Yet yokto Komam Jesús yul konhobꞌ Jerusalén
21
Hayet ayto yapni Komam Jesús yebꞌ ebꞌyaꞌ iskuywom bꞌey Jerusalén yapni Komam bꞌey Betfagé,
iskawilal wonhan Olivo.
Ischejnito Komam kawanh ebꞌyaꞌ iskuywom,
2 yalni Komam tet ebꞌyaꞌ:
«Asiꞌwe bꞌey aldea kosatakꞌto tiꞌ,
yet chexapno bꞌey tuꞌ cheyilaꞌ huneꞌ noꞌ miꞌe burro xekan,
ayko yunin noꞌ iskꞌatanh;
chepuholo noꞌ kat heyinoti noꞌ wetan.
3 Yajaꞌ ta ay tzet chihal-lax teyinh xin,
cheyalaꞌ hakaꞌ tiꞌ:
“Ay chiꞌokniko noꞌ yu Komam Jesús,
yajaꞌ chonhhulanh jaqꞌaꞌpaxojanh noꞌ,”
kexchi,»
xhi Komam.
4 Hak tuꞌ yu yijni isbꞌa tzet tzꞌibꞌnhebꞌilkano yu huneꞌ ischejabꞌ Komam Dios yet payat hakaꞌ tiꞌ:
5 «Halwe tet anma ay yul konhobꞌ Sióna hakaꞌ tiꞌ:
Ilwekꞌanabꞌi,
lanhan yul hereyal texol,
huneꞌ heyahaw tiꞌ kaw kꞌul iskꞌul,
ayahto yibꞌanh huneꞌ noꞌ tzeh burro,
yunin huneꞌ noꞌ miꞌe burro ijtzom,»b
xhihayoj.
6 Isto ebꞌyaꞌ kawanh tuꞌ,
isyijen ebꞌyaꞌ hakaꞌtikꞌa yu yalni Komam.
7 Yet yapni ebꞌyaꞌ bꞌey tuꞌ ispuhnilo ebꞌyaꞌ noꞌ miꞌe burro tuꞌ,
yiniti ebꞌyaꞌ noꞌ yebꞌ noꞌ yunin tet Komam.
Islitxꞌbꞌanahto ebꞌyaꞌ xil isqꞌap isqꞌanho yichinh noꞌ tzeh burro tuꞌ,
lahwi tuꞌ yahto Komam yibꞌanh noꞌ.
8 Kaw hantanhe anma ok tzujno yinta Komam,
ay mak islebꞌayo xil isqꞌap yul bꞌeh.
Aypaxo mak inilo xaj te teꞌc yanayo yul bꞌeh bꞌay chiꞌekꞌto Komam tuꞌ.
9 Sunil anma bꞌabꞌeliko sata Komam yebꞌ tzujaniko yintaj,
ichiko yahwi yinh kaw ip,
chalni hakaꞌ tiꞌ:
«¡Kaw niman yelapno yaꞌ tiꞌ,
haꞌ yaꞌ titna yinh yuninal rey David!
¡Jalaꞌwe tzotiꞌ kꞌul yinh mak chihul koxol yu Komam Dios!
¡Jaqꞌaꞌwe yuchꞌandiosal tet Komam Dios ay satkanh!»d
xhi anma.
10 Hayet yapni Komam bꞌey Jerusalén,
iswejchakanh anma sunil,
isqꞌambꞌeni:
—¿Mak anmahil huneꞌ naj tiꞌ?
xhi anma.
11 Istaqꞌwi hunteqꞌanxa ebꞌnaj:
—Haꞌ yaꞌ tiꞌ Jesús,
ischejabꞌ Komam Dios ay bꞌey Nazaret yul ismajul Galilea,
xhi ebꞌnaj.
Yet istzumbꞌenilti Komam Jesús ebꞌnaj chitxonhwi yul Yatut Komam Dios
12 Lahwi tuꞌ xin yokto Komam Jesús yul Yatut Komam Dios,
istzumbꞌenilti sunil anma chitxonhwi yebꞌ chiloqꞌwi bꞌey tuꞌ.
Iswakchankanh Komam ismexha ebꞌnaj helom melyu,
ispakꞌchanpaxokanh Komam isxhila ebꞌnaj txonhom palamuch.
13 Yalni Komam tet ebꞌnaj:
«Tzꞌibꞌnhebꞌilkano yul Yum Komam Dios hakaꞌ tiꞌ:
“Haꞌ watutan yet txah yehi,”
xhihayoj.
Yajaꞌ hex tiꞌ hakaꞌ hunu isnhachꞌen elqꞌom,
hak tuꞌ ye heyu,»
xhi Komam.
14 Hayet ayikto Komam yul Yatut Komam Dios tuꞌ yapni hunteqꞌan ebꞌnaj mach chu yilni yebꞌ ebꞌnaj txꞌoj ye yoj;
yaqꞌni kawxo Komam ebꞌnaj.
15 Hayet yilni ebꞌnaj iswiꞌehal sacerdote,
yebꞌ ebꞌnaj kuywawom yinh ley hunteqꞌan kꞌaybꞌalkꞌule iswatxꞌe Komam tuꞌ kaw tit ishowal ebꞌnaj;
yebꞌ yet yabꞌen yalni nixhte unin:
«Jaqꞌaꞌweko ismay iskꞌahol jichmam rey David,»
xhi.
16 Yalni ebꞌnaj tet Komam:
—¿Chimhawabꞌe tzet chal nixhte unin tiꞌ?
xhi ebꞌnaj.
Istaqꞌwi Komam:
—Hoꞌ chiwabꞌehan,
yajaꞌ ¿tom maxhto bꞌay cheyil yul Yum Komam Dios bꞌay chal hakaꞌ tiꞌ?:
“Haꞌ nixhte unin yebꞌ nixhte chitotxutxwi haꞌ chaqꞌan bꞌitnheno habꞌi,”e
xhihayoj,
xhi Komam.
17 Lahwi tuꞌ yel Komam yul konhobꞌ Jerusalén,
isto yul konhobꞌ Betania,
bꞌey tuꞌ xin kankano Komam huneꞌ aqꞌbꞌal.
Yet istzꞌaktiꞌnhen Komam Jesús huneꞌ teꞌ higuera machi sat
18 Haxa hunxa tzꞌayik yinh kaw sahabꞌ sakꞌayalil,
ismeltzo Komam Jesús yul konhobꞌ Jerusalén.
Yet ayko Komam yinh isbꞌel tuꞌ isnhohchakanh.
19 Yilnito Komam huneꞌ teꞌ higuera istiꞌ bꞌeh,
isto Komam yich teꞌ,
yilni Komam ta machi sat teꞌ,
xajnhe teꞌ aykoj.
Yalni Komam yinh teꞌ hakaꞌ tiꞌ:
—¡Matxa bꞌaqꞌinhal chaxhsatni!
xhi Komam.
Yinhnhena tuꞌ xin istajilo teꞌ.
20 Hayet yilni ebꞌyaꞌ iskuywom Komam huneꞌ tuꞌ,
kaw kꞌaykanh iskꞌul ebꞌyaꞌ,
isqꞌambꞌen ebꞌyaꞌ tet Komam:
—¿Tzet mayu istajnalo teꞌ yinh anhe?
xhi ebꞌyaꞌ.
21 Yalni Komam tet ebꞌyaꞌ:
—Yinh kaw yeli chiwalan teyet,
ta kaw cheyako heyanma yinh Komam Dios,
machi xin chikabꞌkon hekꞌul,
maxhnhetaj huneꞌ mayu yinh teꞌ higuera tiꞌ chisje hewatxꞌeni.
Wal xin tato cheyal tet huneꞌ witz tiꞌ:
“Hekꞌilo habꞌa bꞌey tiꞌ kat hato hawanoyto habꞌa xol haꞌ mar,”
ta kexchi,
chiyij isbꞌa tzet cheyala.
22 Yuxin ta yinh sunil heyanma chextxahli tet Komam Dios yet cheqꞌanni hunu tzet ye tuꞌ,
chiꞌaqꞌlax teyet,
xhi Komam.
Qꞌambꞌelax bꞌay chitit yip Komam Jesús
23 Lahwi tuꞌ xin,
yapni Komam Jesús yul konhobꞌ Jerusalén,
yokto Komam yul Yatut Komam Dios.
Hayet lanhan iskuywa Komam xin ishitziko ebꞌnaj iswiꞌehal sacerdote,
yebꞌ ebꞌnaj ichamta winaj iswiꞌehal yinh ebꞌnaj Israel,
isqꞌambꞌen ebꞌnaj tet Komam:
—¿Mak kaxhchejni hawatxꞌen hunteqꞌan hawatxꞌe yet ewi?
¿Mak aqꞌni hawip?
xhi ebꞌnaj.
24 Istaqꞌwi Komam:
—Hakintuꞌan ay huneꞌ inqꞌambꞌebꞌalan teyet,
ta chepajtze wetan chiwalan mak aqꞌnhe wipan inwatxꞌenan hunteqꞌan tuꞌ.
25 ¿Mak chejniti yaꞌ Juan yanokanh haꞌ iswiꞌ anma?
¿Tom Komam Dios mato haꞌ anma?
xhi Komam.
Yichiko ebꞌnaj yal-len tet hunun hakaꞌ tiꞌ:
—Tato chijalaꞌ ta Komam Dios chejniti yaꞌ Juan tuꞌ,
chimyalaꞌ naj jet:
“¿Tzet yinh xin mach heyayto yul heyanma yinh tzet yal yaꞌ?”
xhim naj.
26 “Yajaꞌ ta chijalpaxoj ta haꞌ anma chejnhe yaꞌ,
chonhxiw jalni yuto sunil anma chiꞌanayto yul yanma tato yaꞌ Juan tuꞌ ischejabꞌ Komam Dios ye yaꞌ,”
xhi ebꞌnaj.
27 Yuxin taqꞌwi ebꞌnaj tet Komam:
—Mach johtajojanh,
xhi ebꞌnaj.
Yalni Komam:
—Hakintuꞌan mach chiwalan mak aqꞌnhe wipan inwatxꞌenan hunteqꞌan tuꞌ,
xhi Komam.
Yechel yinh kawanh ebꞌnaj kꞌahole
28 Yalnipaxo Komam Jesús tet ebꞌnaj hunelxa:
—¿Tzet cheyute heyalni yinh huneꞌ chiwaltiꞌan?
Ay huneꞌ naj mame ay kawanh iskꞌahol;
yalni naj tet naj bꞌabꞌel hakaꞌ tiꞌ:
“Kꞌahol,
as munlahanh xol teꞌ uva,”
xhi naj.
29 Istaqꞌwi naj:
“¡Mach chintohan!”
xhi naj.
Yajaꞌ tzujanxa xin yok yinh isnabꞌal naj istohi.
30 Lahwi tuꞌ yalnipaxo naj mame tuꞌ tet naj iskabꞌ tato chitopaxo naj munil;
istaqꞌwi naj:
“Kꞌultikꞌa mam chintohan,”
xhi naj.
Yajaꞌ xin mach to naj.
31 ¿Mak xin najil yijen tzet yal ismam yinh ebꞌnaj kawanh tuꞌ?
xhi Komam.
Istaqꞌwi ebꞌnaj:
—Naj bꞌabꞌel,
xhi ebꞌnaj.
Yalni Komam:
—Yinh kaw yeli chiwalan teyet,
ebꞌnaj iqꞌomilo tohlabꞌal yebꞌ ebꞌix ix txꞌoj ye iswiꞌ haꞌ chiꞌok bꞌabꞌel yul isqꞌabꞌ Komam Dios tesataj.
32 Yuto hulikꞌo yaꞌ Juan Anikanh Haꞌ iswiꞌ Anma,
kexiskuyuꞌ yinh iskꞌulal,
yajaꞌ mach heyayto yul heyanma yinh tzet yal yaꞌ.
Wal ebꞌnaj iqꞌomilo tohlabꞌal yebꞌ ebꞌix txꞌoj ye iswiꞌ yayto yul yanma yinh tzet yal yaꞌ.
Wal hex tiꞌ xin,
waxanhka kaw heyil hunteqꞌan tuꞌ yajaꞌ mach hehel hebꞌeybꞌal,
yebꞌ xin mach heyayto yul heyanma,
xhi Komam Jesús.
Yechel yinh ebꞌnaj munlawom kaw txꞌoj
33 Yalnipaxo Komam Jesús tet ebꞌnaj:
—Abꞌewe huneꞌxa yechel chiwaltiꞌan:
Ay huneꞌ naj yahaw munil tzꞌunni teꞌ uva sat istxꞌotxꞌ,
ispenayo naj istzꞌunubꞌ tuꞌ.
Iswatxꞌen naj bꞌay chiyatzꞌlax yal teꞌ,
iswatxꞌenpaxokanh naj huneꞌ nha nimajal yukanh istel yunhe istanhelax huneꞌ peyabꞌ tuꞌ.
Lahwi tuꞌ xin,
yanito naj istzꞌunubꞌ tuꞌ komonal tet hunteqꞌan ebꞌnaj.
Isto naj yul huneꞌxa konhobꞌ kaw nahat.
34 Haxa yet yapni istiempohal yuxlax teꞌ uva tuꞌ xin,
yanito naj hunteqꞌan ischejabꞌ ischahno ismajul tet ebꞌnaj munlawom tuꞌ.
35 Hayet yapni ebꞌnaj chejabꞌ tuꞌ xin,
yok ebꞌnaj istzabꞌnoyo ebꞌnaj,
ismaqꞌni ebꞌnaj huneꞌ naj,
hunxa naj maqꞌbꞌil ispotxꞌni ebꞌnaj,
haxa hunxa naj xin qꞌojlaxkanh naj.
36 Haxa yinh iskayel ekꞌbꞌalxa ebꞌnaj chejabꞌ yato naj yahaw munil,
yajaꞌ xin haktikꞌapax tuꞌ utelax ebꞌnaj yu ebꞌnaj munlawom tuꞌ.
37 »Yinhxa istzujanil xin,
haꞌ kaw iskꞌahol naj yahaw munil tuꞌ yatoj,
istxumni naj hakaꞌ tiꞌ:
“Wal tet naj inkꞌaholtiꞌan chimisyije ebꞌnaj,”
xhi naj.
38 Yajaꞌ hayet yilni ebꞌnaj yapni naj kꞌahole tuꞌ,
yalni ebꞌnaj tet hunun:
“Haꞌ tet naj tiꞌ chikankano huneꞌ txꞌo txꞌotxꞌ tiꞌ,
wal tinanh kopotxꞌoꞌwe kamo naj haxinwal jetxa chuko huneꞌ istxꞌotxꞌ naj tiꞌ,”
xhi ebꞌnaj.
39 Yok ebꞌnaj istzabꞌnoyo naj,
yilaxilto naj yintalto peyabꞌ tuꞌ yu ebꞌnaj,
ispotxꞌni ebꞌnaj naj,
xhi Komam.
40 Isqꞌambꞌen Komam tet ebꞌnaj:
—Yet chihul naj yahaw munil tuꞌ,
¿tzettaxka chute naj ebꞌnaj munlawom tuꞌ cheyute heyalni?
xhi Komam.
41 Istaqꞌwi ebꞌnaj:
—Matxa chitzꞌay iskꞌul naj ispotxꞌni ebꞌnaj munlawom txꞌoj tuꞌ,
kat yanito naj istzꞌunubꞌ tuꞌ komonal tet hunteqꞌanxa ebꞌnaj munlawom tzꞌajan chu yaqꞌni ismajul yet chiꞌuxlax sat teꞌ uva tuꞌ,
xhi ebꞌnaj.
42 Yalni Komam Jesús:
—¿Tom maxhto cheyil yul Yum Komam Dios bꞌay chal hakaꞌ tiꞌ?:
Haꞌ huneꞌ chꞌen chꞌen mach isje ebꞌnaj watxꞌemkanh nha
yaqꞌaꞌko yinh ismunil,
haꞌ chꞌen kaw ekꞌbꞌalto kꞌul yok xeꞌo nha.
Haꞌ Komam watxꞌenhe huneꞌ tuꞌ,
kaw xin chikꞌay kokꞌul jilni,f
xhihayoj.
43 Yuxin chiwalan teyet ta nanxa konhobꞌal chiꞌok yul isqꞌabꞌ Komam Dios heseleloj,
yuto yijem anma tuꞌ yaqꞌni ismajul yinh tzet chiswatxꞌe tet Komam.
44 Wal huneꞌ chꞌen chꞌen tuꞌ,
ta ay mak chiꞌaykꞌay yibꞌanh chꞌen hayebꞌtam isqꞌahilal chiꞌoki.
Yajaꞌ ta haꞌ chꞌen chiꞌaykꞌay yibꞌanh,
chikechꞌmoto yalanh chꞌen,
xhi Komam.