—Kaw mach chikabꞌkon hekꞌul,

aweko heyanma yinh Komam Dios kat xin heyanipaxiko heyanma winhan.

2 Bꞌey yatut Inmaman kaw ay hamanil bꞌay wal jehi;

qꞌinalo ta machi hamanil tuꞌ xamwalan teyet.

Wal xin kaw aya,

yuxinto chintohan inwatxꞌeꞌan huneꞌ bꞌay chexapni tuꞌ.

3 Yet xalahwi inwatxꞌenan bꞌay chexapni,

kat xin wulan hunelxa kexwinotojan,

haxinwal bꞌay chinehan,

haꞌ tuꞌ chexehpaxoj.

4 Haꞌ bꞌay chinto tuꞌan,

kaw heyohtaxa,

yebꞌ xin heyohtapaxo isbꞌelal,

xhi Komam tet ebꞌyaꞌ.

5 Yalni yaꞌ Tomás tet Komam:

—Mamin,

kaw mach johtajojanh bꞌaytuꞌwal chaxhtohi.

¿Tzet xin chiyu johtanhenilojanh isbꞌehal?

xhi yaꞌ tet Komam.

6 Istaqꞌwi Komam:

—Hanintonan huneꞌ bꞌeh chiwalan teyet tiꞌ,

yuto haninnhehan chiyu kexwinitojan iskꞌatanh Inmaman.

Haninan isyelal,

yebꞌ xin haninnhehan chiwaqꞌan qꞌinale mach istanhbꞌal.

7 Tato kinheyohtaj inxahan,

kaw heyohtaxa Inmaman.

Wal tinanh xin,

kaw heyohtaxa Inmaman,

yuto xaheyiliko yinh,

xhi Komam.

8 Yalni xin yaꞌ Felipe tet Komam:

—Mamin,

ye Hamam tuꞌ jilaꞌanh,

kꞌuxanojtamna tuꞌ,

xhi yaꞌ tet Komam.

9 Yalni Komam tet yaꞌ:

—Felipe,

ayxa istiempohal wehikꞌojan texol.

¿Tom kaw maxhto kinhawohtajan?

Maknhetikꞌa chinilnihan,

lanhan yilnipaxo yinh Inmaman.

¿Tzet yinh yuxinto chawalpaxoj?:

“Ye Hamam tuꞌ jilaꞌanh,”

kachi.

10 ¿Tom kaw maxhto chawayto yul hawanma tato wetbꞌi hinbꞌahan yebꞌ Inmaman,

yetbꞌipaxo Inmaman wehan?

Yuxinto sunil tzet chiwalan teyet mach wetojan inchukilan,

haꞌ Inmaman ayiko wetbꞌihojan,

haꞌ chiwatxꞌen ismunil.

11 Aweyto yul heyanma ta wetbꞌi hinbꞌahan yebꞌ Inmaman,

aypaxiko Inmamtuꞌan winhan.

Tato mach cheyayto yul heyanma yinh tzet chiwaltiꞌan,

aweyto yul heyanma yu ej kꞌaybꞌalkꞌule chinyehan teyet.

12 »Yinh kaw isyelal chiwalan teyet,

maknhetikꞌa chinchahnihan yul yanma,

chiswatxꞌepaxo hakaꞌ tzet chinwatxꞌetiꞌan.

Aypaxo tzet ekꞌbꞌalto chiswatxꞌeꞌ,

yuto iskꞌatanh Inmaman chintohan.

13 Tzijxanhe tzet cheqꞌan tet Komam Dios yu ayexxako yul inqꞌabꞌan chiwaqꞌan.

Hak tuꞌ chiwutehan Hanin Iskꞌahol Komam Dios intiꞌan,

yu inyelojan yip Inmamtuꞌan.

14 Yuxin chiwalan teyet,

tzijxanhe ye tuꞌ cheqꞌan yinh inbꞌihan chiwaqꞌan teyet,

yuto kaw wetxahan heyehi.

15 »Tato xahan ayinan heyu,

yijewe inchejbꞌanilan.

16-17 Haninan chinqꞌanan tet Inmaman kat yaniti Komam Espíritu Santo kolwal teyinh,

haꞌ Komam tuꞌ isyelalnhetikꞌa chala.

Haꞌ xin chihul texol yinh sunilbꞌal tiempo.

Wal anma yet yul sat yibꞌanhqꞌinal tiꞌ xin,

kaw mach chiyu ischahni huneꞌ Espíritu tuꞌ yuto mach ohtabꞌilo yu anma,

machi xin chitxumchalo yu.

Wal hex hex tiꞌ xin,

kaw heyohtaxa,

kaw xin chiꞌehayo texol kat yehpaxikꞌo teyinh.

18 »Wal intiꞌan mach chexinbꞌejkanojan hechukil,

chinhulpaxojan tekꞌatanh hunelxa.

19 Kaw hanikꞌxanhe tiempo ayinikꞌojan,

lahwi tuꞌ xin matxa chinil-laxojan yu anma.

Wal hex hex tiꞌ,

chitikꞌa heyilaꞌpaxo winhan,

yuto kaw itzitz innhetikꞌahan yinh sunilbꞌal tiempo.

Hakexpax tuꞌ,

itzitz hexnhetikꞌapaxoj.

20 Yet ayxako Komam Espíritu Santo teyinh,

kat istxumchaholo heyu ta wetbꞌi hinbꞌahan yebꞌ Inmaman.

Hakexpax tuꞌ,

ayexpaxiko winhan,

ay inpaxikojan teyinh.

21 »Makta chiꞌabꞌen tzet chiwalan,

kat xin isyijeni,

haꞌ hunteqꞌan tuꞌ kaw chinochenan.

Yuxin maknhetikꞌa chinochenan,

kaw xahan ay yu Inmaman,

xahan aypaxo wuhan,

kat xin inyenilo hinbꞌahan tet,

xhi Komam.

22 Yalni yaꞌ Judas,

yaj maxhtaj naj Judas Iscariote:

—Mamin,

¿tzet yinh yuxinto jetnhehanh chayelo habꞌa?

Wal tet anma yet yul sat yibꞌanhqꞌinal tiꞌ mach chayelo habꞌa tet,

xhi yaꞌ.

23 Yalni Komam xin:

—Haꞌ mak chinochenan,

chisyije tzet chiwalan,

kaw xin xahan chꞌil-laxo yu Inmaman.

Hak tuꞌ xin chu julanh kat jokkanojanh yetbꞌihoj.

24 Haꞌ mak mach chinochenan,

mach chisyije tzet chiwalan.

Wal huneꞌ kuybꞌanil lanhan heyabꞌen tiꞌ kaw mach wetojan,

yet Inmaman anheintijan texol.

25 »Kaw chiwalkanojan hunteqꞌan tiꞌ teyet yaqꞌ isbꞌa ayintokꞌojan texol.

26 Chati Inmamtuꞌan Komam Espíritu Santo texol;

haꞌ chihul inselelojan kat iskolwa teyinh,

kat xin kexiskuyni yinh sunil tzettaj ye tuꞌ.

Haꞌ xin chiꞌaqꞌni henabꞌati sunil tzet xahinkuykanojan teyet.

27 »Wal tinanh xin,

chiwakanojan aqꞌankꞌulal yul heyanma.

Huneꞌ aqꞌankꞌulal chiwaqꞌtiꞌan kaw kꞌul,

mach hakaꞌ aqꞌankꞌulal chaqꞌ anma yet yul sat yibꞌanhqꞌinal tiꞌ.

Wal xin mach chikabꞌkon hekꞌul,

mach chexxiwpaxoj.

28 Kaw xawalan teyet ta chintohan,

yaj xin chinhulpaxojan hunelxa tekꞌatanh.

Ta kaw yeli chinheyochehan,

kaw chimkextzala heyabꞌeni tato chintohan iskꞌatanh Inmaman,

yuto kaw ekꞌbꞌalto Inmamtuꞌan insatajan.

29 Yalanhtokanoj chiwalnikanojan teyet yinh hunteqꞌan tiꞌ,

haxinwal yet chijni isbꞌa,

kat heyanayto yul heyanma yinh.

30 »Matxa kaw tzet chiwalan teyet,

yuto kaw lanhan yul naj matzwalil,

naj yahawil yeko yinh huneꞌ yul sat yibꞌanhqꞌinal tiꞌ.

Waxanhka ay yip naj,

yaj mach chiqꞌoji naj wibꞌanhan.

31 Yaj to kaw yilal yekꞌyaꞌ wanmatiꞌan yunhe yohtanhenilo sunil anma tato kaw chiwochehan Inmaman,

kat inyenilojan tato kaw chinyijehan chejbꞌanil aqꞌbꞌil wetan yu.

Wal tinanh xin,

ahanhwewanoj,

elojonhwe bꞌey tiꞌ,

xhi Komam.