Yet istxꞌahni Komam Jesús yoj ebꞌyaꞌ chikuywi yintaj
13
Yet hekalxanhe chiꞌichiko qꞌinh Pascua,
kaw yohtaxa Komam Jesús tato apni istiempohal bꞌay chiyakano Komam huneꞌ yul sat yibꞌanhqꞌinal tiꞌ,
kat isto Komam iskꞌatanh Komam Dios.
Kaw xahan yil Komam makta yako isbꞌa yul isqꞌabꞌ yul sat yibꞌanhqꞌinal tiꞌ.
Wal tinanh xin kaw chisyekanilo Komam tato kaw xahan ay anma tuꞌ yu.
2 Wal naj matzwalil xin,
xaꞌaynato naj yul yanma naj Judas Iscariote,
iskꞌahol icham Simón,
yinh yaniko naj Komam yul isqꞌabꞌ kamikal.
Jesús lava los pies de los discipulos (Juan 13.1-17)
3 Wal Komam Jesús kaw yohtaj tato iskꞌatanh Komam Dios titna Komam,
yuxinto iskꞌatanh Komam Dios tuꞌ chitopaxo hunelxa.
Kaw yohtapaxo Komam tato yul isqꞌabꞌ yakaniko Komam Dios sunil tzettaj ye tuꞌ.
4 Yet lanhan iswaꞌ Komam yebꞌ ebꞌyaꞌ iskuywom tuꞌ,
yahwano Komam yinilo huneꞌ xil isqꞌap hukan yehi ayikoj yibꞌanh xil isqꞌabꞌ,
iskꞌalniko Komam huneꞌ pixe yinh yiktaj.
5 Yanayto Komam ha haꞌ yul pechꞌan,
istzabꞌniko Komam istxꞌahni yoj ebꞌyaꞌ chikuywi yinta tuꞌ,
issuni tajo Komam yu huneꞌ pixe ayko yinh yikta tuꞌ.
6 Yet lanhan istzabꞌniko Komam istxꞌahni yoj yaꞌ Simón Pedro,
yalni yaꞌ tet Komam:
—Mamin,
¿tom chaxhok hatxꞌahaꞌ wojtiꞌan hawalni?
xhi yaꞌ.
7 Istaqꞌwi Komam tet yaꞌ:
—Tinanh kaw mach chitxumchalo hawu tzet chinwatxꞌetiꞌan,
yaj yet tzujanxa kat istxumchalo hawu,
xhi Komam.
8 Yalni yaꞌ tet Komam:
—¡Machoj Mamin!
Kaw maxhtikꞌa chu hatxꞌahni wojtiꞌan,
xhi yaꞌ.
Yalni Komam:
—Wal xin tato mach chisje hakꞌul chintxꞌahan hawoj tiꞌ,
kaw mach ayachoko yetbꞌiho ebꞌyaꞌ ayxako yul inqꞌabꞌan,
xhi Komam tet yaꞌ.
9 Yalni yaꞌ Simón Pedro tet Komam:
—Ta hak tuꞌ chal tuꞌ Mamin,
maxhnhehojabꞌtaj wojtiꞌan chatxꞌaha,
wal xin yilal hatxꞌahnipaxo inqꞌabꞌan yebꞌpaxo xin inwiꞌan,
xhi yaꞌ tet Komam.
10 Istaqꞌwi Komam tet yaꞌ:
—Qꞌinalo tato ay hunu mak lanhanto yaxhniloj,
matxa yilalo istxꞌahlax sunil isnimanil,
hanhkꞌanhe yoj,
yuto kaw sajto ye isnimanil tuꞌ.
Yuxinto kaw lahan hex tiꞌ yebꞌ anma lanhanto yaxhniloj;
kaw saj ye heyanma,
yaj mach hesuniloj,
xhi Komam.
11 Wal xin,
kaw yohtaxa Komam mak chiꞌaniko yul isqꞌabꞌ kamikal,
yuxinto yal hakaꞌ tiꞌ:
«Yaj mach hesunilo saj ye heyanma,»
xhi Komam.
12 Yet lahwi istxꞌahni Komam yoj ebꞌyaꞌ xin,
yanipaxiko Komam huneꞌ xil isqꞌap hukan ye tuꞌ.
Yaypaxo tzꞌonhno Komam iskꞌatanh ebꞌyaꞌ,
yalni hakaꞌ tiꞌ:
—Wal hex hex tiꞌ,
chinheyalan hekuywawomal yebꞌ xin heyahawiloj;
wal xin kaw yel cheyala,
istꞌinhanilton huneꞌ tuꞌ.
14 Hanintiꞌan hekuywawom wehan,
heYahawil wepaxojan,
yaj mantxꞌahan heyoj,
yuxin hex tiꞌ hak tuꞌ wal heyuni teyinh hunun hex.
15 Wal xin manwatxꞌehan huneꞌ tiꞌ yunhe inyenikanojan tato hak tuꞌ wal heyuteni.
16 Yinh kaw isyelal chiwalan teyet,
hakaꞌ hunu naj kꞌamteꞌ,
mach ekꞌbꞌalo naj sata naj bꞌay chimunla tuꞌ,
haktikꞌapax tuꞌ naj chejabꞌ,
mach ekꞌbꞌalo naj sat naj chichejni.
17 Tato chitxumchalo hunteqꞌan tiꞌ heyu,
kat xin heyijeni,
kaw saqꞌal heyet.
18 »Maxhtaj teyinh hesunil chiwalan huneꞌ tiꞌ,
wal xin wohtajan makta sikꞌbꞌililo wuhan,
yajaꞌ xin yilal yijni isbꞌa yinh tzet tzꞌibꞌnhebꞌilkanayo yinh Istzotiꞌ Komam Dios bꞌay chala:
“Haꞌ huneꞌ mak kaw hun chinwaꞌan yebꞌi,
haꞌ chipakꞌiko winhan,”
xhihayoj.
Jesús predice la traición (Juan 13.18-38)
19 Yalanhto chiwalnikanojan huneꞌ tiꞌ teyet haxinwal yet chiyijno isbꞌa,
kaw cheyayto yul heyanma tato haninan Cristo hinan.
20 Yinh kaw isyelal chiwalan teyet,
maknhetikꞌa chichahni hunu inchejabꞌan,
haninan chinischahpaxojan.
Hakpax tuꞌ xin maknhetikꞌa chinchahnihan,
chischahpaxo Mak chejnheintijan,
xhi Komam.
Yal Komam Jesús ta naj Judas chiꞌaniko Komam yul isqꞌabꞌ kamikal
21 Yet lahwi yalnikano Komam hunteqꞌan tiꞌ xin,
yok huneꞌ niman bꞌiskꞌulal yinh iskꞌul Komam,
yalni Komam yinh kaw habꞌan:
—Yinh kaw isyelal chiwalan teyet,
texol tiꞌ ayko huneꞌ mak chinanokojan yul isqꞌabꞌ kamikal,
xhi Komam.
22 Yet yabꞌen ebꞌyaꞌ iskuywom Komam tuꞌ xin,
toxanhe chilatꞌanhxiko ebꞌyaꞌ yinh sat hunun,
yuto mach yohtajo ebꞌyaꞌ mak yinh yal Komam.
23 Ay xin huneꞌ yaꞌ iskuywom Komam kaw xahan ay yu,
iskawilal xin Komam ayko yaꞌ yet chiwaꞌi.
24 Yaqꞌni yaꞌ Simón Pedro yechel tet yaꞌ,
yunhe isqꞌambꞌenilo yaꞌ mak huneꞌ chal Komam tuꞌ.
25 Qꞌehan xin yaꞌ iskawilal istxam iskꞌul Komam Jesús,
isqꞌambꞌen yaꞌ tet Komam:
—Mamin,
¿mak najil huneꞌ chawal tiꞌ?
xhi yaꞌ.
26 Istaqꞌwi Komam tet yaꞌ:
—Haꞌ mak bꞌay chiwaqꞌaꞌtojan ixim pan chinlabꞌahan,
haꞌ huneꞌ tuꞌ,
xhi Komam tet yaꞌ.
Lahwi tuꞌ xin islabꞌan Komam ixim pan tuꞌ,
yaqꞌni Komam ixim tet naj Judas Iscariote,
iskꞌahol icham Simón.
27 Yet ischahni naj ixim pan tuꞌ,
yaynato naj matzwalil yul yanma naj,
yalni Komam tet naj:
—Haꞌ tzet nabꞌil hawu hawatxꞌeni,
watxꞌe yinh anhe,
xhi Komam tet naj.
28 Wal ebꞌyaꞌ chiwaꞌ sat mexha yebꞌ Komam tuꞌ xin,
kaw machi hunu ebꞌyaꞌ txumchalo yu tzet yinh yuxinto yal Komam hakaꞌ tuꞌ.
29 Naj Judas tuꞌ xin haꞌ naj iqꞌnhe istxꞌuyal chꞌen melyu,
yuxin ay ebꞌyaꞌ txumni ta chischejto Komam naj isloqꞌoꞌ tzet chiꞌokniko yinh qꞌinh tuꞌ,
maka yu ispohnito naj hanikꞌo chꞌen melyu tuꞌ yinh anma mebꞌaꞌ.
30 Yet lahwi iswahni naj Judas ixim pan tuꞌ,
yelti naj bꞌey tuꞌ,
kaw xin xaꞌay numnahi.
Huneꞌ akꞌ chejbꞌanile
31 Lahwi istokano naj Judas tuꞌ,
yalni Komam Jesús hakaꞌ tiꞌ:
—Wal tinanh chisyelo isbꞌa wipan Hanin Aqꞌbꞌilintijan texol yu Komam Dios,
kat xin isyenipaxilo isbꞌa yip Komam Dios winhan.
32 Tato chinyelojan yip Komam Dios,
chisyepaxilo Komam wipan,
kaw xin lanhanxa isyeniloj.
33 Hex kaw xahan ay hex wuhtiꞌan,
kaw hanikꞌxanhe tiempo ayinikꞌojan texol.
Chinhesayaꞌkꞌojan,
yaj kaw mach chiyu heto bꞌay chinto tuꞌan.
Hakaꞌtikꞌa wute walnihan tet anma Israel,
hak tuꞌ chiwute walnipaxojan teyet.
34 Chiwaqꞌkanojan huneꞌ akꞌ chejbꞌanile tiꞌ teyet,
xahan cheyil hebꞌa hunun hex;
hakaꞌ isxahanil ay hex wuhan,
hak tuꞌ cheyutepaxo hebꞌa.
35 Tato kaw xahankano cheyil hebꞌa hunun hex,
hak tuꞌ chiyu yohtanhenilo anma tato kexinkuywoman,
xhi Komam tet ebꞌyaꞌ.
Yal Komam Jesús tato chal yaꞌ Pedro ta mach yohtajo yaꞌ Komam
36 Isqꞌambꞌen yaꞌ Simón Pedro tet Komam:
—Mamin,
¿bꞌaytuꞌwal xin chaxhtohi?
xhi yaꞌ.
Istaqꞌwi Komam:
—Bꞌay chinto tuꞌan mach chu hato wintajan.
Chaxhoko tzujno wintajan,
yaj maxhto tinanh,
xhi Komam.
37 Yalnipaxo yaꞌ Pedro tuꞌ tet Komam:
—Mamin,
¿tzet yinh yuxin mach chu wok tzujnojan tawintaj?
Kaw hinaninan waqꞌni kamo hinbꞌahan tawinh,
xhi yaꞌ tet Komam.
38 Istaqꞌwi Komam:
—¿Tom hinan hach hakam winhan,
hawalni?
Wal xin yinh isyelal chiwalan tawet,
kaw oxelxa chawala tato mach kinhawohtajojan yalanhto maxhto chiꞌoqꞌkanh noꞌ icham chiyo,
xhi Komam tet yaꞌ.