Issayilo Komam Jesús kabꞌlahonhwanh ebꞌyaꞌ chiꞌok ischejabꞌoj
10
Lahwi tuꞌ,
iskutxbꞌaniko Komam Jesús ebꞌyaꞌ 12 (kabꞌlahonhwanh) iskuywom,
yaqꞌni Komam yip ebꞌyaꞌ yinilo ischejabꞌ naj matzwalil yinh anma,
yebꞌpaxo xin yu yaqꞌni kawxo ebꞌyaꞌ anma yaꞌay,
yebꞌ yu yinilo ebꞌyaꞌ tzettaj yaꞌ yu anma.
2 Hak tiꞌ xin isbꞌi ebꞌyaꞌ 12 (kabꞌlahonhwanh) ischejabꞌ Komama hakaꞌ tiꞌ:
Yaꞌ Simón chiyijpaxo Pedro,
yaꞌ Andrés yuxhta yaꞌ Simón,
yaꞌ Jacobo yebꞌ yaꞌ Juan,
ebꞌyaꞌ kawanh tiꞌ iskꞌahol yaꞌ Zebedeo ye ebꞌyaꞌ.
3 Yaꞌ Felipe,
yaꞌ Bartolomé,
yaꞌ Tomás,
yaꞌ Mateo,
yaꞌ chitikꞌa inilo chꞌen tohlabꞌal chito bꞌey Roma,
yaꞌ Jacobo iskꞌahol icham Alfeo,
yaꞌ Tadeo.
4 Yebꞌpaxo xin yaꞌ Simón,
aytikꞌako yinh huneꞌ partido chiyij cananista,
yebꞌ naj Judas Iscariote,
naj aniko Komam yul isqꞌabꞌ kamikal.
Yet ischejnito Komam Jesús ebꞌyaꞌ ischejabꞌ yalnokꞌo Istzotiꞌ Komam Dios
5 Haꞌ ebꞌyaꞌ 12 (kabꞌlahonhwanh) tiꞌ ischejto Komam Jesús,
yalni Komam ischejbꞌanil ebꞌyaꞌ hakaꞌ tiꞌ:
«Mach chexekꞌ yulaj iskonhobꞌ anma mach Israeloj,
yebꞌpaxo xin mach chexekꞌ yulajla konhobꞌ ay yul ismajul Samaria.
6 Kachannhe xol jet konhobꞌ Israel chextohi,
yuto lahan anma hakaꞌ noꞌ meꞌ chikꞌayikꞌoj.
7 Asiꞌwe xin,
kat heyalni tet anma tato Komam Dios ay yul satkanh yokxa yahawo yinh anma.
8 Aqꞌwe kawxo anma yaꞌay,
ta ay mak chikami cheyaqꞌ hulukanh iskꞌul,
ta ay mak ayko lepra yinh cheyaqꞌ kawxoj,
kat heyinipaxilo ischejabꞌ naj matzwalil yinh anma.
Huneꞌ heyip chiwaqꞌtiꞌan matanil chechah,
yuxin mach cheqꞌan hetohol yet cheyaqꞌni kawxo anma.
9 »Yinh hebꞌel tuꞌ xin matzet cheyitoj;
mach cheyito hemelyu,
nitam hunu centavo,
10 mach cheyipaxto hetzꞌispa,
yebꞌ hehelbꞌal,
mach cheyipaxto ishelbꞌal hexanhabꞌ,
yebꞌpaxo xin mach cheyiqꞌ heqꞌojoch.
Chiwalan hunteqꞌan tiꞌ teyet yuto naj munlawom chiꞌaqꞌlax tzet chislo naj yinh ismunil.
11 »Hayet chexapni yul hunu konhobꞌ maka yul hunu aldea chesay mak kꞌulchꞌan iskꞌul,
haꞌ tuꞌ xin chexkani masanto yet chexmeltzohi.
12 Yet chexapni bꞌey teꞌ nha bꞌay chexkankano tuꞌ,
cheyal tet anma tuꞌ hakaꞌ tiꞌ:
“Ayojabꞌ aqꞌankꞌulal texol,”
kexchi.
13 Ta choche mak ay yul huneꞌ nha tuꞌ aqꞌankꞌulal,
chiꞌaqꞌlax aqꞌankꞌulal tuꞌ tet,
taka mach choche xin,
mach chiꞌaqꞌlax tet.
14 Yajaꞌ tato mach chexchahlaxi,
yebꞌ xin mach chiꞌabꞌelax tzet cheyala,
chexel yatut anma tuꞌ maka yul huneꞌ konhobꞌ tuꞌ,
kat xin hetziknilo pojoj yinh heyoj yunhe heyeniloj tato matxa heyok yinh anma tuꞌ.
15 Yinh kaw yeli chiwalan teyet,
yet chilni Komam yinh tzet chiꞌeliko anma tuꞌ,
kaw ekꞌbꞌalto isyaꞌtajil chischah sata anma ay bꞌey konhobꞌ Sodoma yebꞌ konhobꞌ Gomorra,»
xhi Komam Jesús.
Yilal yaqꞌlax ekꞌoyaꞌ yanma makta ayxako yul isqꞌabꞌ Komam Jesús
16 Yalnipaxo Komam Jesús tet ebꞌyaꞌ iskuywom tuꞌ:
«Chexinchejtojan xol anma hakaꞌ noꞌ meꞌ chito xol noꞌ oj.
Yuxin helan cheyute hebꞌa hakaꞌ noꞌ labꞌa,
yajaꞌ hunkuentanhe cheyute hekꞌul hakaꞌ noꞌ kuwis.
17 Kaw cheyil hebꞌa,
yuto chexilaxto sata ebꞌnaj iswiꞌehal yinh lahtiꞌ yul konhobꞌ.
Chexmaqꞌlax yulajla capilla.
18 Chexalaxiko sata ebꞌnaj gobernador,
maka sat ebꞌnaj nimeta yahaw,
yuto ayexiko yul inqꞌabꞌan.
Hak tuꞌ chu kinheyaqꞌnihan yohtanhelo ebꞌnaj,
yebꞌ tet anma mach Israeloj.
19 Hayet chexalaxiko sata ebꞌnaj yahaw tuꞌ,
mach cheyako yinh hekꞌul yinh tzet chu hetzoteli,
yuto haꞌ Komam Dios chiꞌaqꞌni hehelanil hetzoteli.
20 Wal xin maxhtaj hex chextzoteli,
to haꞌ Yespíritu Komam chitzotel teyinh.
21 »Yet chihul huneꞌ tiempohal tuꞌ ay ebꞌnaj chiꞌaniko yuxhta yul isqꞌabꞌ kamikal,
aypaxo ebꞌnaj mame chiꞌaniko iskꞌahol yul isqꞌabꞌ kamikal,
aypaxo xin ebꞌnaj kꞌahole chiꞌaniko howal yinh ismam kat ispotxꞌnikamo ebꞌnaj ismam.
22 Sunil anma chichiwa iskꞌul teyinh yuto ayexxako yul inqꞌabꞌan,
yajaꞌ wal mak chitecha yu masanto yet islahobꞌal,
chikolchahi.
23 Hayet chextzumbꞌelaxilo yul hunu konhobꞌ,
chexel bꞌey tuꞌ kat heto yul hunuxa konhobꞌ,
yuto yinh kaw yeli chiwalan teyet;
maxhtotikꞌa chilahwi heyekꞌ yul sunil konhobꞌ Israel tiꞌ kat wul lemnahan,
Hanin Aqꞌbꞌilintijan texol yu Komam Dios.
24 »Machi hunu naj lanhan iskuylaxi chipalkꞌonnakanh yibꞌanh naj chikuyni tuꞌ,
yebꞌ xin machi hunu naj chejabꞌ chipalkꞌonnakanh yibꞌanh ispatrón.
25 Yajaꞌ tato ay hunu naj chikuywi tuꞌ chiꞌapni yitzꞌatil iswiꞌ hakaꞌ naj kuywawom tuꞌ,
kaw kꞌul huneꞌ tuꞌ,
yebꞌ xin tato ay hunu naj chejabꞌ chiꞌapni islahannhe isbꞌa yebꞌ ispatrón,
kꞌulpaxo huneꞌ tuꞌ.
Hanintiꞌan hakaꞌ hunu yahaw nha,
haxa hex tiꞌ hakaꞌ ebꞌnaj uninale;
ta chihal-lax Beelzebú winhan,b
hajexxampaxoj,
¿tzet mach hal-laxo teyinh?»
xhi Komam Jesús.
Hanhkꞌanhehojabꞌ tet Komam Dios chonhxiwi
26 Yalnipaxo Komam Jesús:
«Mach chexxiw tet anma,
yuto machi hunu tzet ye tuꞌ ewan mach chiꞌel yenhel,
yebꞌ xin machi hunu tzet chihal-lax yinh ewantajil mach chiꞌabꞌchaloj.
27 Sunil tzet chiwalan teyet yinh ewantajil tinanh,
pujbꞌawekꞌo tet anma.
Yebꞌ hunteqꞌan tonhe chinsahan yul hetxikin,
halwekꞌo yinh kaw ip yulaj calla.
28 Mach chexxiw tet ebꞌnaj chipotxꞌni henimanil,
yuto wal heyanma mach chiqꞌoji ebꞌnaj ispotxꞌni.
Wal xin hanhe tet Komam Dios bꞌay wal hexiwi,
yuto chu yanito Komam henimanil yebꞌ heyanma xol qꞌa qꞌaꞌ mach istanhbꞌal.
29 »Chisje hetxumni yinh noꞌ nixhte chꞌik tinanh,
kakꞌonh noꞌ chitxonhlax yinh centavo.
Yajaꞌ machi hunu noꞌ chikami tato maxhtaj Komam ay yul satkanh chihalni.
30-31 Hajxam hex tiꞌ to kaw ekꞌbꞌal heyelapno sata noꞌ nixhte chꞌik tuꞌ,
kaw bꞌisbꞌil xil hewiꞌ yinh hununtajil yu Komam.
Yuxin chiwalan teyet,
mach chexxiwi,»
xhi Komam.
Mak mach chitxꞌixwi yinh Komam Jesús sata anma
32 Yalnipaxo Komam Jesús:
«Haꞌ mak mach chitxꞌixwi yalni yinh sat anma tato wetxahan yehi,
hakintuꞌan mach chintxꞌixwihan walnihan tet Inmaman ay yul satkanh tato wetan yehi.
33 Yajaꞌ wal mak chihalni yinh sat anma tato mach wetojan yehi,
chiwalpaxojan yinh sat Inmaman ay yul satkanh tato mach wetojan yehi,»
xhi Komam.
Iskajlekanh isbꞌa anma yu Komam Jesús
34 Yalnipaxo Komam Jesús:
«Tajka chetxumu tato hulnajinan yu wanikojan aqꞌankꞌulal xol anma yul sat yibꞌanhqꞌinal tiꞌ,
machoj,
wal xin to yu yaqꞌlenkanh howal winhan.
35 Kinhulan yu yaqꞌnikanh howal naj kꞌahole yebꞌ ismam,
ix unine chiꞌok ix howal yinh ismiꞌ,
ix alibꞌe chiꞌok ix howal yinh ixnam alibꞌe,
36 yuxin xoltikꞌa mak ayto yu isbꞌa chiꞌah howal.
37 »Mak ekꞌbꞌal chako yanma yinh ismam maka ismiꞌ insatajan,
mach istzano yok wetojan,
yebꞌ xin haꞌ mak ekꞌbꞌal ayko yanma yinh iskꞌahol maka iskutzꞌin insatajan,
mach istzano yok yul inqꞌabꞌan.
38 Haꞌ mak hinan yaqꞌlen isyaꞌtajil winhan,
waxanhka chiꞌaqꞌlaxkamo yinh kulus,
haꞌ chu yok wetojan.
39 Haꞌ mak ekꞌbꞌal chisyaꞌilnhe isbꞌa insatajan,
chikꞌaytoj,
mach chiqꞌ isqꞌinal mach istanhbꞌal.
Wal mak hinan iskam winhan xin chischah isqꞌinal mach istanhbꞌal,»
xhi Komam.
Ebꞌnaj chichahni ispaj selel tet Komam Dios
(Mr. 9:41)
40 Yalnipaxo Komam Jesús:
«Haꞌ mak chexchahni,
haninan chinischahan,
haꞌ mak chinchahnihan chischah Mak anheintijan.
41 Haꞌ mak chichahni hunu ischejabꞌ Komam Dios,
lahan ismatan chischah hakaꞌ ischejabꞌ Komam tuꞌ.
Mak chichahni hunu mak iskꞌulalnhetikꞌa chiswatxꞌe,
lahan ispaj chischah yebꞌ mak iskꞌulalnhetikꞌa chiswatxꞌe tuꞌ.
42 Haxa mak chiꞌaqꞌni hunu vaso chewalaꞌ tet hunu inkuywoman,
waxanhka kaw komon jilni,
yinh kaw yeli chiwalan teyet,
huneꞌ mak tuꞌ chischah ispaj selel tet Komam Dios,»
xhi Komam.