Munil chiꞌaqꞌlax jet hununonh yu Komam Espíritu Santo
12
Hex wuxhtaj hex wanabꞌ,
chiwochehan cheyohtanhelo yinh hunteqꞌan komunil chiꞌaqꞌlax jet hununonh yu Komam Espíritu Santo.
2 Kaw heyohtaj ta yet maxhto chexok yul isqꞌabꞌ Komam Dios,
kaw tzujan hexto yinta hunteqꞌan tioxh mach chitzoteli.
3 Wal tinanh xin,
chiwaqꞌan heyohtanheloj tato haꞌ mak chalni hakaꞌ tiꞌ:
«Yaqꞌabꞌti ishowal Komam Dios yibꞌanh naj Jesús,»
ta xhi.
Haꞌ mak chalni hakaꞌ tuꞌ,
maxhtaj Komam Espíritu Santo chiꞌaqꞌni yalaꞌ.
Yajaꞌ wal mak chalni hakaꞌ tiꞌ xin:
«Komam Jesús haꞌ wahawilan,»
ta xhi.
Huneꞌ mak tuꞌ haꞌ Komam Espíritu Santo chiꞌaqꞌni yalaꞌ.
4 Hanhonh tiꞌ nananta komunil hununonh yinh Komam,
yajaꞌ huneꞌ mak chiꞌaqꞌni jet,
haꞌ ton Komam Espíritu Santo.
5 Kaw nananta komunil hununonh,
yajaꞌ huneꞌnhe mak bꞌay chonhmunla kosunil,
haꞌ ton Komam Jesucristo.
6 Nananta tzet chikowatxꞌe hununonh,
yajaꞌ huneꞌnhe Komam Dios chiꞌaqꞌni hunteqꞌan tuꞌ jubꞌ.
7 Chisyelo Komam Espíritu Santo tato ayko yul janma hununonh chaqꞌni Komam iskꞌulal jet,
yu iskꞌulalo yinh ebꞌnaj juxhtaj yebꞌ ebꞌix janabꞌ.
8 Yu yip Komam Espíritu Santo yuxin ay ebꞌnaj juxhta kaw ay ishelanil istzoteli,
aypaxo mak kaw ay isnabꞌal iskuywahi,
yajaꞌ yutikꞌapaxo Komam Espíritu.
9 Yu Komam Espíritu Santo tuꞌ,
yuxinto ay ebꞌnaj kaw chikawxi iskꞌul yinh Komam Dios,
aypaxo ebꞌnaj chiꞌaqꞌlax yip yu Komam Espíritu Santo yaqꞌni kawxo makta yaꞌay.
10 Ay ebꞌnaj chiꞌaqꞌlax yip isyeni kꞌaybꞌalkꞌule,
aypaxo ebꞌnaj chiꞌaqꞌlax ishelanil yalnikꞌo tzotiꞌ chitit tet Komam Dios.
Aypaxo ebꞌnaj xin chiꞌaqꞌlax ishelanil yohtanheniloj tato haꞌ Komam Espíritu Santo ayko yetbꞌiho hunu maka,
maka tato yespíritu naj matzwalil ayko yetbꞌihoj.
Ay ebꞌnaj chaqꞌpaxo Komam Espíritu Santo ishelanil yalni nan abꞌxubꞌal,
aypaxo xin ebꞌnaj chaqꞌ Komam Espíritu Santo ishelanil istxumnilo hunteqꞌan nan abꞌxubꞌale tuꞌ.
11 Sunil hunteqꞌan tiꞌ haꞌtikꞌa Komam Espíritu Santo chiꞌaqꞌni kowatxꞌeꞌ hununonh,
hatatikꞌa tzet choche Komam yaqꞌaꞌ jet.
Kaw xin hunchꞌannhe Komam Espíritu.
Kaw hunxanhe nimanilehal jehi
12 Hakaꞌ konimanil tiꞌ,
waxanhka kaw txꞌiꞌal yiqꞌni isbꞌa,
yajaꞌ huneꞌnhe nimanilehal yehi.
Hak tuꞌ ye Komam Jesucristo.
13 Haktikꞌapax tuꞌ je hanhonh tiꞌ,
waxanhka Israel honh,
maka mach Israelo honh,
waxanhka chejabꞌonh,
maka jet kobꞌa kochukil,
huneꞌnhe Komam Espíritu Santo konhhunbꞌan yinh Komam Jesucristo,
yuxin huneꞌxanhe nimanilehal jehi.
Yaqꞌlax xin Komam Espíritu yul janma hununonh.
14 Hakaꞌ ye konimanil tinanh,
kaw txꞌiꞌal yiqꞌni isbꞌa,
yajaꞌ huneꞌnhe nimanilehal.
15 Qꞌinalo ta chu istzotel joj kat yalni:
«Hanintiꞌan manqꞌabꞌehojan,
yuxin machi wokan yinh huneꞌ nimanile tiꞌ,»
ta xhi.
Waxanhka chal hakaꞌ tuꞌ,
yajaꞌ yetbꞌinhetikꞌa isbꞌa yebꞌ konimanil tiꞌ.
16 Maka ta chal kotxikin hakaꞌ tiꞌ:
«Wal hanintiꞌan manbꞌaqꞌsatehojan,
yuxin mach chiwokan yinh huneꞌ nimanile tiꞌ,»
ta xhi.
Waxanhka chal hakaꞌ tuꞌ,
yaj kaw yetbꞌinhetikꞌa isbꞌa yebꞌ huneꞌ konimanil tiꞌ.
17 Ta bꞌaqꞌ sate sunil konimanil tiꞌ,
machim chu jabꞌeni,
yebꞌ tato sunil konimanil tiꞌ txikinnhe,
machim chu koxuqꞌxen sam hunu tzet ye tuꞌ.
18 Wal xin haꞌ Komam Dios watxꞌenhe hunun yetbꞌi konimanil tiꞌ,
yaniko Komam bꞌay yal iskꞌul.
19 Qꞌinaloj tato lahanxanhetikꞌa hunun yetbꞌi konimanil matxam chu jalni bꞌaytet konimanil,
chal tuꞌ.
20 Yinh kaw isyelal,
waxanhka txꞌiꞌal yiqꞌni isbꞌa,
yajaꞌ huneꞌnhe nimanilehal yehi.
21 Isbꞌaqꞌ kosat mach chu yalni tet koqꞌabꞌ hakaꞌ tiꞌ:
«Matzet chaxhokniko wuhan,»
mach xhihoj.
Hakpax tuꞌ kowiꞌ,
mach chu yalni tet joj:
«Matzet chaxhokniko wuhan,»
mach xhihoj.
22 Ay hunteqꞌan yetbꞌi konimanil tiꞌ kochnhe kaw machi ismunil chijabꞌe,
yajaꞌ haꞌ kaw ekꞌna chꞌokniko ju.
23 Aypaxo yetbꞌi konimanil tiꞌ,
kochnhe matzet chal yelapnoj,
yajaꞌ haꞌ ekꞌbꞌal chikoyaꞌilnhe.
Haxa hunteqꞌan yetbꞌi konimanil mach kꞌulchꞌano jalni,
haꞌ chijebꞌatoj,
hak tuꞌ xin chu koyeniloj tato kaw ay yelapno yehi.
24 Wal hunteqꞌan yetbꞌi konimanil kꞌulchꞌan yil-laxi mach yilalo chijako yenhel.
Hak tuꞌ yu iswatxꞌenkano Komam Dios konimanil tiꞌ,
yunhe haꞌ hunteqꞌan yetbꞌi konimanil machi yelapno tuꞌ,
haꞌ kaw ay yelapnoj.
25 Yuxinto mach chu iskajlenkanh isbꞌa ej yetbꞌi konimanil,
hayet to lahannhe chisyaꞌilnhen isbꞌa hunun.
26 Ta ay hunu yetbꞌi konimanil tiꞌ chilahwi,
sunil konimanil chiꞌabꞌen isyaꞌil.
Taka ay hunu yetbꞌi konimanil chitzantelaxi,
sunil konimanil chitzalahi.
27 Yuxin hakaꞌ isnimanil Komam Jesucristo je kosunil,
hununonh tiꞌ xin yetbꞌixa isnimanil Komam tuꞌ jehi.
28 Yuxin koxol hanhonh ayonhxako yul isqꞌabꞌ Komam,
ay komunil chaqꞌ Komam:
bꞌabꞌel ay mak ischejabꞌ Komam Dios yehi,
iskabꞌ ay mak chalni tzotiꞌ chitit tet Komam Dios,
yinh yox ay mak kuywawom,
aypaxo mak chaqꞌ Komam Dios ishelanil isyeni ej kꞌaybꞌalkꞌule,
aypaxo mak chiꞌaqꞌlax ishelanil yaqꞌni kawxo makta yaꞌay,
aypaxo mak chiꞌaqꞌlax ishelanil iskolwahi,
aypaxo mak chiꞌijbꞌali,
yebꞌ xin ay mak chu yalni nan abꞌxubꞌal.
29 Yuxin mach sunilo mak ischejabꞌ Komam,
mach sunilopaxo mak chihalni tzotiꞌ chitit tet Komam Dios,
mach sunilopaxo mak chikuywahi,
yebꞌ mach sunilo mak chu isyeni ej kꞌaybꞌalkꞌule.
30 Mach sunilopaxo mak chiꞌaqꞌlax ishelanil yaqꞌni kawxo anma yaꞌay,
mach sunilo mak chihalni nan abꞌxubꞌal,
yebꞌ xin mach sunilo mak chitxumnilo yinh tzet chal yelapno nan abꞌxubꞌal tuꞌ.
31 Yuxin hex tiꞌ,
aweko yinh hekꞌul hesayni hunteqꞌan munil ekꞌbꞌalkano iskꞌulal chaqꞌ Komam texol.
Yajaꞌ ayto huneꞌxa tzet kaw ekꞌbꞌal kꞌul kowatxꞌeni,
haꞌ bꞌay chintzotelan yibꞌanhilo teyet.