Yechel yinh hunteqꞌan ebꞌnaj munlawom
20
Yalnipaxo Komam Jesús tet ebꞌyaꞌ iskuywom:
—Anma chiꞌok yul isqꞌabꞌ Komam Dios lahan hakaꞌ hunu naj yahaw munil to yinh kaw sahabꞌ sakꞌayal issayaꞌ iskꞌamteꞌ chimunla xol teꞌ uva.
2 Hayet yilcha hunteqꞌan ebꞌnaj yu naj,
yalni naj tato huneꞌ denario chaqꞌ naj yinh tzꞌayik tet hunun ebꞌnaj,
lahwi tuꞌ isto ebꞌnaj munlaho xol yuva naj.
3 Yinhmi chꞌen bꞌalonhebꞌ yinh yet yalanh chuman isto naj yul txonhbꞌal,
yilni naj hunteqꞌanxa ebꞌnaj mach ismunil.
4 Yalni naj tet ebꞌnaj:
“Ay munil inkꞌatanhan,
chexintohlahan hakaꞌtikꞌa kaw yehi,”
xhi naj.
Istopaxo ebꞌnaj munil xol yuva naj.
5 Naj yahaw munil tuꞌ elpaxto naj yinh chumanil,
yebꞌ yinh chꞌen oxebꞌ,
haktikꞌapax tuꞌ yute yalni naj tet hunteqꞌanxa ebꞌnaj ilcha yu.
6 Yinhxa chꞌen howebꞌ xin,
istopaxo naj txonhbꞌal hunelxa,
yilni naj hunteqꞌan ebꞌnaj chiꞌekꞌ bꞌey tuꞌ mach ismunil.
Isqꞌambꞌen naj tet ebꞌnaj:
“¿Tzet yinh xin tonhe chiꞌekꞌ tzꞌayik teyibꞌanh bꞌey tiꞌ?”
xhi naj.
7 Istaqꞌwi ebꞌnaj:
“Mamin,
to machi mak chiꞌaqꞌni yet komunilanh,”
xhi ebꞌnaj.
Yalni naj tet ebꞌnaj:
“Ta chisje hekꞌul asiꞌwe munil wintajan,
chexintohlahan hakaꞌ kaw yehi,”
xhi naj.
Isto ebꞌnaj munil yinta naj.
8 »Haxa yinh qꞌejbꞌiyal xin,
yalni naj yahaw munil tuꞌ tet naj chiꞌilni ismunil hakaꞌ tiꞌ:
“Awte sunil ebꞌnaj munlawom kat hatohlan ebꞌnaj.
Ebꞌnaj maꞌok munil yinh islahobꞌal,
haꞌ ebꞌnaj chatohla bꞌabꞌel.
Wal ebꞌnaj kaw sahabꞌ maꞌichiko ismunla xin,
islahobꞌal chatohla ebꞌnaj,”
xhi naj yahaw munil tuꞌ.
9 Lahwi tuꞌ xin yawtelax ebꞌnaj ok munil yinh chꞌen howebꞌ,
haꞌ ebꞌnaj bꞌabꞌel tohlalaxi,
huneꞌ denarioa aqꞌlax tet hunun ebꞌnaj.
10 Haxa yet yawtelax ebꞌnaj ichiko munil yinh kaw sahabꞌ sakꞌayal,
ham yalni ebꞌnaj tato ekꞌbꞌal istohol ebꞌnaj chiꞌaqꞌlaxi,
yajaꞌ machoj,
huneꞌnhe denario aqꞌlaxpaxo tet hunun ebꞌnaj.
11 Hayet ischahni ebꞌnaj istohol tuꞌ yichiko ebꞌnaj isbꞌuchwa yinh naj yahaw munil tuꞌ,
12 yalni ebꞌnaj:
“Ebꞌnaj mahul yet islahobꞌalxa tiꞌ hunxanhe hora mamunla ebꞌnaj,
¿tzet yinh xin lahan kotoholanh maxawaqꞌ yebꞌ ebꞌnaj?
Hanhonhtiꞌanh ekꞌbꞌal makonhmunlahanh,
yebꞌ xin kaw majaqꞌ janmahanh xol qꞌaꞌ,”
xhi ebꞌnaj.
13 Istaqꞌwi naj yahaw munil tuꞌ tet huneꞌ naj hakaꞌ tiꞌ:
“Hach wet anmahil,
mach chinetlihan tawinh yuto majala tato huneꞌ denario chintohlahan hatzꞌayik.
14 Wal xin mawaqꞌan hatohol,
paxanhtoj.
Ta chiwochehan ta lahan chiqꞌ ebꞌnaj lanhoxa maꞌok munil yebꞌ hex,
mach hawok yinh huneꞌ tuꞌ.
15 Hanintiꞌan chu waqꞌnihan inmelyuhan tet mak bꞌay chiwochehan,
¿mato chichiwa hakꞌul yu kꞌul inkꞌulan?”
xhi naj yahaw munil tuꞌ.
16 »Yuxin haꞌ mak bꞌabꞌel tinanh,
haꞌ chikankano yinh islahobꞌal,
wal mak islahobꞌal ye tinanh,
haꞌ chiꞌok yinh bꞌabꞌel.
Hantanhe mak awtebꞌil yu Komam Dios,
yajaꞌ haywanhnhe mak sikꞌbꞌililoj,
xhi Komam.
Yal Komam Jesús iskamikal yinh yoxel
17 Yet ayxako Komam Jesús yebꞌ anma yinh isbꞌel bꞌey Jerusalén,
yawtenilo Komam ebꞌyaꞌ 12 (kabꞌlahonhwanh) iskuywom,
yalni Komam tet ebꞌyaꞌ:
18 «Tinanh xin lanhan kotoh bꞌey Jerusalén,
yajaꞌ Hanin Aqꞌbꞌilintijan texol yu Komam Dios,
chinalaxikojan yul isqꞌabꞌ ebꞌnaj yahawil sacerdote yebꞌ ebꞌnaj kuywawom yinh isley yaꞌ Moisés kat isqꞌanni ebꞌnaj kamikal wibꞌanhan.
19 Chilahwi tuꞌ kat kinyanikojan ebꞌnaj yul isqꞌabꞌ ebꞌnaj mach Israeloj,
kat isbꞌuchwa ebꞌnaj winhan,
kat kinismaqꞌnihan ebꞌnaj.
Chilahwi tuꞌ kat kinyanikanhan ebꞌnaj yinh teꞌ kulus,
yajaꞌ yinh yox tzꞌayik kat witzitzbꞌikanhan hunelxa,»
xhi Komam.
Yinh tzet isqꞌan ismiꞌ yaꞌ Jacobo yebꞌ yaꞌ Juan
20 Yet huneꞌ tiempohal tuꞌ apni ismiꞌ ebꞌyaꞌ iskꞌahol icham Zebedeo ilwal yinh Komam Jesús.
Tzujan xin ebꞌyaꞌ kawanh tuꞌ yinta ismiꞌ,
yay jahno ixnam sata Komam yuto ay huneꞌ tzet choche ixnam isqꞌanaꞌ.
21 Isqꞌambꞌen Komam tet ixnam:
—Miyay,
¿tzet chawoche haqꞌanaꞌ wetan?
xhi Komam.
Istaqꞌwi ixnam:
—Mamin,
yet chaxhok Yahawoj chinqꞌanan tawet tato kawanh wunintiꞌan chiꞌok takꞌatanh.
Hunu naj chiꞌok tzꞌonhno yinh hawatxꞌqꞌabꞌ,
hunuxa naj chiꞌok tzꞌonhno yinh hamekqꞌabꞌ,
xhi ixnam.
22 Istaqꞌwi Komam:
—Hex tiꞌ mach heyohtajo tzet cheqꞌana.
¿Chimyu heyukꞌni huneꞌ vaso ha haꞌ kaw kꞌahb hakaꞌ huneꞌ chiwukꞌuꞌan?
xhi Komam.
Istaqꞌwi ebꞌyaꞌ:
—Hoꞌ,
chu jukꞌnihanh,
xhi ebꞌyaꞌ.
23 Yalni Komam tet ebꞌyaꞌ xin:
—Yeltoni chu heyukꞌni huneꞌ vaso ha haꞌ kaw kꞌah chiwaltiꞌan,
yajaꞌ wal hanintiꞌan mach wetojan walnihan mak chiꞌay tzꞌonhno yinh inwatxꞌqꞌabꞌan yebꞌ yinh inmekqꞌabꞌan,
to hanhe Inmaman ohtanhe mak tet chaqꞌa,
xhi Komam.
24 Hayet yabꞌen ebꞌyaꞌ 10 (lahonhwanhxa) iskuywom Komam,
kaw tit ishowal ebꞌyaꞌ yinh ebꞌyaꞌ kawanh tuꞌ.
25 Yet yilni Komam huneꞌ tuꞌ,
yawteniko Komam ebꞌyaꞌ iskꞌatanh,
yalni Komam:
—Hex tiꞌ kaw heyohtaj tato ebꞌnaj ayko yahawo konhobꞌ,
ay yip ebꞌnaj yibꞌanh konhobꞌ tuꞌ.
Haxa ebꞌnaj nime winaj yul konhobꞌ yahawxa chute isbꞌa ebꞌnaj yinh anma.
26 Wal texol xin mach hako tuꞌ cheyute,
ta ay hunu mak ekꞌbꞌal yelapno ye chabꞌe,
haꞌojabꞌ chiꞌok chejabꞌoj.
27 Haxa mak choche haꞌ bꞌabꞌel teyinh xin,
yaqꞌabꞌiko isbꞌa chejabꞌoj.
28 Hak tuꞌ wehan Hanin Aqꞌbꞌilintijan texol yu Komam Dios,
mach hulnajojinan yu inchejnihan anma,
wal xin to hakaꞌ chejabꞌ wekojan xol anma,
kat waniko inbꞌahan yul isqꞌabꞌ kamikal,
hak tuꞌ xin chu intohlanan ismul txꞌiꞌal anma,
xhi Komam.
Yaqꞌ hajlo Komam Jesús isbꞌaqꞌ sat kawanh ebꞌnaj mach chu yilni
29 Hayet yel Komam Jesús yebꞌ ebꞌyaꞌ iskuywom yul konhobꞌ Jericó,
kaw hantanhe anma ok tzujno yinta Komam.
30 Ay xin kawanh ebꞌnaj mach chu yilni,
tzꞌonhanayo istiꞌ bꞌeh.
Hayet yabꞌen ebꞌnaj tato haꞌ Komam Jesús lanhan yekꞌtoj,
yahwi ebꞌnaj tet Komam yinh kaw ip hakaꞌ tiꞌ:
—¡Mamin,
hach titnaj hach yinh yuninal yaꞌ rey David,
kaw tzꞌayojabꞌ hakꞌul jinhanh!
xhi ebꞌnaj.
31 Yajaꞌ xin ok anma iskachaꞌ ebꞌnaj yunhe isbꞌejni ebꞌnaj yel yaw,
yaj kaw islahiko ebꞌnaj yahwi,
yalnipaxo ebꞌnaj:
—¡Mamin,
hach titnaj hach yinh yuninal yaꞌ rey David,
kaw tzꞌayojabꞌ hakꞌul jinhanh!
xhi ebꞌnaj.
32 Yet yabꞌen Komam Jesús huneꞌ tuꞌ yok linhnoj,
yawtenti Komam ebꞌnaj iskꞌatanh,
isqꞌambꞌen Komam tet ebꞌnaj:
—¿Tzet cheyoche chinwatxꞌehan?
xhi Komam.
33 Istaqꞌwi ebꞌnaj:
—Mamin,
chijochehanh chawaqꞌ hajlo kosatanh,
xhi ebꞌnaj.
34 Istzꞌaykanh iskꞌul Komam yinh ebꞌnaj;
yaniko Komam isqꞌabꞌ yinh isbꞌaqꞌ sat ebꞌnaj,
yinhnhena tuꞌ xin ishajlo issat ebꞌnaj,
yok tzujno ebꞌnaj yinta Komam.