Yet yinilo iskuywom Komam Jesús iswiꞌ ixim trigo
12
Yinh huneꞌ tzꞌayikal xewilal ekꞌto Komam Jesús yebꞌ ebꞌyaꞌ iskuywom yul huneꞌ nichꞌan bꞌeh xol ixim trigo.
Kaw xin xanhohcha ebꞌyaꞌ yuxin ok ebꞌyaꞌ yiqꞌalo iswiꞌ ixim trigo,
ischilnilo ebꞌyaꞌ ixim iskꞌuxuꞌ.
2 Hayet yilni ebꞌnaj fariseo huneꞌ tuꞌ,
yalni ebꞌnaj tet Komam:
—Ilkꞌanabꞌ tzet chu ebꞌnaj hakuywom tilah,
lanhan yinilo ebꞌnaj iswiꞌ ixim trigo iskꞌuxuꞌ.
Yajaꞌ xin kaw txahul komunla yinh istzꞌayikal xewilal,
xhi ebꞌnaj.
3 Istaqꞌwi Komam tet ebꞌnaj:
—¿Tom maxhto cheyil yul Yum Komam Dios yinh tzet yaqꞌle yaꞌ rey David yet kaw chinhohcha yaꞌ yebꞌ ebꞌnaj tzujan yintaj?
4 Yaꞌ David tuꞌ okto yaꞌ yul Yatut Komam Dios iswahni yaꞌ ixim pan haltebꞌilxa tet Komam Dios,
iswahnipaxo ebꞌnaj tzujan yinta yaꞌ tuꞌ ixim.
Wal xin hanhkꞌanhe ebꞌyaꞌ sacerdote chu iswahni ixim.
5 ¿Tom maxhto cheyilpaxo yinh isley yaꞌ Moisés yinh tzet yu ebꞌyaꞌ sacerdote ay yul Yatut Komam Dios?
Ebꞌyaꞌ sacerdote tuꞌ mach chixew ebꞌyaꞌ yinh tzꞌayik xewilal,
yajaꞌ mach chako ebꞌyaꞌ ismul yul sat Komam Dios yinh huneꞌ tuꞌ.
6 Yajaꞌ yinh kaw yeli chiwalan teyet:
Hanintiꞌan ekꞌbꞌal welapnojan sata Yatut Komam Dios.
7 Tzettam saqꞌal tato chitxumchalo heyu bꞌay chal yul Yum Komam Dios hakaꞌ tiꞌ:
“Haꞌ huneꞌ chiwochehan tato chitzꞌay hekꞌul yinh heyet anmahil,
maxhnhetaj henhusni no noqꞌ yinh xahanbꞌalil wetan,”a
xhihayoj.
Ta chetxum huneꞌ tiꞌ machim cheyala tato ay ismul mak mach ismul.
8 Wal Hanin Aqꞌbꞌilintijan texol yu Komam Dios chu walnihan yinh tzet cheyu yinh istzꞌayikal xewilal,b
xhi Komam tet ebꞌnaj fariseo tuꞌ.
Yaqꞌ kawxo Komam Jesús huneꞌ naj kamnajilo huneꞌ isqꞌabꞌ
9 Lahwi tuꞌ isto Komam Jesús,
yokto Komam yul iscapilla ebꞌnaj Israel,
10 haꞌ tuꞌ xin ayikto huneꞌ naj kamnajilo huneꞌ isqꞌabꞌ.
Yunhe yok ebꞌnaj fariseo aqꞌokꞌule yinh Komam,
yuxin isqꞌambꞌe ebꞌnaj tet Komam:
—¿Chimyu jaqꞌni kawxo hunu anma yaꞌay yinh istzꞌayikal xewilal?
xhi ebꞌnaj.
11 Istaqꞌwi Komam tet ebꞌnaj:
—Qꞌinalo ta ay hunujex chitokꞌay hunu hemeꞌ yul hunu kꞌuh yinh istzꞌayikal xewilal,
¿mataxka mach chexto heyiqꞌahti noꞌ?
12 Hajxam hunu anma,
to ekꞌbꞌalto yelapno sata noꞌ meꞌ tuꞌ,
yuxin chisje kowatxꞌen hunu tzet ye tuꞌ kꞌul yinh istzꞌayikal xewilal,
xhi Komam.
13 Lahwi tuꞌ yalni Komam tet naj kamnajilo huneꞌ isqꞌabꞌ tuꞌ:
—Toholbꞌanhelto haqꞌabꞌ,
xhi Komam.
Hayet istoholbꞌanhenilto naj isqꞌabꞌ tuꞌ,
iswatxꞌikaniloj.
14 Hayet yilni ebꞌnaj fariseo huneꞌ tuꞌ yelti ebꞌnaj yul capilla,
yok ebꞌnaj islahtiꞌnhen isbꞌa yinh tzet chu yaqꞌnikamo ebꞌnaj Komam Jesús.
Hunteqꞌan tzotiꞌ halbꞌilkano yinh Komam Jesús
15 Hayet yabꞌenilo Komam Jesús huneꞌ tuꞌ,
isto Komam.
Kaw hantanhe anma ok tzujno yinta Komam;
yaqꞌni kawxo Komam makta yaꞌay.
16 Yalni Komam tet anma ta mach chispujbꞌakꞌo yinh tzet iswatxꞌe Komam.
17 Hak tuꞌ yu yijnikano isbꞌa tzet tzꞌibꞌnhebꞌilkano yu yaꞌ Isaías,
ischejabꞌ Komam Dios yet payat,
bꞌay chal hakaꞌ tiꞌ:
18 «Haꞌ yaꞌ tiꞌ inchejabꞌan sikꞌbꞌiliko wuhan,
kaw xahan ay wuhan,
kaw chintzalahan yinh.
Chiwakojan Wespírituhan yinh yaꞌ kat ispujbꞌanikꞌo yaꞌ tet ej konhobꞌ mach Israelo yinh tzet chu isbꞌeybꞌalnhen istoholal.
19 Machi mak yebꞌ chiꞌah howal yu yaꞌ,
machi xin kaw chiꞌel yaw yaꞌ yinh kaw ip,
machipaxo chiꞌel yaw yaꞌ yulaj calla.
20 Ay anma kaw kꞌanchꞌan hakaꞌ teꞌ ah qꞌahnatoj,
maka hakaꞌ teꞌ tah tonhe chimutzꞌmun qꞌaꞌ yinh hak tuꞌ yehi.
Yajaꞌ haꞌ yaꞌ xin chikolwa yinh;
mach chislah yaꞌ yetantoj.
Hak tuꞌ chute yaꞌ masanta chiꞌok sunil yalanh istoholal yu yaꞌ.
21 Sunil ej konhobꞌ chikawxi iskꞌul yinh yaꞌ,»c
xhihayoj.
Hal-laxi tato naj matzwalil chiꞌaqꞌni yip Komam Jesús
22 Yilaxto huneꞌ naj mach chu yilni yebꞌ mach chu istzotel yu ischejabꞌ naj matzwalil tet Komam Jesús,
yaqꞌni kawxo Komam naj.
Hak tuꞌ xin yu ishajlo issat naj,
istzotelpaxokanh naj.
23 Sunil anma ilni huneꞌ tuꞌ kaw kꞌayilo iskꞌul,
yalni hakaꞌ tiꞌ:
«¿Ham yaꞌ tiꞌ,
titna yinh yuninal yaꞌ rey David echmabꞌil yul ju?»
xhi anma.
24 Yajaꞌ hayet yabꞌen ebꞌnaj fariseo yalni anma huneꞌ tuꞌ,
yalni ebꞌnaj:
«Huneꞌ naj tiꞌ chilo naj ischejabꞌ naj matzwalil yinh anma,
yaj yu ayko yip naj Beelzebú,
naj yahawil ebꞌnaj ischejabꞌ naj matzwalil yinh naj,»
xhi ebꞌnaj.
25 Wal Komam yohtaxa tzet chiꞌekꞌ yinh isnabꞌal ebꞌnaj,
yuxin yal Komam:
«Qꞌinalo ta chispoh isbꞌa anma yul hunu niman konhobꞌ,
huneꞌ konhobꞌ tuꞌ yinh anhemi chipax yip.
Maka ta hunu konhobꞌ maka hunu nhahil anma chispoh isbꞌa kat yaniko howal yinh hunun,
kaw yinh anhemi chitanhiloj.
26 Hak tuꞌ ye naj matzwalil,
ta chako naj howal yinh yet matzwalilal,
yinhtikꞌa naj chako howal.
¿Tzet xin chu yiqꞌni yip naj yinh hakaꞌ tuꞌ?
27 Hex tiꞌ cheyala tato yu naj yahawil ebꞌnaj matzwalil yuxin chiwilojan ischejabꞌ naj matzwalil yinh anma.
Ta hak tuꞌ,
¿mak xin chiꞌaqꞌni yip ebꞌnaj tzujan yinh hekuybꞌanil yet chinilo ebꞌnaj ischejabꞌ naj matzwalil yinh anma?
Yuxin haꞌ ebꞌnaj tuꞌ chiyenilo teyet tato mach kꞌulo tzet cheyal winhan.
28 Yajaꞌ ta yu Yespíritu Komam Dios chiwilojan ischejabꞌ naj matzwalil yinh anma,
haꞌ chalniloj tato ayxakꞌo yip Komam Dios texol.
29 »Qꞌinalo hunu naj yahaw nha kaw ay yip,
machi hunu mak chu yokto yul yatut naj kat yelqꞌanilto tzet ay naj.
Yajaꞌ ta chikꞌalbꞌalax naj,
wal tuꞌ chu yilaxilo tzet ay naj.
30 »Haꞌ mak mach ayoko wetbꞌihojan ayko ishowal winhan.
Haꞌ mak mach chikolwa yaniko anma yul inqꞌabꞌan,
haꞌ istzumbꞌenilo anma tuꞌ haꞌ chu.
31 »Yuxin chiwalan teyet,
tzijxanhe mulehal yebꞌ txꞌoj tzotiꞌ chiyal anma,
ay nimankꞌulal yinh yu Komam Dios.
Yajaꞌ tato ay hunu mak txꞌoj istzotel yinh Komam Espíritu Santo,
huneꞌ mak tuꞌ matxa bꞌaqꞌinhal ay nimankꞌulal yinh.
32 Tato ay hunu mak txꞌoj istzotel winhan,
Hanin Aqꞌbꞌilintijan texol yu Komam Dios,
ayto nimankꞌulal yinh.
Wal mak txꞌoj istzotel yinh Komam Espíritu Santo matxa nimankꞌulal yinh,
yinh huneꞌ kotiempohal tiꞌ yebꞌ yinh huneꞌ chihul kosataj,»
xhi Komam.
Haꞌ tzet ay yul janma haꞌ chal kotiꞌ
33 Yalnipaxo Komam Jesús:
«Qꞌinalo hunu te teꞌ kꞌul,
kꞌul sat teꞌ chaqꞌa,
wal teꞌ machiswalil,
mach kꞌulo sat teꞌ chaqꞌa.
Yuxin yinh sat te teꞌ chikotxumu tzet teꞌal teꞌ.
34 Hex tiꞌ lahan hex yebꞌ noꞌ labꞌa,
kaw txꞌoj hex.
¿Tzet chu heyalni tzotiꞌ kꞌul tato txꞌoj ayayto yul heyanma?
Wal xin haꞌ tzet ayayto yul heyanma haꞌ chal hetiꞌ.
35 Haꞌ mak iskꞌulal ayayto yul yanma,
kꞌul tzotiꞌ chala,
haxa mak istxꞌojal ayayto yul yanma,
haꞌ istxꞌojal chala.
36 Yajaꞌ chiwalan teyet,
yet chilni Komam Dios yinh tzet chiꞌeliko anma,
sunil mak chiꞌilchahoti yinh tzettaj tzotiꞌal chiꞌelti yul istiꞌ,
waxanhka komon tzotiꞌ.
37 Hatatikꞌa hakaꞌ hetzoteli hak tuꞌ chu yilni Komam Dios yinh tzet chexelikoj,
ta ay hemul maka machi hemul yinh tzet cheyala,»
xhi Komam.
Anma txꞌoj chisqꞌan kꞌaybꞌalkꞌule yilaꞌ
38 Yet hunel tuꞌ,
ay hunteqꞌan ebꞌnaj kuywawom yinh isley yaꞌ Moisés yebꞌ ebꞌnaj fariseo halni tet Komam:
—Mam kuywawom chijochehanh chaye hunu kꞌaybꞌalkꞌule jilaꞌanh,
xhi ebꞌnaj.
39 Istaqꞌwi Komam tet ebꞌnaj:
—Hex ay hex yul huneꞌ tiempohal tiꞌ kaw txꞌoj hexkanoj,
kaw manhkꞌom hex tet Komam Dios.
Cheqꞌan kꞌaybꞌalkꞌule heyilaꞌ,
huneꞌ chiyenilo ishelanil yip Komam Dios.
Yajaꞌ huneꞌnhe kꞌaybꞌalkꞌule chiꞌaqꞌlax heyilaꞌ,
haꞌ ton huneꞌ hakaꞌ tzet yaqꞌle huneꞌ ischejabꞌ Komam Dios yet payat chiyij Jonás,
haꞌ chiꞌaqꞌlax heyilaꞌ.
40 Yaꞌ Jonás tuꞌ oxebꞌ tzꞌayik yebꞌ oxebꞌ aqꞌbꞌal ayayto yaꞌ yul iskꞌul huneꞌ noꞌ niman kay.
Hakaꞌ yaqꞌle yaꞌ tuꞌ,
hak tuꞌ chiwaqꞌlehan,
Hanin Aqꞌbꞌilintijan texol yu Komam Dios.
Oxebꞌ tzꞌayik yebꞌ oxebꞌ aqꞌbꞌal chinmujihan yul txꞌotxꞌ.
41 Yet isbꞌey yaꞌ Jonás tuꞌ yalno Istzotiꞌ Komam Dios tet anma ay yul konhobꞌ Nínive isbꞌejnikano anma iswatxꞌen istxꞌojal.d
Wal tzet chiwaltiꞌan ekꞌbꞌalto yelapno sata tzet yal yaꞌ Jonás tuꞌ,
yajaꞌ mach chebꞌejkano hetxꞌojal.
Yuxin hayet islahobꞌal tzꞌayik haꞌ huneꞌ konhobꞌal anma ah Nínive tuꞌ haꞌ chihalnilo hemul.
42 Hakpax tuꞌ yu ix reina ay yul ismajul txꞌotxꞌ Sabá,
waxanhka kaw nahat ay ix yajaꞌ masan hul ix yabꞌe yitzꞌatil iswiꞌ yaꞌ rey Salomón.
Yajaꞌ wal hanintiꞌan ekꞌbꞌal welapnojan sata yaꞌ rey Salomón tuꞌ,
yajaꞌ mach cheyako yinh hekꞌul yinh tzet chiwalan.
Yuxin yet islahobꞌal tzꞌayik haꞌ kaw ix reina tuꞌ chihalnilo hemul,e
xhi Komam.
Ischejabꞌ naj matzwalil meltzo yul yehobꞌal hunelxa
43 Yalnipaxo Komam Jesús:
—Qꞌinalo ta ay hunu ischejabꞌ naj matzwalil chiꞌel yul yanma hunu anma.
Lahwi yel naj tuꞌ kat isto naj bꞌey txꞌotxꞌ desierto issayaꞌ bꞌay chixewi,
yajaꞌ mach chiꞌilcha bꞌay chixew naj tuꞌ yu.
44 Lahwi tuꞌ kat yekꞌ yinh isnabꞌal naj hakaꞌ tiꞌ:
“Etzanhem kꞌul inmeltzohan bꞌaytikꞌa ayinan,”
xhi naj.
Haxa yet chiꞌapni naj xin kat yilni naj yanma huneꞌ naj tuꞌ hakaꞌ hunu nha machi yahaw,
kaw kꞌul yekanh qꞌalem yul.
45 Hayet chilni naj huneꞌ tuꞌ xin kat isto naj yinoti hujwanhxa yetbꞌi kaw ekꞌbꞌalto istxꞌojal sataj,
kat yokto ebꞌnaj ehoyo yul yanma huneꞌ naj tuꞌ.
Huneꞌ naj bꞌay chiꞌokto ebꞌnaj tuꞌ,
kaw ekꞌbꞌalto txꞌoj chiꞌeliko naj sata yet bꞌabꞌelal.
Hakaꞌ chaqꞌle huneꞌ naj tuꞌ hak tuꞌ chaqꞌle hunteqꞌan anma kaw txꞌoj tiꞌ tinanh,
xhi Komam.
Apni ismiꞌ yebꞌ yuxhta Komam Jesús ilwal yinh
46 Hayet lanhan istzotel Komam tet anma tuꞌ xin yapni ismiꞌ Komam yebꞌ ebꞌnaj yuxhta Komam,
iskankano istiꞌ ispultahil teꞌ nha bꞌay ayikto Komam.
Yajaꞌ xin yoche ismiꞌ Komam yebꞌ ebꞌnaj yuxhta tuꞌ tzotelo tet.
47 Yuxin yal huneꞌ naj tet Komam:
—Mamin,
aykꞌo hamiꞌ yebꞌ ebꞌnaj hawuxhta istinha,
choche ebꞌnaj tzotelo tawet yalni,
xhi naj.
48 Yajaꞌ taqꞌwi Komam tet naj: