Ebꞌix kolwa yinh Komam Jesús
8
Lahwi tuꞌ xin yekꞌ Komam Jesús yulaj konhobꞌ yebꞌ yulaj aldea yalnikꞌo Tzotiꞌ Kꞌul yinh tzet chu yok anma yul isqꞌabꞌ Komam Dios.
Haꞌ hun ebꞌyaꞌ 12 (kabꞌlahonhwanh) ischejabꞌ Komam tzujan yintaj.
2 Tzujanpaxo hunteqꞌan ebꞌix ix bꞌay yilo Komam ischejabꞌ naj matzwalil,
yebꞌ hunteqꞌanxa ebꞌix nan yabꞌilal aytikꞌako yinh,
kawxikanh yu Komam.
Xol ebꞌix tuꞌ ayko ix María ah Magdala,
ix bꞌay yilo Komam hujwanh ischejabꞌ naj matzwalil.
3 Yebꞌ ix Juana,
yixal naj Chuza,
naj yahaw yeko yinh ismunil naj Herodes,
yebꞌpaxo ix Susana,
yebꞌ hunteqꞌanxa ebꞌix,
kolwa ebꞌix yinh Komam Jesús yebꞌ yinh ebꞌyaꞌ ischejabꞌ Komam,
yinh tzet ay yul isqꞌabꞌ.
Mujeres Discípulos
Yechel yinh huneꞌ naj txihom trigo
4 Tzetkꞌa anma yul hunun konhobꞌ hul ilno Komam Jesús.
Lahwi iskutxbꞌan isbꞌa anma xin,
yalni Komam huneꞌ yechel tiꞌ tet anma:
5 «Ay huneꞌ naj to txiho trigo.
Hayet lanhan istxihni naj ixim trigo tuꞌ,
ay ixim apni kꞌatna yul bꞌeh.
Haꞌ ixim tuꞌ tonhe xanhlaxto ixim yu anma.
Haxa xin noꞌ chꞌik hul sikꞌnokanh ixim.
6 Aypaxo ixim apni kꞌatna xolaj chꞌen chꞌen.
Hayet yahilo ixim yinh anhe tajilo ixim yuto mach ischakꞌanil sat txꞌotxꞌ.
7 Aypaxo xin ixim aykꞌay xol yinhatil teꞌ txꞌix.
Hayet ischꞌibꞌkanh ixim,
ischꞌibꞌpaxokanh teꞌ.
Hak tuꞌ xin yu istzꞌonbꞌayo ixim.
8 Haxa hunmajanxa ixim ay xol txꞌo txꞌotxꞌ kaw kꞌul.
Hayet ischꞌibꞌkanh ixim,
kaw kꞌul yul ixim yaqꞌa,
ay ixim 100 (hokꞌal) yuteko sat yinh hunun iswiꞌ,»
xhi Komam.
Lahwi tuꞌ,
yalni Komam yinh kaw ip:
«Makex cheyabꞌe huneꞌ tiꞌ,
aqꞌwe heyanma hetxumniloj,»
xhi Komam tet anma.
Tzet yinh xin yechelnhe yako Komam Jesús yet iskuywahi
9 Isqꞌambꞌen ebꞌyaꞌ chikuywi yinta Komam tuꞌ yinh tzet chal yelapno huneꞌ yechel yaqꞌ Komam tet anma.
10 Yalni Komam tet ebꞌyaꞌ:
—Teyetnhe chaqꞌ Komam Dios heyohtanhelo tzet ewanyehi yu heyok yul isqꞌabꞌ Komam,
yaj tet anma yechelnhe bꞌay tzotel Komam tet.
Waxanhka hajan isbꞌaqꞌ sat,
mach chu yilni,
waxanhka chabꞌe,
yaj mach chitxumcha yu,
xhi Komam.
Yal Komam Jesús yinh tzet chal yelapno naj txihom trigo
11 Yalnipaxo Komam Jesús:
—Wal xin,
chiwalan teyet yinh tzet chalilo huneꞌ yechel mawaltiꞌan.
Haꞌ ixim hinhat trigo,
yechel Istzotiꞌ Komam Dios ye ixim.
12 Haꞌ ixim hinhat apni kꞌatna yul bꞌeh chitzotel yinh hunteqꞌan anma,
hayet chilahwi yabꞌen Istzotiꞌ Komam Dios,
kat yul naj matzwalil,
kat yinilo naj Istzotiꞌ Komam Dios yul yanma yunhe mach chako yanma anma yinh,
hak tuꞌ xin mach chikolcha anma yu.
13 Haꞌ ixim apni kꞌatna xolaj chꞌen chꞌen,
chitzotel huneꞌ tiꞌ yinh anma kaw chitzala yabꞌen Istzotiꞌ Komam Dios,
yaj mach hunelnheho chukaniko Istzotiꞌ Komam yul yanma.
Hanikꞌnhe tiempohal chistzꞌun yul yanma,
yuxin hayet chul ilwebꞌal yinh,
kat yinilo isbꞌa yinh tzet chal Komam.
14 Haꞌ ixim apni xol teꞌ hinhat txꞌix,
yechel huneꞌ tuꞌ yinh anma chiꞌabꞌen Istzotiꞌ Komam Dios,
yaj hayet chibꞌelwito tiempo yibꞌanh xin,
kat ismajayto ishaqꞌo anma yinh Komam,
yu ekꞌna chako tzet ye tuꞌ ay yul sat yibꞌanhqꞌinal tiꞌ yinh yanma,
maka yu yochento qꞌalomal,
maka yu yochen tzet ay yul sat yibꞌanhqꞌinal tiꞌ.
Hak tuꞌ xin chu yinilo Istzotiꞌ Komam Dios yinh yanma.
Yuxin lahan anma tuꞌ yebꞌ ixim trigo machi satni.
15 »Walpaxo ixim txihlaxayo sat txꞌotxꞌ kaw kꞌul,
yebꞌ yax yalanh,
yechel anma chichahni yabꞌe Istzotiꞌ Komam Dios yinh sunil yanma,
yebꞌ xin hinan isyijeni;
hunelnhe xin chukaniko istzotiꞌ Komam yinh yanma tuꞌ,
mach chikabꞌkon iskꞌul,
yuxin lahan anma tuꞌ yebꞌ ixim kaw tzetkꞌa sat chaqꞌa,
xhi Komam.
La Parábola del Sembrador y la Semilla
Yechel yinh huneꞌ cantil chimujli
16 Yalnipaxo Komam tet ebꞌyaꞌ:
—Hayet chikotzujbꞌaniko qꞌaꞌ yinh hunu cantil,
mach chikonhohbꞌako hunu xi yibꞌanh,
mach chijapaxikto yalanh txꞌat,
wal xin nahat chijakanh yunhe yilni anma chiꞌokto yul nha tuꞌ.
17 Hakpax tuꞌ xin sunil tzet ewanyehi chiꞌixtanhwiloj,
yebꞌ xin sunil tzet ye tuꞌ mach ohtabꞌiloj chiꞌohtanhelaxiloj.
18 »Yuxin chikamwalan heyabꞌeꞌ,
haꞌ mak choche istxumuloj,
kaw chiꞌaqꞌlax yohtanheloj.
Walpaxo mak mach chiyoche istxumulo hunteqꞌan tiꞌ,
haꞌ nichꞌan tzet etza chinachalo yu,
chiꞌilaxilo tet,
xhi Komam.
Parábola de la Lámpara
Ismiꞌ Komam Jesús yebꞌ ebꞌnaj yuxhta Komam
19 Apni ismiꞌ Komam Jesús yebꞌ ebꞌnaj yuxhta Komam bꞌay aykꞌo Komam tuꞌ,
yajaꞌ machi yu yoktoj,
yuto kaw witzꞌan yehiko anma yinh Komam.
20 Yuxin hal-lax tet Komam yu anma ayko iskꞌatanh tuꞌ:
—Mamin,
aykꞌo hamiꞌ yebꞌ ebꞌnaj hawuxhta istinha,
tolabꞌ choche kaxhyilaꞌ,
xhi anma tet Komam.
21 Istaqꞌwi Komam tet anma:
—Maknhetikꞌa chiꞌabꞌen Istzotiꞌ Komam Dios kat isyijeni,
haꞌ ton hunteqꞌan tuꞌ hakaꞌ inmiꞌan yehi,
haꞌ hakaꞌ wuxhtajan yepaxoj,
xhi Komam tet anma tuꞌ.
Yet islinhbꞌan Komam Jesús huneꞌ jaqꞌeqꞌ yibꞌanh ha haꞌ
22 Ay huneꞌ tzꞌayik xin okto Komam Jesús yul teꞌ barco yebꞌ ebꞌyaꞌ chikuywi yinta Komam.
Yalni Komam tet ebꞌyaꞌ:
—Tonhwe bꞌey isqꞌaxebꞌikꞌto haꞌ lago tiꞌ,
xhi Komam.
Isto ebꞌyaꞌ yebꞌ Komam xin.
23 Hayet lanhan yekꞌto ebꞌyaꞌ yibꞌanh ha haꞌ yul teꞌ barco tuꞌ,
iswaykanh Komam yul teꞌ.
Istit huneꞌ niman jaqꞌeqꞌ sikꞌlebꞌil,
ismaqꞌnikto jaqꞌeqꞌ ha haꞌ yul teꞌ.
Etza xin tokano teꞌ yich haꞌ.
24 Yuxin ok ebꞌyaꞌ yiqꞌalo iswayanh Komam.
Yalni ebꞌyaꞌ tet Komam:
—Mam kuywawom,
Mam kuywawom,
lanhanxa kotoh yich haꞌ,
xhi ebꞌyaꞌ tet Komam.
Yabꞌenhe Komam tzet yal ebꞌyaꞌ xin,
yahwano Komam,
yalni Komam tet jaqꞌeqꞌ yebꞌ tet ha haꞌ ta chislinhbꞌa isbꞌa,
ispaxtzꞌinhna xin.
25 Yalni Komam tet ebꞌyaꞌ:
—¿Tzet yinh xin mach cheyako Komam Dios yipo heyanma?
xhi Komam.
Kaw xiw ebꞌyaꞌ,
iskꞌayilo iskꞌul ebꞌyaꞌ,
yal-len ebꞌyaꞌ tet hunun:
—¿Tzet yelapno ye huneꞌ yaꞌ winaj tiꞌ?
Kaw chisyije jaqꞌeqꞌ yebꞌ ha haꞌ tzet chal yaꞌ,
xhi ebꞌyaꞌ yinh Komam.
Jesús Calma la Tormenta
Huneꞌ naj ayko ischejabꞌ naj matzwalil yinh ay bꞌey ismajul Gadara
26 Lahwi tuꞌ xin yekꞌapno ebꞌyaꞌ isqꞌaxebꞌikꞌto haꞌ lago yul ismajul Gadara yetkꞌulal Galilea.
27 Hayet yel Komam Jesús yul teꞌ barco istiꞌ haꞌ tuꞌ,
yapni huneꞌ naj ay yul konhobꞌ tuꞌ iskꞌatanh Komam,
ayko ischejabꞌ naj matzwalil yinh naj.
Txꞌiꞌalxa tiempo istzabꞌchati naj,
matxatikꞌa chako naj xil isqꞌap,
matxa xin choche naj chikankano naj yul hunu nha,
haxanhe xolaj panteón yul camposanto chꞌekꞌ naj.
28 Hayet yilnito naj Komam Jesús,
yah yaw naj,
isjahbꞌanayo isbꞌa naj sata Komam,
yalni naj yinh kaw ip:
—¿Tzet hawok winhan Jesús,
Iskꞌahol Komam Dios kaw aykano yip?
Chinqꞌanan tawet mach chawaqꞌ ekꞌoyaꞌ wanmahan,
xhi naj tet Komam.
29 Yal naj huneꞌ tuꞌ yuto ischejilo Komam ebꞌnaj ischejabꞌ naj matzwalil yinh naj.
Txꞌiꞌalxa el chiꞌetalax naj yu ebꞌnaj ischejabꞌ naj matzwalil tuꞌ.
Chꞌalaxiko chꞌen cadena yinh isqꞌabꞌ naj yu anma,
kat iskꞌalbꞌalax yoj naj yu chꞌen cadena tuꞌ yunhe machi bꞌay chito naj,
yaj chislinhto naj chꞌen,
kat yijbꞌalaxto naj yu ischejabꞌ naj matzwalil bꞌey txꞌotxꞌ desierto.
30 Isqꞌambꞌen Komam Jesús tet naj:
—¿Tzet habꞌi?
xhi Komam.
Istaqꞌwikanh naj tet Komam:
—Legión inbꞌihan,
xhi naj.
Hak tuꞌ yute yalni naj tet Komam yuto kaw tzetkꞌa ebꞌnaj ischejabꞌ naj matzwalil ayko yinh naj.
31 Yalni ebꞌnaj ischejabꞌ naj matzwalil tet Komam ta mach chꞌalaxto ebꞌnaj yu Komam bꞌey yul huneꞌ niman xabꞌ.
32 Kꞌuxan xin tzetkꞌa noꞌ txitam lanhan islow yinh iskꞌul witz iskawilal istiꞌ haꞌ lago tuꞌ.
Yalni ebꞌnaj ischejabꞌ naj matzwalil tet Komam ta chichejlaxto ebꞌnaj yinh noꞌ txitam tuꞌ.
Ishehla Komam tet ebꞌnaj xin.
33 Hak tuꞌ xin yu yel ebꞌnaj ischejabꞌ naj matzwalil yinh naj,
yapnikano ebꞌnaj yinh noꞌ txitam.
Isqꞌojnito isbꞌa noꞌ sat pahaw,
yayapno noꞌ yul haꞌ lago tuꞌ,
ishiqꞌnito noꞌ haꞌ.
34 Hayet yilni ebꞌnaj tanhem txitam huneꞌ tuꞌ,
yelkanh ebꞌnaj yinh anhe,
yalnikꞌo ebꞌnaj yul konhobꞌ yebꞌ xin tet makta pujanto yatut xolaj telaj.
35 Yuxin sunil anma apni ilno tzet yu tuꞌ.
Hayet yapni anma bꞌay ay Komam,
yilni anma naj aytikꞌako ischejabꞌ naj matzwalil yinh,
tzꞌonhanayo naj yich yoj Komam.
Ayxako xil isqꞌap naj,
kaw tohol anmaxa naj,
yuxin sunil anma tuꞌ kaw xiwkanh.
36 Haꞌ ebꞌnaj ilni hunteqꞌan tzet iswatxꞌe Komam Jesús tuꞌ,
haꞌ ebꞌnaj halni tet hunteqꞌanxa anma apni ilno yinh tzet yu iskawxikanh naj bꞌay ayiko ischejabꞌ naj matzwalil.
37 Yu huneꞌ tzet yu tuꞌ yuxin sunil anma ay bꞌey yul ismajul Gadara tuꞌ ok halno tet Komam ta chiꞌel Komam yul ismajul Gadara tuꞌ,
yuto kaw xiw ebꞌnaj yinh tzet yuhi.
Yokto Komam yul teꞌ barco,
ispaxto Komam.
38 Isqꞌanto isbꞌa naj bꞌay el ischejabꞌ naj matzwalil tuꞌ yinta Komam.
Yalni Komam tet naj ta chikan naj bꞌaytikꞌa ay tuꞌ.
39 Yalnikano Komam tet naj:
—Meltzanhto hawatut,
kat hawalnikꞌo iskꞌulal mayu Komam Dios tawinh,
xhi Komam tet naj.
Isto naj xin,
ispujbꞌanikꞌo naj yul konhobꞌ tzet yu iskawxikanh naj yu Komam Jesús.
Sanación de lo Demoniaco
Iskutzꞌin naj Jairo yebꞌ xin huneꞌ ix pitni Komam Jesús
40 Lahwi tuꞌ xin ispaxto Komam Jesús bꞌey isqꞌaxebꞌikꞌto haꞌ lago.
Hayet yapni Komam,
kaw chitzala anma sunil yuto kaw echmabꞌil Komam yu anma.
41 Ay huneꞌ naj iswiꞌehal yeko yijbꞌali yinh iscapilla ebꞌnaj Israel,
Jairo isbꞌi naj.
Apni naj iskꞌatanh Komam Jesús,
yay jahno naj yich yoj Komam.
Isqꞌanni naj tet Komam tato chito Komam bꞌey yatut naj,
42 yuto ay hunpilan iskutzꞌin naj kaw lanhanxa iskami,
12 (kabꞌlahonhebꞌxa) habꞌil ix.
Hayet isto Komam Jesús yinta naj,
kaw chiswitzꞌ isbꞌa anma isto bꞌulbꞌon yinta Komam.
43 Xol anma tuꞌ xin,
ayko huneꞌ ix yaꞌay,
12 (kabꞌlahonhebꞌxa) habꞌil mach chilinhi yay istxꞌawobꞌal ix.
Wal xin xaꞌiskꞌaytzelo ix sunil tzet aya yu yaqꞌni anhteꞌ isbꞌa,
yaj maxhtikꞌa hunu mak qꞌoji yanhten ix.
44 Tzujaniko ix xol anma ayko yinta Komam,
ishitziko ix iskꞌatanh Komam,
ispitni ix istiꞌ xil isqꞌap Komam.
Lanhantotikꞌa xin islinhina yay istxꞌawobꞌal ix.
45 Isqꞌambꞌenilo Komam Jesús tet anma:
—¿Mak anmahil huneꞌ manpitnihan?
xhi Komam.
Yaj yal anma sunil ta machi mak pitni Komam.
Yalni yaꞌ Pedro tet Komam:
—Mamin,
¿tom mach chawila ta witzꞌan yehiko anma tawinh?
Tzetkꞌa mak chisteniko isbꞌa tawinh,
kat xin haqꞌambꞌenpaxoj,
¿mak makinpitnihan?
kachi,
xhi yaꞌ tet Komam.
46 Yalni Komam xin:
—Tzikꞌanabꞌ yinh machi mak heyalni,
wal xin ay mak makinpitnihan yuto mawabꞌehan ta ay huneꞌ anma makawxinakanh yu wipan,
xhi Komam.
47 Hayet yilni ix ta mach chu yebꞌanayo ix huneꞌ tuꞌ,
toxanhe chikꞌarla yah ix,
yay jahno ix sata Komam.
Yalnilo ix yinh sat sunil anma tuꞌ tzet yinh yuxin ispit ix Komam,
yebꞌ tzet yu yanhcha ix yinh anhe.
48 Yalni Komam tet ix:
—Miyay,
makaxhkawxikanh yuto maxawayto yul hawanma winhan.
¡Paxanhto yinh tzalahilal!
xhi Komam tet ix.
49 Lanhantotikꞌa istzotel Komam tet ix xin,
yapni huneꞌ naj ispeto bꞌey yatut naj Jairo,
yalni tet naj:
—Wal ix hakutzꞌin,
makamna ix.
Nabꞌxanhe chito Komam kuywawom tiꞌ,
xhi naj tet naj Jairo.
50 Hayet yabꞌen Komam huneꞌ tuꞌ,
yalni Komam tet naj Jairo:
—Mach kaxhxiwi.
Haꞌ huneꞌ wal hawuteni,
ayto Komam Dios yul hawanma haxinwal chikawxokanh hakutzꞌin,
xhi Komam tet naj.
51 Hayet yapni Komam bꞌey yatut naj Jairo tuꞌ,
machi hunu mak ischakto Komam yul nha,
hanhkꞌanhe yaꞌ Pedro,
yebꞌ yaꞌ Juan,
yebꞌ yaꞌ Jacobo yebꞌpaxo ismam yebꞌ ismiꞌ ix nichꞌan tuꞌ.
52 Toxanhe chihanhcha anma yoqꞌi,
kaw chitzꞌay iskꞌul anma yinh ix.
Yalni Komam xin:
—Mach chexoqꞌi.
Mach kamnajo ix nichꞌan tiꞌ,
wal xin tonhe chiway ix,
xhi Komam.
53 Toxanhe chitzebꞌi anma yinh Komam yuto yohtaxa anma ta kamnaxa ix.
54 Yok tzabꞌno Komam yinh isqꞌabꞌ ix.
Yalni Komam yinh kaw ip:
—Ahanhwano tzꞌul,
xhi Komam.
55 Lanhantotikꞌa xin yulkanh iskꞌul ix yu Komam,
yahwano ix.
Yalni Komam ta chiꞌaqꞌlax waꞌo ix.
56 Kaw kꞌayilo iskꞌul ismam yebꞌ ismiꞌ ix yinh tzet iswatxꞌe Komam Jesús.
Yalnikano Komam xin ta machi bꞌay chihal-laxikꞌo tzet yu yulkanh iskꞌul ix.
La hija de Jairo es devuelta a la vida