Yaqꞌ kawxo Komam Jesús huneꞌ naj ayko ischejabꞌ naj matzwalil yinh
5
Lahwi tuꞌ,
yapni Komam Jesús isqꞌaxebꞌikꞌto haꞌ lago yebꞌ iskuywom yul ismajul Gadara.a
Marcos 5:1-20
2 Hayet yel Komam yul teꞌ barco tuꞌ,
yapni huneꞌ naj ayko ischejabꞌ naj matzwalil yinh iskꞌatanh Komam.
Naj tuꞌ ispeto naj xolaj panteón,
3 kaw xin haꞌ bꞌey tuꞌ hunelnhe ye naj.
Maxhtikꞌa xin chaqꞌ kꞌalbꞌa isbꞌa naj waxanhka chikꞌalbꞌalax naj yu chꞌen cadena.
4 Kaw txꞌiꞌal el kꞌalbꞌalax isqꞌabꞌ naj yebꞌ yoj naj yu chꞌen cadena,
yajaꞌ chislinhto naj chꞌen,
kaw machi hunu mak chiqꞌoji yinh naj.
5 Yet tzꞌayikal yebꞌ yet aqꞌbꞌalil chꞌekꞌ naj yinhla istzalanil witz yebꞌ xolaj panteón,
kaw xin chiꞌel yaw naj yet chiꞌekꞌ naj;
chixin ismaqꞌiko isbꞌa naj yinh ej chꞌen chꞌen yekꞌi.
6 Yet nahatto ay naj yilnito naj Komam,
istit naj yinh anhe isjahbꞌanayo isbꞌa sata Komam.
7-8 Yalni Komam:
—¡Hach matzwalil,
elanh yinh naj tiꞌ!
xhi Komam.
Yah yaw naj yinh kaw ip:
—¿Tzet hawok winhan Jesús,
Iskꞌahol Dios kaw aykano yip?
Kaw chinqꞌanan tawet,
mach chawaqꞌ ekꞌoyaꞌ wanmahan,
xhi naj.
9 Isqꞌambꞌen Komam tet naj:
—¿Tzet habꞌi?
xhi Komam.
Istaqꞌwi naj:
—Legiónb inbꞌihan yuto kaw niman jiqꞌni kobꞌahanh,
xhi naj.
10 Kaw xin isqꞌan ebꞌnaj ischejabꞌ naj matzwalil tuꞌ tet Komam tato mach chischejilo Komam ebꞌnaj yul ismajul huneꞌ txꞌo txꞌotxꞌ bꞌay ay tuꞌ.
11 Kꞌuxan xin tzetkꞌa noꞌ txitam lanhan islow yinh istzalanil huneꞌ witz tuꞌ,
12 yuxin yal ebꞌnaj ischejabꞌ naj matzwalil tuꞌ tet Komam:
—Chejonhtojanh yinh noꞌ txitam tuꞌ lah,
xhi ebꞌnaj.
13 Istaqꞌwi Komam:
—Kexwej,
xhi Komam.
Hak tuꞌ yu yelkano ebꞌnaj ischejabꞌ naj matzwalil yinh naj,
istokano ebꞌnaj yinh noꞌ txitam tuꞌ,
aymi noꞌ kabꞌo mil.
Hayet yapni ebꞌnaj ischejabꞌ naj matzwalil yinh noꞌ xin,
isqꞌojnito isbꞌa noꞌ sat pahaw yayapno noꞌ yul haꞌ lago,
ishiqꞌnito noꞌ haꞌ.
14 Hayet yilni ebꞌnaj tanhem txitam huneꞌ tuꞌ yelkanh ebꞌnaj,
isto ebꞌnaj yalno tet ebꞌnaj lanhan ismunla iskawilal tuꞌ yebꞌ tet anma ay yul konhobꞌ tuꞌ.
15 Hayet yapni anma iskꞌatanh Komam,
yilni anma naj bꞌay aytikꞌako ebꞌnaj ischejabꞌ naj matzwalil,
ayxako xil isqꞌap naj,
kaw xiw anma yilni huneꞌ tuꞌ.
16 Haꞌ xin anma ilni yinh tzet iswatxꞌe Komam yinh naj bꞌay aytikꞌako ischejabꞌ naj matzwalil tuꞌ,
yebꞌ yinh tzet yu isto noꞌ txitam sat pahaw,
haꞌ ebꞌnaj halni tet hunteqꞌanxa anma apni ilnoj.
17 Yichiko anma yalni tet Komam tato chiꞌel Komam sat istxꞌotxꞌ ebꞌnaj.
18 Hayet yokto Komam yul teꞌ barco,
yet ismeltzoxa,
yalni naj bꞌay el ischejabꞌ naj matzwalil tet Komam tato chischahto Komam naj yintaj.
19 Yajaꞌ xin mach chisje Komam,
yalni Komam tet naj:
—As paxanhto hawatut kat hawalni tet sunil mak ayto hawu habꞌa yebꞌi yinh tzet mayu hakawxikanh yebꞌ iskꞌulchꞌanil iskꞌul Komam tawinh,
xhi Komam.
20 Hayet yabꞌen naj huneꞌ tuꞌ ispaxto naj,
yichiko naj ispujbꞌanikꞌo yulaj konhobꞌ ay yul ismajul Decápolisc yinh tzet yu iskawxikanh naj.
Wal anma xin kaw chikꞌay iskꞌul yabꞌen tzet chal naj.
Hulkanh iskꞌul iskutzꞌin naj Jairo yebꞌ xin anhcha huneꞌ ix
21 Hayet yekꞌilo Komam Jesús isqꞌaxebꞌikꞌto haꞌ lago,
kaw hantanhe anma apni iskꞌatanh Komam,
yuxin kankano Komam istiꞌ haꞌ.
Marcos 5:21-43
22 Lahwi tuꞌ,
yapni huneꞌ naj chiyij Jairo iskꞌatanh Komam,
yahawil yeko naj yinh capilla.
Hayet yapni naj iskꞌatanh Komam yay jahno naj yich yoj Komam.
23 Yok naj isqꞌanno tet Komam hakaꞌ tiꞌ:
—Mamin,
ay huneꞌ nichꞌan inkutzꞌinan lanhanxa iskami,
estam chaxhto nino wintajan kat hawanayo haqꞌabꞌ yibꞌanh ix haxinwal chikawxikanh ix,
hak tuꞌ xin mach chikam ix,
xhi naj.
24 Hak tuꞌ yu isto Komam yinta naj,
kaw xin hantanhe anma okpaxo tzujno yinta Komam,
toxanhe xin chisteniko isbꞌa anma yinh Komam.
25 Xol anma tuꞌ ayko huneꞌ ix 12 (kabꞌlahonhebꞌxa) habꞌil machi linhi yay istxꞌawobꞌal.
26 Kaw txꞌiꞌalxa ebꞌnaj doctor bꞌay xaꞌekꞌ ix,
kaw xaꞌistanhtzelo ix sunil tzet aya yu yanhchahi,
yajaꞌ maxhtikꞌa chiꞌanhcha ix;
wal xin kaw ip yahkanh huneꞌ yabꞌil tuꞌ yinh ix.
27 Yajaꞌ xayabꞌe ix yinh ej iskꞌulal chiswatxꞌe Komam,
yuxin hitziko ix yinta Komam xol anma tuꞌ,
istzabꞌni ix xil isqꞌap Komam.
28 Yuto istxum ix hakaꞌ tiꞌ:
«Waxanhka hanhe xil isqꞌap Komam chintzabꞌan kat inkawxikanhan,»
xhi ix ischukil.
29 Lanhantotikꞌa istzabꞌni ix xil isqꞌap Komam,
islinhinakanh yinh ix,
iskawxinalo ix.
30 Wal Komam Jesús yohtanheloj tato ay huneꞌ mak kawxilo yu yip,
yuxin meltzo Komam yintaj,
istꞌanhxito yinh anma tuꞌ,
yalni Komam:
—¿Mak makintzabꞌnihan?
xhi Komam.
31 Istaqꞌwi ebꞌyaꞌ iskuywom Komam:
—Mamin,
¿tom mach chawila tato kaw hantanhe anma chisteniko isbꞌa tawinh kat haqꞌambꞌenpaxoj mak makaxhtzabꞌni?
xhi ebꞌyaꞌ.
32 Yajaꞌ yexnhe yekꞌ tꞌanhtꞌon Komam yinh anma tuꞌ yu yilni mak tzabꞌni Komam.
33 Wal ix xin toxanhe chibꞌayla yah ix yu xiwkilal,
ishitziko ix,
yay jahno ix sata Komam,
yalnilo ix yinh tzet yu iskawxikanh.
34 Yalni Komam tet ix:
—Miyay,
makaxhkawxinakanh yu maxawako hawanma winhan,
paxanhto yinh tzalahilal,
kawachxa tinanh,
xhi Komam.
35 Lanhantotikꞌa xin,
yapni hunteqꞌan ebꞌnaj ispeto bꞌey yatut naj Jairo,
ismam ix nichꞌan yaꞌay tuꞌ,
yalni ebꞌnaj tet naj:
—Mam Jairo,
wal ix hakutzꞌin makamna ix,
nabꞌxanhe chawito yaꞌ kuywawom tiꞌ tawintaj,
xhi ebꞌnaj.
36 Hayet yabꞌen Komam yinh tzet yal ebꞌnaj tuꞌ,
yalni Komam tet naj Jairo:
—Mach chawako yinh hakꞌul,
wal xin ako hawanma yinh Komam Dios,
xhi Komam.
37 Mach xin isje Komam tato chito anma yintaj,
kachannhe yaꞌ Pedro,
yaꞌ Jacobo yebꞌ yaꞌ Juan yito Komam;
yaꞌ Jacobo yebꞌ yaꞌ Juan tuꞌ,
yuxhta isbꞌa ebꞌyaꞌ.
38 Hayet yapni Komam yatut naj Jairo tuꞌ,
yilni Komam tato xanhe chiwejcha anma yoqꞌ yu bꞌiskꞌulal yinh ix.
39 Yokto Komam yul nha tuꞌ,
yalni Komam tet anma:
—¿Tzet yinh xin chexwejcha heyoqꞌi?
Ix nichꞌan tiꞌ mach kamnajo ix,
wal xin tonhe chiway ix,
xhi Komam.
40 Hayet yabꞌen anma yalni Komam hakaꞌ tuꞌ,
yok anma tzebꞌo yinh Komam.
Lahwi tuꞌ ischejnilti Komam sunil mak ayikto bꞌey tuꞌ,
haxanhe xin ismam yebꞌ ismiꞌ ix yebꞌ ebꞌyaꞌ oxwanh tuꞌ okto yinta Komam bꞌay ay ix nichꞌan tuꞌ.
41 Yok tzabꞌno Komam yinh isqꞌabꞌ ix,
yalni Komam tet ix:
—¡Talita cumi!
xhi Komam.
Haꞌ chal yelapno tuꞌ:
“¡Hach nichꞌan tzꞌul,
haninan chiwalan tawet,
ahanhwanoj!”