9
Yalnipaxo Komam Jesús:
—Yinh kaw yeli chiwalan teyet,
ay haywanh mak texol hex tiꞌ,
maxhto chikami masanto chil yok Komam Dios Yahawiloj,
yebꞌ sunil yip,
xhi Komam.
Marcos 9:1-32
Ishel isbꞌa yil-lax yinh Komam Jesús
2 Wajebꞌxa tzꞌayik xin,
isto Komam Jesús yinh iswiꞌ huneꞌ witz nahat yekanh,
hanhe xin yaꞌ Pedro,
yaꞌ Jacobo yebꞌ yaꞌ Juan yito Komam yintaj;
haꞌ bꞌey tuꞌ xin ishel isbꞌa yil-lax Komam.
3 Kawxanhe chitzejla xil isqꞌap Komam,
kaw sajhoponhe elikoj.
Machi hunu ix txꞌahwom chisajnhen hunu xilqꞌape hakaꞌ tuꞌ.
4 Yinhnhena tuꞌ yilni ebꞌyaꞌ iskuywom Komam yaꞌ Elías yebꞌ yaꞌ Moisés;
tzotelo chu ebꞌyaꞌ yebꞌ Komam.
5 Yalni yaꞌ Pedro tet Komam:
—Mam kuywawom,
kaw saqꞌal je bꞌey tiꞌ,
wal xin chikowatxꞌekanhanh oxebꞌo pat;
hunu hawet,
hunu yet yaꞌ Moisés yebꞌ hunu yet yaꞌ Elías,
xhi yaꞌ.
6 Kaw xiw ebꞌyaꞌ iskuywom Komam tuꞌ,
yuxin matxa chitxumcha yu yaꞌ Pedro yinh tzet chute yalni,
yuxin yal yaꞌ hakaꞌ tuꞌ.
7 Lahwi tuꞌ yayilo huneꞌ moyan yibꞌanh ebꞌyaꞌ,
yabꞌen ebꞌyaꞌ huneꞌ yul nuqꞌe xol moyan tuꞌ,
yalni hakaꞌ tiꞌ:
«Haꞌ yaꞌ tiꞌ Inkꞌaholan kaw xahan ay wuhan,
abꞌewe tzet chal yaꞌ,»
xhi.
8 Haxa yet yekꞌ tꞌanhtꞌon ebꞌyaꞌ xin,
yilni ebꞌyaꞌ tato haxanhe Komam aykꞌoj,
matxa ebꞌyaꞌ kawanh tuꞌ.
9 Hayet lanhan ispaxayti Komam yinh iswiꞌ witz yebꞌ ebꞌyaꞌ oxwanh tuꞌ,
yalni Komam tet ebꞌyaꞌ:
—Machi mak tet cheyal huneꞌ maxeyil tuꞌ,
wal xin haꞌ to yet chinitzitzbꞌikanhan xol kamom,
Hanin Aqꞌbꞌilintijan texol yu Komam Dios katto heyalni,
xhi Komam.
10 Yuxin machi mak tet bꞌay yal ebꞌyaꞌ huneꞌ tuꞌ,
yajaꞌ xin isqꞌambꞌele ebꞌyaꞌ tet hunun yinh tzet chal yelapno yet chiꞌitzitzbꞌikanh Komam xol kamom.
11 Yok ebꞌyaꞌ isqꞌambꞌeno tet Komam:
—¿Tzet yinh xin chal ebꞌnaj kuywawom yinh isley yaꞌ Moisés tato yaꞌ Elías chul bꞌabꞌel sata yaꞌ Cristo?
xhi ebꞌyaꞌ.
12 Istaqꞌwi Komam:
—Yeltoni,
haꞌ yaꞌ Elías tuꞌ bꞌabꞌel chuli,
yunhe isnahni isbꞌa anma kat yok yinh istoholal.
Yajaꞌ,
¿tzet tzꞌibꞌnhebꞌilkano winhan,
Hanin Aqꞌbꞌilintijan texol yu Komam Dios?
Tzꞌibꞌnhebꞌilkanoj tato kaw yilal yekꞌyaꞌ wanmahan,
kat wintanhelaxkaniltojan yu anma.
13 Yajaꞌ chiwalan teyet ta yaꞌ Elíasa tuꞌ xahulikꞌo yaꞌ,
yaj iswatxꞌe anma istxꞌojal yinh yaꞌ hakaꞌ yoche iskꞌul,
hakaꞌ tzet tzꞌibꞌnhebꞌilkano yul Yum Komam Dios,
xhi Komam.
Yilo Komam Jesús ischejabꞌ naj matzwalil yinh huneꞌ naj nichꞌan tzeh
14 Haxa yet yayilo Komam Jesús yebꞌ ebꞌyaꞌ oxwanh iskꞌatanh hunteqꞌanxa ebꞌyaꞌ iskuywom,
yilni Komam tato kaw hantanhe anma hoyaniko yinh ebꞌyaꞌ;
ay hunteqꞌan ebꞌnaj kuywawom yinh isley yaꞌ Moisés ayko isteyeleno isbꞌa yebꞌ ebꞌyaꞌ.
15 Hayet yilni anma yapni Komam,
kaw kꞌayilo iskꞌul,
isto anma yinh anhe iskꞌatanh Komam,
istioxhli anma tet Komam.
16 Isqꞌambꞌen Komam:
—¿Bꞌaytet yinh lanhan heteyelen hebꞌa?
xhi Komam.
17 Istaqꞌwi huneꞌ naj xol anma tuꞌ,
yalni naj:
—Mam kuywawom,
mawitijan nichꞌan inkꞌaholan tawet,
ay huneꞌ ischejabꞌ naj matzwalil ayko yinh naj,
yuxin mach chu istzotel naj.
18 Hunta el chilow yinh naj yu naj matzwalil tuꞌ,
kaw chitzikobꞌtanhelax naj,
kat istit hujuy yul istiꞌ naj,
yebꞌ xin kaw chinhetxꞌla yeh naj kat iskawyanhilo naj.
Manqꞌanan tet ebꞌyaꞌ hakuywom tiꞌ tato chilo ebꞌyaꞌ ischejabꞌ naj matzwalil yinh inkꞌaholtiꞌan,
yajaꞌ mach yu ebꞌyaꞌ,
xhi naj.
19 Istaqꞌwi Komam:
—Hex tiꞌ,
kaw mach cheyako heyanma yinh Komam Dios,
kaw nimanxa tiempo ayinikꞌojan texol,
¿hantatokꞌanabꞌ tiempo chextecha wuhan?
Iweti naj nichꞌan tuꞌ bꞌey tiꞌ,
xhi Komam.
20 Yilaxto naj sata Komam,
hayet yilni ischejabꞌ naj matzwalil tuꞌ Komam,
yichiko islow huneꞌ yaxkamik tuꞌ yinh naj,
istirlaxayo naj sat txꞌotxꞌ,
yichiko naj yekꞌ bꞌalbꞌoni,
istit hujuy yul istiꞌ naj.
21 Isqꞌambꞌen Komam tet naj mame tuꞌ:
—¿Bꞌaqꞌinhtax tzabꞌloti naj nichꞌan tzeh tiꞌ?
xhi Komam.
Istaqꞌwi naj:
—Yettax kaw nichꞌanto naj.
22 Kaw txꞌiꞌalxa el chito naj yul qꞌaꞌ yebꞌ xol ha haꞌ yu ischejabꞌ naj matzwalil yunhe iskam naj.
Yajaꞌ ta chu hawu,
kolwahanhninoj,
kaw tzꞌayojabꞌ hakꞌul jinhanh,
xhi naj.
23 Yalni Komam tet naj:
—Tato chawayto yul hawanma,
chuhi,
yuto sunil mak chiꞌanayto yul yanma yinh Komam Dios sunil tzet chisqꞌana chij isbꞌa,
xhi Komam.
24 Yet yabꞌen naj mame huneꞌ tuꞌ yah yaw naj yinh kaw ip,
yalni naj:
—¡Chiwaytojan yul wanmahan,
yajaꞌ kolwahanh winhan haxinwal chiqꞌ yip waniko wanmahan yinh Komam Dios!
xhi naj.
25 Hayet yilni Komam tato kaw hantanhe anma iskutxbꞌako isbꞌa iskꞌatanh,
ischejnilo Komam ischejabꞌ naj matzwalil yinh naj nichꞌan tzeh tuꞌ,
yalni Komam:
—Hach ischejabꞌ naj matzwalil,
aqꞌom sukbꞌo anma,
yebꞌ hawu yuxin mach chabꞌe naj nichꞌan tzeh tiꞌ,
haninan chiwalan tawet,
elanh yinh naj,
matxa chaxhmeltzo hunelxa,
xhi Komam.
26 Yah yaw ischejabꞌ naj matzwalil tuꞌ yinh kaw ip,
islow huneꞌ yaxkamik yinh naj nichꞌan tzeh tuꞌ,
yelkano ischejabꞌ naj matzwalil yinh naj.
Hakaꞌ kamom yukanilo naj,
yuxin txꞌiꞌal mak txumni ta kam naj yinh hunelnhe.
27 Wal Komam Jesús xin ok tzabꞌno Komam yinh isqꞌabꞌ naj,
isxeknikanh Komam naj,
yah linhno naj.
28 Lahwi tuꞌ,
yokto Komam Jesús yul huneꞌ nha yebꞌ ebꞌyaꞌ iskuywom.
Haxa yet ischukilxanhe ebꞌyaꞌ yebꞌ Komam xin,
isqꞌambꞌen ebꞌyaꞌ tet Komam:
—Mamin,
¿tzet yinh mach yu jinilojanh ischejabꞌ naj matzwalil yinh naj nichꞌan tzeh tuꞌ?
xhi ebꞌyaꞌ.
29 Istaqꞌwi Komam:
—Hunteqꞌan ischejabꞌ naj matzwalil hakaꞌ tiꞌ,
mach chiꞌel ebꞌnaj ta mach chextxahli,
yebꞌ ta mach cheyije huneꞌ yet mach chexwaꞌ yu hetxahli tet Komam Dios,
xhi Komam tet ebꞌyaꞌ.
Yal Komam Jesús iskamikal yinh iskayel
30 Lahwi tuꞌ xin,
yel Komam Jesús bꞌey tuꞌ,
yapni yul ismajul Galilea,
machi xin choche Komam tato chiꞌabꞌelaxiloj ta apni bꞌey tuꞌ,
31 yuto ayko Komam yaqꞌno kuybꞌanil tet ebꞌyaꞌ iskuywom yinh iskamikal,
yalni Komam:
—Hanin Aqꞌbꞌilintijan texol yu Komam Dios chinalaxikojan yul isqꞌabꞌ anma kat inpotxꞌlax kamojan,
yaj yinhxa yox tzꞌayik inkam tuꞌan kat witzitzbꞌipaxokanhan hunelxa,
xhi Komam tet ebꞌyaꞌ.
32 Yajaꞌ machi txumcha yu ebꞌyaꞌ yinh tzet yal Komam,
chixiwpaxo ebꞌyaꞌ isqꞌambꞌen tet Komam.
Yal Komam Jesús yinh mak kaw ekꞌbꞌal yelapnoj
33 Lahwi tuꞌ xin,
yapni Komam Jesús yebꞌ ebꞌyaꞌ iskuywom yul konhobꞌ Capernaúm.
Haxa yet ayxa Komam yul nha bꞌaytikꞌa chikani,
isqꞌambꞌen Komam tet ebꞌyaꞌ:
—¿Bꞌaytet yinh heteyele hebꞌa yet ayonhiko yinh kobꞌel?
xhi Komam.
Marcos 9:33-50
34 Yajaꞌ maxhtikꞌa taqꞌwi ebꞌyaꞌ tet Komam yuto isteyele isbꞌa ebꞌyaꞌ yinh mak ekꞌbꞌal yelapno ye xol ebꞌyaꞌ.
35 Yay tzꞌonhno Komam,
yawtenti ebꞌyaꞌ 12 (kabꞌlahonhwanh) tuꞌ iskꞌatanh,
yalni Komam:
—Tato ay hunu mak choche chiꞌok iswiꞌehalo texol,
yutehojabꞌ isbꞌa hakaꞌ hunu mak islahobꞌalxa yehi,
kat yok chejabꞌo teyinh,
xhi Komam.
36 Lahwi tuꞌ xin yaniko Komam nichꞌan unin xolbꞌal ebꞌyaꞌ,
ischelnikanh Komam,
yalni hakaꞌ tiꞌ:
37 —Maknhetikꞌa chichahni hunu nichꞌan unin yuto wetan yehi,
haninan chinischahan.
Haꞌ mak chinchahnipaxojan xin maxhnhetajinan chinischahan,
to chischahpaxo Mak anheintijan,
xhi Komam tet ebꞌyaꞌ.
Mak mach ayoko ishowal jinh jetbꞌi kobꞌa yebꞌi
38 Yalni yaꞌ Juan tet Komam:
—Mam Kuywawom,
jilanh yinilo huneꞌ naj ischejabꞌ naj matzwalil yinh anma yinh habꞌi,
yajaꞌ kokachanh naj yuto mach jetbꞌiho naj,
xhi yaꞌ.
39 Istaqꞌwi Komam:
—Mach chekach naj,
yuto machi hunu mak lahwi iswatxꞌen hunu kꞌaybꞌalkꞌule yinh inbꞌihan kat yok yalnopaxo tzotiꞌ txꞌoj winhan.
40 Haꞌ mak mach chichiwa iskꞌul jinh,
ayko jetbꞌihoj.
41 Yinh kaw isyelal chiwalan makxanhetikꞌa chiꞌaqꞌni hunu vaso haꞌ teyet yu ayexiko yul inqꞌabꞌan,
chiꞌaqꞌlax ispaj selel tet huneꞌ mak tuꞌ,
xhi Komam.
Hunteqꞌan tzet chonhaqꞌni aykꞌayoj
42 Yalnipaxo Komam Jesús:
—Maknhetikꞌa chiꞌaqꞌni aykꞌayo hunu mak uninto yaniko isbꞌa yul inqꞌabꞌan,
huneꞌ mak tuꞌ kꞌul iskꞌal-laxiko hunu niman ischꞌenal chꞌen molino yinh isnuqꞌ,
kat istirlaxto xol haꞌ mar.
43 Yuxin tato yu heqꞌabꞌ xin chexaykꞌay yinh istxꞌojal,
kꞌul ta chetzokꞌiltoj.
Yuto ekꞌbꞌalto kꞌul ta matxa huneꞌ heqꞌabꞌ yet chechahni heqꞌinal mach istanhbꞌal sata iskabꞌil heqꞌabꞌ aykoj,
kat heqꞌojlaxto xol qꞌa qꞌaꞌ mach istanhbꞌal.b
44 Bꞌey tuꞌ xin maxhtikꞌa chikam noꞌ ha haꞌ,
maxhtikꞌa chitanhpaxo qꞌa qꞌaꞌ.
45 Maka xin ta heyoj chexaqꞌni aykꞌayo yinh istxꞌojal,
chetzokꞌiltoj.
Yuto ekꞌbꞌalto kꞌul ta huneꞌnhe heyoj ayko yet chechahni heqꞌinal mach istanhbꞌal,
sata ta chexqꞌojlaxto xol qꞌa qꞌaꞌ mach istanhbꞌal yebꞌ iskabꞌil heyoj,
46 bꞌay matxatikꞌa chikam noꞌ ha haꞌ yebꞌ bꞌay matxatikꞌa chitanh qꞌa qꞌaꞌ.
47 Yajaꞌ ta xin isbꞌaqꞌ hesat chexaqꞌni aykꞌayo yinh istxꞌojal,
kꞌul ta cheyiltij yuto ekꞌbꞌalto kꞌul waxanhka hunxanhe isbꞌaqꞌ hesat yet chechahni heqꞌinal mach istanhbꞌal,
sata heyalaxto xol qꞌa qꞌaꞌ mach istanhbꞌal yebꞌ iskabꞌil isbꞌaqꞌ hesat,c
48 bꞌay maxhtikꞌa chikam noꞌ ha haꞌ,
yebꞌ bꞌay maxhtikꞌa chitanh qꞌa qꞌaꞌ.
49 »Yuto hakaꞌ yok atzꞌam atzꞌam yinh xahanbꞌal,
hak tuꞌ yok qꞌa qꞌaꞌ yinh sunil anma.d
50 »Kaw kꞌul atzꞌam atzꞌam,
yajaꞌ ta chiꞌel iskꞌachiꞌal atzꞌam,
¿tzettaxka chu ismeltzoko iskꞌachiꞌal hunelxa?
Hakaꞌojabꞌ yaqꞌni atzꞌam atzꞌam isxuqꞌal hunu tzet ye tuꞌ,
hakojabꞌ hex tuꞌ,
yebꞌ xin ayojabꞌ aqꞌankꞌulal texol,e
xhi Komam Jesús.