11
Okanhwe tzujno yinh inbꞌeybꞌaltiꞌan,
hakaꞌ chiwute inbꞌeybꞌalnhehan isbꞌeybꞌal Komam Jesucristo.
Kuybꞌanile yinh ebꞌix ix yet ay culto
2 Hex wuxhtaj hex wanabꞌ,
kaw chintzalahan teyinh,
yuto yinh sunil tzet chewatxꞌe chinhenatijan,
yebꞌpaxo kaw ayexiko heyijen hunteqꞌan kuybꞌanile waqꞌan teyet.
3 Chiwochehan cheyohtanheloj ta Komam Jesucristo,
haꞌ kaw ayko iswiꞌehalo ebꞌnaj winaj.
Haxa naj ichamile xin,
iswiꞌehal yeko naj yinh yixal,
hakaꞌpaxo Komam Dios iswiꞌehal yeko Komam yinh Komam Jesucristo.
4 Tato chako ebꞌnaj winaj yenhel iswiꞌ yet chitxahli ebꞌnaj,
maka yet chalni ebꞌnaj tzotiꞌ chitit tet Komam Dios,
yinh hakaꞌ tuꞌ chiyilo ebꞌnaj ispixan Komam Jesucristo,
Komam ayko iswiꞌehalo yinh ebꞌnaj.
5 Hakaꞌpaxo ebꞌix ix,
ta ay hunu ix mach chahto yenhel iswiꞌ yet chitxahli,
maka yet chalni tzotiꞌ chitit tet Komam Dios,
yinh hakaꞌ tuꞌ,
haꞌtikꞌa ix chiꞌinilo ispixan yichamil,
naj ayko iswiꞌehalo yinh ix.
Lahan chalilo hakaꞌtanhe xayaqꞌ elo ix xil iswiꞌ.
6 Yuxin ta ay hunu ebꞌix ix,
mach chahto yenhel iswiꞌ,
kꞌulmi yaqꞌni ebꞌix elo xil iswiꞌ,
yajaꞌ ta txꞌixobꞌal huneꞌ tuꞌ chabꞌe ebꞌix xin,
yaqꞌabꞌahto ebꞌix yenhel iswiꞌ.
7 Wal hanhonh winajonh tiꞌ xin,
mach kꞌuloj ta chijahto yenhel kowiꞌ,
yuto yechel Komam Dios jehi yebꞌ hanhonh chikoyelo yip Komam Dios.
Haxa ebꞌix ix xin,
haꞌ ebꞌix chiyenilo yip ebꞌnaj winaj.
8 Yuto yet iswatxꞌen Komam Dios naj winaj,
mach yinho ix ix el naj yu Komam.
Wal xin to haꞌ ix ix tuꞌ yinh naj winaj elna ix yu Komam.
9 Maxhtaj yu ix ix yuxin iswatxꞌe Komam Dios naj winaj,
wal xin to yu naj winaj yuxin iswatxꞌe Komam ix ix.
10 Yu huneꞌ tuꞌ,
yuxin yilal yanahto ebꞌix ix yenhel iswiꞌ yu isyenilo ebꞌix tato ayikto ebꞌix yalanh ischejbꞌanil yichamil,
yuto tꞌanhaniko ebꞌnaj ángel jinh.
11 Yajaꞌ walxa yinh Komam Dios,
machim naj winaj ta machi ix ix,
machimpaxo ix ix ta machi naj winaj.
12 Kaw yeli,
yinh naj bꞌabꞌel winaj elna ix bꞌabꞌel ix.
Walxa tinanh xin,
yinhxa ix ix chipitzkꞌa naj winaj.
Yajaꞌ sunil tuꞌ yu Komam Dios yuxin hak tuꞌ yehi.
13 Yuxin txumwej,
¿kꞌulmi istxahli hunu ix ix yet machi yenhel iswiꞌ ix chahtoj?
14 Kaw johtaj tato kaw txꞌixobꞌal yaqꞌni chꞌibꞌo ebꞌnaj winaj xil iswiꞌ.
15 Yajaꞌ wal ebꞌix ix xin,
kaw istzan ebꞌix yaqꞌni chꞌibꞌo xil iswiꞌ,
yuto xil iswiꞌ ebꞌix tuꞌ hakaꞌ yenhel iswiꞌ ebꞌix yekoj.
16 Tato ay mak chiꞌok tzotelo yibꞌanhilo huneꞌ tiꞌ,
yohtanhehojabꞌiloj tato hanhonhtiꞌanh yebꞌ sunil mak ayxako yul isqꞌabꞌ Komam Dios yul hunun konhobꞌ,
mach chichahlax txahlo hunu ix ix ta machi yenhel iswiꞌ ix chahtoj.
Mach chiyijelax santa cena hakaꞌ kaw yelapno yehi
17 Yinh hunteqꞌan chiwaltojan teyet tiꞌ,
mach chintzalahan teyinh,
yuto hayet chekutxbꞌaniko hebꞌa,
kaw machi nino iskꞌulal chechah,
wal xin kaw tonhe cheyetato hebꞌa.
18 Yinh bꞌabꞌelal chiwaltojan teyet ta xawabꞌehan ta hayet chekutxbꞌan hebꞌa yinh culto tolabꞌ chepohle hebꞌa,
yajaꞌ yet chintxumnihan etzanhem kaw yel huneꞌ tuꞌ.
19 Yajaꞌ etza kaw yilal chepohle hebꞌa,
yunhe yixtanhwiloj mak kaw yel chala ayxako yul isqꞌabꞌ Komam Dios.
20 Wal xin yet chekutxbꞌan hebꞌa,
matxataj santa cena cheyekꞌtze,
21 yuto yet chiꞌapni yorahil hewaꞌi nanantaxanhe hebꞌabꞌikꞌo heloni tzet cheloh,
yuxin ay hex mach chinoh hekꞌul,
ayexpaxo xin chexukꞌikanokanh.
22 ¿Tom machi heyatut bꞌay chexwaꞌ xin?
¿Tzet yinh xin cheyilo ispixan mak ayxako yul isqꞌabꞌ Komam Dios,
kat heyanikaniko yinh txꞌixwilal mak matzet aya?
¿Chimkintzalahan yinh huneꞌ hebꞌeybꞌal tuꞌ heyalni?
Wal xin kaw mach chu intzalahan yinh.
Issanta cena Komam Jesucristo
23 Huneꞌ kuybꞌanil chiwapaxtojan teyet tiꞌ,
haꞌ tet Komam Jesucristo Jahawil chabꞌilkano wuhan.
Haꞌ yinh huneꞌ aqꞌbꞌal yet yalaxiko Komam yul isqꞌabꞌ kamikal,
yikanh Komam ixim pan,
24 lahwi yaqꞌni Komam yuchꞌandiosal yinh ixim,
isqꞌaxponayo ixim,
yalni Komam:
«Chahwej kat hewahni,
huneꞌ tiꞌ yechel innimanilan chiwaqꞌan yinh kamikal yu hekolchahi.
Hunta el yet cheyekꞌtzen huneꞌ tiꞌ chinhenanitijan,»
xhikano Komam.
25 Lahwi tuꞌ yinipaxokanh Komam chꞌen vaso,
yalni Komam:
«Huneꞌ ayayto yul vaso tiꞌ yechel inchikꞌilan chimaltoj,
haꞌ xin chitꞌinhbꞌankano huneꞌ akꞌ trato chaqꞌ Komam Dios.
Huntaꞌel yet cheyukꞌni huneꞌ tiꞌ chinhenatijan,»
xhi Komam.
26 Yuxin hunta el yet chikowahni ixim pan tuꞌ,
yebꞌ yet chijukꞌni tzet ayayto yul huneꞌ vaso tuꞌ,
haꞌ iskamikal Komam Jesucristo chikoyeloj masanto yet chul Komam hunelxa.
Kuybꞌanile yinh yalanhto maxhto chikochah santa cena
27 Yuxin ta ay hunu mak matzet chal yelapno ixim pan tuꞌ yul sat yet chiswahni,
yebꞌ yet chukꞌni tzet ayayto yul vaso yet Komam,
chako ismul yinh isnimanil Komam Jesucristo,
yebꞌ yinh ischikꞌil Komam.
28 Yuxin hayet yalanhto maxhto chewah huneꞌ pan tuꞌ yebꞌ heyukꞌni tzet ayayto yul huneꞌ vaso tuꞌ,
kaw yilal hetxumni yinh tzet heyeko hunun hex.
29 Yuto ta chewah huneꞌ pan tuꞌ yebꞌ ta cheyukꞌ huneꞌ ayayto yul vaso tuꞌ,
machi xin kꞌulo heyekoj,
yebꞌ xin mach chenah ta hakaꞌ isnimanil Komam yehi,
yinh hak tuꞌ chijiti isyaꞌtajil teyibꞌanh.
30 Yu huneꞌ tuꞌ,
yuxin ay mak yaꞌay texol,
aypaxo mak tzꞌontanhe,
yebꞌpaxo xin ay mak xakami.
31 Wal xin ta chikotxum kobꞌa yinh tzet jeko hununonh,
machim chiꞌay isyaꞌtajil jibꞌanh yu Komam Dios.
32 Yajaꞌ ta mach chikotxum yinh tzet jeko yul sat Komam,
chayo Komam isyaꞌtajil jibꞌanh,
yunhe mach chonhto yinh isyaꞌtajil xol hunteqꞌan anma kꞌaynatoj.
33 Yuxin hex wuxhtaj hex wanabꞌ,
yet chekutxbꞌan hebꞌa hechahni santa cena tuꞌ,
yilal cheyechmale hebꞌa hewahni.
34 Yajaꞌ ta ay hunu mak kaw xanhohchahi chisje iswaꞌkano bꞌey yatut,
haxinwal mach chayo Komam isyaꞌtajil teyibꞌanh yinh tzet mach toholo chewatxꞌe yet chetkutxbꞌan hebꞌa tuꞌ.
Wal yinh hunteqꞌanxa xin,
yetto chinapnihan texol kat kexinwatxꞌenikojan yinh.