Yato yaꞌ Juan anikanh haꞌ iswiꞌ anma, kawanh iskuywom yaqꞌaꞌ isqꞌambꞌebꞌal tet Komam Jesús
11
Lahwi yalnikano Komam Jesús ischejbꞌanil ebꞌyaꞌ 12 (kabꞌlahonhwanh) iskuywom,
isto Komam kuywal;
yekꞌ Komam yalnokꞌo Istzotiꞌ Komam Dios yul hunun konhobꞌ ayko yinh ishoyanil bꞌay ay Komam.
2 Yinh huneꞌ tiempohal tuꞌ ayikto yaꞌ Juan,
anikanh haꞌ iswiꞌ anma,
yul preso.
Yabꞌe yaꞌ isqꞌumal yinh tzettaj chiswatxꞌe Komam Cristo.
Ischejnito yaꞌ kawanh ebꞌyaꞌ iskuywom
3 isqꞌambꞌeno tet Komam:
—¿Ham hach tiꞌ Cristo echmabꞌil yul juhanh,
mato chijechmahanh yul hunuxa yaꞌ?
xhi ebꞌnaj.
4 Istaqꞌwi Komam:
—As halwe tet yaꞌ Juan tuꞌ yinh sunil tzet maxeyabꞌe yebꞌ yinh tzet maxeyila.
5 Halwe tet yaꞌ tato haꞌ mak maxhtikꞌa chu yilni hajlokanokanh sat,
haxa mak maxhtikꞌa chu yekꞌi,
bꞌelwikanh.
Haꞌ mak ayko lepra yinh xin anhchakanoj,
haꞌ mak maxhtikꞌa chabꞌe,
hajlo istxikin.
Aypaxo kamom hulkanh iskꞌul,
kat xin yal-laxpaxo Tzotiꞌ yet kolbꞌanile tet anma machi bꞌay chikawxi iskꞌul.
6 ¡Saqꞌal yet mak mach chikabꞌkon yanma winhan!
kexchi,
xhi Komam tet ebꞌyaꞌ.
7 Hayet lahwi ispaxto ebꞌyaꞌ xin,
yichiko Komam yalni tet anma yinh tzet yelapno ye yaꞌ Juan,
yalni Komam hakaꞌ tiꞌ:
«Nawetij tzet kexbꞌey heyilaꞌ bꞌey txꞌotxꞌ desierto,
¿tom haꞌ huneꞌ teꞌ ah chꞌekꞌ qꞌelah yu jaqꞌeqꞌ?
8 ¿Mato hunu naj kaw nanxa yok xil isqꞌap ayko kexbꞌey heyilaꞌ?
¡Machoj!
Yuto ebꞌnaj kaw nanxa islow yehiko xil isqꞌap yulnhe yatut ebꞌnaj rey ay ebꞌnaj.
9 ¿Mak kexbꞌey heyilaꞌ?
Wal xin huneꞌ ischejabꞌ Komam Dios kexbꞌey heyilaꞌ.
Yinh kaw yeli huneꞌ ischejabꞌ Komam Dios kexbꞌey heyilaꞌ tuꞌ kaw ekꞌbꞌalto yelapno ye ismunil yaꞌ sata ebꞌyaꞌ ischejabꞌ Komam Dios ekꞌlena yet payat.
10 Yinh yaꞌ Juan tzꞌibꞌnhebꞌilkano yul Yum Komam Dios bꞌay chal hakaꞌ tiꞌ:
“Haninan chinchejtojan inchejabꞌan bꞌabꞌel tasataj,
yunhe iswatxꞌen habꞌeh yalanhto maxhto chaxhapni,”a
xhihayoj.
11 »Yinh kaw yeli chiwalan teyet,
xol sunil anma yul sat yibꞌanhqꞌinal tiꞌ machi hunu mak ekꞌbꞌal yelapno yibꞌanh yaꞌ Juan tuꞌ.
Yajaꞌ wal mak chiꞌok yul isqꞌabꞌ Komam Dios xin waxanhka kaw komonnhe yekꞌi,
ekꞌbꞌal saqꞌal yet sata yaꞌ Juan.
12 »Yettaxtikꞌa yichiti yaꞌ Juan tuꞌ yanikanh haꞌ iswiꞌ anma masanta tinanh,
yinh isyaꞌtajil chꞌok anma yul isqꞌabꞌ Komam Dios,
yajaꞌ hanhkꞌanhe mak chihti yanma yinh,
haꞌ chitzujcha apno yu yok yul isqꞌabꞌ Komam.
13 Sunil tzet yal ebꞌyaꞌ ischejabꞌ Komam Dios yet payat yebꞌ isley yaꞌ Moisés yalanhto maxhto chiꞌichiko ismunil yaꞌ Juan,
tonhe bꞌina yinh tzet chu yok anma yul isqꞌabꞌ Komam Dios.
14 Ta cheyoche cheyayto yul heyanma yinh tzet chiwaltiꞌan,
txumchahojabꞌilo heyu tato haꞌ yaꞌ Juan tuꞌ,
haꞌ yaꞌ hakaꞌ yaꞌ Elíasb echmabꞌil yul heyu.c
15 Makex cheyabꞌe huneꞌ tiꞌ aqꞌwe heyanma hetxumniloj.
16 »Anma ay yul huneꞌ tiempo tiꞌ,
kꞌul inlahanbꞌanan yebꞌ nixhte unin chiꞌay tzꞌonhno yul txonhbꞌal kat issajchi,
kat yahwi tet nixhte yet uninal,
chalni:
17 “Nabꞌanhe jeta kobꞌahanh joqꞌtzenanh teꞌ suꞌ,
yuto mach kexkanhalwi.
Nabꞌanhe jakojanh bꞌit kaw bꞌiskꞌulal yoki,
yuto mach kexoqꞌpaxoj,”
xhi nixhte unin tuꞌ.
18 Chiwalan huneꞌ tiꞌ,
yuto yet yul yaꞌ Juan,
anikanh haꞌ iswiꞌ anma,
mach waꞌ yaꞌ yebꞌ anma,
yuxin hal-laxi tato ayko ischejabꞌ naj matzwalil yinh yaꞌ.
19 Haxa Hanin Aqꞌbꞌilintijan texol yu Komam Dios,
chinwaꞌan yebꞌ anma yuxin chihal-lax winhan hakaꞌ tiꞌ:
“Wal naj Jesús tiꞌ waꞌonhetikꞌa chu naj yebꞌ ukꞌu vinonhetikꞌa chu naj,
yamigopaxo isbꞌa naj yebꞌ ebꞌnaj txꞌoj isbꞌeybꞌal,
yebꞌ ebꞌnaj iqꞌomilo tohlabꞌal chꞌen chito bꞌey Roma,”
xhi anma winhan.
Yajaꞌ wal anma ayko ishelanil Komam Dios yinh habꞌan isyenilo isbꞌa yinh tzettaj iskꞌulal chilaiswatxꞌe,»
xhi Komam.
Hunteqꞌan konhobꞌ mach yijemo yinh tzet chal Komam Jesús
20 Yet hunel xin ok Komam Jesús yalaꞌ istxꞌojal hunteqꞌan konhobꞌ bꞌay kaw txꞌiꞌal kꞌaybꞌalkꞌule xaꞌisye Komam,
yuto anma ay yul hunteqꞌan konhobꞌ tuꞌ maxhtikꞌa chisnah isbꞌa isbꞌejnikano iswatxꞌen istxꞌojal,
yuxin yal Komam hakaꞌ tiꞌ:
21 «Hex ay yul konhobꞌ Corazín kꞌanchꞌan hex,
yebꞌ hex ay yul konhobꞌ Betsaida,
kꞌanchꞌan hexpaxoj,
yuto ta yul konhobꞌ Tiro yebꞌ konhobꞌ Sidón yelax hunteqꞌan kꞌaybꞌalkꞌule chiyelax texol tiꞌ,
payxam isbꞌejkano anma iswatxꞌen istxꞌojal,
yamahto anma tanh yinh iswiꞌ,
yebꞌ yamiko anma xil isqꞌap chiyenilo bꞌiskꞌulal.
22 Yajaꞌ chiwalan teyet,
yet chiꞌapni istzꞌayikal bꞌay chil Komam Dios yinh tzet chiꞌeliko anma,
kaw ekꞌbꞌalto isyaꞌtajil chischah hunteqꞌan anma tiꞌ sata anma ay yul konhobꞌ Tiro yebꞌ anma ay yul konhobꞌ Sidón.
23 Haxa hex ay yul konhobꞌ Capernaúm,
¿ham heyalni ta chexilaxkanh satkanh?
Machoj,
wal xin chexqꞌojlaxayto xol kamom.
Yuto ta yul konhobꞌ Sodoma yelax hunteqꞌan kꞌaybꞌalkꞌule chiyelax texol tiꞌ,
isbꞌejmikano anma yaniko ismul,
aytomikꞌo huneꞌ konhobꞌ tuꞌ tinanh.
24 Yuxin chiwalan teyet yet chilni Komam Dios yinh tzet chiꞌeliko anma,
kaw ekꞌbꞌalto isyaꞌtajil chechah sata anma ah Sodoma tuꞌ,»
xhi Komam.
Haꞌ Komam Jesús chonhaqꞌni xewoj
25 Hayet huneꞌ tiempohal tuꞌ txahli Komam Jesús,
yalni Komam:
«Mamin,
yahawil satkanh yebꞌ txꞌo txꞌotxꞌ,
chiwaqꞌan yuchꞌandios tawet yuto hawebꞌa hunteqꞌan tiꞌ tet ebꞌnaj ay ishelanil yebꞌ tet ebꞌnaj ay iskuyu yul sat anma,
hawaqꞌni yohtanhelo anma matzet yohtaj.
26 Mamin,
hak tuꞌ chuhi yuto hak tuꞌ el yinh hakꞌul,»
xhi Komam.
27 Lahwi tuꞌ yalni Komam tet anma:
«Sunil tzet ye tuꞌ ayko yul inqꞌabꞌan yu Inmaman.
Machi hunu mak ohtanhe hinan hanin Kꞌahole intiꞌan,
kachannhe Inmaman ohtanhe hinan.
Machi hunu mak ohtanhe Inmaman,
kachannhe haninan kiniskꞌaholtiꞌan wohtajan,
kat waqꞌnihan Inmamtuꞌan yohtanhelo tet mak bꞌay chiwochehan.
28 Makex sikom hexxa yu hemunil yebꞌ hex xatibꞌayo heyu yalanh yalil heyijatz,
titanhwe inkꞌatanhan,
yuto haninan chexwaqꞌ xewojan.
29 Ijwe huneꞌ ijatz chiwaqꞌan heyijaꞌ.
Kuywanhwe wintajan haxinwal chixew heyanma,
yuto hanintiꞌan kꞌulchꞌan inkꞌulan yebꞌ xin ay isnimanil inkꞌulan.
30 Huneꞌ ijatz chiwaqꞌan heyijaꞌ tiꞌ mach aloj,
mach yaꞌtajo heyijenpaxoj,»
xhi Komam tet anma.