Iskamikal yaꞌ Juan anikanh haꞌ iswiꞌ anma
14
Yinh huneꞌ tiempohal tuꞌ xin,
yabꞌelo naj rey Herodes,
naj ayko gobernadoral bꞌey Galilea,
isbꞌina Komam Jesús.
2 Yuxin yal naj tet ebꞌnaj chimunla yinta tuꞌ:
«Huneꞌ naj chibꞌina tuꞌ,
ham naj Juan,
anikanh haꞌ iswiꞌ anma,
itzitzbꞌikanh,
yuxin ay yip naj iswatxꞌen hunteqꞌan kꞌaybꞌalkꞌule tuꞌ,»
xhi naj.
3 Yal naj huneꞌ tuꞌ yuto haꞌ naj chejni tzabꞌlaxoyo yaꞌ Juan,
iskꞌal-laxayo yaꞌ yu chꞌen cadena,
yalaxikto yaꞌ yul preso yuto kachwa yaꞌ yinh naj Herodes tuꞌ yet yiqꞌnikanh naj ix Herodías,
yixal yuxhtaj,
haꞌ ton naj Felipe.
4 Kaw xin txꞌiꞌal el yal yaꞌ Juan tuꞌ tet naj Herodes hakaꞌ tiꞌ:
«Mach kꞌulo hawiqꞌni yixal hawuxhtaj,»
xhi yaꞌ.
5 Wal naj Herodes tuꞌ xin kaw yoche naj ispotxꞌoꞌ yaꞌ Juan,
yaj xin xiw naj yuto sunil anma chalni tato ischejabꞌ Komam Dios ye yaꞌ.
6 Yet hunel xin,
yekꞌtze naj Herodes huneꞌ qꞌinh yuto tzꞌajna naj yinh ishabꞌilal,a
kaw xin txꞌiꞌal anma yawte naj.
Yinh qꞌinh tuꞌ,
kanhalwi ix yunin ix Herodías yinh sat naj Herodes yebꞌ yinh sat sunil anma awtebꞌil.
Kaw xin kꞌulchꞌan yu iskanhalwi ix yil naj,
7 yuxin yalte naj tet ix tato chaqꞌ naj tzijxanhe tzet chisqꞌan ix.
8 Yalni ismiꞌ ix tet tato chisqꞌan ix iswiꞌ yaꞌ Juan;
yuxin yal ix tet naj Herodes tuꞌ:
«Haꞌ iswiꞌ naj Juan,
anikanh haꞌ iswiꞌ anma,
chawaqꞌ wetan yul hunu plato,»
xhi ix tet naj.
9 Hayet yabꞌen naj Herodes huneꞌ tuꞌ yok bꞌiskꞌulal yinh iskꞌul naj.
Yajaꞌ yu xayal naj yinh sat sunil anma tet ix tato chaqꞌ naj tzet chisqꞌan ix,
yuxin yal naj ta chiꞌaqꞌlax tzet chisqꞌan ix tuꞌ.
10 Ischejni naj yilaxolo iswiꞌ yaꞌ Juan yul preso.
11 Hak tuꞌ xin yu yilaxti iswiꞌ yaꞌ yul huneꞌ plato yaqꞌlax tet ix,
yinito ix tet ismiꞌ.
12 Lahwi tuꞌ xin,
yapni ebꞌyaꞌ iskuywom yaꞌ Juan tuꞌ,
yinito ebꞌyaꞌ isnimanil yaꞌ mujlaxoj.
Tzujan tuꞌ isbꞌey ebꞌyaꞌ yalno tet Komam Jesús.
Yet yaqꞌni waꞌo Komam Jesús howebꞌ mil ebꞌnaj winaj
13 Hayet yabꞌen Komam Jesús ta kam yaꞌ Juan yel Komam bꞌey tuꞌ,
yahto Komam yul huneꞌ teꞌ barco,
yekꞌapno Komam isqꞌaxebꞌikꞌto haꞌ lago bꞌay machi anma.
Hayet yabꞌen anma ay yulaj konhobꞌ xin tato to Komam,
istopaxo anma yu yoj istiꞌla haꞌ bꞌay chiꞌapni Komam tuꞌ.
14 Hayet yelti Komam yul teꞌ barco tuꞌ xin yilnitoj ta tenanxato anma yechmani.
Istzꞌaykanh iskꞌul Komam yinh anma,
yaqꞌni kawxo Komam anma yaꞌay ilaxto bꞌey tuꞌ.
15 Haxa yet lanhanxa isqꞌejbꞌayo xin,
ishitziko ebꞌyaꞌ iskuywom Komam iskꞌatanh,
yalni ebꞌyaꞌ tet Komam:
—Mamin,
maqꞌejbꞌi lah yebꞌpaxo xin machi teꞌ nha bꞌey tiꞌ,
yuxin kꞌulmi hachejnito anma tiꞌ yulaj aldea kokawilal tiꞌ isloqꞌoꞌ tzet chislo,
xhi ebꞌyaꞌ.
16 Yalni Komam tet ebꞌyaꞌ:
—Mach yilalo chipaxto anma tiꞌ,
aqꞌwe tzet chislo,
xhi Komam.
17 Istaqꞌwi ebꞌyaꞌ tet Komam:
—Mamin,
kaw hanhkꞌanhe howebꞌ ixim pan yebꞌ kakꞌonh kay koxol tiꞌ,
xhi ebꞌnaj tet Komam.
18 Yalni Komam:
—Iweti ixim yebꞌ noꞌ kay tuꞌ bꞌey tiꞌ,
xhi Komam.
19 Lahwi tuꞌ ischejni Komam anma kutxaniko tuꞌ tato chiꞌay tzꞌonhno sat cheqꞌanh.
Yinikanh Komam ixim howebꞌ pan yebꞌ noꞌ kakꞌonh kay,
yah tꞌanhno Komam satkanh,
yaqꞌni Komam yuchꞌandiosal tet Komam Dios yinh ixim yebꞌ yinh noꞌ.
Lahwi tuꞌ isqꞌaxponayo Komam ixim,
yaqꞌni Komam ixim tet ebꞌyaꞌ iskuywom,
yok ebꞌyaꞌ yitxqꞌanoto ixim yinh anma.
20 Kaw sunil anma waꞌi hantatikꞌa kaw yoche iskꞌul,
kaw xin 12 (kabꞌlahonhebꞌto) motx nohkanh yinh ixim matxa lahwi yu anma.
21 Kaw howebꞌ mil ebꞌnaj winaj waꞌi,
wal ebꞌix ix yebꞌ nixhte unin mach ok istzꞌajo yinh huneꞌ isbꞌisil tiꞌ.
Yet isbꞌelwikꞌo Komam Jesús yibꞌanh ha haꞌ
22 Lahwi tuꞌ xin,
yalni Komam Jesús tet ebꞌyaꞌ iskuywom ta chꞌokto yul huneꞌ teꞌ barco yu isbꞌabꞌito ebꞌyaꞌ isqꞌaxepxakꞌto haꞌ lago tuꞌ.
Wal Komam kankano taqꞌlo tet anma.
23 Hayet lahwi istaqꞌlikano Komam tet anma tuꞌ xin,
yahto Komam txahlo ischukil istzalanil huneꞌ witz.
Haꞌ tuꞌ xin ah aqꞌbꞌal yinh Komam.
24 Wal ebꞌyaꞌ iskuywom Komam nahatxa chito ebꞌyaꞌ yibꞌanh haꞌ lago tuꞌ,
yaj xin ay huneꞌ niman jaqꞌeqꞌ chimaqꞌnikanh ha haꞌ sata teꞌ barco tuꞌ.
25 Haxa yet lanhanxa issajbꞌilo xin istzujcha ebꞌyaꞌ yu Komam,
bꞌelwito Komam yibꞌanh ha haꞌ tuꞌ.
26 Hayet yilni ebꞌyaꞌ isbꞌelwi Komam yibꞌanh haꞌ isxiwkanh ebꞌyaꞌ,
yah yaw ebꞌyaꞌ yu xiwkilal,
yalni ebꞌyaꞌ:
—¡Huneꞌ tiꞌ ispixan kamom!
xhi ebꞌyaꞌ.
27 Yalnikanh Komam:
—Mach chexxiwi,
haninan,
xhi Komam.
28 Yalni yaꞌ Pedro tet Komam:
—Mamin,
ta hach huneꞌ tuꞌ,
hala ta chinbꞌelwihan yibꞌanh ha haꞌ tiꞌ kat wapnihan bꞌay ayach tuꞌ,
xhi yaꞌ.
29 Yalni Komam tet yaꞌ xin:
—Kꞌultikꞌa,
titanh,
xhi Komam.
Hayet yabꞌen yaꞌ Pedro huneꞌ tuꞌ,
yel yaꞌ yul teꞌ barco,
isto yaꞌ iskꞌatanh Komam,
yichiko yaꞌ isbꞌel yibꞌanh haꞌ.
30 Yajaꞌ yet yilni yaꞌ isbꞌili haꞌ tuꞌ yu jaqꞌeqꞌ isxiwkanh yaꞌ,
yichiko yaꞌ isto xol haꞌ,
yah yaw yaꞌ tet Komam yinh kaw ip:
—¡Mamin,
kolinan!
xhi yaꞌ.
31 Yinh anhe xin ok tzabꞌno Komam yinh isqꞌabꞌ yaꞌ,
yalni Komam:
—Hach tiꞌ kaw mach ayoko hawanma winhan.
¿Tzet yinh xin makabꞌkonkanh hakꞌul?
xhi Komam.
32 Haxa yet yahto Komam yul teꞌ barco yebꞌ yaꞌ,
islinhi yekꞌ jaqꞌeqꞌ.
33 Wal sunil ebꞌyaꞌ ayikto yul teꞌ barco tuꞌ xin ay jahno ebꞌyaꞌ sata Komam,
yalni ebꞌyaꞌ hakaꞌ tiꞌ:
—¡Yinh kaw yeli hach tiꞌ Iskꞌahol Komam Dios hawehi!
xhi ebꞌyaꞌ tet Komam.
Yet yaqꞌni kawxo Komam Jesús anma yaꞌay bꞌey konhobꞌ Genesaret
34 Hayet isqꞌaxponikꞌto Komam Jesús yibꞌanh haꞌ lago tuꞌ yebꞌ ebꞌyaꞌ iskuywom,
yapni Komam yul ismajul txꞌotxꞌ Genesaret.
35 Haxa yet yohtanhenilo anma Komam xin,
ispujbꞌalaxikꞌo isqꞌumal Komam sunil yul ismajul txꞌotxꞌ Genesaret tuꞌ.
Kaw xin hantanhe anma yaꞌay ilaxto tet Komam.
36 Isqꞌanni anma tet Komam ta waxanhka hanhechꞌan istiꞌ xil isqꞌap Komam chistzabꞌ anma yaꞌay,
yuxin sunil anma yaꞌay tzabꞌni istiꞌ xil isqꞌap Komam tuꞌ kawxikanokanh.
Jesús camina sobre el agua (Mateo 14.22-36)