Saylax yinh tzet chu istzabꞌlaxayo Komam Jesús yinh qꞌinh Pascua
14
Yet kabꞌexanhe qꞌinh Pascua,
yet chiwahlax ixim pan machi yanhal chiꞌalaxikoj,
yichiko ebꞌnaj yahawil yinh ebꞌnaj sacerdote yebꞌ ebꞌnaj kuywawom yinh isley yaꞌ Moisés issayni yinh tzet chu yaykꞌay Komam yinh hunu istxꞌojal;
yunhe istzabꞌnayo ebꞌnaj kat ispotxꞌni ebꞌnaj Komam yalni.
Marcos 14:1-16
«Mach chikotzabꞌayo naj yinh qꞌinh yuto ahta wejna anma sunil jinh,»
xhi ebꞌnaj.
Yet isjobꞌnayo huneꞌ ix ix anh kaw xuqꞌ sam yibꞌanh iswiꞌ Komam
3 Yet ay Komam Jesús bꞌey konhobꞌ Betania,
bꞌey yatut naj Simón,
naj aytikꞌako yabꞌil lepra yinh.
Yet ayko Komam waꞌo sat mexha yapni huneꞌ ix iskꞌatanh Komam,
iqꞌbꞌil huneꞌ anh kaw xuqꞌ sam yu ix ayayto yul huneꞌ chꞌen limeta alabastro isbꞌi.
Nardo isbꞌi huneꞌ anh tuꞌ kaw ay istohol.
Iskꞌutznilto ix isnuqꞌ chꞌen limeta tuꞌ,
isjobꞌnayo ix huneꞌ anh kaw xuqꞌ sam tuꞌ yibꞌanh iswiꞌ Komam.
4 Xol mak ayikto bꞌey tuꞌ,
ay hunteqꞌan ebꞌnaj tit ishowal,
yalni ebꞌnaj tet hunun:
—¿Tzet yinh xin tonhe chiꞌetalaxto huneꞌ anh kaw xuqꞌ sam tiꞌ?
5 Estam matxonhlaxtoj,
ekꞌbꞌalmi 300 denarioa chiꞌaqꞌlax yinh,
kat ispohlaxkanh istohol yinh anma mebꞌaꞌ,
xhi ebꞌnaj.
Kaw xin ok ebꞌnaj bꞌuchwal yinh ix.
6 Yajaꞌ xin yal Komam:
—¿Tzet yinh xin cheyaqꞌ hetiꞌ yinh ix?
Mach chekach ix yuto huneꞌ maswatxꞌe ix winhtiꞌan kaw kꞌul.
7 Haꞌ anma mebꞌaꞌ aynhetikꞌako texol yinh sunilbꞌal tiempo,
tzijxanhe tiempohal chu hekolwa yinh;
wal inpaxojan xin mach sunilbꞌal tiempo ayinikꞌojan texol.
8 Ix tiꞌ,
haꞌ tzet chiqꞌoji ix iswatxꞌeni,
haꞌ maswatxꞌe ix winhan.
Mayanhtekano ix innimanilan yalanhto maxhto chinmujlaxan.
9 Yinh kaw yeli chiwalan teyet;
bꞌayxanhetuꞌwal chihal-laxikꞌo Tzotiꞌ Kꞌul yet Kolbꞌanile,
chihal-laxpaxo huneꞌ maswatxꞌe ix tiꞌ winhan,
kat yaqꞌlax bꞌinaho ix,
xhi Komam.
Yako naj Judas Komam Jesús yul isqꞌabꞌ kamikal
10 Wal naj Judas Iscariote,
naj ayko istzꞌajo ebꞌyaꞌ 12 (kabꞌlahonhwanh) iskuywom Komam Jesús,
to naj yilaꞌ ebꞌnaj yahawil yinh ebꞌnaj sacerdote yunhe yaniko naj Komam yul isqꞌabꞌ ebꞌnaj.
11 Hayet yabꞌen ebꞌnaj huneꞌ tuꞌ kaw tzalakanh ebꞌnaj,
yalten ebꞌnaj melyu tet naj.
Yichiko naj Judas tuꞌ issayni yinh tzet chu yaniko Komam yul isqꞌabꞌ ebꞌnaj.
Yet iswaꞌkano Komam Jesús yebꞌ ebꞌyaꞌ iskuywom yinh qꞌinh Pascua
12 Haxa yayilo bꞌabꞌel tzꞌayik qꞌinh Pascua,
yet chiwahlax ixim pan machi yanhal chiꞌalaxikoj,
yebꞌ yet chipotxꞌlax noꞌ meꞌ xahanbꞌalil;
isqꞌambꞌen ebꞌyaꞌ iskuywom Komam tet:
—Mamin,
¿bꞌaytuꞌwal chawoche chikowatxꞌehanh tzet chikolo yinh qꞌinh Pascua tiꞌ?
xhi ebꞌyaꞌ.
13 Ischejnito Komam kawanh ebꞌyaꞌ iskuywom,
yalni Komam tet ebꞌyaꞌ:
—Asiꞌwe yul konhobꞌ,
hayet chexapno bꞌey tuꞌ cheyilno huneꞌ naj iqꞌbꞌil huneꞌ tzꞌahabꞌ haꞌ yu,
chexoko tzujno yinta naj.
14 Haꞌ bꞌay chꞌapni naj xin cheqꞌambꞌe tet naj yahaw nha tuꞌ:
“¿Bꞌaytuꞌwal ay huneꞌ cuarto bꞌay chiwaꞌ yaꞌ Kuywawom yebꞌ iskuywom yinh qꞌinh Pascua?”
kexchi.
15 Haꞌ naj xin chiyeno huneꞌ cuarto kaw nimajal teyet,
ayko yinh iskabꞌ piso,
kaw kꞌulxa yehi.
Haꞌ bꞌey tuꞌ xin chewatxꞌe tzet chikolo,
xhi Komam.
16 Lahwi tuꞌ,
isto ebꞌyaꞌ kawanh tuꞌ yul konhobꞌ Jerusalén,
yilcha yu ebꞌyaꞌ hakaꞌtikꞌa yu yalni Komam.
Yok ebꞌyaꞌ iswatxꞌeno tzet chilolax yinh qꞌinh Pascua tuꞌ.
17 Haxa yet lanhanxa yay numna xin yapni Komam yebꞌ ebꞌyaꞌ 12 (kabꞌlahonhwanh) iskuywom yul huneꞌ cuarto tuꞌ.
Marcos 14:17-31
—Yinh kaw isyelal chiwalan teyet,
haꞌ huneꞌ mak chinanikojan yul isqꞌabꞌ kamikal,
ayko waꞌo koxol tiꞌ,
xhi Komam.
19 Hayet yabꞌen ebꞌyaꞌ iskuywom Komam huneꞌ tuꞌ,
kaw ok bꞌiskꞌulal yinh yanma ebꞌyaꞌ,
yok ebꞌyaꞌ isqꞌambꞌeno yinh hununtajil tet Komam:
—Mamin,
¿tom haninan?
xhi hunun ebꞌyaꞌ.
20 Istaqꞌwi Komam:
—Huneꞌ mak texol hex 12 (kabꞌlahonhwanh) hex tiꞌ,
naj chislabꞌayto ispan yul insekꞌan,
haꞌ naj chinanikojan yul isqꞌabꞌ kamikal.
21 Hanin Aqꞌbꞌilintijan texol yu Komam Dios yilal wekꞌan yinh kamikal hakaꞌ yalni yul Yum Komam,
yajaꞌ kꞌanchꞌan naj chinanikojan yul isqꞌabꞌ kamikal.
Ayxikꞌa mach pitzkꞌana naj yul sat yibꞌanhqꞌinal tiꞌ,
xhi Komam.
22 Hayet lanhan iswaꞌ Komam,
yinikanh ixim pan,
yaqꞌni yuchꞌandiosal tet Komam Dios,
lahwi tuꞌ isqꞌaxponayo ixim,
yaqꞌni Komam ixim tet ebꞌyaꞌ,
yalni Komam:
—Chahwej,
kat hewahni.
Huneꞌ tiꞌ yechel innimanilan yehi,
xhi Komam.
23 Lahwi tuꞌ yinipaxokanh Komam chꞌen copa,
yaqꞌnipaxo Komam yuchꞌandiosal tet Komam Dios.
Lahwi tuꞌ xin yaqꞌni Komam chꞌen tet ebꞌyaꞌ iskuywom,
kaw xin sunil ebꞌyaꞌ ukꞌni.
24 Yalni Komam:
—Huneꞌ tiꞌ yechel inchikꞌilan chimalto yu iskꞌulal yinh txꞌiꞌal anma.
Hak tuꞌ chu yijni isbꞌa huneꞌ akꞌ trato chaqꞌ Komam Dios teyet.
25 Yinh kaw yeli chiwalan;
matxa chiwukꞌan yal sat teꞌ uva masanto chiꞌok Komam Dios Yahawiloj,
katto wukꞌnihan yinh yakꞌtohal hunelxa,
xhi Komam.
Yal Komam Jesús ta chal yaꞌ Pedro ta mach yohtajo yaꞌ Komam
26 Lahwi isbꞌitnikano Komam Jesús yebꞌ ebꞌyaꞌ iskuywom,
isto Komam yebꞌ ebꞌyaꞌ bꞌey wonhan Olivo,
27 yalni Komam tet ebꞌyaꞌ:
—Yinh huneꞌ aqꞌbꞌal tiꞌ,
kaw hesunil cheyiqꞌalo heyanma winhan,
yuto hak tuꞌ yu istzꞌibꞌnhelaxkano yul Yum Komam Dios bꞌay chala:
“Chinpotxꞌkamojan naj tanhem meꞌ,
kat issajlemito noꞌ meꞌ tuꞌ,”
xhihayoj.
28 Yajaꞌ yet chinitzitzbꞌikanhan chinbꞌabꞌitojan bꞌey Galilea tesataj,
xhi Komam.
29 Yalni yaꞌ Pedro tet Komam:
—Mamin,
waxanhka sunil mak chiꞌinilo yanma tawinh,
wal hinan machoj,
xhi yaꞌ.
30 Yalni Komam tet yaꞌ:
—Pedro,
yinh kaw yeli chiwalan tawet;
yinhtikꞌa huneꞌ aqꞌbꞌal tiꞌ,
yalanhto maxhto chiꞌoqꞌ noꞌ icham chiyo yinh iskayel,
oxelxa chawala ta mach kinhawohtajojan,
xhi Komam.
31 Islahniko yaꞌ Pedro yalni:
—Waxanhka chinaqꞌlax kamojan tawintaj yajaꞌ mach chiwalan ta mach kaxhwohtajojan,
xhi yaꞌ tet Komam.
Sunil xin ebꞌyaꞌ iskuywom Komam halni hakaꞌ tuꞌ.
Txahli Komam Jesús bꞌey Getsemaní
32 Lahwi tuꞌ,
isto Komam Jesús yebꞌ ebꞌyaꞌ iskuywom bꞌey huneꞌ peyabꞌ chiyij Getsemaní,
yalni Komam tet ebꞌyaꞌ:
—Kananhwekano tzꞌonhno bꞌey tiꞌ,
chintohan txahloj,
xhi Komam.
Marcos 14:32-52
33 Hanhe xin yaꞌ Pedro,
yaꞌ Jacobo yebꞌ yaꞌ Juan yito Komam.
Kaw yabꞌe Komam isyaꞌil bꞌiskꞌulal yinh yanma.
34 Yalni Komam tet ebꞌyaꞌ:
—Kaw chiwabꞌehan isyaꞌil isbꞌiskꞌulal kamikal yinh wanmahan.
Kananhwekano bꞌey tiꞌ,
mach chexwayi,
xhi Komam.
35 Ishitzilo Komam hanikꞌxa sata ebꞌyaꞌ,
yay jahno Komam,
yay xulno sat txꞌotxꞌ,
yok Komam isqꞌanni tet Komam Dios ta ay tzet chu yekꞌto huneꞌ isyaꞌtajil chul yibꞌanh tuꞌ.
36 Yalni Komam yinh istxah:
«Mam,
machi hunu tzet ye tuꞌ yaꞌta yul hasat.
Kolinan tet huneꞌ isyaꞌtajil chul wibꞌanhtiꞌan,
yajaꞌ mach hakaꞌ chiwochehan to hakaꞌojabꞌ tzet chal hakꞌul,»
xhi Komam.
37 Lahwi tuꞌ xin,
ismeltzo Komam bꞌay kankano ebꞌyaꞌ oxwanh,
yalni Komam tet yaꞌ Pedro:
—Simón,
¿tom wayo chawu?
¿Tom mach chu hawinilo hawayanh hunu orahil?
xhi Komam.
38 Yalnipaxo Komam tet ebꞌyaꞌ:
—Iwelo hewayanh,
txahlanhwej,
haxinwal mach chexaykꞌay yul isqꞌabꞌ istxꞌojal,
wal heyanma kaw hinan isyijen tzet chal Komam Dios,
yajaꞌ wal henimanil xin mach chitecha yu,
xhi Komam.
39 Istopaxo Komam txahlo hunelxa,
hakaꞌtikꞌa tzet yal Komam yet bꞌabꞌelal,
hak tuꞌ yute yalnipaxo yinh iskayel.
40 Haxa yet ismeltzopaxo Komam iskꞌatanh ebꞌyaꞌ xin,
wayanh chupaxo ebꞌyaꞌ,
yuto mach chitecha naj wayanh yu ebꞌyaꞌ.
Yuxin matxa chitxumcha yu ebꞌyaꞌ yinh tzet chu istaqꞌwi tet Komam.
41 Haxa yet ismeltzo Komam iskꞌatanh ebꞌyaꞌ yinhxa yoxel isbꞌeykꞌo txahloj,
yalni Komam tet ebꞌyaꞌ:
—¿Tom yexnheto hewayi yebꞌ hexewi?
¡Yetzanxa!
Wal xin Hanin Aqꞌbꞌilintijan texol yu Komam Dios tiꞌ,
maꞌapni yorahil walaxikojan yul isqꞌabꞌ anma mulum.
42 Ahanhwewanoj,
tonhwej;
lanhan yul naj chinanikojan yul isqꞌabꞌ kamikal,
xhi Komam.
Yet istzabꞌlaxayo Komam Jesús
43 Yet lanhan istzotel Komam Jesús tuꞌ,
yapni naj Judas,
naj ayko istzꞌajo ebꞌyaꞌ 12 (kabꞌlahonhwanh) iskuywom Komam.
Kaw xin hantanhe anma tzujan yinta naj.
Ay mak iqꞌbꞌil yespada,
aypaxo mak iqꞌbꞌil isteꞌ yu.
Chejbꞌil ebꞌnaj yu ebꞌnaj iswiꞌehal yinh ebꞌnaj sacerdote yebꞌ yu ebꞌnaj kuywawom yinh isley yaꞌ Moisés,
yebꞌ yu ebꞌnaj ichamta winaj iswiꞌehal konhobꞌ.
44 Naj Judas chiꞌaniko Komam yul isqꞌabꞌ ebꞌnaj tuꞌ halbꞌilxa tet ebꞌnaj yu naj hakaꞌ tiꞌ:
«Haꞌ naj chintzꞌohoꞌan isqꞌotx,
haꞌ naj chetzabꞌayoj,
kat heyinito naj;
mach xin chebꞌejtzo naj,»
xhi naj.
45 Yuxin apninhe naj,
ishitziko naj iskꞌatanh Komam,
yalni naj:
—Mam Kuywawom,
xhi naj.
Istzꞌohni naj isqꞌotx Komam,
46 yok bꞌulna ebꞌnaj yinh Komam,
istzabꞌnayo ebꞌnaj.
47 Yajaꞌ ay huneꞌ yaꞌ iskuywom Komam yihti yespada yul yatut,
ispitnilto yaꞌ istxikin ischejabꞌ naj yahawil yinh ebꞌnaj sacerdote.
48 Yalni Komam tet ebꞌnaj apni tzabꞌnoyo tuꞌ:
—¿Tom elqꞌom hinan teyet yuxin iqꞌbꞌil heyespada yebꞌ heteꞌ winhan chexhul kinhetzabꞌnoyojan?
49 Hunun tzꞌayik inbꞌeyan kuywal yul Yatut Komam Dios texol,
yajaꞌ mach kinhetzabꞌayojan.
Wal tinanh yilal yuni huneꞌ tiꞌ yunhe yijni isbꞌa tzet tzꞌibꞌnhebꞌilkano winhan yul Yum Komam Dios,
xhi Komam.
50 Wal ebꞌyaꞌ iskuywom Komam,
elkanh ebꞌyaꞌ sunil,
yanikano ebꞌyaꞌ Komam ischukil.
Huneꞌ naj tzeh elkanh yinh anhe
51 Ay xin huneꞌ naj tzeh ok tzujno yinta Komam,
hanhe huneꞌ qꞌap sábana ayko xilo isqꞌap naj.
52 Istzabꞌlaxayo naj yu ebꞌnaj inito Komam,
yajaꞌ xin iskolilo isbꞌa naj,
iskankano qꞌap sábana yul isqꞌabꞌ ebꞌnaj tuꞌ;
tꞌilanxa naj yet yelkanh naj.
Ilaxto Komam Jesús sata ebꞌnaj iswiꞌehal yinh lahtiꞌ xol ebꞌnaj Israel
53 Lahwi tuꞌ yinito ebꞌnaj Komam Jesús sata naj yahawil sacerdote.
Iskutxbꞌaniko isbꞌa ebꞌnaj iswiꞌehal yinh ebꞌnaj sacerdote,
yebꞌ ebꞌnaj kuywawom yinh isley yaꞌ Moisés.
Marcos 14:53-72
54 Wal yaꞌ Pedro nahat tzujan isto yaꞌ yinta Komam,
yapni yaꞌ yamaqꞌil yatut naj yahawil sacerdote tuꞌ,
yok tzꞌonhno yaꞌ qꞌaxhno xol ebꞌnaj chitanhen Yatut Komam Dios.
55 Ebꞌnaj iswiꞌehal yinh ebꞌnaj sacerdote yebꞌ ebꞌnaj iswiꞌehal yinh lahtiꞌ xol ebꞌnaj Israel,
ok ebꞌnaj issayaꞌ hunu tzet chiꞌok ismulo Komam yunhe iskawxeniko ebꞌnaj kamikal yibꞌanh Komam yalni,
yajaꞌ machi hunu tiꞌ kawxiko ismulo Komam.
56 Kaw txꞌiꞌal ebꞌnaj hobꞌnikanh leqꞌtiꞌal yinh Komam,
yajaꞌ nanantanhe tzet chal ebꞌnaj.
57 Ay xin hunteqꞌan ebꞌnaj ah linhnoj,
yalni ebꞌnaj leqꞌtiꞌal yinh Komam hakaꞌ tiꞌ:
58 —Jabꞌehanh yalni naj:
“Huneꞌ Yatut Komam Dios,
anma watxꞌenhe tiꞌ,
chiwuchkꞌayojan,
oxebꞌnhe xin tzꞌayik chiwakanhan selel,
yajaꞌ mach anmaho chiwatxꞌenkanh,”
xhi naj tiꞌ,
xhi ebꞌnaj yinh Komam.
59 Yajaꞌ maxhtikꞌa okpaxo huneꞌ tuꞌ ismulo Komam.
60 Lahwi tuꞌ,
yah linhno naj yahawil sacerdote,
yalni naj tet Komam:
—¿Tzet yinh xin mach chaxhtaqꞌwi?
¿Tzet ye hunteqꞌan chal ebꞌnaj tawinh tiꞌ?
xhi naj.
61 Yajaꞌ xin maxhtikꞌa taqꞌwi Komam tet naj.
Isqꞌambꞌenpaxo naj tet Komam:
—¿Tom hach tiꞌ Cristo,
Iskꞌahol Komam Dios,
Komam chihal-lax kꞌulal?
xhi naj.
62 Istaqꞌwi Komam:
—Hoꞌ,
hanintonan.
Hex tiꞌ cheyilaꞌ wok tzꞌonhnojan yinh iswatxꞌqꞌabꞌ Komam Dios kaw aykano yip,
kat heyilni wulpaxojan xol moyan yul satkanh,
Hanin Aqꞌbꞌilintijan texol yu Komam Dios,
xhi Komam.
63 Hayet yabꞌen naj yahawil ebꞌnaj sacerdote yinh tzet yal Komam tuꞌ,
istzilnilo naj xil isqꞌap yu isyenilo naj ta txꞌoj chabꞌe naj yinh tzet yal Komam.
Lahwi tuꞌ,
yalni naj:
—Wal tinanh matxa yilalo chikoqꞌan mak chihalni ismul naj tiꞌ.
64 Hex kaw hex maxeyabꞌe istxꞌojal istzotel naj yinh Komam Dios.
¿Tzet cheyute heyalni yinh naj?
xhi naj.
Sunil xin ebꞌnaj halni tato yilal iskam Komam.
65 Ay xin ebꞌnaj tzubꞌliko yinh Komam,
ismajchenpaxo ebꞌnaj sat,
ismaqꞌnipaxo ebꞌnaj,
chisqꞌambꞌen ebꞌnaj tet Komam:
«Haliloj mak chaxhmaqꞌni,»
xhi ebꞌnaj.
Hakpax tuꞌ ebꞌnaj chitanhen Yatut Komam Dios okpaxo ebꞌnaj ispaqꞌalto sat Komam.
Yal yaꞌ Pedro ta mach yohtajo yaꞌ Komam
66 Wal yaꞌ Pedro ayayto yaꞌ yamaqꞌil teꞌ nha tuꞌ yet yapni ix ischejabꞌ naj yahawil sacerdote.
67 Hayet yilni ix isqꞌaxhni yaꞌ Pedro,
yokkano tꞌanhno ix yinh yaꞌ,
yalni ix:
—Hach tiꞌ hawetbꞌi habꞌa yebꞌ naj Jesús,
naj ah Nazaret,
xhi ix.
68 Istaqꞌwi yaꞌ Pedro:
—Tzimi chawal hach tiꞌ,
mach wohtajojan naj chawal tuꞌ,
xhi yaꞌ.
Lahwi tuꞌ isto yaꞌ istiꞌ huneꞌ niman pulta,
lanhantotikꞌa xin yoqꞌkanh huneꞌ noꞌ icham chiyo.
69 Hayet yilnipaxo ix yaꞌ Pedro,
yalni ix tet ebꞌnaj ayayto bꞌey tuꞌ:
—Huneꞌ naj tiꞌ yetbꞌi isbꞌa naj yebꞌ naj Jesús,
xhi ix.
70 Yajaꞌ xin yalpaxo yaꞌ ta mach yohtajo yaꞌ Komam.
Hunepixto xin yalni ebꞌnaj ayayo bꞌey tuꞌ:
—Yinh kaw yeli,
hach tiꞌ hawetbꞌi habꞌa yebꞌ ebꞌnaj chiꞌekꞌ yinta naj Jesús,
yuto ah Galilea hach,
xhi ebꞌnaj.
71 Yajaꞌ ok yaꞌ Pedro istzꞌaktiꞌnhe isbꞌa,
yalni yaꞌ:
—Kaw chabꞌe Komam Dios mach wohtajojan huneꞌ naj cheyal tiꞌ,
xhi yaꞌ.
72 Lanhantotikꞌa yalni yaꞌ hakaꞌ tuꞌ yoqꞌkanh noꞌ icham chiyo yinh iskayel.
Hak tuꞌ yu isnahniti yaꞌ Pedro yinh tzet yal Komam tet yaꞌ,
yet yalni hakaꞌ tiꞌ:
«Yalanhto maxhto chiꞌoqꞌ noꞌ icham chiyo yinh iskayel,
oxelxa chawala ta mach kinhawohtajojan,»
xhi Komam.
Hayet istit yul iskꞌul yaꞌ yinh tzet yal Komam tuꞌ,
yok yaꞌ oqꞌoj.