Yalnipaxo Komam Jesús:

—Kaw machi walan hunteqꞌan tiꞌ teyet yet yalanhtokanoj yuto ayinikꞌojan texol.

5 Yajaꞌ wal tinanh xin,

kaw chinpaxtojan iskꞌatanh Inmaman anheintijan,

yaj xin machi hunujex cheqꞌambꞌe:

“¿Bꞌaytuꞌwal chaxhtohi?”

kexchi.

6 Wal xin,

kaw chiꞌok bꞌiskꞌulal yinh hekꞌul yu chiwalan hunteqꞌan tiꞌ teyet.

7 Yinh kaw yeli chiwalkanojan teyet,

kaw ekꞌna kꞌul tato chintohan,

yuto ta mach chintohan kaw mach chihul Komam chikolwa teyinh.

Wal xin kaw chintohan kat inchejnitijan Komam.

8 Yet chihul Komam tuꞌ,

haꞌ chiꞌaqꞌni yohtanhelo anma tato mulum.

Haꞌ Komam tuꞌ chiꞌaqꞌni yohtanhelo anma tuꞌ ta kaw istoholal kinhulikꞌojan inwatxꞌeꞌan,

yebꞌ ta chil Komam Dios yinh tzet chiꞌeliko anma.

9 Haꞌ Komam Espíritu tuꞌ,

chiꞌaqꞌni yohtanhelo anma tato kaw mulum,

yuto maxhtikꞌa isje iskꞌul kinischabꞌaꞌan yul yanma.

10 Haꞌ Komam chiꞌaqꞌnipaxo yohtanhelo anma tato kaw istoholal kinhulikꞌojan inwatxꞌeꞌan,

yuxin chinpaxtojan iskꞌatanh Komam Dios,

matxa xin bꞌay chiꞌil-lax winhan.

11 Chaqꞌnipaxo Komam yohtanhelo anma tato haꞌ Komam Dios chiꞌilni yinh tzet chiꞌeliko anma,

yuto xakawxiko ismul naj yahawil yul sat yibꞌanhqꞌinal tiꞌ yibꞌanh yu Komam.

12 »Kaw hantanhe tzet chiwochehan chiwalan teyet,

yaj tinanh maxhto chexqꞌoji hetxumniloj.

13 Yajaꞌ yet chihul Komam Espíritu Santo isyelal chala,

haꞌ Komam xin chexkuyni yinh sunil isyelal.

Yaj xin mach yeto tzet chaqꞌ hekuyuꞌ tuꞌ to tzet abꞌebꞌil yu,

haꞌ chal teyet,

kat yaqꞌni heyohtanhelo tzettaj ye tuꞌ chito yubꞌ.

14 Haꞌ xin chiꞌaniko inmayan,

yuto chohtanhe bꞌaytet wetan yehi kat xin yalnolo teyet.

15 Sunil tzettaj ye tuꞌ yet Inmaman kaw wetpaxojan,

yuxinto chiwalkanojan teyet;

sunil tzettaj ye tuꞌ wetan yehi kaw chal-laxo teyet yu Komam Espíritu Santo,

xhi Komam.

16 Yalnipaxo Komam tet ebꞌyaꞌ iskuywom:

—Hanikꞌxanhe bꞌay matxa cheyilaꞌ winhan,

hanikꞌxanhe kat heyilnipaxo winhan hunelxa yuto chintohan bꞌey Inmaman,

xhi Komam.

17 Lahwi yalni Komam hakaꞌ tuꞌ xin,

istzabꞌniko ebꞌyaꞌ iskuywom Komam isqꞌambꞌen tet hunun:

—¿Tzet chal yelapno huneꞌ chiyal Komam tiꞌ?

“Kaw hanikꞌxanhe bꞌay matxa cheyilaꞌ winhan,

hanikꞌxanhe xin kat heyilni winhan hunelxa yuto chintohan iskꞌatanh Inmaman,”

xhi Komam,

xhi ebꞌyaꞌ tet hunun.

18 Yalnipaxo ebꞌyaꞌ:

—¿Tzet kaw yelapno ye huneꞌ chiyal Komam tiꞌ,

“kaw hanikꞌxanhe”?

xhi Komam.

Kaw mach chitxumchalo ju tzet chal yelapnoj,

xhi ebꞌyaꞌ.

19 Isnahnilo Komam Jesús tato kaw choche ebꞌyaꞌ isqꞌambꞌeꞌ tet Komam,

yuxinto yal Komam tet ebꞌyaꞌ:

—Kaw xawalan teyet:

“Kaw hanikꞌxanhe bꞌay matxa cheyilaꞌ winhan,

hanikꞌxanhe xin kat heyilnipaxo winhan hunelxa,”

kinchihan.

¿Tom haꞌ huneꞌ mawaltiꞌan,

haꞌ kaw cheqꞌambꞌe teyet hunujex?

20 Yinh kaw yeli chiwalan teyet;

chiꞌok bꞌiskꞌulal yinh heyanma kat heyoqꞌi.

Wal anma yet yul sat yibꞌanhqꞌinal tiꞌ xin,

kaw chitzalahokanh.

Chiꞌayo bꞌiskꞌulal teyibꞌanh,

yaj huneꞌ hebꞌiskꞌulal tuꞌ xin kaw chipakꞌiko yinh tzalahilal.

21 Qꞌinalo hakaꞌ hunu ix ix,

yet chiꞌapni yorahil iswatxꞌi iskꞌul kaw bꞌiskꞌulal chulo yanma ix yu isyaꞌil chul yibꞌanh ix.

Yajaꞌ yet xapitzkꞌa nichꞌan istzꞌul ix tuꞌ xin matxa chisnati ix isyaꞌtajil tuꞌ yu tzalahilal yinh nichꞌan unin xapitzkꞌa yul sat yibꞌanhqꞌinal tiꞌ.

22 Hak tuꞌ cheyaqꞌle hex tiꞌ,

kaw chiꞌok bꞌiskꞌulal yinh hekꞌul tinanh,

yaj xin yet cheyilnopaxo winhan hunelxa,

kaw chꞌoko huneꞌ icham tzalahilal yinh hekꞌul.

Machi hunu mak chiyu yinilo huneꞌ tzalahilal tuꞌ teyet.

23 »Yet huneꞌ tiempohal tuꞌ xin,

matxa yilalo ay tzet cheqꞌambꞌe wetan.

Yinh kaw isyelal chiwalkanojan teyet,

tzijxanhe ye tuꞌ cheqꞌan tet Inmaman yinh inbꞌihan,

chiyaqꞌ Komam teyet.

24 Wal tinanh xin,

kaw maxhto hunu tzet cheqꞌan yinh inbꞌihan tet Inmaman.

Qꞌanwej kat yaqꞌlax teyet,

haxinwal kaw tzꞌajan chukaniko tzalahilal yul heyanma,

xhi Komam.

25 Yalni xin Komam Jesús:

—Hunteqꞌan kuybꞌanile xawalan teyet tiꞌ,

yechelnhe yu walnihan.

Yaj xin chiꞌapni yorahil yet matxa chiwalan teyet yinh yechelnhe,

wal xin to kaw yinhxa habꞌan chiwalan teyet tzet kaw ye Inmaman.

26 Yet huneꞌ tiempohal tuꞌ xin,

cheqꞌan tzet choche hekꞌul tet Inmaman yinh inbꞌihan.

Matxa yilalo chintzotelan teyinh tet Inmamtuꞌan,

27 wal xin kaw xahan ay hex yu Inmaman,

yuto kaw xahan ayinan heyu yebꞌ xin yu xaheyayto yul heyanma tato iskꞌatanh Komam titnaj hinan.

28 Iskꞌatanh Inmaman kintitan yet wulan yul sat yibꞌanhqꞌinal tiꞌ.

Wal tinanh xin chinelan yul sat yibꞌanhqꞌinal tiꞌ,

kat intohan iskꞌatanh Inmaman hunelxa,

xhi Komam.

29 Yalni ebꞌyaꞌ iskuywom Komam tuꞌ tet:

—Wal tinanh,

kaw habꞌanxa hatzoteli,

yu matxa chaxhtzotel yinh yechelnhe.

30 Tinanh xin,

kaw chinachalo juhanh tato sunil kaw hawohtaj;

yuxin chijaytojanh yul janmahanh tato iskꞌatanh Komam Dios titnaj hach;

matxa yilalo chikoqꞌambꞌehanh tawet,

xhi ebꞌyaꞌ tet Komam.

31 Yalni Komam tet ebꞌyaꞌ:

—¿Mataxka kaw yeli chechayto yul heyanma?

32 Wal xin,

kaw lanhan yul istiempohal,

haꞌ ton tinanh yet chexpujnahokantoj,

nananta bꞌay xin chextokanikoj.

Hak tuꞌ xin chu kinhebꞌejnikanojan inchukilan,

yaj xin mach chinkanan inchukilan yuto kaw ayko Inmaman wetbꞌihojan.

33 Kaw chiwalkanojan sunil hunteqꞌan tiꞌ teyet yunhe yokkano aqꞌankꞌulal yinh heyanma wuhan.

Yul sat yibꞌanhqꞌinal tiꞌ cheyilaꞌ isyaꞌtajil,

yaj aweko yip heyanma yuto hanintiꞌan xakinqꞌojihan yinh sunil isyaꞌtajil ay yul sat yibꞌanhqꞌinal tiꞌ,

xhi Komam.