Yaqꞌ kawxo Komam Jesús huneꞌ naj kamnajilo huneꞌ isqꞌabꞌ
3
Yokto Komam Jesús yul iscapilla ebꞌnaj Israel hunelxa,
kꞌuxan xin ayikto huneꞌ naj kamnajilo huneꞌ isqꞌabꞌ.
Marcos 3:1-19
2 Ay xin hunteqꞌan ebꞌnaj ayiktoj yunhe yilni ta chaqꞌ kawxo Komam huneꞌ naj tuꞌ yinh istzꞌayikal xewilal,
kat yok ebꞌnaj aqꞌokꞌule yinh Komam yalni.
3 Yalni Komam tet naj kamnajilo isqꞌabꞌ tuꞌ:
—Ahanhwanoj kat hawok linhno koxol tiꞌanh,
xhi Komam.
4 Isqꞌambꞌen Komam tet ebꞌnaj ayikto yul capilla tuꞌ:
—¿Bꞌaytet taxka chisje kowatxꞌen yinh istzꞌayikal xewilal heyalni,
ham iskꞌulal mato istxꞌojal?
¿Chimyu janhten anma yaꞌay mato machoj?
xhi Komam.
Hayet yabꞌen ebꞌnaj yalni Komam hakaꞌ tuꞌ machi hunu ebꞌnaj taqꞌwi.
5 Ishowbꞌikanh Komam,
yekꞌ tꞌanhtꞌon yinh anma ayikto yul capilla tuꞌ.
Kaw xin bꞌiskꞌulal elpaxiko iskꞌul Komam yuto mach chisje ebꞌnaj yabꞌeto yinh tzet chal Komam.
Lahwi tuꞌ xin yalni Komam tet naj kamnajilo isqꞌabꞌ:
—Toholbꞌanhelto haqꞌabꞌ,
xhi Komam.
Istoholbꞌanhenilto naj isqꞌabꞌ,
iswatxꞌikaniloj.
6 Haxa yet yelti ebꞌnaj fariseo bꞌey tuꞌ yok ebꞌnaj islahtiꞌnhen isbꞌa yebꞌ ebꞌnaj ayko yinh ispartido naj Herodes yinh tzet chu yaqꞌnikamo ebꞌnaj Komam.
Txꞌiꞌal anma kawxikanh yu Komam Jesús
7 Lahwi tuꞌ,
isto Komam istiꞌ haꞌ lago yebꞌ iskuywom.
Kaw xin hantanhe anma ok tzujno yinta Komam.
Ay anma ay bꞌey ismajul Galilea,
aypaxo anma ay bꞌey ismajul Judea,
8 aypaxo xin anma ah konhobꞌ Jerusalén,
yebꞌ anma ah Idumea.
Aypaxo xin anma ay isqꞌaxebꞌikꞌto haꞌ niman Jordán apni.
Aypaxo anma tit yul ismajul konhobꞌ Tiro yebꞌ yul ismajul konhobꞌ Sidón.
Apni sunil anma tuꞌ yuto yabꞌelo sunil kꞌaybꞌalkꞌule xaꞌiswatxꞌe Komam.
9 Kaw xin txꞌiꞌal anma apni iskꞌatanh Komam,
yuxin yal Komam tet ebꞌyaꞌ iskuywom ta chíti ebꞌyaꞌ hunu teꞌ barco bꞌay chiꞌahto Komam yunhe machi isteniko isbꞌa anma yinh Komam.
10 Yuto kaw txꞌiꞌal mak kawxikanh yu Komam,
kaw xin tzetkꞌa anma yaꞌay apni yunhe istzabꞌni anma Komam yalni.
11 Xol anma istenbꞌa isbꞌa iskꞌatanh Komam tuꞌ,
ay anma ayko ischejabꞌ naj matzwalil yinh.
Hayet yilni ebꞌnaj Komam,
yay jahno ebꞌnaj sata Komam,
yahwi ebꞌnaj yinh kaw ip:
—Hach tiꞌ hach Iskꞌahol Komam Dios,
xhi ebꞌnaj.
12 Yajaꞌ kachwa Komam yinh ebꞌnaj ta mach chalilo ebꞌnaj Komam.
Issayilo Komam Jesús kabꞌlahonhwanh ebꞌyaꞌ chiꞌok ischejabꞌoj
13 Lahwi tuꞌ yahto Komam Jesús yinh istzalanil huneꞌ wonhan,
yawtenti Komam makta chal iskꞌul,
ishitziko makta yawte Komam tuꞌ iskꞌatanh.
14 Lahwi tuꞌ issikꞌlenilo Komam 12 (kabꞌlahonhwanh) ebꞌyaꞌ yu yokkano tzujno yinta Komam yebꞌ yu yalnikꞌo Istzotiꞌ Komam Dios tet anma.
15 Yaqꞌnikano Komam yip ebꞌyaꞌ ischejnilo ischejabꞌ naj matzwalil yinh anma.
16 Hak tiꞌ isbꞌi ebꞌyaꞌ hakaꞌ tiꞌ:
yaꞌ Simón,
Pedro yako Komam isbꞌiho yaꞌ,
17 yaꞌ Jacobo,
yebꞌ yaꞌ Juan;
ebꞌyaꞌ kawanh tiꞌ yuxhta isbꞌa,
iskꞌahol icham Zebedeo ye ebꞌyaꞌ,
Boanerges yakaniko Komam isbꞌiho ebꞌyaꞌ.
Huneꞌ bꞌihe tuꞌ chal yelapnoj Yuninal Kꞌuh.
18 Yebꞌpaxo xin yaꞌ Andrés,
yaꞌ Felipe,
yaꞌ Bartolomé,
yaꞌ Mateo,
yaꞌ Tomás,
yaꞌ Jacobo,a
iskꞌahol icham Alfeo.
Yaꞌ Tadeo,
yaꞌ Simón aytikꞌako yinh huneꞌ partido cananista,
19 yebꞌ naj Judas Iscariote,
naj aniko Komam yul isqꞌabꞌ kamikal.
Hal-laxi ta naj matzwalil chiꞌaqꞌni yip Komam Jesús
Lahwi tuꞌ yapni Komam Jesús yul huneꞌ nha yebꞌ ebꞌyaꞌ iskuywom.
20 Kaw xin txꞌiꞌal anma apnipaxo iskꞌatanh Komam,
kaw matxatikꞌa chu iswaꞌ Komam yebꞌ ebꞌyaꞌ iskuywom tuꞌ yu anma.
Marcos 3:20-35
21 Hayet yohtanhenilo ebꞌnaj yuxhta Komam ta apni Komam bꞌey huneꞌ nha tuꞌ,
yapni ebꞌnaj iqꞌwal yinh Komam yalni,
yuto chal-laxi tato xaꞌetaxto yul iswiꞌ Komam.
22 Aypaxo xin hunteqꞌan ebꞌnaj kuywawom yinh isley yaꞌ Moisés ispeto Jerusalén apni iskꞌatanh Komam,
yalni ebꞌnaj yinh Komam hakaꞌ tiꞌ:
—Naj tiꞌ chu yinilo naj ischejabꞌ naj matzwalil yinh anma yuto naj Beelzebú,
yahawil ebꞌnaj matzwalil,
chiꞌaqꞌni yip naj,
xhi ebꞌnaj.
23 Hayet yabꞌen Komam yalni ebꞌnaj hakaꞌ tuꞌ,
yawten Komam ebꞌnaj,
yaniko Komam huneꞌ yechel tiꞌ tet ebꞌnaj:
—¿Tzettaxka chu yinilo naj matzwalil hunuxa yet matzwalilal yinh anma?
24 Qꞌinaloj ta ay hunu konhobꞌ chispoh isbꞌa kat yaniko howal yinh hunun,
ta hak tuꞌ kaw yinh anhemi chitanhilo yip huneꞌ konhobꞌ tuꞌ.
25 Hakpax tuꞌ xin ta ay hunu nhahil ebꞌnaj yuxhtanhe isbꞌa chaqꞌle howal,
yinh anhemi chipax yip huneꞌ nhahil anma tuꞌ.
26 Hakmi tuꞌ chu naj matzwalil ta chispoh isbꞌa naj yebꞌ ischejabꞌ kat yaniko naj howal yinh ischejabꞌ tuꞌ,
ta hak tuꞌ kaw yinh anhemi chipax yip naj kat istanhilo naj.
27 »Qꞌinalo ta ay hunu naj yahaw nha kaw ay yip,
machmi hunu mak chu yokto yul yatut naj yelqꞌanolti tzet ay naj,
kachannhe tato chiqꞌoji naj elqꞌom tuꞌ yinh naj kat iskꞌalbꞌan naj naj,
haknhem tuꞌ chu yelqꞌanilti naj tzet ay naj.
28 »Yinh kaw yeli chiwalan teyet,
tzijxanhe mulehal chako anma,
maka tzijxanhe tzotiꞌ txꞌoj chala,
ayto nimankꞌulal yinh yu Komam Dios.
29 Yajaꞌ wal mak txꞌoj istzotel yinh Komam Espíritu Santo,
huneꞌ mak tuꞌ matxa bꞌaqꞌinhal ay nimankꞌulal yinh yu Komam Dios,
chíkanto ismul tuꞌ yinh sunilbꞌal tiempo,
xhi Komam.
30 Yal Komam hakaꞌ tuꞌ yuto yal ebꞌnaj tato ayko ischejabꞌ naj matzwalil yinh Komam.
Apni ismiꞌ Komam Jesús yebꞌ juxhta Komam ilwal yinh
31 Hayet yapni ismiꞌ Komam Jesús yebꞌ ebꞌnaj yuxhta ilwal yinh,
mach okto yul nha,
tonhe ischej ebꞌnaj awtelaxo Komam.
32 Xol anma tzꞌonhanayo iskꞌatanh Komam tuꞌ,
ay mak halni:
—Mam kuywawom,
aykꞌo hamiꞌ yebꞌ ebꞌnaj hawuxhta istiꞌ nha,
lanhan kaxhissayni ebꞌnaj,
xhi.
33 Istaqꞌwi Komam:
—¿Mak inmiꞌan yebꞌ wuxhtajan heyalni?
xhi Komam.
34 Yekꞌ tꞌanhtꞌon Komam yinh sunil mak tzꞌonhanayo iskꞌatanh tuꞌ,
yalni Komam xin: