Koxahannhen kobꞌa hununonh
13
Qꞌinalo ta kaw helanonh jalni yabꞌxubꞌal anma yul sat yibꞌanhqꞌinal tiꞌ,
maka yabꞌxubꞌal ebꞌnaj ángel,
yajaꞌ ta mach xahano chijil jet anmahil,
lahanonhnhe hakaꞌ hunu chꞌen campana tonhe chiqꞌanhi,
yebꞌ chꞌen chꞌen paqꞌan yehi tonhe chitzꞌinhxi.
2 Waxanhka chijal tzotiꞌ chitit tet Komam Dios,
waxanhka xin chikotxum hunteqꞌan tzet ye tuꞌ ewan ye yu Komam,
waxanhka johta sunil tzet ay yul sat yibꞌanhqꞌinal tiꞌ,
yebꞌ waxanhka chu kohekꞌnilo hunu witz yul yehobꞌal yu ayko janma yinh Komam,
yajaꞌ ta mach xahano chijil jet anmahil,
yinh hakaꞌ tuꞌ machi yelapno jehi.
3 Waxanhka xin chijitxqꞌato tzet ayonh yinh anma mebꞌaꞌ,
waxanhka xin chijako kobꞌa yinh kamikal,
kat yaqꞌlax tzꞌajoto konimanil xol qꞌa qꞌaꞌ,
yajaꞌ ta mach xahano chijil jet anmahil,
nabꞌnhe huneꞌ tuꞌ.
4 Wal xin ta yeli xahan chijil jet anmahil,
ay konimankꞌulal yinh,
chikoyelo iskꞌulchꞌanil kokꞌul tet,
yebꞌ mach chichiwa kokꞌul yinh,
yebꞌ mach chikololoꞌnhe kobꞌa,
yebꞌ mach chijikanh kobꞌa.
5 Machi xin chijilo istxꞌixobꞌal hunu jet anmahil,
machnhetaj jet chijako yinh kokꞌul,
mach chitit kohowal,
wal xin chikonahulnheto istxꞌojal chiswatxꞌe jinh.
6 Mach chonhtzala yinh istxꞌojal chiswatxꞌe hunu jet anmahil,
wal xin to haꞌ yinh iskꞌulal chiswatxꞌe yinh chonhtzalahi.
7 Yet xahan chijil jet anmahil tuꞌ chijaqꞌ janma istecha sunil tzet chiswatxꞌe jinh,
chikawxi kokꞌul yinh tzet chala,
ay konimankꞌulal jechmani,
niman chijute kokꞌul yinh.
8 Haꞌ huneꞌ koxahannhen kobꞌa tuꞌ mach bꞌaqꞌinhal chitanhi,
wal jalni tzotiꞌ chitit tet Komam Dios chiꞌapni istiempohal bꞌay matxa chihal-laxi.
Chiꞌapnipaxo istiempohal bꞌay matxa chihal-laxpaxo nan abꞌxubꞌal,
yebꞌ matxa yilalo ay kohelanil.
9 Yuto kohelanil yebꞌ jalni tzotiꞌ chitit tet Komam Dios mach tzꞌajanoj,
10 yuxin hunteqꞌan tuꞌ chilahwi ismunil yet chihul hunteqꞌan tzꞌajan yehi.
11 Yet nichꞌan intohan hakaꞌ istzotel nixhte unin,
hak tuꞌ intzotelan.
Hakaꞌ istxumnipaxo nixhte unin,
hak tuꞌ intxumnipaxojan,
hakaꞌpaxo isnabꞌal nixhte unin,
hak tuꞌ innabꞌalan.
Wal tinanh xin icham anma inxahan,
xawakanojan tzet ye tuꞌ yet nixhte unin.
12 Tinanh maxhto chonhqꞌoji kotxumnilo tzet ye tuꞌ hakaꞌ kaw yehi.
Wal xin hakaꞌtanhe jilni kosat yul hunu chꞌen espejo qꞌejmutzꞌmunhe,
hak tuꞌ je tinanh.
Yajaꞌ chiꞌapni istzꞌayikal bꞌay chijil yinh kaw habꞌan,
hakaꞌ konhyohtanhen Komam Dios.
13 Ay oxebꞌ tzet ye tuꞌ tiꞌ mach chitanhiloj,
haꞌ ton janayto yul janma yinh Komam Dios,
yebꞌ iskawxi kokꞌul yinh Komam,
yebꞌpaxo koxahannhen jet anmahil.
Yajaꞌ huneꞌ kaw ekꞌbꞌal yelapnoj xol oxebꞌ tiꞌ,
haꞌ ton koxahannhen jet anmahil.