3 Kaw xin txꞌiꞌal anma yaꞌay hilanejayo yul hunteqꞌan nha tuꞌ.

Ay mak mach chu yilni,

ay xin mak mach chu yekꞌi,

aypaxo mak mach chibꞌili isnimanil.

Hunteqꞌan anma yaꞌay tuꞌ ayko yechman isbꞌilikanh haꞌ,

4 yuto kaw yinhnhe istiempohal chihulayti huneꞌ naj ángel isbꞌile haꞌ,

maknhetikꞌa bꞌabꞌel chiꞌayto yet chibꞌilikanh haꞌ xin,

haꞌ chiꞌanhchahi,

kat yel tzettaj yabꞌilal ayko yinh.

5 Xol anma yaꞌay tuꞌ ayayo huneꞌ naj 38 (waxajlahonhebꞌxa) habꞌilxa yok yabꞌil yinh.

6 Hayet yilni Komam Jesús ta hilanayo naj bꞌey tuꞌ,

istxumnilo Komam tato kaw payxa ichiti naj,

yalni Komam tet naj:

—¿Chimhawoche chaxhanhchahi?

xhi Komam.

7 Yalni naj tet Komam hakaꞌ tiꞌ:

—Mamin,

kaw machi hunu mak chinanaytojan xol haꞌ tiꞌ yet chibꞌilikanh haꞌ.

Hayet chinaytojan xol haꞌ walnihan,

nan mak chibꞌabꞌayto insatajan,

xhi naj tet Komam.

8 Yalni Komam tet naj xin:

—Ahanhwanoj,

ikanh hawaybꞌal tiꞌ,

kat hatohi,

xhi Komam tet naj.

9 Yinhnhena tuꞌ iskawxikanh naj,

yok naj yinokanh iswaybꞌal,

isto naj xin.

Hayet yanhchakano naj tuꞌ,

kꞌuxan istzꞌayikal xewilal,

10 yuxinto yal ebꞌnaj yahawil yinh konhobꞌ Israel tet naj hakaꞌ tiꞌ:

—Wal tinanh,

kaw istzꞌayikal xewilal,

kaw mach chu hawijnikꞌo hawaybꞌal tiꞌ,

xhi ebꞌnaj tet naj.

11 Istaqꞌwikanh naj kawxikanh tuꞌ:

—Haꞌ mak makinaqꞌni kawxojan,

haꞌ mahalni wetan hakaꞌ tiꞌ:

“Ikanh hawaybꞌal,

kat xin hatohi,”

xhi wetan,

xhi naj tet ebꞌnaj yahawil tuꞌ.

12 Isqꞌambꞌen ebꞌnaj tet naj:

—¿Mak xin najil mahalni tawet,

ta chawikanh hawaybꞌal kat xin hatohi?

xhi ebꞌnaj.

13 Wal xin kaw mach yohtajo naj mak aqꞌni kawxo tuꞌ,

yuto kaw hantanhe anma bꞌey tuꞌ,

kaw xin pet kꞌaykanh Komam Jesús xol anma.

14 Lahwi tuꞌ xin,

ischahnayo Komam Jesús naj yul Yatut Komam Dios,

yalni Komam tet naj:

—Wal tinanh,

kaw makaxhkawxiloj.

Matxa chawako yaqꞌbꞌil hamul haxinwal matxa hunuxa isyaꞌtajil kaw txꞌoj chul tawibꞌanh,

xhi Komam tet naj.

15 Lahwi tuꞌ xin,

isto naj yalno tet ebꞌnaj yahawil yeko yinh konhobꞌ Israel tato haꞌ Komam Jesús aqꞌni kawxo naj.

16 Hak tuꞌ xin,

yu yokkano ishowal ebꞌnaj yinh Komam isyayil yaqꞌ kawxo Komam huneꞌ naj yinh istzꞌayikal xewilal.

17 Yalni Komam Jesús xin:

—Inmaman,

maxhtikꞌa chisbꞌej ismunlahi,

yuxin hakintuꞌan,

maxhtikꞌa chinbꞌejkanojan inmunlahan,

xhi Komam.

18 Hak tuꞌ xin,

kaw yakaniko ebꞌnaj yahawil konhobꞌ Israel tuꞌ yinh iskꞌul yaqꞌnikamo Komam Jesús,

yuto mach isyije Komam huneꞌ tzꞌayik xewilal.

19 Yalni Komam Jesús tet ebꞌnaj:

—Yinh kaw isyelal chiwalkanojan teyet,

kaw Iskꞌahol Dios wehan,

yuxin haꞌ hunteqꞌan chinwatxꞌetiꞌan kaw mach wetojan inchukilan.

Haꞌ tzet chaqꞌ Inmaman inwatxꞌehan,

haꞌ chiwuhan,

yuxinto sunil tzet chiswatxꞌe Inmamtuꞌan,

kaw chiyupaxo wuhan.

20 Wal hanintiꞌan,

Iskꞌahol Dios wehan,

kaw xin xahan ayinan yu Inmamtuꞌan.

Sunil tzet chinwatxꞌehan,

Inmamtuꞌan chiyeni wetan.

Ayto xin hunteqꞌan tzet kaw ay yelapno chisye Inmamtuꞌan wetan kat inwatxꞌenan,

hak tuꞌ xin chikꞌay hekꞌul heyilni.

21 Wal Inmamtuꞌan chiyu yaqꞌni itzitzbꞌokanh kamom,

kat xin yaqꞌnipaxo isqꞌinal.

Hakinpax tuꞌan chiwaqꞌan qꞌinale tet mak bꞌay choche inkꞌulan chiwaqꞌan.

22 Machi hunu anma chiyil Inmaman yinh tzet chiꞌelikoj,

wal xin to haninan aqꞌbꞌil wipan yu Inmaman yu wilnihan yinh tzet chiꞌeliko anma.

23 Kaw yul inqꞌabꞌan ayko hunteqꞌan tiꞌ yu Inmaman yunhe lahannhe chꞌok inmayan yebꞌ Inmaman.

Yaj tato ay anma machi welapnojan yul sat,

kaw machipaxo yelapno Inmaman yul sat chal tuꞌ,

yuto Inmamtuꞌan chejnheintijan.

24 »Yinh kaw isyelal chiwalan teyet,

maknhetikꞌa chꞌabꞌen tzet chiwaltiꞌan,

kat yanayto yul yanma yinh Inmaman chejnheintijan,

chischah isqꞌinal mach istanhbꞌal.

Hak tuꞌ xin mach chikawxiko ismul yibꞌanh,

kaw wiyom yel yul isqꞌabꞌ naj kamikal,

kat ischahnikano isqꞌinal yinh hunelnhe.

25 Wal hanin Iskꞌahol Komam Dios wetiꞌan,

kaw chiwalkanojan teyet tato chihul istiempohal,

haꞌ ton tinanh yet chabꞌen anma kamom wawihan;

haꞌ mak chiꞌabꞌen tzet chiwaltiꞌan xin chischah isqꞌinal mach istanhbꞌal.

26 Wal Inmaman,

haꞌtikꞌa iqꞌnhe isqꞌinal,

hakinpax tuꞌan winhan ayko inqꞌinalan yu Inmaman.

Hakaꞌ chu yaqꞌni Inmaman isqꞌinal anma,

hak tuꞌ chu waqꞌnipaxojan.

27 Chaqꞌnipaxo Inmaman wipan yul inqꞌabꞌan wilnihan yinh tzet chiꞌeliko anma,

ta kꞌul maka txꞌoj tzet chiswatxꞌe.

Ay huneꞌ wiptiꞌan yuto Haninan Aqꞌbꞌilintijan texol yu Inmaman.

28 Kaw mach cheyaqꞌ kꞌayo hekꞌul yinh hunteqꞌan tzet chiwalkanojan teyet tiꞌ.

Wal xin kaw chiꞌapni istiempohal yet chabꞌen sunil anma kamnaxa yul innuqꞌan,

kat xin yitzitzbꞌikanh.

29 Maknhetikꞌa kꞌul tzet iswatxꞌe yul sat yibꞌanhqꞌinal tiꞌ,

chiꞌitzitzbꞌikanh kat ischahni huneꞌ isqꞌinal mach istanhbꞌal,

walpaxo anma kaw istxꞌojalnhetikꞌa hulikꞌo iswatxꞌe yul sat yibꞌanhqꞌinal tiꞌ,

chiꞌitzitzbꞌikanh kat xin ischahni isyaꞌtajil,^a

xhikano Komam Jesús.

30 Yalnipaxo Komam Jesús tet ebꞌnaj yahawil yeko yinh konhobꞌ Israel:

—Wal hanintiꞌan,

kaw machi hunu tiꞌ chinwatxꞌehan yul wetan inchukilan.

Hakaꞌ halbꞌil wetan yu Inmaman hak tuꞌ chu wilnihan yinh tzet chiꞌeliko anma,

yajaꞌ chiwilan yinh tzet chiꞌeliko yinh kaw istoholal.

Yuxin haꞌ tzet chal iskꞌul Inmaman anheintijan,

haꞌ chinwatxꞌehan,

maxhtaj tzet chiwochehan.

31 »Tato hankawinan chinokan tzotelo yinh sunil tzet chinwatxꞌehan,

kaw matzet chalilo chal tuꞌ.

32 Yajaꞌ ay huneꞌ mak kaw chaqꞌ isbꞌa istzotel winhan,

kaw xin wohtajan ta sunil tzet chala kaw yeli.

33 »Yet hechejnito hechejabꞌ tet yaꞌ Juan heqꞌambꞌeno tzet kaw yelapno ye yaꞌ,

kaw isyelal yal yaꞌ teyet.

34 Yaj maxhtaj yu wiqꞌni wipan yinh tzet chal anma yuxin chiwalan huneꞌ tiꞌ teyet,

machoj,

wal xin to yu hekolchahi.

35 Yaꞌ Juan tuꞌ,

kaw lahan yaꞌ hakaꞌ hunu cantil ayko qꞌaꞌ yinh,

nahat chimujli isqꞌaqꞌal.

Kaw hak tuꞌ yu yulikꞌo yaꞌ,

yuxintikꞌa kextzalakanh yu yaꞌ hanikꞌ tiempohal.

36 »Yajaꞌ ay huneꞌ tzet kaw ekꞌbꞌal yelapno ye sata tzet yal yaꞌ Juan tuꞌ winhan,

sunil ej kꞌaybꞌalkꞌule yaqꞌ Inmaman inwatxꞌehan,

haꞌ chitzotel winhan.

Haꞌ xin chiyeniloj tato haꞌ Inmaman kinanitijan.

37 Haꞌ Inmaman anheintijan haꞌ chitzotel winhan,

wal hex hex tiꞌ kaw maxhto bꞌay cheyabꞌe istzoteli,

kaw maxhto chetxumilo mak kaw Inmaman.

38 Kaw maxhto Istzotiꞌ Inmamtuꞌan yul heyanma,

yuto mach cheyayto yul heyanma winhan,

wal xin haꞌ Komam Dios anheintijan.

39-40 »Hex tiꞌ kaw cheyil hekuyni Istzotiꞌ Komam Dios,

yuto chꞌekꞌ yinh henabꞌal ta yinh tuꞌ chiꞌilchalo heqꞌinal mach istanhbꞌal.

Yajaꞌ waxanhka Istzotiꞌ Komam Dios tuꞌ chitzotel winhan,

yajaꞌ mach chisje hekꞌul chexoktzujno wintajan yunhe hechahni heqꞌinal mach istanhbꞌal chiwaqꞌtiꞌan.

41 »Maxhtaj yu yalaxiko inmayan yu anma yuxin chiwalan hunteqꞌan tzotiꞌ tiꞌ.

42 Wal hakaꞌ kexwilnitiꞌan,

kaw mach cheyoche Komam Dios.

43 Hanintiꞌan kaw chejbꞌilintijan yu Inmaman,

yaj kaw mach cheyabꞌe tzet chiwalan.

Wal tato hunuxa naj komon anma chihul yebꞌ yet,

wal tuꞌ kaw saqꞌal heyijen sunil tzet chal naj.

44 ¿Tzettikꞌa chu heyanayto yul heyanma tato hemay cheyako hunun hex,

wal helanil chitit tet Komam Dios,

kaw mach chikam hekꞌul hesayniloj?

45 »Tajka cheyala tato hanintiꞌan chinokan aqꞌokꞌule yinh hemul tet Inmaman,

wal xin to haꞌ kaw yaꞌ Moisés chiꞌok aqꞌokꞌule teyinh,

yaꞌ bꞌay chikawxi hekꞌul.

46 Wal xin tato cheyayto yul heyanma yinh tzet tzꞌibꞌnhebꞌilkano yu yaꞌ Moisés,

chimheyapaxayto yul heyanma winhan,

yuto winhan chitzotel hunteqꞌan tzet tzꞌibꞌnhebꞌilkano yu yaꞌ.

47 Yajaꞌ tato mach cheyayto yul heyanma yinh tzet tzꞌibꞌnhebꞌilkano winhan yu yaꞌ tuꞌ,

tzikꞌanabꞌ chiyu heyanayto yul heyanma yinh sunil tzet chiwaltiꞌan,

xhi Komam tet ebꞌnaj.