2 Yichiko Komam iskuyni anma,

kaw xin txꞌiꞌal tzet yako Komam yecheloj yet chikuywahi.

Yet iskuywa Komam tuꞌ yalni Komam huneꞌ tiꞌ:

3 —Tinanh,

abꞌewe tzet chiwalan:

Ay huneꞌ naj to txiho trigo.

4 Hayet lanhan istxihnayo naj ixim,

ay ixim apni kꞌatna yul bꞌeh,

yul noꞌ chꞌik islohnoto ixim.

5 Aypaxo xin ixim apni kꞌatna xolaj chꞌen chꞌen bꞌay machi bꞌin txꞌo txꞌotxꞌ,

kaw xin pet ahilo ixim yu qꞌaxan xolaj chꞌen,

mach nahatto yehayto yich txꞌotxꞌ.

6 Yajaꞌ yet yahilo tzꞌayik yet yiqꞌnikanh yip qꞌaꞌ istajayo ixim,

yuto machi bꞌay yayto xeꞌ ixim yu chꞌen chꞌen.

7 Aypaxo xin ixim apni xolaj yinhatil teꞌ txꞌix,

hayet ischꞌibꞌkanh ixim ischꞌibꞌpaxokanh teꞌ,

yuxin tzꞌonbꞌayo ixim,

machi xin sat ixim yakoj.

8 Wal ixim apni kꞌatna xol txꞌo txꞌotxꞌ kaw kꞌul,

kaw saqꞌal yu ischꞌibꞌkanh ixim yebꞌ kaw yaqꞌ sat ixim.

Ay ixim 30 (lahonhebꞌ iskawinaj) yuteko sat yinh hunun iswiꞌ,

ay bꞌay 70 (lahonhebꞌ iskanhwinaj),

aypaxo bꞌay 100 (hokꞌal) yuko sat ixim yinh hunun iswiꞌ.

9 »Mak hex cheyabꞌe huneꞌ tiꞌ aqꞌwe heyanma hetxumniloj,

xhi Komam.

10 Hayet haxanhe iskuywom Komam Jesús kankano iskꞌatanh yebꞌ mak chitikꞌa abꞌen tzet chal Komam,

yok ebꞌyaꞌ isqꞌambꞌeno tet Komam yinh tzet chal yelapno huneꞌ yechel yako Komam yet iskuywahi.

11 Istaqꞌwi Komam tet ebꞌyaꞌ:

—Teyetnhe chaqꞌ Komam Dios heyohtanhelo hunteqꞌan ewantikꞌa yehi,

yunhe hetxumni yinh tzet chu yok anma yul isqꞌabꞌ Komam Dios.

Wal tet komon anma xin yechelnhe chaqꞌ Komam tet.

12 Waxanhka hajan isbꞌaqꞌ sat,

yajaꞌ mach chila,

waxanhka chabꞌe,

yajaꞌ mach chitxumchalo yu,

yuxin mach chako isbꞌa yul isqꞌabꞌ Komam Dios kat yaqꞌlax nimankꞌulal yinh ismul,^a

xhi Komam.

13 Yalnipaxo Komam tet iskuywom:

—Ta machi txumchalo heyu yinh naj txihom trigo wakojan yechelo teyet,

¿tzikꞌanabꞌ xin chu hetxumnilo hunteqꞌanxa yechel chiwalan chal tuꞌ?

14 »Naj txihom trigo tuꞌ,

yechel yeko naj yinh mak chihalnikꞌo Istzotiꞌ Komam Dios.

15 Ixim hinhat apni yul bꞌeh,

yechel yinh anma chiꞌabꞌen Istzotiꞌ Komam Dios,

yajaꞌ lahwi yabꞌeni kat yul naj matzwalil yinolo yinh yanma.

16 Ixim aykꞌay xolaj chꞌen chꞌen,

yechel yinh anma chiꞌabꞌen Istzotiꞌ Komam Dios kat ischahni yinh tzalahilal yul yanma.

17 Yajaꞌ yu maxhto yip yanma yinh Komam yuxin hayet chul ilwebꞌal yibꞌanh yebꞌ yet chikajlax yu Istzotiꞌ Komam,

kaw yinh anhe chilo yanma yinh Komam.

18 »Ixim hinhat apni xolaj yinhatil teꞌ txꞌix yechel yinh mak chiꞌabꞌen Istzotiꞌ Komam Dios,

19 yajaꞌ yu ekꞌbꞌal chako yinh iskꞌul yinh tzet ay yul sat yibꞌanhqꞌinal tiꞌ kat yaniko yanma yinh qꞌalomal,

chochenpaxto sunil tzet ye tuꞌ.

Haꞌ sunil hunteqꞌan tuꞌ chiꞌaqꞌni kꞌayolo Istzotiꞌ Komam yul yanma,

hak tuꞌ xin mach chichꞌibꞌ yinh yet Komam.

20 »Haxa ixim hinhat apni xol txꞌo txꞌotxꞌ kaw kꞌul,

yechel yinh anma chiꞌabꞌen Istzotiꞌ Komam Dios kat ischahni yul yanma.

Lahan anma tuꞌ hakaꞌ ixim kaw niman sat yaqꞌa;

hakaꞌ ixim yako 30 (lahonhebꞌ iskawinaj) sat yinh hunun iswiꞌ,

hakaꞌ ixim 70 (lahonhebꞌ iskanhwinaj) yebꞌ ixim yako 100 (hokꞌal) sat yinh hunun iswiꞌ,

xhi Komam.

21 Yalnipaxo Komam Jesús:

—Yet chikotzujbꞌaniko qꞌaꞌ yinh hunu cantil,

mach chikonhohbꞌako hunu kahon yibꞌanh,

mach chijapaxikto yalanh txꞌat.

Wal xin nahat chikotꞌunhbꞌakanh yunhe ismujli.

22 Hakpax tuꞌ xin sunil tzet ewanyehi,

chiꞌixtanhwiloj yebꞌ sunil tzet ye tuꞌ mach ohtabꞌiloj chiꞌohtanhelaxi.

23 Makex cheyabꞌe huneꞌ tiꞌ,

aqꞌwe heyanma hetxumniloj,

xhi Komam.

24 Yalnipaxo Komam:

—Kam cheyabꞌe tzet chiwaltiꞌan yuto hakaꞌ heyaniko yinh heyanma heyabꞌeni,

hak tuꞌ chu yaqꞌni Komam Dios hetxumuꞌ,

kaw xin ekꞌbꞌalto chu yaqꞌni Komam hetxumuꞌ.

25 Yuto haꞌ mak chaqꞌ yanma istxumni,

chaqꞌpaxo Komam yaqꞌbꞌil tet,

yajaꞌ wal mak mach chikam iskꞌul istxumni,

haꞌ nichꞌan etza chitxumchalo yu chiꞌilaxilo tet,

xhi Komam.

26 Yalnipaxo Komam Jesús:

«Anma chiꞌok yul isqꞌabꞌ Komam Dios,

lahan hakaꞌ hunu naj chitxihnayo ixim trigo sat txꞌo txꞌotxꞌ.

27 Waxanhka chiway naj aqꞌbꞌalil kat yahwano naj tzꞌayikal,

yajaꞌ ixim hinhat tuꞌ chul iskꞌul ixim kat ischꞌibꞌ ixim;

mach yohtajo naj yinh tzet chu ischꞌibꞌ ixim.

28 Yul txꞌotxꞌ chiswatxꞌe isbꞌa ixim;

haꞌ yinh bꞌabꞌelal chiꞌahilo ixim,

haxa yinh tzujanilxa xin kat ispoh ixim,

lahwi tuꞌ kat yok yul ixim.

29 Haxa yet chiqꞌanbꞌilo ixim,

kat yul naj iskꞌupnokanh ixim yuto istiempohalxa yah ixim,»

xhi Komam.

30 Yalnipaxo Komam Jesús:

«¿Tzettaxka chiyu ischꞌibꞌ isbꞌisil anma chiꞌok yul isqꞌabꞌ Komam Dios chute hetxumni?

31 Wal xin lahan hakaꞌ nichꞌan yinhatil teꞌ mostaza chitzꞌunlaxi.

Teꞌ hinhat mostaza tuꞌ,

haꞌ teꞌ kaw nichꞌanchꞌan xol sunil ej teꞌ hinhat,

32 yajaꞌ yet chitzꞌunlax teꞌ xin kat ischꞌibꞌkanh teꞌ,

haꞌ xin teꞌ ekꞌbꞌal nimajal chu sata sunil ej teꞌ itah.

Kaw nimej chu isqꞌabꞌ teꞌ yuxin chiꞌapni noꞌ chꞌik iswatxꞌe yatut xol isqꞌabꞌ teꞌ,»

xhi Komam.

33 Hak tuꞌ yu iskuyni Komam Jesús anma yinh Istzotiꞌ Komam Dios yet yaniko Komam hunteqꞌan yechel tet anma.

Kaw txꞌiꞌal yechel yako Komam,

hatatikꞌa hanta chiqꞌoji anma istxumni.

34 Sunil kuybꞌanile yaqꞌ Komam,

yechelnhe yako Komam tet anma.

Wal tet ebꞌyaꞌ iskuywom Komam xin,

yal Komam yinh habꞌan yinh tzet chal yelapnoj.

35 Yet qꞌejbꞌiyalil yinhtikꞌa huneꞌ tzꞌayik tuꞌ,

yalni Komam Jesús tet ebꞌyaꞌ iskuywom:

—Tonhwe isqꞌaxebꞌikꞌto haꞌ lago tiꞌ,

xhi Komam.

36 Hak tuꞌ yu iskankano anma istiꞌ haꞌ,

yinito ebꞌyaꞌ Komam yul teꞌ barco bꞌay ayxakto Komam tuꞌ.

Aypaxo xin hunteqꞌan teꞌ barco ok tzujno yinta teꞌ bꞌay ayikto Komam.

37 Hayet ayko teꞌ yibꞌanh ha haꞌ istit huneꞌ niman jaqꞌeqꞌ,

yichiko jaqꞌeqꞌ ismaqꞌnikto haꞌ yul teꞌ barco tuꞌ,

kaw xin nohayto haꞌ yul teꞌ.

38 Wal Komam xin wayo chu yinhilto isyutz teꞌ,

qꞌeyanayo yibꞌanh huneꞌ isqꞌanh wiꞌe.

Yok ebꞌyaꞌ yinolo iswayanh Komam,

yalni ebꞌyaꞌ:

—¡Mam kuywawom!

Kaw matzet chal nino hakꞌul,

lanhan kotoh yich haꞌ lah,

xhi ebꞌyaꞌ.

39 Hayet yabꞌen Komam huneꞌ tuꞌ yahwano Komam,

iskachni Komam jaqꞌeqꞌ yebꞌ ha haꞌ:

—¡Matxa chexbꞌili,

linhbꞌawe hebꞌa!

xhi Komam.

Yinhnhena tuꞌ islinhbꞌan isbꞌa jaqꞌeqꞌ yebꞌ ha haꞌ,

ispaxtzꞌinhnahi.

40 Yalni Komam tet ebꞌyaꞌ iskuywom tuꞌ:

—¿Tzet yinh xin kaw chexxiwi?

Kaw mach chikawxi hekꞌul yinh Komam Dios,

xhi Komam.

41 Wal ebꞌyaꞌ iskuywom Komam tuꞌ kaw xiw ebꞌyaꞌ,

yalni ebꞌyaꞌ tet hunun:

—¿Mak anmahil yaꞌ tiꞌ yuxin chisyije jaqꞌeqꞌ yebꞌ ha haꞌ yinh tzet chal yaꞌ?

xhi ebꞌyaꞌ yinh Komam.