3 Isto Komam Jesús iswiꞌ huneꞌ wonhan yebꞌ ebꞌyaꞌ iskuywom,

yay tzꞌonhno Komam yebꞌ ebꞌyaꞌ bꞌey tuꞌ.

4 Toxa xin chiꞌichiko qꞌinh Pascua,

isqꞌinh ebꞌnaj Israel.

5 Yet yilni Komam xin ta kaw hantanhe anma apni iskꞌatanh,

yalni Komam tet yaꞌ Felipe:

—¿Bꞌaytuꞌwal chikoloqꞌ tzet chislo sunil anma tiꞌ?

xhi Komam tet yaꞌ.

6 Yal Komam huneꞌ tuꞌ yunhe yabꞌen Komam tzet chiyute yalni yaꞌ Felipe.

Wal Komam xin,

kaw yohtaxa tzet chiyu yaqꞌni waꞌo sunil anma tuꞌ.

7 Istaqꞌwi yaꞌ:

—Waxanhka ay kabꞌo ciento denario komelyu chiloqꞌni tzet chilolaxi,

kaw maxhtikꞌam chabꞌe yiqꞌni anma hunta txꞌinano yet,

xhi yaꞌ tet Komam.

8 Ay xin huneꞌ yaꞌ chikuywi yinta Komam tuꞌ,

yuxhta isbꞌa yebꞌ yaꞌ Simón Pedro,

Andrés isbꞌi.

Haꞌ yaꞌ halni:

9 —Ay huneꞌ naj nichꞌan koxol tiꞌ,

ay kakꞌonh noꞌ kay iqꞌbꞌil yu naj yebꞌ xin howebꞌ ixim pan cebada,

yajaꞌ ¿tzet chaqꞌ hanikꞌ tiꞌ yinh sunil anma?

xhi yaꞌ tet Komam.

10 Yalni Komam tet ebꞌyaꞌ iskuywom tuꞌ:

—Halwe tet sunil anma ayojabꞌ tzꞌonhnoj,

xhi Komam.

Kaw xin cheqꞌanhla sat txꞌotxꞌ bꞌey tuꞌ,

yuxin haknhe tuꞌ yu yay tzꞌonhno anma sunil.

Aymi howebꞌo mil isbꞌisil ebꞌnaj winaj.

11 Yinikanh Komam ixim pan tuꞌ.

Yet lahwi yaqꞌni Komam yuchꞌandiosal yinh ixim tet Komam Dios,

yitxqꞌanto Komam ixim yinh anma tzꞌonhan tuꞌ.

Haktikꞌapax tuꞌ yute Komam yinh noꞌ kay,

yaqꞌ Komam hantatikꞌa kaw choche anma.

12 Hayet lahwi isnohkano iskꞌul anma tuꞌ xin,

yalni Komam tet ebꞌyaꞌ chikuywi yintaj:

—Kutxbꞌaweyo sunil ixim matxa malahwi yu anma tiꞌ,

haxinwal machi ixim chiꞌetaxtoj,

xhi Komam.

13 Hak tuꞌ xin yu iskutxbꞌaniko ebꞌyaꞌ ixim,

kaw xin 12 (kabꞌlahonhebꞌto) motx ixim matxa lahwi yu anma tuꞌ yinh ixim howebꞌ pan cebada.

14 Yet yilni anma huneꞌ kꞌaybꞌalkꞌule iswatxꞌe Komam Jesús tuꞌ,

yalni anma hakaꞌ tiꞌ:

«Yinh kaw yeli,

haꞌ huneꞌ yaꞌ tiꞌ ischejabꞌ Komam Dios halbꞌilkanoj tato chihul koxol bꞌey yul sat yibꞌanhqꞌinal tiꞌ,»

xhi anma.

15 Isnahnilo Komam Jesús tato chꞌekꞌ yinh isnabꞌal anma yinito Komam kat yaniko anma Komam yahawiloj,

yuxinto el Komam xol anma,

isto Komam iswiꞌ wonhan ischukil.

16 Yet yay numnahi yapni ebꞌyaꞌ iskuywom Komam Jesús istiꞌ haꞌ lago.

17 Lahwi tuꞌ xin yokto ebꞌyaꞌ yul huneꞌ teꞌ barco yunhe yekꞌapno ebꞌyaꞌ isqꞌaxepxakꞌto haꞌ lago kat yapni ebꞌyaꞌ yul konhobꞌ Capernaúm.

Kaw xaꞌay numnahi,

maxhtotikꞌa xin chiꞌapni Komam iskꞌatanh ebꞌyaꞌ.

18 Yet ayko ebꞌyaꞌ yibꞌanh haꞌ tuꞌ,

istzabꞌniko yekꞌ huneꞌ niman jaqꞌeqꞌ.

Kaw nahat chiꞌah haꞌ isbꞌilen jaqꞌeqꞌ.

19 Ayxam xin yiktajo iskabꞌ legua chito isbarco ebꞌyaꞌ yibꞌanh haꞌ lago tuꞌ,

yilni ebꞌyaꞌ Komam Jesús bꞌelwo chu yibꞌanh haꞌ.

Lanhan xin ishitziko Komam iskꞌatanh teꞌ barco bꞌay ayikto ebꞌyaꞌ tuꞌ,

isxiwkanh ebꞌnaj.

20 Yalni Komam tet ebꞌyaꞌ:

—Haninan,

mach chexxiwi,

xhi Komam.

21 Yuxinto kaw tzalakanh ebꞌyaꞌ ischahnikto ebꞌyaꞌ Komam yul barco tuꞌ iskꞌatanh.

Hunepixto xin,

yapni ebꞌyaꞌ isqꞌaxebꞌikꞌto haꞌ bꞌay nabꞌilto yu yapni.

22 Haxa yinh hunxa tzꞌayik xin,

yet aytokꞌo anma sunil istiꞌ haꞌ lago tuꞌ,

isnahniti anma tato xato ebꞌyaꞌ iskuywom Komam yul huneꞌ teꞌ barco ayayo bꞌey tuꞌ,

hanhe xin teꞌ ayayoj.

Isnahnipaxti anma ta machi to Komam yinta ebꞌyaꞌ.

23 Ay xin hunteqꞌan teꞌ barco ispeto yul konhobꞌ Tiberias apni iskawilal bꞌay iswah anma ixim pan yet yaqꞌni Komam yuchꞌandiosal yinh ixim tet Komam Dios.

24 Yet yilni anma tato matxa Komam Jesús bꞌey tuꞌ yebꞌ ebꞌyaꞌ chikuywi yintaj,

yokto anma yul hunteqꞌan teꞌ barco apni bꞌey tuꞌ,

isto anma saywal yinh Komam qꞌaxepxakꞌto haꞌ bꞌey yul konhobꞌ Capernaúm.

25 Yet yekꞌapno anma isqꞌaxebꞌikꞌto haꞌ lago tuꞌ yilcha Komam yu anma.

Isqꞌambꞌen anma tuꞌ tet Komam:

—Mam kuywawom,

¿hanikꞌ hawul bꞌey tiꞌ?

xhi anma.

26 Istaqꞌwi Komam tet anma:

—Yinh kaw isyelal chiwalan teyet,

wal hex hex tiꞌ,

chinhesayilojan yuto kaw noh hekꞌul yu ixim pan waqꞌan hewabꞌ.

Maxhtaj yu matxumchalo heyu yinh tzet chal yelapno ye huneꞌ kꞌaybꞌalkꞌule inwatxꞌe tuꞌan,

xhi Komam.

27 Yalnipaxo Komam:

—Maxhnhetaj tzet cheloh cheyako yinh hekꞌul hesayniloj yuto huneꞌ tuꞌ chilahwi.

Wal xin ay huneꞌxa hakaꞌ tzet chikolo mach chitanhiloj,

haꞌ huneꞌ tuꞌ chiꞌaqꞌni heqꞌinal mach istanhbꞌal.

Haꞌ huneꞌ tuꞌ wal heyaniko yinh heyanma hesayniloj.

Hanin Aqꞌbꞌilintijan texol yu Inmaman,

haninan chiwaqꞌan huneꞌ itah,

haꞌ ton qꞌinale mach istanhbꞌal,

yuto xaꞌisyelo Komam Dios tato haninan sikꞌbꞌil hintijan yu,

xhi Komam Jesús tet anma.

28 Isqꞌambꞌen anma tet Komam:

—¿Tzet xin wal juten kobꞌahanh yunhe kowatxꞌenanh sunil tzet choche iskꞌul Komam Dios?

xhi anma.

29 Istaqꞌwi Komam:

—Haꞌ huneꞌ chiyoche Komam Dios to cheyayto yul heyanma winhan,

yuto haꞌ Komam chejnheintijan,

xhi Komam.

30 Yalnipaxo anma tet Komam:

—¿Tzet xin hunu kꞌaybꞌalkꞌulehal chaye jilaꞌanh,

yunhe kaxhkochahnihanh yul janmahanh?

¿Tzet hunu chawatxꞌe?

31 Ebꞌnaj jichmamanh yet payat,

ay huneꞌ kꞌaybꞌalkꞌule ilbꞌil yu ebꞌnaj yet islohni ebꞌnaj maná bꞌey txꞌotxꞌ desierto.

Hakaꞌ yalni Istzotiꞌ Komam Dios bꞌay chal hakaꞌ tiꞌ:

“Yati Komam Dios huneꞌ itah satkanh islobꞌ sunil anma,”

xhihayoj,

xhi anma tet Komam.

32 Yalni Komam tet anma:

—Yinh kaw isyelal chiwalan teyet,

maxhtaj yaꞌ Moisés aqꞌnhe huneꞌ itah satkanhil tuꞌ tet ebꞌnaj jichmam yet payat tiempohal tuꞌ.

Wal xin itah tit yul satkanh tuꞌ yechel yinh huneꞌ wah kaw yeli chaqꞌ Inmaman teyet.

33 Huneꞌ wah chaqꞌ Komam tiꞌ,

yul satkanh titnaj,

haꞌ xin chiꞌaqꞌni qꞌinale mach istanhbꞌal tet anma,

xhi Komam.

34 Yalni anma tet Komam:

—Mamin,

aqꞌ huneꞌ wah tuꞌ jetanh yinh sunilbꞌal tiempo,

xhi anma.

35 Yalni Komam tet anma:

—Hanintonan huneꞌ wah tuꞌ,

yuto chiwaqꞌan qꞌinale mach istanhbꞌal.

Maknhetikꞌa chako isbꞌa yul inqꞌabꞌan,

matxa bꞌaqꞌinhal chinhohchahi,

yebꞌ xin maknhetikꞌa chiꞌanayto yul yanma winhan,

matxa bꞌaqꞌinhal chitajpaxo istiꞌ.

36 Kaw xatikꞌa walan teyet,

waxanhka kaw cheyiliko winhan,

yajaꞌ kaw mach cheyako hebꞌa yul inqꞌabꞌan.

37 Wal xin,

sunil mak chati Inmaman wetan,

chul yul inqꞌabꞌan,

yuxin mak chihul yul inqꞌabꞌ tuꞌan kaw chinchahan,

mach chinmanhkꞌotojan.

38 Wal hanintiꞌan,

kintitan yul satkanh,

yaj maxhtaj yu inwatxꞌenan tzet chal inkꞌulan,

wal xin titnaj hinan yunhe inwatxꞌenan tzet chal iskꞌul Inmaman chejnheintijan.

39 Haꞌ tzet choche iskꞌul Komam chejnheintijan yinh sunil makta chiyako yul inqꞌabꞌan,

ta machi hunu mak chikꞌayto wuhan,

to chiwaqꞌ itzitzbꞌokanhan yet chiꞌapni islahobꞌal tzꞌayik.

40 Haꞌ choche iskꞌul Inmaman,

to haꞌ mak chinilnihan hanin Iskꞌahol Dios hintiꞌan,

kat yanayto yul yanma winhan,

chischah isqꞌinal mach istanhbꞌal.

Haxa yet chiꞌapni islahobꞌal tzꞌayik,

kat waqꞌni itzitzbꞌokanhan xol kamom,

xhi Komam.

41 Yet yabꞌen ebꞌnaj yahawil yinh ebꞌnaj Israel yinh tzet yal Komam tuꞌ,

yok ebꞌnaj bꞌuchwal yinh Komam yuto yal Komam hakaꞌ tiꞌ:

«Hanintiꞌan huneꞌ wah titna yul satkanh,»

xhi Komam.

42 Yalni ebꞌnaj hakaꞌ tiꞌ:

—¿Tom maxhtaj naj tiꞌ naj Jesús,

iskꞌahol naj José?

Kaw johta mak ismam naj yebꞌ ismiꞌ naj.

¿Tzet yinh yuxinto chal naj tato yul satkanh titna naj?

xhi ebꞌnaj yinh Komam.

43 Yalni Komam tet ebꞌnaj:

—Bꞌejwe hetzotel winhan.

44 Kaw machi hunu mak chihul yul inqꞌabꞌan tato maxhtaj Inmaman chichejniti wetan,

Komam anheintijan.

Haninan xin chiwaqꞌ itzitzbꞌokanhan yet islahobꞌal tzꞌayik.

45 Tzꞌibꞌnhebꞌilkano yu ebꞌyaꞌ ischejabꞌ Komam Dios yet payat hakaꞌ tiꞌ:

“Sunil mak chikuylax yu Komam Dios,”

xhihayoj.

Yuxin sunil mak chiꞌabꞌen tzet chal Komam Dios tuꞌ,

chitxumchalo yu yinh tzet chala,

haꞌ xin chihul yul inqꞌabꞌan.

46 »Kaw maxhto hunu mak ilnhe yinh Komam Dios Mame hach kachannhe hinan,

yuto yul satkanh titnaj hinan,

yuxinto kaw wohtajan Komam.

47 Yinh kaw isyelal chiwalan teyet,

maknhetikꞌa chinchahnihan yul yanma,

kaw chischah huneꞌ isqꞌinal mach istanhbꞌal.

48 Hanintiꞌan haꞌ ton huneꞌ wah chiꞌaqꞌni qꞌinale mach istanhbꞌal.

49 Haꞌ ebꞌnaj heyichmam yet payat tuꞌ,

iswah ebꞌnaj hunteqꞌan maná bꞌey txꞌotxꞌ desierto,

yaj xin sunil ebꞌnaj xalekamtoj.

50 Yajaꞌ mak chiwahni huneꞌ wah titna yul satkanh,

chiwaltiꞌan xin,

machi bꞌaqꞌinhal chikami.

51 Hanintonan huneꞌ wah itzitz titna yul satkanh,

yuxin maknhetikꞌa chiwahni huneꞌ wah tiꞌ,

kaw itzitznhetikꞌa yinh sunilbꞌal tiempo.

Haꞌ huneꞌ wah chiwaqꞌtiꞌan,

haꞌ ton innimanilan chiwaqꞌan yunhe ischahni anma isqꞌinal,

xhi Komam Jesús tet anma.

52 Hayet yabꞌen anma Israel hunteqꞌan tiꞌ,

istzabꞌniko isteyelen isbꞌa yinh tzet yal Komam.

Leyalni anma hakaꞌ tiꞌ:

—¿Tzet chu yaqꞌni yaꞌ tiꞌ isnimanil kokꞌuxuꞌ?

xhi anma tet hunun.

53 Yalni Komam xin:

—Yinh kaw isyelal chiwalan teyet,

tato mach chekꞌux innimaniltiꞌan,

Hanin Aqꞌbꞌilintijan texol yu Komam Dios,

yebꞌ xin ta mach cheyukꞌ inchikꞌilan,

mach chechah heqꞌinal mach istanhbꞌal.

54 Yuxin maknhetikꞌa chikꞌuxni innimaniltiꞌan,

kat yukꞌni inchikꞌiltiꞌan,

kaw chischah isqꞌinal mach istanhbꞌal.

Hayet islahobꞌal tzꞌayik xin chiwaqꞌ itzitzbꞌokanhan xol anma kamom.

55 Yuto innimaniltiꞌan lahan hakaꞌ wah,

haꞌ chiꞌaqꞌni qꞌinale mach istanhbꞌal,

hakpax tuꞌ xin inchikꞌilan hakaꞌ tzet chiꞌukꞌlaxi.

56 Maknhetikꞌa chikꞌuxni innimanilan kat xin yukꞌni inchikꞌilan,

kaw hunxanhe chiwukanojan yebꞌi.

57 Komam Dios kaw itzitz yinh sunilbꞌal tiempo,

haꞌ Komam tuꞌ kinchejnitijan,

yuxin itzitz innhetikꞌapaxojan.

Hakton tuꞌ xin,

mak chikꞌuxni innimaniltiꞌan,

kaw itzitznhetikꞌapaxo wuhan.

58 Hanintonan,

huneꞌ wah titna yul satkanh,

yaj mach hakaꞌo maná isloh ebꞌnaj jichmam,

yuto waxanhka isloh ebꞌnaj hunteqꞌan maná tuꞌ,

yaj kam ebꞌnaj.

Wal mak chiwahni huneꞌ wah chiwaltiꞌan xin,

kaw ay isqꞌinal mach istanhbꞌal,

xhi Komam.

59 Sunil hunteqꞌan tiꞌ yaqꞌ Komam Jesús iskuyuꞌ anma yul iscapilla ebꞌnaj Israel bꞌey yul konhobꞌ Capernaúm.

60 Yet yabꞌen anma chikuywi yinta Komam Jesús hunteqꞌan kuybꞌanile yaqꞌ Komam tuꞌ,

txꞌiꞌal mak halni tet hunun:

—Kaw yaꞌta kochahni hunteqꞌan chal yaꞌ tiꞌ.

¿Maktaxka chiqꞌoji isyijeni?

xhi.

61 Wal Komam xin,

kaw yohtaxa tzettaj chal anma tuꞌ,

yuxin yal Komam hakaꞌ tiꞌ:

—¿Tom kaw chikabꞌkonkanh hekꞌul yinh tzet chiwaltiꞌan?

62 Wal Hanin Aqꞌbꞌilintijan texol yu Komam Dios tiꞌ,

tato cheyil inmeltzohan yul satkanh bꞌay titnaj hinan,

¿tzixam chilaheyalaꞌ?

63 Haꞌ Yespíritu Komam Dios haꞌ chiꞌaqꞌni qꞌinale mach istanhbꞌal,

wal konimanil matzet chaqꞌa.

Hunteqꞌan kuybꞌanile xawalan teyet tuꞌ,

yinh kaw yeli yet Espíritu yehi,

haꞌ chiꞌaqꞌni qꞌinale mach istanhbꞌal.

64 Yajaꞌ ayexto hex tiꞌ,

maxhto cheyayto yul heyanma yinh tzet chiwaltiꞌan,

xhi Komam.

Yal Komam hakaꞌ tuꞌ yuto kaw yohtaxa Komam yet yalanhto makta mach chiꞌanayto yul yanma yinh tzet chal Komam.

Kaw xin yohtaxapaxo Komam mak chiꞌaniko yul isqꞌabꞌ ebꞌnaj ayko ishowal yinh.

65 Yuxinto yalpaxo Komam hakaꞌ tiꞌ:

—Kaw chiwalan teyet tato kaw machi hunu mak chako isbꞌa yul inqꞌabꞌan tato maxhtaj Inmaman chichejniti wetan,

xhi Komam.

66 Yet yabꞌen anma tzet yal Komam tuꞌ xin,

txꞌiꞌal anma bꞌejnikano yekꞌ yinta Komam.

67 Yuxinto isqꞌambꞌe Komam tet ebꞌyaꞌ 12 (kabꞌlahonhwanh) iskuywom:

—Haxa hex tiꞌ,

¿chimheyoche chextopaxoj?

xhi Komam tet ebꞌyaꞌ.

68 Istaqꞌwi yaꞌ Simón Pedro,

tet Komam:

—Mamin,

makkꞌanabꞌ yinta chonhok tzujnojanh,

yuto hanhkꞌanhe hatzotiꞌ chiꞌaqꞌni qꞌinale mach istanhbꞌal.

69 Wal hanhonhtiꞌanh,

kaw xajaytojanh yul janmahanh tawinh.

Kaw xin johtajanh tato hach tiꞌ Cristo hach,

Iskꞌahol Komam Dios kaw itzitz,

xhi yaꞌ Pedro tet Komam.

70 Yalni Komam tet yaꞌ:

—Wal xin kexinsayilojan hekabꞌlahonhwanhil,

yaj ay huneꞌ hex tiꞌ ayayto naj matzwalil yul yanma,

xhi Komam tet ebꞌyaꞌ.

71 Yet yalni Komam hakaꞌ tuꞌ,

yinh naj Judas Iscariote,

iskꞌahol naj Simón yal Komam.

Yuto waxanhka ayko naj istzꞌajo ebꞌyaꞌ 12 (kabꞌlahonhwanh),

yaj xin haꞌ naj aniko Komam yul isqꞌabꞌ kamikal.