Yaqꞌ kawxo Komam Jesús huneꞌ naj mach chibꞌili isnimanil
9
Lahwi tuꞌ xin yokto Komam Jesús yul teꞌ barco,
ismeltzoti Komam isqꞌaxepxakꞌti haꞌ lago tuꞌ,
yapni Komam yul iskonhobꞌ.
2 Yilaxto huneꞌ naj mach chibꞌili isnimanil iskꞌatanh Komam sat bꞌatxteꞌ.
Hayet yilni Komam xin tato kaw ayko yanma ebꞌnaj initi naj tuꞌ yinh Komam,
yalni Komam tet naj yaꞌay tuꞌ:
—Hach wet anmahil ako yip hawanma,
tinanh chiꞌaqꞌlaxkano nimankꞌulal yinh hamul,
xhi Komam tet naj.
3 Ay xin hunteqꞌan ebꞌnaj kuywawom yinh isley yaꞌ Moisés,
istxum hakaꞌ tiꞌ:
«Huneꞌ naj tiꞌ kaw txꞌoj istzotel naj yinh Komam Dios,
yuto chako isbꞌa naj Diosal,»
xhi ebꞌnaj yul yet ischukil.
4 Wal Komam xin,
yohta tzet chiꞌekꞌ yinh isnabꞌal ebꞌnaj,
yuxin yal Komam:
—¿Tzet yinh xin kaw txꞌoj chiꞌekꞌ yinh henabꞌal?
5 ¿Bꞌaytet subꞌuta walnihan heyalni,
tom “chꞌaqꞌlax nimankꞌulal yinh hamul,”
mato “ahanhwanoj kat hapaxtoj?”
6 Tinanh xin chinyehan heyilaꞌ tato Hanin Aqꞌbꞌilintijan texol yu Komam Dios,
ay wipan waqꞌnihan nimankꞌulal yinh ismul anma yul sat yibꞌanhqꞌinal tiꞌ,
xhi Komam.
Yalni Komam tet naj yaꞌay tuꞌ:
—Ahanhwanoj,
ikanh habꞌatxteꞌ tiꞌ kat hapaxto hawatut,
xhi Komam.
7 Yinhnhena tuꞌ xin yahwano naj,
ispaxto naj yatut.
8 Hayet yilni anma huneꞌ tuꞌ kaw xiwkanokanh,
yok anma yaqꞌno tzalaho iskꞌul yinh Komam Dios,
yuto kaw txꞌiꞌal yip Komam isye tet anma.
Yet yawten Komam Jesús yaꞌ Mateo iskuywomoj
9 Lahwi tuꞌ isto Komam Jesús.
Hayet yekꞌto Komam xin,
yilni Komam huneꞌ yaꞌ iqꞌomilo tohlabꞌal,
Mateo isbꞌi.
Tzꞌonhanayo yaꞌ bꞌay chiꞌel chꞌen tohlabꞌal chiꞌalaxto bꞌey Roma.
Yalni Komam Jesús tet yaꞌ:
—Okanh tzujno wintajan inkuywomojan,
xhi Komam.
Hayet yabꞌen yaꞌ huneꞌ tuꞌ,
yahwano yaꞌ,
yok tzujno yaꞌ yinta Komam.
10 Lahwi tuꞌ yawtelax Komam waꞌo yu yaꞌ yul yatut,
yok Komam sat mexha yebꞌ ebꞌyaꞌ iskuywom,
yebꞌpaxo xin hunteqꞌanxa ebꞌnaj iqꞌomilo tohlabꞌal,
yebꞌ hunteqꞌan anma txꞌoj isbꞌeybꞌal.
11 Hayet yilni ebꞌnaj fariseo huneꞌ tuꞌ,
yalni ebꞌnaj tet ebꞌyaꞌ iskuywom Komam:
—¿Tzet yinh xin chiwaꞌ naj hekuywawom tiꞌ xol ebꞌnaj iqꞌomilo tohlabꞌal,
yebꞌ xol ebꞌnaj txꞌoj isbꞌeybꞌal?
xhi ebꞌnaj.
12 Hayet yabꞌen Komam huneꞌ tuꞌ xin,
yalni Komam tet ebꞌnaj:
—Haꞌ anma mach yaꞌo ay,
matzet chiꞌokniko naj anhlom yu,
to haꞌ anma yaꞌay haꞌ chiꞌokniko naj anhlom yu.
13 Yuxin chiwalan teyet,
saywe yul Yum Komam Dios kat hetxumni yinh bꞌay chal hakaꞌ tiꞌ:
“Haꞌ huneꞌ chiwochehan ta chitzꞌay hekꞌul yinh heyet anmahil,
maxhnhetaj heyaqꞌni hexahanbꞌal wetan,”a
xhihayoj.
Mach hulnajojinan wawteꞌan anma chalni ta kꞌul yekoj,
¡machoj!
Wal xin to yu anma chistxumu ta mulum,
yuxin hulnajinan,
yunhe isbꞌejnikano yaniko ismul,
xhi Komam.
Mach chischah isbꞌa payat bꞌeybꞌale yebꞌ akꞌ bꞌeybꞌale
14 Yet hunel apni ebꞌyaꞌ iskuywom yaꞌ Juan anikanh haꞌ iswiꞌ anma iskꞌatanh Komam Jesús,
isqꞌambꞌen ebꞌyaꞌ tet Komam:
—Hanhonhtiꞌanh yebꞌ ebꞌnaj fariseo kaw chikoyijehanh huneꞌ yet mach chonhwaꞌ kotxahli.
Walpaxo ebꞌnaj hakuywom xin,
¿tzet yinh xin mach chisyije ebꞌnaj huneꞌ tuꞌ?
xhi ebꞌyaꞌ.
15 Yalni Komam tet ebꞌyaꞌ:
—Qꞌinalo tato ay hunu mohyilal tinanh,
aypaxo xin anma awtebꞌil yinh mohyilal tuꞌ.
¿Tom xin chiꞌok anma tuꞌ yijle wahil yet aykꞌo naj mohyom tuꞌ?
¡Machoj!
Wal xin hato yet chiꞌapni istiempohal yilaxilo naj mohyom tuꞌ xol anma,
katto yok anma yinh yijlen wahil,
xhi Komam.
16 Yalnipaxo Komam:
—Mach chu yalaxiko hunu qꞌap qꞌap akꞌto isbꞌujilo hunu xilqꞌape xilxa,
yuto hayet chitxꞌahlax qꞌap,
chimokꞌi qꞌap akꞌ ayko isbꞌujilo qꞌap xilxa tuꞌ,
kat xin istzilmokanto huneꞌ xilqꞌape tuꞌ.
17 Hakpax tuꞌ xin,
mach chu yalaxayto akꞌ vino yul noꞌ tzꞌum xilxa yuto chilinhmo noꞌ kat ismalto vino tuꞌ,
kat yetaxpaxkanto noꞌ tzꞌum tuꞌ.
Wal xin yul noꞌ tzꞌum akꞌto chiꞌalaxayto akꞌ vino,
hak tuꞌ xin mach chiꞌetaxto teꞌ vino yebꞌ noꞌ tzꞌum,
xhi Komam Jesús tet ebꞌyaꞌ iskuywawom yaꞌ Juan.
Hulkanh iskꞌul iskutzꞌin naj Jairo yebꞌ xin anhcha huneꞌ ix pitni xil isqꞌap Komam Jesús
18 Hayet lanhan yalni Komam Jesús hunteqꞌan kuybꞌanile tuꞌ,
yapni huneꞌ naj yahawil yinh ebꞌnaj Israel iskꞌatanh Komam,
yalni naj tet Komam:
—Mamin,
ay huneꞌ nichꞌan inkutzꞌinan lanhanto iskamayoj,
yaj ta chaxhto wintajan kat hawanayo haqꞌabꞌ yibꞌanh ix,
chihulkanh iskꞌul ix,
xhi naj tet Komam.
19 Lahwi tuꞌ yah linhno Komam,
isto yinta naj yebꞌ ebꞌyaꞌ iskuywom.
20 Xol anma tzujan yinta Komam tuꞌ xin,
ay huneꞌ ix yaꞌay,
12 (kabꞌlahonhebꞌxa) habꞌil mach chilinhi yay istxꞌawobꞌal ix.
Yuxin hitziko ix iskꞌatanh Komam,
ispitni ix istiꞌ xil isqꞌap Komam,
21 yuto istxum ix hakaꞌ tiꞌ:
«Walka hanhe istiꞌ xil isqꞌap Komam chinpitan kat inkawxokanhan,»
xhi ix.
22 Wal Komam xin,
meltzo yintaj,
yok tꞌanhno Komam yinh ix,
yalni Komam hakaꞌ tiꞌ:
—Ako yip hawanma,
miyay.
Makaxhkawxikanh tinanh yuto maxawako hawanma winhan,
xhi Komam tet ix.
Yinhnhena tuꞌ xin iskawxikanh ix.
23 Hayet yapni Komam Jesús bꞌey yatut naj yahawil ebꞌnaj Israel tuꞌ xin,
yilni Komam tato ayxakꞌo ebꞌnaj chiꞌaniko teꞌ suꞌ yinh ismujubꞌal ix nichꞌan,
yebꞌpaxo xin wejanxanhe anma yoqꞌi.
24 Hayet yilni Komam huneꞌ tuꞌ,
yalni Komam tet anma:
—Elanhwetoj,
ix nichꞌan tiꞌ mach kamnajo ix,
tonhe chiway ix,
xhi Komam.
Wal anma tuꞌ xin ok tzebꞌo yinh tzet yal Komam.
25 Lahwi ischejni Komam eloti sunil anma yul nha,
yokto Komam iskꞌatanh ix nichꞌan tuꞌ.
Yok tzabꞌno Komam yinh isqꞌabꞌ ix,
yahwano ix.
26 Sunil anma ay yul ismajul huneꞌ konhobꞌ tuꞌ,
abꞌenilo tzet yuhi.
Yaqꞌ hajlo Komam Jesús sat kawanh ebꞌnaj mach chu yilni
27 Yet yel Komam bꞌey tuꞌ,
ay kawanh ebꞌnaj mach chu yilni ok tzujno yinta Komam.
Chixinawito ebꞌnaj tet Komam hakaꞌ tiꞌ:
—Mamin,
iskꞌahol jichmam David,
tzꞌayojabꞌ hakꞌul jinhanh,
xhi ebꞌnaj.
28 Hayet yapni Komam yul nha,
yokpaxto ebꞌnaj yul nha yinta Komam,
yalni Komam tet ebꞌnaj:
—¿Chimheyayto yul heyanma tato chu waqꞌni hajlojan hesat?
xhi Komam.
Istaqꞌwi ebꞌnaj:
—Hoꞌ Mamin,
chijaytojanh yul janmahanh,
xhi ebꞌnaj.
29 Yaniko Komam isqꞌabꞌ yinh isbꞌaqꞌ sat ebꞌnaj,
yalni Komam tet ebꞌnaj:
—Yubꞌojabꞌ hakaꞌ cheyoche yuto maxeyako heyanma winhan,
xhi Komam tet ebꞌnaj.
30 Hak tuꞌ xin yu ishajlo isbꞌaqꞌ sat ebꞌnaj,
yalnikano Komam tet ebꞌnaj:
—Tinanh xin,
machi mak tet cheyalikꞌo huneꞌ tiꞌ,
xhi Komam.
31 Yajaꞌ hanikꞌixto chito ebꞌnaj,
yichiko ebꞌnaj yalni tet anma yinh tzet yu ishajlo isbꞌaqꞌ sat ebꞌnaj.
Tzotelkanh huneꞌ naj maxhtikꞌa chu istzoteli
32 Hayet lanhan ispaxto ebꞌnaj hajlo isbꞌaqꞌ sat tuꞌ,
yapni hunteqꞌan ebꞌnaj yaqꞌnokano huneꞌ naj iskꞌatanh Komam Jesús.
Huneꞌ naj tuꞌ mach chu istzotel naj yuto ayko ischejabꞌ naj matzwalil yinh naj.
33 Hayet ischejnilo Komam ischejabꞌ naj matzwalil yinh naj,
yichiko naj istzoteli.
Wal anma ilni huneꞌ tuꞌ xin kaw kꞌaykanokanh iskꞌul.
Yalni hakaꞌ tiꞌ:
—Maxhto hunelo chijil yuni yul konhobꞌ Israel hakaꞌ huneꞌ tiꞌ,
xhi anma.
34 Wal ebꞌnaj fariseo xin yal ebꞌnaj hakaꞌ tiꞌ:
—Huneꞌ naj tiꞌ chilo naj ischejabꞌ naj matzwalil yinh anma yu yip naj matzwalil,
xhi ebꞌnaj yinh Komam.
Kaw tzꞌay iskꞌul Komam Jesús yinh anma
35 Kaw sunil yulajla konhobꞌ yebꞌ yulajla aldea bꞌay ekꞌ Komam Jesús,
iskuyni Komam anma yulaj iscapilla ebꞌnaj Israel yul hunu konhobꞌ tuꞌ.
Yalnikꞌo Komam yinh tzet chu yok anma yul isqꞌabꞌ Komam Dios,
yaqꞌni kawxo Komam anma tzijxanhe yabꞌilal ayko yinh.
36 Hayet yilniko Komam yinh anma xin kaw tzꞌaykanh iskꞌul,
yuto bꞌejbꞌilkanoj,
mach chitxumcha yu tzet wal yuten isbꞌa.
Hakaꞌ noꞌ meꞌ machi mak chitanheni,
hak tuꞌ ye anma.
37 Yuxin yal Komam tet ebꞌyaꞌ iskuywom:
«Hunteqꞌan anma tiꞌ lahan hakaꞌ ixim trigo lanhan isqꞌanbꞌiloj.
Kaw hantanhe munil,
yajaꞌ haywanhnhe ebꞌnaj munlawom.
38 Yuxin qꞌanwe tet Komam Dios yahaw munil,
haxinwal chati Komam ismunlawom xol anma,»
xhi Komam tet ebꞌyaꞌ.