2 Ay xin hunteqꞌan ebꞌnaj fariseo apni ilweno Komam,

isqꞌambꞌen ebꞌnaj tet Komam:

—¿Chimyu ispohni isbꞌa hunu naj winaj yebꞌ yixal?

xhi ebꞌnaj.

3 Istaqꞌwi Komam:

—¿Tzet halbꞌilkano teyet yu yaꞌ Moisés yinh huneꞌ tuꞌ?

xhi Komam.

4 Istaqꞌwi ebꞌnaj:

—Halbꞌilkano yu yaꞌ ta chisje ispohni isbꞌa hunu naj yebꞌ yixal,

yajaꞌ yilal yaqꞌnikano naj hunu hum yet pohlebꞌahil tet ix,

xhi ebꞌnaj.

5 Yalni Komam tet ebꞌnaj:

—Yu kaw mach cheyabꞌe yuxin aqꞌbꞌilkano huneꞌ chejbꞌanil tuꞌ yu yaꞌ Moisés.

6 Yajaꞌ yet iswatxꞌenkano Komam Dios yul sat yibꞌanhqꞌinal tiꞌ,

iswatxꞌe Komam naj winaj yebꞌ ix ix.

7 Yalnikano Komam Dios ta chákano naj winaj ismam yebꞌ ismiꞌ kat ishunbꞌan isbꞌa naj yebꞌ yixal,

8 hunxanhe xin anmahil chukanoj.

Hak tuꞌ xin matxa kawanho yehi,

to hunxanhe anmahil.

9 Yuxin haꞌ mak hunbꞌabꞌil yu Komam Dios,

mach chu ispohni anma,

xhi Komam Jesús.

10 Haxa yet ayxa Komam yebꞌ ebꞌyaꞌ iskuywom yul nha bꞌaytikꞌa chikani,

yok ebꞌyaꞌ isqꞌambꞌeno tet Komam yinh tzet chalilo huneꞌ tuꞌ.

11 Yalni Komam tet ebꞌyaꞌ:

—Ta chispoh isbꞌa hunu naj yebꞌ yixal kat yiqꞌni naj hunuxa ix,

chako naj ismul tet yixal hakaꞌ tuꞌ.

12 Yajaꞌ ta xin ix ix chispoh isbꞌa yebꞌ yichamil,

kat yiqꞌni ix hunuxa naj,

chapaxiko ix ismul,

xhi Komam Jesús.

13 Ay xin hunteqꞌan nixhte unin ilaxti tet Komam Jesús yu yanayo Komam isqꞌabꞌ yibꞌanh,

yajaꞌ kachwa ebꞌyaꞌ iskuywom Komam yinh anma initi nixhte yunin tuꞌ.

14 Hayet yilni Komam huneꞌ tuꞌ ishowbꞌikanh Komam yinh ebꞌyaꞌ,

yalni Komam:

—Mach chekach istit nixhte unin tiꞌ inkꞌatanhan,

tijabꞌi yuto haꞌ mak chako yanma yinh Komam Dios hakaꞌ yeko yanma nixhte unin yinh ismam ismiꞌ,

haꞌ chiꞌok yul isqꞌabꞌ Komam Dios.

15 Chiwalan yinh isyelal teyet;

haꞌ mak mach chichahni Komam Dios Yahawiloj hakaꞌ ischahni nichꞌan unin hunu tzet ye tuꞌ,

mach chu yok yul isqꞌabꞌ Komam Dios,^a

xhi Komam.

16 Yok Komam ischelno nixhte unin tuꞌ,

yanayo Komam isqꞌabꞌ yibꞌanh,

isqꞌannikano Komam iskꞌulal Komam Dios yibꞌanh.

17 Haxa yet lanhan isto Komam Jesús yinh isbꞌel xin,

yapni huneꞌ naj yinh anhe iskꞌatanh Komam,

yay jahno naj sata Komam,

isqꞌambꞌen naj:

—Mam Kuywawom,

hach tiꞌ kaw kꞌulach,

¿tzet wal wuten hinbꞌahan yunhe inchahnihan qꞌinale mach istanhbꞌal?

xhi naj.

18 Yalni Komam tet naj:

—¿Tzet yinh xin chinhawalan kꞌulal?

Huneꞌnhe mak kꞌul,

haꞌ ton Komam Dios.

19 Hawohtami hunteqꞌan chejbꞌanile chalni hakaꞌ tiꞌ:

“Mach chaxhpotxꞌwahi,

mach chaxhixli,

mach chaxhelqꞌawi,

mach chahobꞌkanh tzotiꞌ yinh hawet anmahil,

mach chawako leqꞌtiꞌal,

yebꞌ xin ayojabꞌ yelapno hamam,

hamiꞌ yul hasat,

¿hawohtami hunteqꞌan tiꞌ?”

xhi Komam tet naj.

20 Istaqꞌwi naj tet Komam:

—Mam kuywawom,

sunil hunteqꞌan tiꞌ chinyijehan yichitax inchꞌibꞌtijan,

xhi naj.

21 Istꞌanhxiko Komam yinh naj yinh tzalahilal,

yalni Komam:

—Hunxanhe tzet maxhto chayije;

as txonhto sunil tzet ayach kat hawitxqꞌanto istohol yinh anma mebꞌaꞌ,

haxinwal ay haqꞌalomal satkanh,

lahwi tuꞌ xin kat hawok tzujno wintajan,

xhi Komam tet naj.

22 Hayet yabꞌen naj huneꞌ tuꞌ kaw yaꞌ yuko yinh yanma naj yu bꞌiskꞌulal yuto kaw qꞌalomkano naj sikꞌlebꞌil,

ispaxto naj.

23 Yekꞌ tꞌanhtꞌon Komam yinh ebꞌyaꞌ iskuywom,

yalni Komam:

—Tzet isyaꞌtajil yok anma qꞌalom yul isqꞌabꞌ Komam Dios,

xhi Komam.

24 Kaw kꞌaykanh iskꞌul ebꞌyaꞌ iskuywom Komam yabꞌen huneꞌ tuꞌ,

yuxinto yalpaxo Komam tet ebꞌyaꞌ:

—Hex xahan ay wuhtiꞌan,

haꞌ anma chako yanma yinh qꞌalomal kaw yaꞌta yok yul isqꞌabꞌ Komam Dios.

25 Qꞌinalo hunu noꞌ camello tinanh,

¿tom subꞌuta yekꞌto noꞌ yul isholanil hunu chꞌen akuxha?

Hak tuꞌ ye anma qꞌalom,

kaw yaꞌta yok yul isqꞌabꞌ Komam Dios,

xhi Komam.

26 Hayet yabꞌen ebꞌyaꞌ huneꞌ tuꞌ,

kaw ekꞌbꞌalto kꞌayilo iskꞌul ebꞌyaꞌ,

yalni ebꞌyaꞌ tet hunun:

—Ta hak tuꞌ,

¿maktaxka chu iskolchahi?

xhi ebꞌyaꞌ.

27 Istꞌanhxiko Komam yinh ebꞌyaꞌ,

yalni Komam:

—Yul sat anma kaw yaꞌta huneꞌ tuꞌ,

wal yul sat Komam Dios mach yaꞌtajoj,

yuto machi hunu tzet ye tuꞌ mach chu iswatxꞌen Komam,

xhi Komam.

28 Yalni yaꞌ Pedro tet Komam:

—Mamin,

sunil tzet ayonhanh bꞌejbꞌilkano juhanh yu jokkano tzujnojanh tawintaj,

xhi yaꞌ.

29 Istaqꞌwi Komam:

—Yinh kaw isyelal chiwalan teyet;

maknhetikꞌa chisbꞌejkano yatut,

yuxhtaj,

ismam,

ismiꞌ,

yuninal maka istxꞌotxꞌ yu yok tzujno wintajan yebꞌ yu Tzotiꞌ Kꞌul yet Kolbꞌanile,

30 huneꞌ mak tuꞌ chiꞌaqꞌlax ispaj selel tet yul sat yibꞌanhqꞌinal tiꞌ;

100 (hokꞌal) elto chiꞌaqꞌlax ispaj selel yatut,

yuxhtaj,

yanabꞌ,

ismiꞌ yebꞌ istxꞌotxꞌ,

waxanhka xin chiꞌaqꞌlax ekꞌoyaꞌ yanma.

Haxa yinh huneꞌ tiempohal maxhto chihuli chischah isqꞌinal mach istanhbꞌal.

31 »Yuxin haꞌ mak kaw ay yelapno ye tinanh,

matxa yelapno chiꞌelikoj,

wal mak machi yelapno xin,

haꞌ kaw ekꞌbꞌal yelapno chiꞌelkanikoj,

xhi Komam tet ebꞌyaꞌ iskuywom.

32 Hayet ayko Komam Jesús yinh isbꞌel bꞌey Jerusalén,

bꞌabꞌeliko Komam sata ebꞌyaꞌ iskuywom,

kaw xin chikꞌay iskꞌul ebꞌyaꞌ,

wal anma tzujanpaxiko xin kaw chixiwi.

Yawtenilo Komam ebꞌyaꞌ 12 (kabꞌlahonhwanh) iskuywom ischukil,

yok Komam yalno tet ebꞌyaꞌ yinh tzet chihul yibꞌanh.

33 Yalni Komam:

—Tinanh,

lanhan kotoh bꞌey Jerusalén,

Hanin Aqꞌbꞌilintijan texol yu Komam Dios tiꞌ,

chinalaxikojan yul isqꞌabꞌ ebꞌnaj iswiꞌehal yinh ebꞌnaj sacerdote yebꞌ ebꞌnaj kuywawom yinh isley yaꞌ Moisés,

chiskawxeko ebꞌnaj kamikal wibꞌanhan kat kinyanikojan ebꞌnaj yul isqꞌabꞌ ebꞌnaj mach Israeloj.

34 Haxa ebꞌnaj tuꞌ xin chiꞌok tzebꞌo winhan,

kat istzubꞌliko winhan,

kat xin kinismaqꞌnihan ebꞌnaj.

Lahwi tuꞌ kat kinyaqꞌnikamojan ebꞌnaj,

yajaꞌ yinh yox tzꞌayik xin kat witzitzbꞌikanhan hunelxa,

xhi Komam tet ebꞌyaꞌ iskuywom tuꞌ.

35 Hitziko yaꞌ Juan yebꞌ yaꞌ Jacobo iskꞌatanh Komam Jesús,

ebꞌyaꞌ iskꞌahol icham Zebedeo,

yalni ebꞌyaꞌ tet Komam:

—Mam kuywawom,

ay huneꞌ tzet chikoqꞌananh tawet,

yajaꞌ chijochehanh chawaqꞌ jetanh,

xhi ebꞌyaꞌ.

36 Isqꞌambꞌen Komam:

—¿Tzet xin cheyoche?

xhi Komam.

37 Yalni ebꞌyaꞌ:

—Estam chaje chonhok tzꞌonhnojanh takꞌatanh yet chaxhok Yahawil,

hunujonhanh yinh hawatxꞌqꞌabꞌ,

hunuxahonhpaxojanh yinh hamekqꞌabꞌ,

xhi ebꞌyaꞌ.

38 Istaqꞌwi Komam:

—Hex tiꞌ,

mach heyohtajo tzet cheqꞌana.

¿Chimyu heyukꞌni huneꞌ vaso kꞌahla haꞌ,

hakaꞌ chiꞌaqꞌlax wukꞌuꞌan?

yebꞌ ¿tom chitecha huneꞌ niman isyaꞌtajil heyu hakaꞌ huneꞌ bꞌay chinekꞌojan,

hakaꞌ yahbꞌal haꞌ kowiꞌ?

xhi Komam.

39 Istaqꞌwi ebꞌyaꞌ kawanh tuꞌ:

—Hoꞌ,

chitecha juhanh,

xhi ebꞌyaꞌ.

Yalni Komam:

—Yeltoni chu heyukꞌni huneꞌ kꞌahla haꞌ chiwal tuꞌan,

yebꞌ chitecha isyaꞌtajil heyu hakaꞌ huneꞌ chihul wibꞌanhan,

hakaꞌ yahbꞌalo haꞌ kowiꞌ.

40 Yajaꞌ wal heyok tzꞌonhno yinh inwatxꞌqꞌabꞌan yebꞌ yinh inmekqꞌabꞌan,

mach chu walnihan teyet,

wal xin watxꞌebꞌil tet mak yetxatikꞌa yehi,

xhi Komam tet ebꞌyaꞌ.

41 Hayet yabꞌen ebꞌyaꞌ 10 (lahonhwanhxa) huneꞌ tuꞌ,

istit ishowal ebꞌyaꞌ yinh yaꞌ Juan yebꞌ yaꞌ Jacobo.

42 Yawtenti Komam ebꞌyaꞌ sunil,

yalni Komam:

—Kaw heyohta hex tiꞌ tato ebꞌnaj ayko yahawilo yinh txꞌotxꞌ nime konhobꞌ,

kaw yahawilxa chute isbꞌa ebꞌnaj.

Hakpax tuꞌ ebꞌnaj kaw aykano yelapno yulaj konhobꞌ,

kaw ay yip ebꞌnaj yibꞌanh ej anma.

43 Yajaꞌ wal texol hex tiꞌ,

mach hako tuꞌ cheyute,

wal xin tato ay hunujex cheyoche ay yelapno cheyuko xol ebꞌnaj heyetbꞌi,

aweko hebꞌa chejabꞌoj.

44 Yebꞌ xin ta ay hunu mak choche chiꞌok iswiꞌehalo texol,

yaqꞌabꞌiko isbꞌa hechejabꞌoj.

45 Yuto Hanin Aqꞌbꞌilintijan texol yu Komam Dios,

mach hulnajojinan yu inchejnihan anma,

wal xin to yu wokan hakaꞌ chejabꞌ xol anma yebꞌ yu waqꞌni hinbꞌahan yinh kamikal yu iskolcha txꞌiꞌal anma,

xhi Komam tet ebꞌyaꞌ iskuywom tuꞌ.

46 Lahwi tuꞌ yapni Komam Jesús yul konhobꞌ Jericó yebꞌ ebꞌyaꞌ iskuywom.

Hayet yel Komam yebꞌ ebꞌyaꞌ bꞌey tuꞌ xin,

kaw hantanhe anma ok tzujno yinta Komam.

Ay xin huneꞌ naj mach chu yilni,

tzꞌonhanayo istiꞌ bꞌeh qꞌano melyu;

Bartimeo isbꞌi naj,

iskꞌahol naj Timeo ye naj.

47 Hayet yabꞌen naj tato haꞌ Komam Jesús ah Nazaret chiꞌekꞌtoj,

yichiko naj yahwi yinh kaw ip,

chalni naj:

—Mam Jesús,

hach titnaj hach yinh yuninal yaꞌ rey David,

kaw tzꞌayojabꞌ hakꞌul winhan,

xhi naj.

48 Kaw xin txꞌiꞌal mak kachwa yinh naj yunhe isbꞌejni naj yel yaw,

yajaꞌ xin kaw ekꞌbꞌalto ah yaw naj,

yalnipaxo naj:

—Mamin,

hach titnaj hach yinh yuninal yaꞌ rey David,

kaw tzꞌayojabꞌ nino hakꞌul winhan,

xhi naj.

49 Yok linhno Komam,

yalni hakaꞌ tiꞌ:

—Awteweti naj,

xhi Komam.

Yawtelaxti naj,

yal-lax tet naj hakaꞌ tiꞌ:

—Ako yip hawanma,

ahanhlinhnoj chaxhyawte Komam,

xhi anma tet naj.

50 Hayet yabꞌen naj hakaꞌ tuꞌ,

yah linhno naj yinh anhe,

isbꞌejnikano naj huneꞌ xil isqꞌap hukaniko yinh,

istit naj iskꞌatanh Komam.

51 Isqꞌambꞌen Komam tet naj:

—¿Tzet chawoche chinwatxꞌehan tawinh?

xhi Komam.

Istaqꞌwi naj:

—Mam kuywawom,

chiwochehan chawaqꞌ hajlo insatan,

xhi naj.

52 Yalni Komam tet naj:

—Hajlojabꞌ hasat yuto maxawako hawanma winhan,

xaꞌisje hapaxtoj,

xhi Komam tet naj.

Yinhnhena tuꞌ xin ishajlo issat naj,

yok tzujno naj yinta Komam.