—Mam,

Maꞌapni yorahil hayenilo yip Hakꞌahol tiꞌ,

kat isyenipaxilo Hakꞌahol hawip.

2 Wal xin kaw ayxako anma yalanh wipan hawu,

yunhe waqꞌnihan qꞌinale mach istanhbꞌal tet anma xahawaqꞌ yul inqꞌabꞌan.

3 Qꞌinale mach istanhbꞌal chaliloj,

to chaxhyohtanhelo anma ta hachnhechꞌan kaw Dios yinh kaw isyelal,

kat xin kinyohtanhenilojan anma tato haninan Cristo hinan,

hach anheinpaxtijan.

4 »Kaw xaꞌinyelojan hawip yul sat yibꞌanhqꞌinal tiꞌ,

yuto xaꞌinlahan munil hawaqꞌ inwatxꞌehan.

5 Wal tinanh xin Mam,

yepaxilo wipan tawintaj,

huneꞌ wipan iqꞌbꞌiltikꞌa wuhan yet ayinan takꞌatanh yet yalanhto maxhto chiwatxꞌi huneꞌ yul sat yibꞌanhqꞌinal tiꞌ.

6 »Hunteqꞌan mak xahasikꞌilo xol anma yul sat yibꞌanhqꞌinal tiꞌ,

hawati yul inqꞌabꞌan,

xakaxhwaqꞌan yohtanhelo ebꞌnaj.

Hunteqꞌan ebꞌnaj tiꞌ xin kaw hawetxatikꞌa yehi,

kaw xin chisyije tzet chawala.

7 Wal tinanh xin kaw yohtaxa tato sunil tzet aqꞌbꞌil wetan hawu,

takꞌatanh titnaj.

8 Kuybꞌanile hawaqꞌ wetan,

kaw xawalan yabꞌeꞌ ebꞌnaj,

ischahni ebꞌnaj yul yanma.

Yuxinto kaw yohta ebꞌnaj tato kaw yeli takꞌatanh titnaj hinan.

Kaw ischayto ebꞌnaj yul yanma tato hach anheintijan.

9 »Kaw chiwabꞌenhekantojan ebꞌnaj yul haqꞌabꞌ,

maxhtaj anma yet yul sat yibꞌanhqꞌinal tiꞌ chiwabꞌenhetojan yul haqꞌabꞌ,

to hanhkꞌanhe ebꞌnaj hawaqꞌ wetan,

yuto kaw hawet ye ebꞌnaj.

10 Makta chiwalan wetojan,

kaw hawetpaxoj,

yebꞌ xin makta kaw hawet,

wetpaxojan,

yinh xin chiꞌilchalo sunil wipan.

11 »Kaw hanikꞌxanhe tiempohal ayinikꞌojan yul sat yibꞌanhqꞌinal tiꞌ,

kat xin inpaxtojan takꞌatanh;

walpaxo ebꞌnaj tiꞌ xin,

chikankano ebꞌnaj bꞌey tiꞌ.

Wal hach hach tiꞌ Mam,

kaw kꞌul hachnhetikꞌa,

makta xahawaqꞌ wetan,

chawil yu hahelanil,

haxinwal hunxanhe chute isnabꞌal,

hakaꞌ je hanhonh tiꞌ.

12 Yet ayinikꞌojan xol ebꞌnaj bꞌey yul sat yibꞌanhqꞌinal tiꞌ,

kaw ilbꞌil ebꞌnaj wuhan,

yu hawip ayko ebꞌnaj yul inqꞌabꞌan.^a

Ebꞌnaj hawaqꞌ wetan,

kaw xin machi hunu mak kꞌaytoj,

kachannhe huneꞌ naj tꞌinhanxatikꞌa yetanto isbꞌa;

yunhe yijni isbꞌa tzet aykanayo yul Hatzotiꞌ.

13 »Wal tinanh Mam,

chinpaxtojan takꞌatanh,

yaj yet ayintokꞌojan ninoxa yul sat yibꞌanhqꞌinal tiꞌ,

chiwalkanojan hunteqꞌan tiꞌ haxinwal hakaꞌtikꞌa yehiko tzalahilal yinh wanmatiꞌan,

hak tuꞌ chupaxiko tzalahilal yinh yanma ebꞌnaj.

14 Kaw xawalan hatzotiꞌ yabꞌeꞌ ebꞌnaj,

yaj wal anma yet yul sat yibꞌanhqꞌinal tiꞌ,

kaw chichiwa iskꞌul yinh ebꞌnaj yuto kaw matxa yeto yul sat yibꞌanhqꞌinal tiꞌ ye ebꞌnaj.

Hakaꞌ inpaxojan mach yeto yul sat yibꞌanhqꞌinal tiꞌ wehan.

15 Wal xin mach chinqꞌanan tawet ta chawilo ebꞌnaj yul sat yibꞌanhqꞌinal tiꞌ,

hanhkꞌanhe chinqꞌanan tawet ta chakꞌubꞌa ebꞌnaj tet naj matzwalil.

16 Kaw mach yeto yul sat yibꞌanhqꞌinal tiꞌ wehan,

hakpax tuꞌ ebꞌnaj,

kaw mach yeto yul sat yibꞌanhqꞌinal tiꞌ ye ebꞌnaj.

17 Watxꞌeko isnabꞌal ebꞌnaj tawinh yu isyelal,

Hatzotiꞌ xin,

haꞌ ton isyelal.

18 Hakaꞌ yu kinhawanitijan xol anma ay yul sat yibꞌanhqꞌinal tiꞌ,

hak tuꞌ chiyu wanipaxtojan ebꞌnaj xol anma.

19 Yu ebꞌnaj hawako yul inqꞌabꞌan,

yuxin chiwako hinbꞌahan yinh munil hawaqꞌ wetan;

hak tuꞌ xin chiwatxꞌiko ebꞌnaj yul haqꞌabꞌ yu isyelal.

20 »Maxhnhetajpaxo yinh ebꞌnaj tiꞌ chinqꞌanan hakꞌulal,

kaw chinqꞌanpaxojan hakꞌulal yinh sunil anma chinchahnihan yul yanma yu Hatzotiꞌ chalaꞌko ebꞌnaj tiꞌ.

21 Wal tinanh xin Mam,

kaw chinqꞌanan tawet tato kaw hunnhehojabꞌ chiyute isnabꞌal ebꞌnaj.

Hakaꞌtikꞌa je hanhonh tiꞌ,

hawetbꞌi wehan,

wetbꞌipaxojan hawehi.

Hak tuꞌ Mam,

chiwochehan tato kaw hunxanhehojabꞌ chukano isnabꞌal ebꞌnaj.

Hakton tuꞌ xin chiyu yanayto anma yul yanma tato hach anheintijan yul sat yibꞌanhqꞌinal tiꞌ.

22 »Haꞌ iskꞌulchꞌanil hawaqꞌ wetan xawaqꞌpaxojan tet ebꞌnaj tuꞌ,

yunhe kaw lahanxanhe chiyukano isnabꞌal hakaꞌtikꞌa je hanhonh tiꞌ.

23 Kaw wetbꞌi hinbꞌahan yebꞌ ebꞌnaj,

kaw xin jetbꞌipaxo kobꞌa;

hak tuꞌ xin kaw hunxanhe chukano ebꞌnaj.

Hakton tuꞌ xin chiyu istxumchalo yu anma ay yul sat yibꞌanhqꞌinal tiꞌ tato kaw hach kinhachejtijan,

kat xin isnachalo yu tato kaw hakaꞌ isxahanil ayinan hawu,

hak tuꞌ isxahanil aypaxo anma ayxako yul inqꞌabꞌtiꞌan hawu.

24 »Mam,

ebꞌnaj ayxako yul inqꞌabꞌtiꞌan hawu,

kaw chiwochehan tato bꞌay chinehan haꞌ tuꞌ xin chiꞌehpaxo ebꞌnaj inkꞌatanhan yunhe yilni ebꞌnaj wipan aqꞌbꞌil wetan hawu,

yuto kaw xahan ayinan hawu yalanhto yet maxhto huneꞌ yul sat yibꞌanhqꞌinal tiꞌ.

25 Wal hach hach tiꞌ Mam,

kaw toholkano sunil tzet chawatxꞌe.

Wal anma ay yul sat yibꞌanhqꞌinal tiꞌ,

kaw mach kaxhyohtajoj.

Wal hinan xin,

kaw ohtabꞌil hach wuhan,

kaw xin yohtapaxo ebꞌnaj ayko yul inqꞌabꞌtiꞌan tato hach anheintijan.

26 Kaw xakaxhinyelojan tet ebꞌnaj,

yuxin chaxhyohtanhelo ebꞌnaj,

yaj chito kam kaxhwaqꞌaꞌan yohtanhelo ebꞌnaj.

Yunhe hakaꞌ isxahanil ayinan hawu,

hak tuꞌ isxahanil aypaxo ebꞌnaj hawu,

haxinwal hun chiwupaxojan yebꞌ ebꞌnaj,

xhi Komam Jesús tet Komam Dios.