Hunteqꞌan nan abꞌxubꞌal
14
Machojabꞌ chebꞌej hexahannhen heyet anmahil,
kat xin heyaqꞌni heyanma hesayni hunteqꞌan munil chaqꞌ Komam Espíritu Santo teyet.
Yajaꞌ haꞌ huneꞌ kaw kꞌul,
haꞌ heyalni tzotiꞌ chitit tet Komam Dios.
2 Haꞌ mak chitzotel yinh nan abꞌxubꞌal,
haꞌ tet Komam Dios chitzoteli,
maxhtaj tet anma,
yu machi mak chitxumni yinh tzet chala.
Yu Komam Espíritu Santo yuxin chal tzotiꞌ machi mak ohtanhe.
3 Wal mak chalni tzotiꞌ chitit tet Komam Dios xin,
chichꞌibꞌ ebꞌnaj juxhtaj yebꞌ ebꞌix janabꞌ yinh yet Komam yu,
kat yiptzelax yu,
kat yaqꞌnipaxo yaqꞌlobꞌal yanma.
4 Haꞌ mak chitzotel yinh nan abꞌxubꞌal,
hanhkꞌanhe huneꞌ mak tuꞌ chichꞌibꞌ yinh yet Komam,
yajaꞌ wal mak chihalni tzotiꞌ chitit tet Komam Dios,
chaqꞌ chꞌibꞌo mak ayxako yul isqꞌabꞌ Komam.
5 Wochebꞌalan tato hesunil cheyal nan abꞌxubꞌal,
yajaꞌ haꞌ huneꞌ ekꞌbꞌal chiwochehan to cheyalikꞌo tzotiꞌ chitit tet Komam Dios.
Yuto ekꞌbꞌal kꞌul jalni tzotiꞌ chitit tet Komam Dios sata jalni hunuxa nan abꞌxubꞌal,
kachannhe ta ay mak chalnilo tzet chal yelapno huneꞌ nan abꞌxubꞌale tuꞌ,
ta hak tuꞌ xin chichꞌibꞌ makta ayxako yul isqꞌabꞌ Komam Dios yu.
6 Yuxin hex wuxhtaj hex wanabꞌ,
qꞌinalo tato chinapnihan kexwilaꞌan kat intzotelan yinh nan abꞌxubꞌal teyet,
machmi tzet cheyiqꞌ yinh.
Yajaꞌ ta hunu tzet chaqꞌ Komam Dios johtanhe,
haꞌ chiwalan,
maka helanile,
maka ta chiwalan tzotiꞌ chitit tet Komam Dios,
maka hunuxa kuybꞌanile;
wal tuꞌ chitxumchalo heyu.
7 Qꞌinalo hunu teꞌ suꞌ maka hunu teꞌ arpa,
machim chikotxum tzet bꞌital chiꞌalaxiko yinh teꞌ ta mach watxꞌebꞌilo yul isnuqꞌ teꞌ.
8 Yebꞌ xin ta ay hunu howal kat yoqꞌtzelax chꞌen trompeta yu iskutxiko ebꞌnaj soldado,
yajaꞌ ta mach habꞌano yoqꞌ chꞌen,
machim chiskutxbꞌako isbꞌa ebꞌnaj isto yinh howal.
9 Kaw xin hakonhmi tuꞌ,
ta mach habꞌano tzet chijala yet chonhtzoteli,
¿tzettaxka chu istxumlaxilo tzet chijal tuꞌ?
Kaw nabꞌnhem chonhtzotel yinh hakaꞌ tuꞌ.
10 Yul sat yibꞌanhqꞌinal tiꞌ,
kaw txꞌiꞌal abꞌxubꞌal,
yajaꞌ hunun abꞌxubꞌal tuꞌ ay tzet chaliloj.
11 Yajaꞌ ta mach wohtajojan yabꞌxubꞌal hunu mak chitzotel wetan,
nan konhobꞌal hinan yul sat huneꞌ mak chitzotel tuꞌ,
nanpaxo konhobꞌal naj yul insatan.
12 Kaw wohtajan tato hex tiꞌ kaw cheyoche hunteqꞌan munil chaqꞌ Komam Espíritu Santo teyet,
yajaꞌ haꞌ hunteqꞌan chꞌaqꞌni chꞌibꞌo mak ayxako yul isqꞌabꞌ Komam Dios,
haꞌ bꞌay wal helahnikoj.
13 Yuxin tato ay mak chitzotel yinh nan abꞌxubꞌal,
kaw yilal isqꞌanni ishelanil tet Komam Dios yunhe chu yalnilo yinh tzet chal yelapnoj.
14 Ta chintxahlihan yinh nan abꞌxubꞌal,
yinh kaw yeli hanhe wanmahan chitxahli,
wal innabꞌalan xin,
mach chitxumcha yu yinh tzet chiwal tuꞌan.
15 Yuxin ¿tzet wal juten kobꞌa?
Wal xin machnhehojabꞌtaj janma chitxahli,
kaw yilal kotxahlipaxo yebꞌ konabꞌal.
Yebꞌpaxo yet chonhbꞌitni,
machnhehojabꞌtaj janma chibꞌitni,
wal xin kaw yilal kobꞌitni yebꞌ konabꞌal.
16 Ta ay hunujex cheyaqꞌ tzalaho hekꞌul yinh Komam Dios yinh hunu nan abꞌxubꞌal,
hanhe heyanma chitzalahi,
wal mak chiꞌabꞌen tzet cheyal tuꞌ xin,
mach chu yalni:
Hakojabꞌ tuꞌ yuto mach chitxumcha yu tzet cheyala.
17 Yinh kaw yeli lanhan heyaqꞌni tzalaho heyanma yinh Komam Dios,
yajaꞌ mak chiꞌabꞌen tuꞌ,
mach chiqꞌ yip yanma heyu.
18 Hanintiꞌan chiwaqꞌan yuchꞌandiosal tet Komam Dios yuto ekꞌbꞌalto chiwalan nan abꞌxubꞌal tesataj.
19 Yajaꞌ yet chikokutxbꞌan kobꞌa yinh culto,
wochebꞌalan waxanhka howebꞌnhe tzotiꞌ chiwalan,
yajaꞌ tanhe chiqꞌ anma kuybꞌanile yinh,
sata walnihan 10 (lahonhebꞌ) mil tzotiꞌ yinh abꞌxubꞌal mach chitxumcha heyu.
20 Hex wuxhtaj hex wanabꞌ,
machojabꞌ hakaꞌ istxumni nixhte unin,
machojabꞌ hako tuꞌ hetxumni.
Wal xin hakaꞌojabꞌ istxumni icham anma hakojabꞌ tuꞌ hetxumni,
yajaꞌ wal yinh istxꞌojal,
hakaꞌojabꞌ istxumni nixhte unin maxhto isnabꞌal,
hakojabꞌ tuꞌ cheyute hebꞌa.
21 Tzꞌibꞌnhebꞌilkano yul Yum Komam Dios bꞌay chala:
«Chintzotelan tet huneꞌ konhobꞌ tuꞌ yinh nan abꞌxubꞌal,
yebꞌ anma nan konhobꞌal chihalni intzotiꞌan,
yajaꞌ maxhtikꞌa chabꞌeto anma tzet chiwalan,»a
xhi Komam,
xhihayoj.
22 Yuxin hunteqꞌan nan abꞌxubꞌale tuꞌ yechel ye tet anma maxhto chako isbꞌa yul isqꞌabꞌ Komam Dios,
maxhtaj tet anma ayxako yul isqꞌabꞌ Komam.
Wal tzotiꞌ chihal-lax chitit tet Komam Dios xin,
yechel ye tet anma ayxako yul isqꞌabꞌ Komam.
23 Qꞌinalo chekutxbꞌa hebꞌa kat heyichiko hesunil tzotelo yinh nan abꞌxubꞌal,
kat yokapno hunu mak maxhto ayoko yul isqꞌabꞌ Komam,
maka hunu mak mach ohtanhe huneꞌ tuꞌ,
chimistxum huneꞌ mak tuꞌ ta matxa tzꞌajano ye yul hewiꞌ.
24 Wal ta hesunil lanhan heyalni tzotiꞌ chitit tet Komam Dios xin,
yet chiꞌokapno hunu mak maxhto ayoko yul isqꞌabꞌ Komam,
maka hunu mak mach yohtajo tzet cheyu tuꞌ,
wal tuꞌ chimistxum isbꞌa huneꞌ mak mulum tuꞌ,
kat isnahni isbꞌa yu hunteqꞌan tzet cheyal tuꞌ.
25 Hak tuꞌ xin chu yelkano yenhel tzet kꞌuwan yul yanma huneꞌ mak tuꞌ,
kat yay jahnoj,
kat yinayo isbꞌa tet Komam Dios,
hak tuꞌ xin chu yohtanhen huneꞌ mak tuꞌ ta kaw yeli ayko Komam Dios heyetbꞌihoj.
Istxolal yinh yet ay culto
26 Yuxin hex wuxhtaj hex wanabꞌ,
hayet chekutxbꞌan hebꞌa yinh culto ay hex chisje hebꞌitni,
ayexpaxo xin chisje hekuywa yinh Istzotiꞌ Komam Dios,
maka heyalni tzet chaqꞌ Komam Dios heyohtanheloj.
Ayexpaxo xin chu hetzotel yinh nan abꞌxubꞌal,
ay hex xin chu heyalni yinh tzet chal yelapno hunteqꞌan abꞌxubꞌal tuꞌ.
Aweko hunteqꞌan tuꞌ yinh ismunil,
yajaꞌ yunhe yiqꞌni yip heyanma yinh Komam.
27 Yet chextzotel yul nan abꞌxubꞌal,
kawanh,
maka oxwanhnhe mak chitzoteli,
yajaꞌ yinh hununtajil,
ayojabꞌ mak xin chalnilo yinh tzet chal yelapno hunteqꞌan abꞌxubꞌal cheyal tuꞌ.
28 Taka machi mak chitxumnilo yinh tzet chal yelapno xin,
kꞌulmi ta mach cheyala,
wal xin ischukilojabꞌ heyanma chitzotel tet Komam Dios.
29 Hakpax tuꞌ xin yet chihal-lax tzotiꞌ chitit tet Komam Dios,
kawanh maka oxwanhnhe mak chitzoteli,
wal ebꞌnaj juxhta xin tonhehojabꞌ chꞌok tukno yabꞌen yinh tzet kaw yehi.
30 Yajaꞌ ta ay hunu tzet chaqꞌ Komam Dios yohtanhelo hunu mak tzꞌonhanayo texol tuꞌ,
huneꞌ mak lanhan istzotel tuꞌ xin yilal istukbꞌan istzoteli,
kat istzotel huneꞌxa mak tuꞌ.
31 Hesunil chu heyalni tzotiꞌ chitit tet Komam Dios,
yajaꞌ yinh hununtajil yunhe ay kuybꞌanil cheyiqꞌ yinh,
kat yaniko yip heyanma.
32 Haꞌ mak chalni tzotiꞌ chitit tet Komam Dios,
chisje iskachni isbꞌa yet ay mak lanhan istzoteli,
33 yuto mach choche Komam Dios tato toxanhe chonhwejchahi yet chikokutxbꞌan kobꞌa,
wal xin hununtajil kotzotel yinh aqꞌankꞌulal.
Hakaꞌtikꞌa ye ischejbꞌanil anma ayxako yul isqꞌabꞌ Komam Dios ay yul hunun konhobꞌ,
34 ebꞌix janabꞌ,
mach chu yok ebꞌix tzotelo texol yet chekutxbꞌan hebꞌa yinh culto,
yuto mach aqꞌbꞌil ischejbꞌanil ebꞌix istzoteli.
Wal xin kaw yijemojabꞌ chute isbꞌa ebꞌix hakaꞌ yalni isley yaꞌ Moisés.
35 Tato ay hunu tzet ye tuꞌ choche ebꞌix yohtanheloj,
isqꞌambꞌehabꞌ ebꞌix tet yichamil bꞌey yatut,
yuto mach kꞌuloj tato chitzotel ebꞌix yet kutxanexikoj.
36 Tajka chetxumu tato teyet bꞌabꞌel aqꞌlax Istzotiꞌ Komam Dios,
yebꞌ tato hexnhe chabꞌilxa heyu.
37 Tato ay hunu mak ischejabꞌ Komam Dios ye chabꞌe,
maka ta iptzebꞌil yu Komam Espíritu Santo,
yilal istxumni tato hunteqꞌan kuybꞌanile chintzꞌibꞌnhetotiꞌan,
ischejbꞌanil Komam Dios yehi.
38 Yajaꞌ tato machi yelapno hunteqꞌan kuybꞌanile tiꞌ yul sat,
machojabꞌpaxo xin yelapno huneꞌ mak tuꞌ yul hesat.