—Wal hanintiꞌan,

kaw lahan hinan yebꞌ xin hunu yoj teꞌ uva kaw kꞌul,

wal Inmaman xin,

kaw lahan yebꞌ hunu mak chiꞌilni teꞌ.

2 Qꞌinaloj tato ay ej teꞌ isqꞌabꞌ mach chisatni,

chitzokꞌlaxilto teꞌ yu Inmaman.

Wal teꞌ isqꞌabꞌ kaw kꞌul issatni xin,

chiyilo istajinal isqꞌabꞌ teꞌ,

hak tuꞌ xin kaw chisatni teꞌ sikꞌlebꞌil.

3 Wal hex hex tiꞌ,

kaw sajxa ye heyanma yu kuybꞌanile aqꞌbꞌilxa teyet wuhan.

4 Ayojabꞌ hexnhetikꞌako winhan,

kat wehikꞌojan yul heyanma.

Kaw hakaꞌ hunu isqꞌabꞌ teꞌ uva tzokꞌbꞌililto yinh yoj,

matxa chisatni,

kaw hak tuꞌ heyehi tato machi hex winhan.

5 »Wal hanintiꞌan,

kaw lahan hinan yebꞌ xin yoj teꞌ uva.

Wal hexpaxo xin,

kaw lahan hex hakaꞌ teꞌ isqꞌabꞌ.

Yuxin ta ayexnhetikꞌako winhan,

ayinpaxikꞌojan teyinh,

lahan hex hakaꞌ hunu isqꞌabꞌ teꞌ uva kaw kꞌul issatni.

Wal tato machijinan teyinh,

kaw machi hunu tiꞌ chiyu hewatxꞌen hechukil.

6 Wal mak mach chiꞌehikꞌo winhan xin,

kaw lahan chiꞌutelax hakaꞌ teꞌ isqꞌabꞌ mach chiyaqꞌ sat,

chitzokꞌlaxiloj kat istajiloj.

Chilahwi istajilo teꞌ xin,

kat iskutxbꞌalaxkanh teꞌ,

kat yalaxto teꞌ yul qꞌaꞌ.

7 »Tato haknhetikꞌa tuꞌ heyehiko winhan,

machi xin chekꞌayto heyijen kuybꞌanile chiwalkanotiꞌan,

qꞌanwe sunil tzet choche hekꞌul chiꞌaqꞌlaxo teyet.

8 Ta hakaꞌ teꞌ isqꞌabꞌ kaw satnom tuꞌ hakex tuꞌ,

wal tuꞌ cheyeloj tato kaw yeli inkuywoman heyehi.

Hak tuꞌ xin chiyu heyinikanh isbꞌi Inmaman.

9 »Hakaꞌ isxahanil ayinan yu Inmamtuꞌan,

hak tuꞌ isxahanil chexwilpaxojan.

Yuxin xahannhehojabꞌnhetikꞌa cheyil hebꞌa,

hakaꞌ isxahanil ay hex wuhan.

10 Tato cheyije chejbꞌanile chiwaqꞌkanojan teyet tiꞌ,

chexahannhe hebꞌa,

hakaꞌ isxahanil ay hex wuhan.

Yuto hak tuꞌ wehan yebꞌ xin Inmaman,

kaw xahan chexwilan,

hakaꞌ iskꞌulchꞌanil iskꞌul Inmaman.

11 »Kaw chiwalan hunteqꞌan tiꞌ teyet yunhe hakaꞌ istzala inkꞌultiꞌan,

hak tuꞌ heyabꞌenpaxo tzalahilal wintajan;

haxinwal kaw chitzꞌajnakano huneꞌ tzalahilal tuꞌ yul heyanma.

12 Haꞌ huneꞌ chejbꞌanile tiꞌ chiwalkanojan teyet,

kaw xahanojabꞌ cheyil hebꞌa hunun hex hakaꞌ isxahanil chexwilan.

13 Hak tiꞌ chiyu koyeniloj tato kaw xahan aykano hunu jamigo ju,

tato hinanonh jaqꞌni kamo kobꞌa yinh.

14 Tato cheyije tzet chiwaltiꞌan,

kaw wamigohan heyehi.

15 Wal hex hex tiꞌ,

kaw matxa chexwalan inchejabꞌojan,

yuto hunu naj chejabꞌ kaw mach yohtajo naj tzet chiswatxꞌe yahaw,

wal xin chexwalan wamigohojan,

yuto xawalan teyet sunil tzet halbꞌil wetan yu Inmaman.

16 Maxhtaj hex kinhesayilojan,

haninan kexinsayilojan,

kexwanikojan yinh hemunil yunhe lahan chexeliko hakaꞌ hunu teꞌ satnom teꞌ kaw niman sat chaqꞌa,

haꞌ xin sunil hunteqꞌan chewatxꞌe tuꞌ aynhetikꞌa yinh sunilbꞌal tiempo.

Hak tuꞌ xin tzijxanhe ye tuꞌ cheqꞌan tet Inmaman yinh inbꞌihan,

chiꞌaqꞌlax teyet.

17 Yuxinto kaw chiwalkanojan teyet,

kaw xahan cheyil-le hebꞌa hunun hex,

xhi Komam.

18 Yalnipaxo Komam Jesús:

—Tato chexkajlax yu anma ay yul sat yibꞌanhqꞌinal tiꞌ,

nawetij tato kaj kinyilpaxojan anma.

19 Qꞌinalo tato ayextoko xol tzet chiswatxꞌe anma tiꞌ,

kaw xahanmi chexyila,

hakaꞌ isxahanil chil isbꞌa.

Wal xin kaw haninan kexinsikꞌilojan xol anma,

yuxintikꞌa chexiskaj anma,

yuto matxa ayexoko xol tzet chiswatxꞌe.

20 Tijabꞌ yul hekꞌul yet walnihan teyet hakaꞌ tiꞌ:

“Naj kꞌamteꞌ kaw mach ekꞌbꞌalo naj sata ispatrón,”

yuxin tato kaw kinkajlaxan yu anma,

hakexpax tuꞌ chal tuꞌ,

chexkajlaxpaxo yu anma.

Wal tato isyije anma intzotiꞌan walan tet xin,

hakexpax tuꞌ,

chisyije anma kuybꞌanile cheyala.

21 Kaw chexekꞌoyaꞌ yu anma isyayil ayexiko yul inqꞌabꞌan.

Chiyute anma huneꞌ tuꞌ yuto kaw mach yohtajo anma tuꞌ Mak anheintijan.

22 »Qꞌinalo tato kaw mach kinhulan walaꞌan kuybꞌanile tet anma,

kaw machmi ismul anma.

Wal tinanh xin,

kaw matxa tzet tzꞌaj yalaꞌ yu iskolni isbꞌa yinh ismul tuꞌ.

23 Maknhetikꞌa chinkajnihan,

chiskajpaxo Inmaman.

24 Sunil tzet inyehan xol anma,

kaw maxhto hunu mak chiyeni yilaꞌ anma hakaꞌ tuꞌ.

Qꞌinalo tato machi kꞌaybꞌalkꞌule inyehan xol anma,

kaw machim ismul anma,

chal tuꞌ.

Wal xin,

waxanhka kaw yil anma hunteqꞌan tuꞌ,

yaj to kaw chiniskajan,

chiskajpaxo Inmaman.

25 Yajaꞌ kaw chu hunteqꞌan tiꞌ,

yunhe yijnikano isbꞌa sunil tzet tzꞌibꞌnhebꞌilkano yinh Istzotiꞌ Komam Dios bꞌay chala:

26 »Yaj ay huneꞌ Komam chikolwa teyinh chitit bꞌey Inmaman,

haꞌ ton xin Komam Espíritu Santo,

Komam hanhe isyelal chala.

Haninan chintohan inchejaꞌtijan Komam tuꞌ.

Yet ay Komam texol chitzotelo winhan.

27 Hakexpax tuꞌ hex tiꞌ,

kaw chextzotelo winhan yuto kaw huneꞌnhetikꞌa hetzujiko wintajan yettaxtikꞌa wichikojan walnihan istzotiꞌ Inmaman.