3 Wal ix María xin,

aymi hunu libra anh kaw xuqꞌ sam iqꞌbꞌil yu ix,

nabꞌa nardo kaw xin aykanh istohol.

Yaniko ix yinh yoj Komam,

lahwi tuꞌ xin issuni tajo ix yoj Komam yu xil iswiꞌ.

Hak tuꞌ xin,

kaw sunil yul nha tuꞌ pujnakanh sunil isxuqꞌal sam.

4 Wal naj Judas Iscariote,

iskꞌahol icham Simón,

naj ayko yetbꞌiho ebꞌnaj chikuywi yinta Komam,

naj chiꞌaniko Komam yul isqꞌabꞌ kamikal,

haꞌ naj halni hakaꞌ tiꞌ:

5 —Huneꞌ anh kaw xuqꞌkano sam tiꞌ,

kaw oxebꞌmi ciento denario istohol.

Estam matxonhlaxtoj,

kat ispohlaxto istohol yinh anma mebꞌaꞌ,

xhi naj.

6 Matolo yu chitzꞌay iskꞌul naj yinh anma mebꞌaꞌ yuxinto yal naj hakaꞌ tuꞌ,

machoj.

Wal xin to haꞌ naj iqꞌnhe istxꞌuyal chꞌen melyu,

kaw xin qꞌayna naj yelqꞌanilo chꞌen melyu chiskꞌubꞌa tuꞌ,

yuto kaw elqꞌom naj.

7 Yalni Komam Jesús tet naj:

—¡Mach chakach ix!

Wal xin kaw yanhebꞌil huneꞌ anh tiꞌ yu ix,

yunhe yaniko ix yinh innimanilan yet yalanhto maxhto chinmujlaxan.

8 Wal anma mebꞌaꞌ chawal tiꞌ,

kaw aynhetikꞌako texol,

yaj wal hinan xin,

mach tonhetikꞌa ayinikojan texol,

xhi Komam.

9 Kaw txꞌiꞌal anma Israel abꞌeniloj tato aykꞌo Komam Jesús bꞌey Betania;

isto anma yilno Komam,

yebꞌ chiyoche anma yilaꞌpaxo naj Lázaro itzitzbꞌikanh xol anma kamom yu Komam.

10-11 Yu naj Lázaro tuꞌ,

kaw niman anma Israel yayto yul yanma yinh Komam Jesús;

matxa xin chisje iskꞌul anma tuꞌ isyijeꞌ tzettaj chal ebꞌnaj sacerdote.

Yu huneꞌ tuꞌ,

yuxinto islahtiꞌnhe isbꞌa ebꞌnaj yahawil yehiko yinh ebꞌnaj sacerdote tato chaqꞌ kamo ebꞌnaj naj Lázaro.

12 Kaw hantanhe anma apni yinh qꞌinh Pascua bꞌey yul konhobꞌ Jerusalén.

Yet huneꞌxa tzꞌayik xin,

yabꞌen anma tato lanhan yapni Komam Jesús bꞌey yul konhobꞌ tuꞌ.

13 Yuxin yilo anma xaj teꞌ chꞌibꞌ,

yinito anma teꞌ yunhe isto anma ischahno Komam.

Chilael yaw anma yinh kaw ip,

chalni:

—¡Kaw niman yelapno Komam Dios!

¡Jalaꞌwe tzotiꞌ kaw kꞌul yinh Mak aqꞌbꞌilti koxol yu Komam Dios Jahawil.

Jaqꞌaꞌwe tzalaho kokꞌul yinh Jahawil,

hanhonh Israel honh tiꞌ!

xhi anma tuꞌ.

14 Ay xin huneꞌ noꞌ nichꞌan burro ilcha yu Komam.

Yahto Komam yibꞌanh noꞌ hakaꞌtikꞌa tzet tzꞌibꞌnhebꞌilkanoj yul yum Komam Dios:

16 Yet huneꞌ tzꞌayikal tuꞌ xin kaw maxhtikꞌa txumchalo yu ebꞌyaꞌ iskuywom Komam Jesús yinh tzet chalilo huneꞌ tuꞌ.

Hato yet istokano Komam yul satkanh,

hato tuꞌ xin isnahniti ebꞌyaꞌ tato tzꞌibꞌnhebꞌilkano huneꞌ tuꞌ yinh Komam,

yuxinto hak tuꞌ yuhi.

17 Wal anma aykꞌo iskꞌatanh Komam Jesús yet yawtenilti Komam naj Lázaro yul panteón,

yet yitzitzbꞌikanh naj yu Komam,

haꞌ anma tuꞌ halnikꞌo yinh tzet yuhi.

18 Kaw txꞌiꞌal anma to chawal yinh Komam,

yuto yabꞌe anma isqꞌumal yinh huneꞌ kꞌaybꞌalkꞌule iswatxꞌe Komam tuꞌ.

19 Wal ebꞌnaj fariseo xin,

yal ebꞌnaj tet hunun:

—Ilwekꞌanabꞌi lah,

kaw matzet wal juteni yuto kaw sunil anma tzujan yinta naj,

xhi ebꞌnaj yinh Komam.

20 Xol sunil anma apni yiqꞌayo isbꞌa tet Komam Dios yinh qꞌinh tuꞌ,

ayko hunteqꞌan ebꞌnaj griego.

21 Apni ebꞌnaj tiꞌ iskꞌatanh yaꞌ Felipe ay bꞌey konhobꞌ Betsaida ayko yul ismajul Galilea,

yalni ebꞌnaj tet yaꞌ:

—Mamin,

kaw chijochehanh chijilanh yinh Komam Jesús,

xhi ebꞌnaj.

22 Hak tuꞌ xin yu isto yaꞌ Felipe tuꞌ yalno tet yaꞌ Andrés,

iskawanhilxa xin ebꞌyaꞌ to halno tet Komam.

23 Yalni Komam tet ebꞌyaꞌ:

—Wal Hanin Aqꞌbꞌilintijan texol yu Komam Dios,

lanhan yapni yorahil isyelaxilo inhelanilan.

24 Kaw isyelal chiwalan teyet,

qꞌinalo tato mach chitzꞌunlax hunu hinhat trigo sat txꞌotxꞌ kat isqꞌato ixim,

machom chul iskꞌul ixim.

Yaj tato chiqꞌato ixim,

wal tuꞌ chihul iskꞌul ixim,

kaw xin niman sat ixim chaqꞌa.

25 Mak mach hinano yabꞌen isyaꞌtajil winhan,

chiskꞌayto isqꞌinal mach istanhbꞌal.

Wal mak hinan yanma yabꞌen isyaꞌtajil winhan,

kaw chischah isqꞌinal mach istanhbꞌal.

26 Tato ay mak chiyijen tzet chiwalan,

okojabꞌ tzujno wintajan.

Yuxinto haꞌ bꞌay ayinan,

haꞌ tuꞌ chiꞌehpaxo mak kaw yijem chute isbꞌa wettiꞌan;

haꞌ xin Inmaman chihalni iskꞌulal yinh,

xhi Komam.

27 Lahwi tuꞌ xin,

yalni Komam Jesús:

—Wal tinanh,

kaw bꞌiskꞌulal ye wanmahan,

yajaꞌ ¿tzet chiwute walnihan?

¿Tom chiwalan tet Komam Dios hakaꞌ tiꞌ?

“Mam,

kolinilojan yul isqꞌabꞌ huneꞌ isyaꞌtajil lanhan yul wibꞌanhtiꞌan,”

¿Tom kinchihan?

¡Machoj!

Yuton huneꞌ tiꞌ,

yuxinto hulnajinan yul sat yibꞌanhqꞌinal tiꞌ.

28 Mam,

yeloj tato kaw aykano yelapno hawehi,

xhi Komam.

Lahwi tuꞌ xin yabꞌelax huneꞌ yul nuqꞌe satkanh,

yalni hakaꞌ tiꞌ:

«Kaw xaꞌinyelojan tato kaw aykano yelapno wehan,

yaj chinyelojan hunelxa,»

xhihayti yul satkanh.

29 Sunil anma kutxaniko bꞌey tuꞌ,

abꞌen huneꞌ yul nuqꞌe tuꞌ,

yalni anma hakaꞌ tiꞌ:

—Kꞌuh manhirlahi,

xhi anma.

Aypaxo mak halni:

—Huneꞌ naj ángel matzotel tet naj,

xhipaxoj.

30 Yalni Komam Jesús:

—Mach wuhojan xin to mahal-laxayti hunteqꞌan tzotiꞌ tiꞌ,

machoj,

to heyu.

31 Wal tinanh xin,

yilchaxati anma ay yul sat yibꞌanhqꞌinal tiꞌ yu Komam Dios yinh tzet chilaiswatxꞌe,

kat yinilo Komam naj yahawil yehiko yul sat yibꞌanhqꞌinal tiꞌ.

32 Wal intiꞌan,

yet chinilaxkanhan sat txꞌotxꞌ tiꞌ yinh teꞌ kulus,

sunil anma chiwitijan inkꞌatanhan,

xhi Komam.

33 Yal Komam huneꞌ tuꞌ yu isyeniloj tzet kamikal chiꞌiqꞌni kamoj.

34 Istaqꞌwi anma tet Komam:

—Chal Istzotiꞌ Komam Dios yinh ley aykano jet,

tato yaꞌ Cristo chiꞌehokꞌo yaꞌ yinh sunilbꞌal tiempo.

¿Tzet yinh yuxinto chawal hakaꞌ tiꞌ?:

“Wal Hanin Aqꞌbꞌilintijan texol yu Komam Dios,

kaw yilal chinilaxkanhan,”

kachi.

¿Mak xin huneꞌ Aqꞌbꞌilti Koxolanh yu Komam Dios tuꞌ?

xhi anma tet Komam.

35 Yalni Komam tuꞌ xin:

—Yinhxanhe hanikꞌ tiempo ayinikꞌojan texol tiꞌ,

kaw chiwakanikojan issajilqꞌinal yinh heyanma,

yuxinto watxꞌeweko hebꞌa yinh kaw istoholal yaqꞌ isbꞌa ayintokꞌojan texol.

Ta machoj,

chisomchahokanh cheyila,

kat xin heyoko hakaꞌ anma chiꞌekꞌ xol qꞌejholo,

kaw mach chiyu yilni bꞌay kaw chitokoj.

36 »Wal hanintiꞌan,

kaw lahan hinan hakaꞌ issajilqꞌinal,

yuxinto chahwe hinan yul heyanma yaqꞌ isbꞌa ayintokꞌojan texol,

kat xin wanikojan issajilqꞌinal tiꞌ yul heyanma yinh kaw hunelnhe,

xhi Komam.

Lahwi yalni Komam tuꞌ xin,

isto Komam yebꞌanoto isbꞌa tet anma.

37 Kaw hantanhe kꞌaybꞌalkꞌule isye Komam Jesús tet anma tuꞌ,

yaj kaw maxhtikꞌa ischah anma Komam yul yanma.

38 Hak tuꞌ xin yu yijnikano isbꞌa yinh tzet tzꞌibꞌnhebꞌilkano yu yaꞌ Isaías,

ischejabꞌ Komam Dios yet payat,

bꞌay chala:

39 Kaw maxhtikꞌa ischayto anma Komam yul yanma.

Tzꞌibꞌnhebꞌilpaxkano yu yaꞌ Isaías hakaꞌ tiꞌ:

42 Waxanhka hak tuꞌ yute yalnikano yaꞌ Isaías,

yajaꞌ kaw hantanhe ebꞌnaj yahawil yinh ebꞌnaj Israel chahnikano Komam yul yanma,

txꞌiꞌalpaxo ebꞌnaj yahawil yinh ebꞌnaj Israel;

yaj to kaw mach chisyelo ebꞌnaj,

machi bꞌay chalpaxikꞌo ebꞌnaj yuto kaw chixiw ebꞌnaj tet ebꞌnaj fariseo.

Tato chiyabꞌekanh ebꞌnaj fariseo tuꞌ,

kaw matxa chichahlaxikto ebꞌnaj yul capilla.

43 Hak tuꞌ yute ebꞌnaj yunhe iskan ebꞌnaj kꞌulal yul sat anma,

sata iskanpaxo ebꞌnaj kꞌulal yul sat Komam Dios.

44 Yalni Komam Jesús yinh ip tet anma:

«Haꞌ mak chinchahnaytojan yul yanma,

maxhnhetajinan chinischahan,

to haꞌ hun Inmaman chischahpaxoj,

yuto haꞌ kinanitijan.

45 Yebꞌ mak chinilnihan,

kaw lanhan yilnipaxiko yinh Inmaman kinanitijan.

46 Wal intiꞌan,

hulnajinan waqꞌaꞌan sajilqꞌinal yul yanma anma ay yul sat yibꞌanhqꞌinal tiꞌ,

yuxin maknhetikꞌa chinchahnihan yul yanma mach chikan xol qꞌejholoj.

47 Yajaꞌ haꞌ mak chiꞌabꞌen tzet chiwaltiꞌan,

mach xin chisyijepaxoj,

maxhtaj hinan chinkawxekojan ismul yibꞌanh.

Wal hinan maxhtaj yu inkawxenikojan ismul anma yibꞌanh yuxinto hulnajinan yul sat yibꞌanhqꞌinal tiꞌ;

to yu inkolnihan anma yuxin kinhulan.

48 Makta chinyahnihan,

yebꞌ xin mach chisyije tzet chiwalan,

ay huneꞌ chikawxeniko ismul tuꞌ yibꞌanh,

haꞌ ton tzotiꞌ xawalan xol anma.

Haꞌ tzotiꞌ tuꞌ xin,

chikawxeniko ismul tuꞌ yibꞌanh yet islahobꞌal tzꞌayik.

49 Wal xin,

sunil tzet chiwalan,

kaw mach wetojan inchukilan,

haꞌ Inmaman anheintijan,

haꞌ chejnhe hinan yinh tzettaj chiwalan yebꞌ tzettaj chiwaqꞌan iskuyuꞌ anma.

50 Kaw xin wohtajan tato haꞌ ischejbꞌanil Inmamtuꞌan,

haꞌ chiꞌaqꞌni qꞌinale mach istanhbꞌal tet anma;

yuxin hakaꞌ yu yalni wetan,

hak tuꞌ chiwute walnikanojan teyet,»

xhi Komam tet anma.