Yechel yinh huneꞌ naj txihom trigo
13
Yinhtikꞌa huneꞌ tzꞌayik tuꞌ,
elti Komam Jesús yul nha,
isto Komam istiꞌ haꞌ lago,
yay tzꞌonhno Komam bꞌey tuꞌ.
2 Yajaꞌ kaw txꞌiꞌal anma apni iskꞌatanh Komam,
yuxin ahto Komam yul huneꞌ teꞌ barco,
yay tzꞌonhnoj,
yichiko Komam iskuywahi.
Wal anma xin kankano istiꞌ haꞌ lago tuꞌ.
3 Kaw txꞌiꞌal yechel yako Komam yet iskuyni Komam anma tuꞌ,
yichiko Komam yalni hakaꞌ tiꞌ:
«Yet hunel,
ay huneꞌ naj to txiho trigo.
4 Yet lanhan istxihni naj ixim,
ay ixim apni kꞌatna yul bꞌeh,
yapni noꞌ chꞌik issikꞌnokanh ixim.
5 Aypaxo ixim apni kꞌatna xolaj chꞌen chꞌen bꞌay machi bꞌin txꞌo txꞌotxꞌ;
kaw xin pet ahilo ixim yuto mach nahato yehayto yich txꞌotxꞌ.
6 Yajaꞌ haxa yet yahilo tzꞌayik yet yiqꞌnikanh yip qꞌaꞌ istajilo ixim yuto machi bꞌay yayto isxeꞌ ixim yu chꞌen chꞌen tuꞌ.
7 Aypaxo ixim apni kꞌatna xol yinhatil teꞌ txꞌix,
hayet ischꞌibꞌkanh ixim ischꞌibꞌpaxokanh teꞌ txꞌix tuꞌ,
hak tuꞌ yu istzꞌonbꞌayo ixim xol teꞌ.
8 Walpaxo ixim hinhat apni xol txꞌo txꞌotxꞌ kaw kꞌul,
kaw saqꞌal yu ischꞌibꞌkanh ixim.
Yet yaqꞌni ixim sat,
ay ixim aqꞌni 100 (hokꞌal) yinh hunun iswiꞌ,
aypaxo ixim 60 (oxkꞌal),
aypaxo ixim yaqꞌ 30 (lahonhebꞌ iskawinaj) sat yinh hunun iswiꞌ.
9 Makex cheyabꞌe huneꞌ tiꞌ aqꞌwe heyanma hetxumniloj,»
xhi Komam tet anma.
Tzet yinh xin yechelnhe yako Komam Jesús yet iskuywahi
10 Lahwi tuꞌ ishitziko ebꞌyaꞌ iskuywom Komam Jesús iskꞌatanh,
isqꞌambꞌen ebꞌyaꞌ:
—Mamin,
¿tzet yinh yuxin yet chakuyni anma yechelnhe chawaqꞌbꞌalnhe tet?
xhi ebꞌyaꞌ.
11 Istaqꞌwi Komam:
—Teyetnhe chaqꞌ Komam Dios heyohtanhelo hunteqꞌan tzet ye tuꞌ ewanyehi,
yunhe hetxumni yinh tzet chu heyok yul isqꞌabꞌ Komam Dios.
Walpaxo tet hunteqꞌanxa anma xin mach chꞌaqꞌlax yohtanheloj.
12 Yuto haꞌ mak chiyoche chiyohtanhelo hunteqꞌan tiꞌ kaw ekꞌnaxa chiꞌaqꞌlax yohtanheloj,
wal mak mach choche yohtanheloj,
haꞌ nichꞌan etza chitxumcha yu chiꞌilaxilo tet.
13 Yuxinto yechelnhe chiwakojan yet chinkuynihan anma.
Wal xin waxanhka chiyila,
yajaꞌ mach chinachalo yu,
waxanhka chabꞌe yajaꞌ mach chitxumchalo yu.
14 Yuto lanhan yijni isbꞌa tzet tzꞌibꞌnhebꞌilkano yinh hunteqꞌan anma tiꞌ yu yaꞌ Isaías,
ischejabꞌ Komam Dios yet payat,
bꞌay chal hakaꞌ tiꞌ:
“Wal hunteqꞌan anma tiꞌ waxanhka chabꞌe,
yajaꞌ mach chitxumchalo yu.
Waxanhka chiyila,
yaj mach chinachalo yu.
15 Yuto hunteqꞌan anma tiꞌ kaw nohna yanma yu ekꞌnajil,
hakaꞌtanhe majan istxikin yuxin mach chabꞌe.
Hakaꞌtanhe mutzꞌan sat yuxin mach chila,
hak tuꞌ xin mach chistxum isbꞌa kat yaniko isbꞌa yul inqꞌabꞌan kat yanhchahi,”
xhihayoj.a
16 »Yajaꞌ wal hex tiꞌ saqꞌal heyet,
yuto habꞌan istxumchalo heyu yet cheyilni,
yebꞌ xin yet cheyabꞌeni habꞌan henaniloj.
17 Yinh kaw yeli chiwalan teyet,
kaw txꞌiꞌal ischejabꞌ Komam Dios,
yebꞌ txꞌiꞌal mak kꞌul isbꞌeybꞌal yet payat yocheꞌ yilaꞌ hunteqꞌan cheyil tiꞌ,
yajaꞌ mach yilah.
Yochepaxo yabꞌe hunteqꞌan cheyabꞌe tiꞌ yajaꞌ mach yabꞌe,
xhi Komam.
Yal Komam Jesús yinh tzet chal yelapno naj txihom trigo
18 Yalni Komam Jesús:
—Tinanh xin chiwalan teyet yinh tzet chal yelapno naj txihom trigo.
19 Ixim hinhat aykꞌay yul bꞌeh,
yechel yeko ixim yinh mak chiꞌabꞌen Istzotiꞌ Komam Dios,
yajaꞌ mach chitxumchalo yu.
Lahwi tuꞌ kat yul naj matzwalil yinolo Istzotiꞌ Komam tuꞌ yul yanma.
20 Haxa ixim hinhat aykꞌay yibꞌanh chꞌen chꞌen,
yechel huneꞌ tuꞌ yinh anma chiꞌabꞌen Istzotiꞌ Komam Dios kat ischahni yul yanma yinh tzalahilal.
21 Yajaꞌ machi kaw yip yanma yinh yet Komam,
yebꞌ xin mach hunelnheho chukaniko yinh yanma,
yuxin hayet chihul ilwebꞌal yinh yu Istzotiꞌ Komam,
yinh anhe chikabꞌkonkanh iskꞌul kat ismeltzo yintaj.
22 Haxa ixim hinhat apni kꞌatna xol yinhatil teꞌ txꞌix,
yechel huneꞌ tuꞌ yinh mak chiꞌabꞌen Istzotiꞌ Komam Dios yajaꞌ yu ekꞌbꞌalto chako yanma yinh qꞌalomal yebꞌ yinh tzet ay yul sat yibꞌanhqꞌinal tiꞌ,
yuxin chilo yanma yinh Istzotiꞌ Komam Dios.
Haꞌ hunteqꞌan anma tuꞌ lahan hakaꞌ ixim trigo tzꞌonbꞌayoj,
machi sat yaqꞌa.
23 Wal ixim hinhat aykꞌay bꞌay kaw kꞌul txꞌo txꞌotxꞌ xin,
yechel huneꞌ tuꞌ yinh anma chiꞌabꞌen Istzotiꞌ Komam Dios,
kaw kꞌul istxumni kat ischahni yul yanma,
lahan yebꞌ ixim trigo kaw niman sat yakoj.
Ay mak hakaꞌ ixim trigo yaqꞌ 100 (hokꞌal) sat yinh hunun iswiꞌ,
aypaxo mak hakaꞌ ixim yaqꞌ 60 (oxkꞌal),
aypaxo xin mak hakaꞌ ixim yaqꞌ 30 (lahonhebꞌ iskawinaj) yinh hunun iswiꞌ,
xhi Komam.
Yechel yinh hunteqꞌan teꞌ chꞌim ahilo xol ixim trigo
24 Yalnipaxo Komam Jesús huneꞌ yechel hakaꞌ tiꞌ:
«Hayet chiꞌok Komam Dios yahawilo anma,
lahan hakaꞌ chaqꞌle hunu naj chitxihni ixim hinhat trigo kaw kꞌul sat istxꞌotxꞌ.
25 Yajaꞌ yet aqꞌbꞌalil xin yet wayo chu naj,
yapni huneꞌ naj ayko ishowal yinh naj,
istxihnayo naj yinhatil teꞌ chꞌim hakaꞌ ixim trigo tuꞌ xol ixim,
isto naj.
26 Lahwi tuꞌ ischꞌibꞌkanh ixim,
haxa yet yok iswiꞌ ixim isyenilo isbꞌa teꞌ chꞌim tuꞌ xol ixim.
27 Hayet yilni ebꞌnaj munlawom huneꞌ tuꞌ,
isto ebꞌnaj yalno tet naj yahaw munil hakaꞌ tiꞌ:
“Mamin,
kaw kꞌul ixim hinhat trigo kaxhbꞌey hatxihayoj,
yajaꞌ ¿tzet yinh xin kaw ay teꞌ chꞌim ahilo xol ixim?”
xhi ebꞌnaj.
28 Istaqꞌwi naj:
“Ham hunu mak ayko ishowal winhan txihnayo yinhatil teꞌ chꞌim xol ixim,”
xhi naj.
Isqꞌambꞌenpaxo ebꞌnaj ismunlawom naj tuꞌ:
“Ta chisje hakꞌul chonhtohanh kohokꞌokanhanh teꞌ chꞌim tuꞌ xol ixim,”
xhi ebꞌnaj.
29 Yalni naj:
“Machoj,
yuto ta chehokꞌkanh teꞌ ham hun ixim trigo chehokꞌkanh yinta teꞌ.
30 Wal xin chꞌibꞌojabꞌna teꞌ xol ixim,
hatojabꞌ yet chiꞌapni istiempohal bꞌay chikꞌuplaxkanh ixim kat yah teꞌ,
kat walnihan tet ebꞌnaj inmunlawoman tato chiskꞌupkanh ebꞌnaj teꞌ xol ixim kat iskꞌalnayo ebꞌnaj teꞌ yinh hunun yachan,
lahwi tuꞌ kat isnhuslaxto teꞌ.
Wal ixim trigo tuꞌ xin chikꞌubꞌalaxto ixim yul inkꞌunhahan,”
xhi naj yahaw munil tuꞌ,»
xhi Komam.
Yechel yinh yinhatil teꞌ mostaza
31 Yanipaxiko Komam Jesús yinhatil teꞌ mostaza yechelo yet iskuywahi,
yalni Komam hakaꞌ tiꞌ:
«Chiwalpaxojan teyet yinh tzet chu ischꞌibꞌ isbꞌisil anma chiꞌok yul isqꞌabꞌ Komam Dios,
lahan hakaꞌ nichꞌan yinhatil teꞌ mostaza chistzꞌun hunu naj sat istxꞌotxꞌ.
32 Yinh kaw yeli,
teꞌ hinhat mostaza tuꞌ,
haꞌ teꞌ kaw nixhchꞌan xol teꞌ hinhat,
yaj haxa yet chiꞌahilo teꞌ kat ischꞌibꞌkanh teꞌ,
haꞌ teꞌ kaw nimej chiꞌeliko xol sunil ej teꞌ itah chitzꞌunlaxi.
Teꞌ mostaza tuꞌ nimej chu teꞌ yuxin chiꞌapni noꞌ chꞌik iswatxꞌe yatut xol isqꞌabꞌ teꞌ,»
xhi Komam.
Yechel yinh yanhal ixim pan
33 Yanipaxiko Komam Jesús yanhal ixim pan yechelo yet iskuywa tet anma,
yalni Komam hakaꞌ tiꞌ:
«Chiwalpaxojan teyet yinh tzet chu ischꞌibꞌ isbꞌisil anma chako isbꞌa yul isqꞌabꞌ Komam Dios.
Lahan hakaꞌ nichꞌan yanhal ixim pan chako hunu ix ix xol oxebꞌ mal ixim harina.
Haxa yet chissomni ix ixim kat issipkꞌa ixim yu nichꞌan yanhal chiꞌoki,»
xhi Komam.
Tzet yinh yechelnhe yaqꞌ Komam Jesús tet anma
34 Yet yaqꞌni Komam Jesús Istzotiꞌ Komam Dios iskuyuꞌ anma nabꞌa yechelnhe bꞌay tzotel Komam,
35 yunhe yijni isbꞌa tzet tzꞌibꞌnhebꞌilkano yu ischejabꞌ Komam Dios yet payat,
bꞌay chal hakaꞌ tiꞌ:
«Yechelnhe chiwaqꞌan tet anma yet chintzotelan.
Chiwalan tet yinh hunteqꞌan tzet ewanyehi yichitaxtikꞌa iswatxꞌi yul sat yibꞌanhqꞌinal tiꞌ,»b
xhihayoj.
Ok Komam Jesús yalaꞌ yinh tzet chal yelapno teꞌ chꞌim ahilo xol ixim trigo
36 Lahwi tuꞌ istaqꞌli Komam Jesús tet anma chiꞌabꞌen tzet chal tuꞌ,
yokto Komam yul nha yebꞌ ebꞌyaꞌ iskuywom.
Ishitziko ebꞌyaꞌ iskꞌatanh Komam isqꞌambꞌen ebꞌyaꞌ yinh tzet chal yelapno teꞌ chꞌim ahilo xol ixim trigo.
37 Yalni Komam tet ebꞌyaꞌ xin:
—Naj txihom trigo yechel yeko naj winhan,
Hanin Aqꞌbꞌilintijan texol yu Komam Dios.
38 Haꞌ txꞌo txꞌotxꞌ bꞌay txihlaxayo ixim trigo,
yechel anma ay yul sat yibꞌanhqꞌinal tiꞌ ye txꞌotxꞌ.
Haꞌ ixim hinhat kꞌul,
yechel anma chiꞌok yul isqꞌabꞌ Komam Dios ye ixim.
Haxa teꞌ chꞌim chꞌibꞌkanh xol ixim trigo tuꞌ,
yechel anma ayko yul isqꞌabꞌ naj matzwalil ye teꞌ.
39 Naj txihnayo teꞌ hinhat chꞌim xol ixim trigo tuꞌ,
yechel naj matzwalil ye naj.
Yet chikꞌuplaxkanh ixim trigo tuꞌ xin,
yechel yinh yet chilahwi yul sat yibꞌanhqꞌinal tiꞌ.
Haxa ebꞌnaj chikꞌupni ixim trigo tuꞌ,
yechel ebꞌnaj ángel ye ebꞌnaj.
40 Hakaꞌ yet chiꞌilaxilo teꞌ chꞌim xol ixim trigo kat isnhuslaxto teꞌ,
hak tuꞌ chiꞌutelax anma mach chako isbꞌa yul isqꞌabꞌ Komam Dios yet chitanh yul sat yibꞌanhqꞌinal tiꞌ.
41 Hanin Aqꞌbꞌilintijan texol yu Komam Dios tiꞌ,
chinchejtijan ebꞌnaj ángel iskutxbꞌako sunil mak chꞌaqꞌni aykꞌayo yet anmahil yebꞌ mak istxꞌojalnhetikꞌa chiswatxꞌe,
42 kat yalaxto hunteqꞌan mak tuꞌ xol qꞌa qꞌaꞌ bꞌay chꞌoqꞌi,
kat isnhetxꞌla yeh yu isyaꞌil.
43 Wal mak chiyijen tzet chal Komam Dios xin,
chitzejla hakaꞌ tzꞌayik yul isqꞌabꞌ Komam Dios ay yul satkanh.
Makex cheyabꞌe huneꞌ tiꞌ aqꞌwe heyanma hetxumniloj,
xhi Komam.
Yechel yinh huneꞌ qꞌalomal mujbꞌil
44 Yalnipaxo Komam Jesús:
—Anma chꞌok yul isqꞌabꞌ Komam Dios,
lahan yebꞌ huneꞌ qꞌalomal kaw ay istohol mujbꞌil yul txꞌo txꞌotxꞌ chiꞌilcha yu huneꞌ naj,
lahwi tuꞌ kat ismujnipaxo naj.
Kaw xin chitzala naj yinh huneꞌ qꞌalomal tuꞌ kat isto naj istxonhnoto sunil tzet aya yunhe isloqꞌni naj huneꞌ txꞌotxꞌ bꞌay mujan huneꞌ qꞌalomal tuꞌ,
xhi Komam.
Yechel yinh huneꞌ chꞌen perla kaw ay istohol
45 Yalnipaxo Komam Jesús:
—Haꞌ anma chꞌok yul isqꞌabꞌ Komam Dios,
lahan hakaꞌ hunu naj txonhwom chiꞌekꞌ sayno hunteqꞌan chꞌen chꞌen kaw ay istohol chiyij perla.
46 Haxa yet chiꞌilcha hunu chꞌen yu naj,
chito naj istxonhoꞌto sunil tzet aya kat isloqꞌni naj huneꞌ chꞌen perla kaw kꞌul tuꞌ,
xhi Komam.
Yechel txꞌanh hakꞌ iqꞌomati kay
47 Yalnipaxo Komam Jesús:
—Chiwalpaxojan teyet,
haꞌ anma chiꞌok yul isqꞌabꞌ Komam Dios,
lahan yebꞌ huneꞌ txꞌanh hakꞌ iqꞌomati kay chayto hunteqꞌan ebꞌnaj xol ha haꞌ.
Yet chibꞌejlaxayto txꞌanh xol haꞌ kaw txꞌiꞌal noꞌ kay chiꞌok yul txꞌanh.
48 Haxa yet chinohilo txꞌanh yu noꞌ xin kat yilaxahti txꞌanh xol haꞌ,
kat yay tzꞌonhno ebꞌnaj istiꞌ haꞌ,
kat issikꞌnilo ebꞌnaj noꞌ kꞌul kat yanayto ebꞌnaj noꞌ yul motx.
Haxa noꞌ mach kꞌuloj xin,
chisqꞌojto ebꞌnaj noꞌ.
49 Hak tuꞌ chaqꞌle anma yet chilahwi huneꞌ yul sat yibꞌanhqꞌinal tiꞌ.
Chul ebꞌnaj ángel ispoholo anma txꞌoj xol anma kꞌul.
50 Haꞌ hunteqꞌan anma txꞌoj chiꞌalaxto xol qꞌa qꞌaꞌ,
haꞌ bꞌey tuꞌ xin chiꞌoqꞌ yinh kat isnhetxꞌla yeh yu isyaꞌil,
xhi Komam.
Akꞌ kuybꞌanile yebꞌ xil kuybꞌanile
51 Lahwi tuꞌ isqꞌambꞌen Komam Jesús tet ebꞌyaꞌ iskuywom hakaꞌ tiꞌ:
—¿Chimhetxum sunil hunteqꞌan yechel chiwaltiꞌan?
xhi Komam.
Istaqꞌwi ebꞌyaꞌ:
—Hoꞌ Mamin,
xhi ebꞌyaꞌ.
52 Yalni Komam xin:
—Haꞌ chalilo huneꞌ tiꞌ,
ta ay hunu naj kuywawom yinh ley chikuywa yinh tzet chu yok anma yul isqꞌabꞌ Komam Dios,
lahan hakaꞌ hunu naj mame yohta yokniko hunteqꞌan tzet ye tuꞌ akꞌ yu yebꞌ hunteqꞌan tzet ye tuꞌ xilxa kꞌuwan yul iskꞌuwanbꞌal,
xhi Komam.
Apni Komam Jesús bꞌey Nazaret
53 Lahwi yalnikano Komam hunteqꞌan kuybꞌanile tuꞌ,
isto Komam.
54 Yet yapni Komam yul iskonhobꞌ,
iskuyni Komam anma yul iscapilla ebꞌnaj Israel.
Hayet yabꞌen anma istzotel Komam,
kaw kꞌayilo iskꞌul,
yuxin yal anma hakaꞌ tiꞌ:
—¿Bꞌay chitit ishelanil huneꞌ naj tiꞌ,
yebꞌ bꞌay chitit iskanhil ye naj iswatxꞌen hunteqꞌan kꞌaybꞌalkꞌule tiꞌ?
55 Naj tiꞌ iskꞌahol naj hutxꞌum teꞌ ye naj,
yebꞌpaxo yunin ix María ye naj,
yebꞌ yuxhta isbꞌa naj yebꞌ naj Jacobo,
naj José,
naj Simón yebꞌ naj Judas.
56 Yebꞌpaxo xin ebꞌix yanabꞌ naj,
koxol tiꞌ ay ebꞌix.
¿Bꞌaytaxka xin chitit ishelanil naj tiꞌ?
xhi anma yinh Komam.
57 Yuxin machi kam iskꞌul anma yabꞌen tzet chal Komam.
Yalni Komam tet anma tuꞌ:
—Sunil bꞌay xahan chiꞌil-lax ischejabꞌ Komam Dios yu anma,
yajaꞌ wal yul iskonhobꞌ yebꞌ yul yatut chiyahlaxi,
xhi Komam.
58 Wal Komam xin mach txꞌiꞌalo kꞌaybꞌalkꞌule isye Komam yul iskonhobꞌ tuꞌ,
yuto mach chayto anma yul yanma yinh Komam.