettaj ye tuꞌ ay sat txꞌo txꞌotxꞌ tiꞌ.
41 Hakpax tuꞌ tzꞌayik,
mach lahano isqꞌaqꞌal yebꞌ ixahaw,
mach lahanpaxo yebꞌ txꞌumel,
hakpax tuꞌ ej txꞌumel mach lahano isqꞌaqꞌal hunun.
42 Hak tuꞌ chu yitzitzbꞌikanh anma kamom.
Huneꞌ nimanile chimujlaxi chiꞌetaxtoj,
yajaꞌ nanxa nimanile chu ispitzkꞌakanh,
matxa xin chiꞌetaxtoj.
43 Chimujlax huneꞌ nimanile ayko istxꞌojal yinh,
wal yet chiꞌitzitzbꞌikanh xin,
kꞌulchꞌanxa jilni.
Chimujlax huneꞌ nimanile machi yip,
haxa yet chiꞌitzitzbꞌikanh kaw ayxa yip.
44 Chimujlax huneꞌ nimanile yet yul sat yibꞌanhqꞌinal tiꞌ,
haxa yet chiꞌitzitzbꞌikanh xin,
yetxa espíritu yehi.
Ay nimanile yet yul sat yibꞌanhqꞌinal tiꞌ,
aypaxo nimanile yet espíritu.
45 Chal yul Yum Komam Dios hakaꞌ tiꞌ:
«Haꞌ naj Adán,
naj bꞌabꞌel winaj,
anma yu iswatxꞌelax naj,
aqꞌbꞌil isqꞌinal naj,»
xhihayoj.
Haxa naj iskabꞌ Adán,
yet satkanh ye naj,
haꞌ naj chiꞌaqꞌni qꞌinale mach istanhbꞌal.
46 Wal xin bꞌabꞌel hul tzet ye tuꞌ yet yul sat yibꞌanhqꞌinal tiꞌ,
tzujan tuꞌ xin,
yul tzet ye tuꞌ yet espíritu.
47 Naj bꞌabꞌel winaj,
yinh txꞌo txꞌotxꞌ watxꞌelax naj,
yuxin yet txꞌo txꞌotxꞌ ye naj.
Wal naj iskabꞌ yet satkanh ye naj.
48 Haꞌ nimanile yet yul sat yibꞌanhqꞌinal tiꞌ,
lahan hakaꞌ isnimanil naj watxꞌebꞌil yinh txꞌo txꞌotxꞌ,
wal nimanile yet satkanh xin,
lahan hakaꞌ isnimanil naj tit yul satkanh.
49 Yulbꞌal yet ayonh yul sat yibꞌanhqꞌinal tiꞌ,
lahan konimanil yebꞌ naj bꞌabꞌel winaj watxꞌebꞌil yinh txꞌo txꞌotxꞌ,
wal yet bꞌaqꞌinh xin,
lahan chiꞌeliko konimanil hakaꞌ naj yet satkanhil yehi.
50 Hex wuxhtaj hex wanabꞌ,
chiwalan teyet tato huneꞌ konimanil tiꞌ,
mach chu yapni iskꞌatanh Komam Dios,
yuto chibꞌe yebꞌ bꞌaj;
hunteqꞌan chiꞌetaxto tiꞌ,
mach chu yapni bꞌay mach chiꞌetaxto tzet ye tuꞌ.
51 Chiwochehan cheyohtanhelo huneꞌ tzet ye tuꞌ ewanyehi:
Mach kosunilo chonhkami,
yajaꞌ xin kosunil chihel-lax konimanil,
52 yuto yinh kaw lembꞌil,
hakaꞌnhe ismutzꞌla kosat,
yet chiꞌoqꞌ chꞌen islahobꞌal trompeta,
yet chiꞌoqꞌ chꞌen tuꞌ kat yitzitzbꞌikanh makta ayxako yul isqꞌabꞌ Komam xakami,
matxa xin bꞌaqꞌinhal chikami.
Walonh itzitzonh tiꞌ,
chihel-lax konimanil.
53 Yuto huneꞌ konimanil chiꞌetaxto tiꞌ,
chihel-lax yinh huneꞌ nimanile mach chiꞌetaxtoj.
Huneꞌ konimanil chikamto tiꞌ chihel-laxi,
haꞌ huneꞌ satkanhil chiꞌaqꞌlax seleloj huneꞌ matxa bꞌaqꞌinh chitanhiloj.
54 Huneꞌ konimanil chiꞌetaxto tiꞌ,
chiheli kat yok yinh huneꞌ nimanile machi etaxtoj.
Chihel-lax konimanil chikamto tiꞌ yinh huneꞌ nimanile mach chikami.
Hak tuꞌ chu yijni isbꞌa tzet tzꞌibꞌnhebꞌilkano yul Yum Komam Dios bꞌay chala:
«Chikꞌaytzelaxilo naj kamikal,
ay huneꞌ mak chiqꞌoji yinh naj yinh hunelnhe.
55 Yuxin hach kamikal ¿bꞌaytuꞌwal ay hahelanil?
¿Bꞌaytuꞌwal ay hawip hapotxꞌwahi?»a
xhihayoj.
56 Haꞌ mule chonhyaqꞌ kamoj,
wal isley Komam Dios xin ip yaniko isyaꞌtajil jibꞌanh.
57 ¡Yajaꞌ yuchꞌandios tet Komam Dios,
yuto xakonhqꞌoji yinh naj kamikal,
yaj yu Komam Jesucristo!
58 Yuxin hex wuxhtaj hex wanabꞌ,
hex xahan ay wuhan,
linhbꞌawe hebꞌa,
machojabꞌ chexpax teyintaj.
Kaw munlahanhwe yinh ismunil Komam Dios sunilbꞌal tiempo,
yuto johtaj tato mach nabꞌnheho chonhmunla yinh ismunil Komam Jesucristo Jahawil.